Lesson 204 - Senior

Memory Verse

“Owo eke awade uwa ekọm eyekpono mi: ama onyuñ edi owo eke otimde ndinim ido, nyewut enye erinyaña eke Abasi añyañade” (Psalm 50:23).

Cross References

I Ubom Abasi

1. Abasi odu ke kpukpru ebiet ke isọñ, Psalm 50:1

2. Mbet Esie ọwọrọ oto ke Zion, Psalm 50:2

3. Abasi edi ikañ emi atadeta, Psalm 50:3

4. Ekot edinen owo ke eñyọñ ye isọñ ete edi ntiense ebaña Israel, Psalm 50:4-7

II Utọk Abasi Ye Israel

1. Mme uwa ke usen ke usen ikemke, Psalm 50:8-13

2. Ekọm, mme akaña ye akam eke etode akpanikọ edi se Abasi amade, Psalm 50:14, 15

III Ubierikpe Ke Abaña Mme Idiọk-Ido

1. Esua enọ ido mbubik, Psalm 50:16, 17

2. Mbon mbubik ema edue ke ediyip inọ, ke edisin efibe ye ke ikọ edem, Psalm 50:18-20

3. Edimum ubiere ikpe nnim iwutke unyime Abasi, Psalm 50:21, 22

IV Uduak Abasi

1. Itoro ọnọ Abasi ubọñ, Psalm 50:23

2. Nneme ye isañ nnyin enyene ndidi nnen-nnen, Psalm 50:23

Notes

SE EKPEPDE EBAÑA

Ubom Abasi

“ABASI IBOM, kpa Jehovah, ọdọhọ”. Abasi Israel ikebietke mme abasi mme idut oro ekekande mmọ ekuk. Enye edi Abasi ofuri ererimbot, Andinam kpukpru ñkpọ. “Anie odomo mmọñ ke eka-ubọk esie, onyuñ ada eka-ubọk odomo enyọñ, onyuñ akama ntan isọñ ke udomo-ñkpọ, onyuñ odomo udop ikpọ obot ke scales, ye ekpri obot ke balance?” “Emenere enyin mbufo ke enyọñ, enyuñ ese! Anie okobot mme mmọ emi? Anie ada otu mmọ ọwọrọ ke ibat mmọ? Enye osio kpukpru mmọ enyiñ: koro nsọñidem esie okponde, enye onyuñ ọsọñ odudu; baba owo mmọ kiet isopke ... Nte Afo ufiọkke? Nte afo akanam ukopke? Jehovah emi okobotde mme utit ererimbot edi nsinsi Abasi; enye ikpaha mba, inyuñ ikpọtke; idighe nte eduñọre asian esie” (Isaiah 40:12, 26, 28).

Abasi ofuri ererimbot emi edi kpa Enye emi ekemekde Israel onyuñ anam Zion akwa obio esie. “Abasi etie ke zion emi eyede ama, ayama”. Nditọ Israel ema enyene mfọn-iso ekan kpukpru owo ke isọñ ke ndinyene ọkpọsọñ Abasi nte Abasi mmọ. Ubọñ esie ama ayarade ke otu mmọ ke ini Enye ọkọnọde mmọ ibet ke obot Sinai. “Ndien iso ubọñ Jehovah ebiet ikañ asakde ke enyọñ obot ke enyin nditọ Israel” (Exodus 24:17). “Ndien ofuri obot Sinai edi nsuñikañ nsuñikañ; oto koro Jehovah etiede ke ikañ ọsuhọre ke esit: nsuñikañ esie onyuñ ọwọrọ ọdọk nte nsuñikañ furnace, ofuri obot onyuñ enyek eti-eti” (Exodus 19:18).

Ọfọn nnyin ndidiọñọ nte ke nnyin inam ñkpọ inọ ukem Abasi oro mfin. Eyak nnyin itie ikere ibaña Enye inyuñ iñwana ndikut ubom ye odudu Esie. Ndifiọk nte ke Enye emi eketiñde ikọ ndien ererimbot ọwọrọ ada, eyekpañ utọñ ke eseme nnyin onyuñ ọbọrọ ebeñe nnyin, ekpekpri nte ekpekpri, emi eyenọ nsuhọre idem onyuñ ọyọhọ nnyin ye ima Esie. Enye ama ayarade akwa ima Esie ke ndinọ eyen Esie akpa man ekpefak nnyin ke mme idiọk usuñ nnyin. Nte nnyin ikamake Enye isọñ nsinsi ekọm ye itoro?

Ediomi Emi Asañade Ye Uwa

Andiwet Psalm ekere nte akwa Abasi okotde ndisana owo ke enyọñ ye isọñ ete edi ntiense ke abaña edinen ubierikpe Esie ye Israel. “Mbufo ebon ikọt ima mi enọ mi, kpa mmọ eke ekedade uwa ediomi ediomi ye ami”. Nti nditọ Abasi edi mmọ emi enamde ediomi ye Enye eke asañade ye uwa.

Ke ini owo ọdiọñọde ufọn nsinsi uwem, ekọm-urua ndomo kiet ikpokponke ikaha ndida ndep enye. Nso uwa okpokpon ntre emi akpanamde owo afaña edieke Abasi oyomde? Ata ediwak mmọ emi ekewotde ke ntak Ikọ Abasi ikabatke uwem mmọ ke ñkpọ man mmọ ekpenam akpanikọ enọ Christ. Nte iyip mmọ iditiehe ntiense inọ mmọ emi esinde ndiyak idem mmọ nnọ Abasi nte odu uwem uwa ke utom Esie? Abasi oyom nnyin inyime ndisin eka, ete, eyen eka añwan mme eren inyuñ iduọk uwem nnyin, edieke oyomde oro, man nnyin idi mme anam akpanikọ nnọ Enye emi okokotde nnyin. Jesus ọdọhọ ete “Edieke owo ekededi oyomde nditiene Mi, yak enye otuk idem esie, onyuñ emen crọss esie, etiene Mi” (Matthew 16:24).

Ini kiet owo kiet ama etiene Jesus edidọhọ ete “Nyetiene Fi, Ọbọñ, edi yak mbem iso ... “ Ibọrọ Jesus ekedi “Baba owo kiet emi akabarede ese edem, ke enye ama ekesin ubọk ke ufuñ-isọñ, ikemke ndinam utom Ubọñ Abasi” (Luke 9:62). Ndusuk owo ekpenyime ndinam utom Abasi edieke mmọ ekpekemede ndibem iso nnam mme ñkpọ oro esit mmọ ọdọñde. Abasi ke okot kpukpru mmọ emi eyomde ndinam ñkpọ nnọ Enye ndinam ediomi ye Enye ke asañade ye uwa. Mmọ enyene ndinyime ndiyak ñkpọ oro akpade mmọ ekọm-urua, nte David emi mikonyimeke ndida se mikpaha enye ñkpọ nnam uwa nnọ Jehovah.

Se Edade Ebiom Israel Ikpe

Abasi ama anam otim añwaña Israel ete ke idighe koro Imọ ikoyomde uwa mmọ ekesin Imọ ibiom mmọ ikpe. “Biọñ ama ọkpọdọñ mi, ñkpọdọhọke fi: koro ekonde ye se iyọhọde ke esit edide okim”. Abasi ikasuaha inọ mmọ koro mikawaha edifọp uwa, okposuk edi emi okodotde ufen. Se ekedade ebiom mmọ ikpe ekedi koro mmọ mikekpehe akaña mmọ mikonyuñ inyeneke esit ekọm inọ Abasi.

Uwa Emi Inọde Abasi

Mfin emi Abasi iyomke inyene nnyin; Enye iyomke ufene nnyin mme ñkpọ efen eke nnyin inyenede ke uwem emi. Edi nnyn imoyom Abasi eti-eti. Edi Enye ọnọ nnyin odudu ndikọ inyene ererimbot emi mbon; ke ntre nnyin ibere ofuri-ofuri ke Enye man ibọ kpukpru se iyomde ekpedi edidiọñ ke ñkpọ spirit mme ke ñkpọ ikpọkidem. Edieke Enye okpoyomde ufene, Enye ọkpọsuhọre editañ mmọ ke tọsin ikpọ obot.

“Ke ntre” afo ọdọhọ ete, “Edieke Abasi miyomke inyene mi, ini mi, talent mi, ntak ñkpọnọde Enye? Nso idi ntak anade iyak idem nnyin ntọtuñọ-ntọtunọ inọ Enye? Kpukpru ñkpọ enyene Enye. Edieke nnyin inyenede talent, odudu mme ukeme, oto Abasi. “Kpukpru eti erinọ ye kpukpru enọ eke efọnde ema eto enyọñ, eto ke ubọk Ete mme uñwana esuhọre edi” (James 1:17). Nnyin idi mme andise ñkpọ mbaña mme ñkpọ ye mme enọ emi Abasi ọnọde nnyin; ndien nte nnyin ikpenyeneke esit ekọm ndifiak nnyak mme enọ emi nnọ Enye ke ndida nnam utom Esie? Ke akpanikọ, nnyin ikpamaha ndikop ubierikpe nnyin edide “Mbufo enyuñ eduọk asañutom emi midorike mi udori ke ekim ke esien”.

Ke usen kiet kpukpru nnyin iyenam ibat inọ Abasi nte ikadade se Enye ọkọnọde nnyin inam ñkpọ. Eti-mbuk ke akaka iso mfin emi. Nte afo amabuana ke utom esie? Amañwam ndinam mbiomo efere ọnọ mmọ emi edude ke iso ekọñ? Amayak mme enọ, mme talent ye mme ñkpọ oro Abasi ọkọnọde fi ọnọ Ọbọñ? Munamke, Eti-mbuk eyesuk aka iso; edi ndusuk ukpọñ kiet ke ubọk nnasia fo mme eken ke ufien idikopke ikọ erinyaña sia afo ekesinde udeme fo. Eyom mme anam utom mfin ekan nte ekeyomde ke akpa; iñwañ utom adat, ndien Ọbọñ kobup “Anie ke ndidọñ? Nte afo odu ke otu mmọ emi edọhọde, “yak mbem iso ... “? Utom Abasi ikemeke ndibet! Enye enyene ndidi akpa ke uwem fo. Akpatre ikot kọwọrọ ọnọ mme anam utom. Yere ikot oro mfin.

Andifak

“Seme nọ mi ke usen ukut: nyebabare fi mbaba, ndien afo eyekpono mi”. Ediwak ini edi ndiọi edinam owo esida owo oro esin ke afanikọñ. Kpa ye oro, Abasi ọñwọñọ ete edieke isemede inọ Enye ke usen ukut Imọ iyebabare nnyin mbaba. Esit nnyin ọkpọyọhọ ye ekọm ọnọ utọ Abasi oro.

Edikpono Abasi Ke Ido

Ndusuk mmọ emi ekenyenede enyọñ-enyọñ ido ukpono Abasi, ekenyuñ ekamade ewuhọ Abasi ke mkpọk-inua mmọ, enyuñ etiñde ewuhọ Esie, Abasi ama owut mmọ saña-saña idiọk ñkpọ mmọ. Mmọ ekeduk nduk ye inọ; ndusuk mmọ ema edep mme ñkpọ emi mme inọ emi ekeyipde-yip. Mmọ ema edue isop efibe, kpa idiọk-ñkpọ emi edarade ke ndusuk ebiet ukpono Abasi mfin. John ọduọk owo mmọñ ama ọduọk uwem esie koro enye ama etiñ añwa-añwa ọnọ Herod ete ke idotke enye ndida ñwan eyen eka esie. Mmọ ema edue ñko ke nditiñ ndiọi ikọ ndinyuñ nsu nsu. Mmọ ema etiñ ikọ ebiat nditọ-ete mmọ. Mme ñkpọ emi ekesuk ekaka iso, edi mmọ ema ekere ete ke imekeme ndisuk ñka iso ntre ye Abasi ke ndiwa uwa nnọ Enye emi misañake ye ata edikabare esit.

Ufen Eke Miwarake Ndidi

“Koro miwarake ndinọ idiọk owo ufen, oro esin nditọ owo esọñ esit ke idem mmọ enam idiọk” (Ecclesiates 8:11). “Ntem ke afo akanam, edi ami ndop uyo” (Psalm 50:21). Abasi ke mbọm Esie ọnọ owo ifet ndikabare esit; edi edieke enye akade iso esin ndikabare, ubierikpe eyedi. Israel ekekere ete ke Abasi ekeme ndinyime nnọ idiọk-ñkpọ mme imọ. Mmọ ekekere ete ke Abasi ikekwe mme idiọk ido mmọ, ntre ke Abasi idinọhọ mme anam idiọk ufen. Abasi ama ọdọhọ Israel ete ke ubierikpe eyedi ndien ke mmọ eyekut ke enyin. “Owo ikemeke ndibiaña Abasi: se ededi owo ọtọde, oro ke enye edinyuñ ọdọk” (Ñwed Mbon Galatia 6:7). Abasi ama oduri nditọ Israel utọñ akpan-akpan ke ntak isa-isa ido ukpono Abasi mmọ ye ntaha edu uwem mmọ. “O mbufo emi efrede Abasi, etim ese emi, mbak ndiwai mbufo mbak-mbak, ndien owo eke anyañade iduhe”. Kpa ye nduari emi ufañ ama odu ọnọ mbọm: “Owo eke awade uwa ekọm eyekpono mi: ama onyuñ edi owo eke otimde ndinim ido, nyewut enye erinyaña eke Abasi anyañade”.

Uwem Unana Idiọk-ñkpọ

Abasi adara ke mbọm onyuñ ama ekọm, edi ñkpọ ndomo kiet ididaha itie edinen isañ ye Abasi. Ñkpọ ndomo kiet iduhe ndida ñkpuhọ ye uwem unana idiọk-ñkpọ. Owo baba kiet ikemeke ndinọ Abasi ekọm eke odotde, nte enye emi ama ekeyere ke iyip Eyen Erọñ, emi onyuñ odude uwem eke okoñde akan esuene. Yak mmọ eke Jehovah afakde etoro Jehovah enyuñ enọ Enye ekọm ke akwa edinyaña Esie.

Questions

MME MBUME

1. Ndinam ediomi eke asañade ye uwa ọwọrọ nso?
2. Yom mme ufañ ke Ñwed Abasi emi etiñde abaña ubom Abasi.
3. Nso idi ntak emi ekebiomde Israel ikpe?
4. Nso eñwọñọ ke enọ ke ibuot ñwed emi?
5. Edisaña didie ebọ mme eñwọñọ emi enyene?
6. Ikọ emi “ido” ke ufañ 23 ọwọrọ didie?
7. Ewe ke otu mbet duop ke Abasi ọkọdọhọ ete ke mme anam idiọk ebiat?
8. nso ke Abasi okoyom Israel enam?