Matthew 22:1-14

Lesson 198 - Senior

Memory Verse
“Mbufo eka ndien ke ñwaña usuñ ekekot kpukpru mmọ eke edikutde edidi udia-ndọ” (Matthew 22:9).
Cross References

I Usọrọ-ndọ Ye Mmọ Emi Mikamaha Ndika

1. Edidem kiet akanam ndọ ọnọ eyen esie, Matthew 22:1, 2; Luke 14: 16; Eriyarare 19:7-9

2. Mmọ emi nditọ-ufọk ekekotde ete edi ndọ imaha ndidi, Matthew 22:3; Mark 6:12; Luke 14:17-20

3. Ema edọñ mme isuñ-utom efen, Matthew 22:4-6; Mme Ñke 9:2-6; Isaiah 25:6; Utom Mme Apostle 5:40; 1 Ñwed Timothy 6:10; Mme Hebrew 2:3

4. Iyaresit anam edidem osobo mme owot-owo oro, Matthew 22:7; Luke 14:24; 19:27; Daniel 9:26

II Usọrọ-Ndọ Ye Mmọ Emi Ekenyimede Ndika

1. Edidem okot kpukpru mmọ emi ekekemede ndikut, Matthew 22:8, 9; Luke 14:21; Utom Mme Apostle 13:46

2. Ke akpatre, usọrọ ndọ ọyọhọ ye esen owo, Matthew 22:10; Luke 14:22, 23

III Esen-Owo Emi Mikodotke

1. Ema ekut esen-owo emi mikesineke ọfọñidem-ndọ, Matthew 22:11, 12; Eriyarare 3:4; 16:15; Zephaniah 1:7, 8

2. Ema ebọp enye eduọk ke ekim ke esien, Matthew 22:13; 8:12

3. “Koro mmọ eke ekotde ewak, edi mmọ eke emekde iwakke”, Matthew 22:14; 20:16.

Notes
SE EKPEPDE EBAÑA

Ekenọ ñke usọrọ-ndọ man eda ekpep mme akpanikọ emi abañade obio ubọñ Heaven ke ndida mmọ emi ekekotde usọrọ-ndọ nte uwut-ñkpọ nyuñ ñwut ọfọñidem ndọ nte akpan ñkpọ, emi edide mbeñe-idem ọnọ kpukpru mmọ emi eyomde ndika usọrọ-ndọ.

Usọrọ-Ndọ

Ke ñke emi Abasi etiñ abaña usọrọ Eti-mbuk emi ekotde kpukpru owo. Mme Jew ema emehe ke mme ufañ ñwed ke Akani Ediomi emi okowutde ntọtuñọ ebuana emi okodude ke ufọt Abasi ye ndimek ikọt Esie, koro ema ekpep mmọ ntre ke ini ke ini. Jesus ọkọdọhọ ete “Obio Ubọñ Heaven ebiet edidem kiet, emi anamde udia-ndọ ọnọ eyen esie”. Nnyin imotim ikut nte ekpepde akpanikọ mi, nte ke Abasi ọdọñ mme isuñ utom Esie ete ekekot mmọ emi ekekotde edi usọrọ. Edi ñke emi anam nnyin ifiọk ite ke mmọ ema esin ndika; nnyin ikeme ndikut emi ke mbuk eset, nte oro ama ọkọwọrọ osu ke ediwak idaha.

Mme Anditiñ-ntiñ-nnim-ikọ ekedu ke otu akpa mme asaña utom emi ekesiode edọñ ndisuan etop Eti-mbuk nnyuñ ñkot mme owo edi ke usọrọ. Isaiah ama ọdọhọ ete; “Ndien ke obot emi ke Jehovah mme udim edinam akamba udia ọnọ kpukpru mme idut, ñkpọ eke enyenede isek, ndia ke wine eke anade ke ntak, ke ñkpọ eke enyenede isek, enyuñ ewakde ndia, wine ke ntak eke etimde eduk” (Isaiah 25:6). Etiñ enọ nnyin: “Koro ke akpanikọ ema ekwọrọ gospel enọ nnyin, kpa nte ekekwọrọde enọ mmọ; edi ikọ eke mmọ ekopde inamke mmọ ufọn, koro mikadianake ye mbuọtidem ke esit mmọ emi ekopde” (Mme Hebrew 4:2).

Kpa ntre ñko ke Abasi ọdọñ mme asaña-utom efen eka ebine mme anam idiọk man ada mmọ ọnọ Idem Esie. Se utọ ikot eke Abasi okotde kpukpru owo! Edieke ekpedide usọrọ-ndọ edidem ererimbot, baba owo kiet ikpesinke ndika, edi mmọ esin ikot enye emi okponde akan, kpa ikot usọrọ Eti-mbuk.

Ikot Emi Esinde

Imokot nte mmọ oro ekekotde edi usọrọ ekedade ikot oro ke mbubru enyuñ esin ndika. Ndusuk ekeyom ndidu ifure uwem ke iñwañ inyuñ iyomke akwa ñkpọ ntibe oro otimere mmọ. Ndusuk eken ema eyak ofuri ini mmọ enọ unyam urua tutu mmọ inyeneke ini ndika. Ñkpọ uwem emi ikayakke ediwak eyere ikot oro; edi edisin emi ndusuk ekesinde ekedi koro mmọ mikamaha ndika, unana edifiọk mme unana inem. Ke ñkañ eken, nnyin imokut nte ndusuk ekedide mbon ibak ekenyuñ emiade mme isuñ-utom emi ekedọñde ekekot mmọ. Kpukpru mmọ emi ekesinde ikot oro ema enọ ntak emi akanamde mmọ etre ndika usọrọ ndọ oro. Kpukpru mmọ ekemek ñkpọ isọñ ekan mme edidiọñ heaven.

Iyaresit Edidem

Ñke emi etiñ ete ke ini edidem okopde ete ke mmọ esin ikot oro ekekotde mmọ, enye ayat esit onyuñ ọnọ mbon ekọñ esie ekewot mmọ, enyuñ efọp mme obio mmọ. Ikebigheke tọñọ nte Jesus okotop ñke emi, ñkpọ emi ama ọwọrọ osu ọnọ mme Jew kpa nte Enye ọkọdọhọde. Titus asaña ye udim ekọñ mbon Rome ke A. D. 70 ediwuri Jerusalem ofuri onyuñ owot ediwak mme Jew. Ema ekot mmọ, edi mmọ ikodotke. Mmọ ekpenam didie edot, adaña nte mmọ ema ekesuene Edidem enyọñ ke usuñ nte mmọ ekebọde ikot Esie? Edidem ndien ọdọñ ikot esie eka ke mme efak ekekot adaña ibat nte ekekeme edi ke usọrọ ndọ. Ikọt esie eka ekenọ kpukpru owo ikot oro kpasuk ntre. Mmọ ikọwutke ubahare ke otu mme enyene nti ido ye ndiọi owo. Usọrọ-ndọ ama ọyọhọ ye mme esen-owo. Abasi oyom nnyin inam kpasuk ntre, koro Enye ọdọhọ ete, “Eka ke ofuri ererimbot ekekwọrọ Eti-mbuk enọ kpukpru owo” (Mark 16:15). “Spirit ye ñwan-ndọ edọhọ ete Di. Owo eke onyuñ okopde, yak enye ọdọhọ ete, Di. Owo eke itọñ asatde, yak enye edi. Owo eke amade, yak edi edibọ mmọñ uwem ke ikpikpu” (Eriyarare 22:17).

Ọfọnidem-Ndọ

Kotu mbio edem usiaha-utin, ekesisine mfia nduọ-nduọ ọfọñ eka mme edinam obio, ndien mmọ emi ekesinede oruk ọfọñ efen ke utọ edinam oro ema edot ufen. Owo emi okokotde esen-owo ama okim mme ọfọñ ama, onyuñ osioño ọnọ adaña esen-owo eke edibeñede etubom usọrọ.

Ke ini edidem edide ndise esen-owo, enye okut owo emi misineke ọfọnidem-ndọ. Emi anam nnyin ifiọk ete ke nduñọre eyedu ọnọ esen-owo kiet kiet. Edidem ọdọhọ ete, “Ufan, afo anam didie oduk mi ke musineke ọfọñidem-ndọ?” Owo oro ikemeke ndisioro uyo koro esit obiomde enye ikpe. Enye inyeneke se etiñde afaña idem ke nsọñ-ibuot esie. Ema enim ọfọnidem edi enye ikebeñeke inyuñ isineke. Ido usọñenyin esie ama ọdọk okosim akwa idaha.

Ekem edidem ọdọhọ ikọt esie ete; “Ebọp enye ubọk ye ukot, enyuñ etop enye eduọk ke ekim ke esien; do ke eritua eyet ye erita edet eyedu” Oro edi se iditibede inọ mmọ emi misineke ọfọñidem-ndọ.

Kere nte eketiede ye owo emi, ke enye ama okokut uñwana usọrọ-ndọ, ama okokop mme inem ikwọ, ama okonyuñ okut otu owo emi ekedarade, edi etop enye eduọk ke ekim ke esien! Enye idinyeneke ufañ ye ifet ndikabare esit. Enye ekpekenyene ndida se ekenọde enye ñyaña idem ke ini ifet okodude. Abasi ọdọhọ ete, “Eyak nnyin idara inyuñ idat esit, inyuñ inọ Enye ubọñ; koro ekem ini ndọ Eyen-erọñ, Ñwan Esie otim idem ebeñe Enye; Enyuñ enọ enye ndisine ediye linen eke asanade onyuñ esemde; koro ediye linen oro edi edinen ido nti ikọt Abasi” (Eriyarade 19:7, 8). Nnyin ikut mi ite ke ata ọfọñidem-ndọ edi edinen ido ikọt Abasi. Edi Abasi ke Idemesie ọnọ ọfọnidem-ndọ, oto ke mkpa Eyen Esie ke cross. Ikpesime didie ndisin ọfọñidem-ndọ eke enọde nnyin! Edi ke mfọn, idighe ke okuk inyụñ idighe ke ekọm-urua. Nnyin imonyuñ ikot ke ñwed Abasi: “Dop uyo ke iso Ọbọñ Jehovah: koro usen Jehovah emekpere: Koro Jehovah omowuk uwa: omotim mmọ emi enye okokotde: Ndien ama ekem ke usen uwa Jehovah, nyeda ufen nnọ nbọñ, ye nditọ edidem, ye kpukpru owo eke esinede esen ñkpọ ke idem” (Zephaniah 1:7, 8).

“Koro mmọ eke ekotde ewak, edi mmọ eke emekde iwakke”. Ikot enyene kpukpru owo. Ikọt esie ekeneyene ndika ke efak ñkokot owo ekededi emi mmọ ekutde, nti ye ndiọi, man edi ke uswọrọ-ndọ. Kpukpru mmọ oro ekeyerede ikot ema ebọ ọfọñidem-ndọ. Edi edisin se Abasi ọnọde nnyin eritua ye edita edet idi ke akpatre. Ñwed Abasi otim oduri nnyin utọñ ke abaña ufen emi ebetde mmọ emi esinde erinyaña eke okponde ntem. Emek fi ke afo eyerede ikot Christ ndika udia-ndọ. Nte afo emeyere ikot oro? “Enam kpukpru ñkpọ ema, di ke usọrọ! Di, ebri okpokoro; Mbon mba, mbon mmem-idem, edi, Ndien eyetim eyuhọ fi”.

Questions
MME MBUME
  1. Ewe usọrọ-ndọ ke ñke emi ada ọnọ?
  2. Mme anie ekedi akpa mbon utom emi ekesiode edọñ?
  3. Anie ọkọnọ ikot oro? Ndi nti ikpọñ ke ekekot?
  4. Mme owo ekeyere ikot oro didie?
  5. Ke ini edidem odukde edi, enye okokut owo kiet didie?
  6. Nso utọ ọfọñidem-ndọ ke edidem ọkọnọ?
  7. Nso idi ntak emi emekde esisit?