Lesson 208 - Senior
Memory Verse
“Ndien kpukpru spirit eke minyimeke Jesus itoho Abasi. Emi onyuñ edi spirit andibiọñọ Christ, emi mbufo ekekopde ete enye ọmọñ edi; ndien enye odu ke ererimbot ke emi”. (1 John 4:3).Cross References
I Christ Emi Okodudedu
1. Jesus emi edide ukem ye Abasi, ye kiet ke mbuot Abasi ita ke kiet, edi nsinsi Eyen Abasi, John 1:1, 2, 15; 8:58; 17:5, 11, 21, 24; Isaiah 9:6; Eriyarare 22:13, 1 John 1:1, 2
2. Jesus ke ata edidiana kiet ke edinam ye uduak ye Abasi Ete ye Edisana Spirit, okobot ererimbot, John 1:3, 10; Ñwed Mbon Colossae 1:15-17; Mme Hebrew 1:1-3; 1 Ñwed Corinth 8:6; Ñwed Mbon Ephesus 3:9
3. Akpan utom Esie edi ndida nsinsi uwem nsọk ofuri ubon owo, John 1:4, 5; 10;10; 11;25; 14:6; Ñwed Mbon Rome 5:21; 2 Ñwed Timothy 1:10; 1 John 1:6; 5:12
II Jesus Christ, Uñwana Ererimbot
1. John ọduọk Owo Mmọñ ekedi andibem Christ iso, man etiñ abaña edidi Messiah, John 1:6-8, 15, 19-34; Isaiah 40:3; Malachi 3:1; Matthew 3:1-7; 11:10
2. Jesus edi uñwana ererimbot, John 1:9; 8:12; Isaiah 9:2; 42:6; Matthew 4:16; Luke 1:79; Ñwed Mbon Ephesus 5:14; 1 John 1:7; 2:8; Eriyarare 21:23
3. Jesus ekedi ndinyaña mme idiọk owo, edi mme Jew ye mme Gentile ema esin Enye, John 1:10, 11; 12:48; Matthew 1:21-23; Psalm 2:2-4; Utom Mme Apostle 4:27
4. Akwa ifet ndidi nditọ Abasi odu ọnọ kpukpru owo emi enyimede Jesus nte Christ, John 1:12, 13, 16, 17; Ñwed Mbon Galatia 4:7; Ñwed Mbon philippi 2:15; 1 John 3:1
5. Jesus edi Ikọ Abasi emi akabarede edi obukidem John 1:14, 18; 1 Ñwed Timothy 3:16; 1 John 5:7; Eriyarare 19:13
Notes
SE EKPEPDE EBAÑA“Jesus Edi Anie?”
Mme mbiet mbume emi, edi se ebupde ediwak ini ke ñkpọ ñte tọsin isua iba emi ebede. Jesus ama obup mbet Esie ete, “Mme owo edọhọ ete Eyen Owo edi anie?” Emi edi ata akpan mbume, koro ibọrọ eke inọde ekeme ndisọñọ idaha nnyin ke abaña nsinsi ini.
Ñwed Abasi anam otim añwaña nnyin nte ke Ọbọñ Jesus Christ ikedighe ikpikpu Anditiñ-ntiñ-nnim-ikọ, eti andikpep, mme owo emi ekenọde saña-saña odudu ndinam mme utibe-ñkpọ. Onyuñ etiñ ediwak ini ete ke Enye edi Eyen Abasi, okonyuñ edi Eyen Abasi, okonyuñ edi Eyen Abasi kpukpru ini. Enye ikenyeneke ntọñọ Esie ke ini emena Esie ke Bethlehem. Enye ọkọtọñọ ndidu nte Eyen Owo ke Bethlehem, edi ama ododu nte Eyen Abasi “ke eritọñọ.”
Ke ntre ediọñọ Ọbọñ nnyin Jesus Christ nte Abasi Eyen. Enye ama odu ye Abasi Ete ye Abasi Edisana Spirit mbemiso ebot ererimbot. Enye edi kiet ke nsinsi Mbuot-Abasi, edi ukem onyuñ edi kiet ye Abasi Ete ye Abasi Edisana Spirit. Kpukpru uduot ye edu emi edude ke Abasi Ete ye Abasi Edisana Spirit edu ke Jesus Christ, Eyen Abasi, ke ukem idaha nte odude ke nsinsi Mbuot-Abasi eken; koro Ñwed Abasi ewet abaña Christ ete, “Koro ofuri Uyọhọ Abasi ke oduduñ Enye ke idem” (Ñwed Mbon Colossae 2:9).
Ediwak idaha ye enyiñ emi enọde Christ edu ke Ikọ Abasi. Edi baba emi kiet iyarakere ofuri-ofuri nsinsi uduot Esie emi “okposuk edi nte Enye ekedide mbiet Abasi, Enye ikabatke ndida ñka-ñka ye Abasi ke ñkpọ eke okpomumde akama: edi Enye akañwaña Idem Esie, ada mbiet ofin, owut idem nte owo; ndien sia Enye ọwọrọde edi ke ido owo, Enye ọsuhọre idem, akabare osuk ibuot tutu ọsuñọ ke mkpa, kpa mkpa crọss”. Edisana Spirit aka-iso etiñ ñkpọ abaña Christ ke ini ọdọhọde ete, “Ke ntak oro Abasi ekemenede Enye onim ke enyọñ, onyuñ ọnọ Enye enyiñ okoñde akan kpukpru enyiñ; man ke enyiñ Jesus kpukpru edọñ ekpetọñọ enọ Abasi ... kpukpru edeme ekponyuñ enyime ete Jesus Christ edi Ọbọñ, enọ Abasi Ete ubọñ” (Ñwed Mbon Philippi 2:6-11).
Jesus edi Eyen Abasi! Jesus edi Christ, Enye emi ekeyetde aran enim, kpa Messiah. Jesus edi idorenyin kpukpru owo emi eñwanade ndinyene edisana ye edinen ido emi Abasi amade; koro Enye edi Ekpe-emem, ye Andida-Itie nnyin, Akpa-mbuñwum ediset nnyin, ye edidem nnyin emi edidide!
Nso Ke Ndinam Ye Jesus?’
Ke ini ntem ke isua, ekikere nnyin afiak eti usuhọre ye ubọñ akpa edidi Christ ke ererimbot, ke ini Enye akamanade ke Bethlehem ndien enim Enye ke usin-udia ufene koro itie mikoduhe inọ Enye ke ufọk isen. Ama odu ediwak mmọ emi ekekotde mme okpono Abasi ke ini oro, emi ekefiọkde ete Christ eyedi, ekenyuñ efiọkde usuñ nte Enye edidide, ekenyuñ enyenede mme ñkpọ ndinam mmọ efiọk ete ke edidi Esie ekpere eti-eti. Edi ediwak owo ke otu mmọ ikonimke ite Jesus edi Christ, inyuñ idaha Enye nte Andinyaña.
Nnyin imekeme ndikut nte ke edi ekpri ibat owo ekefiọk enyuñ enyime Enye ke ini emana Esie. Nnyin imeti mbuk ekpri otu mme ekpeme-erọñ emi ekebọde etop emana Esie ebe ke ikwọ mme angel, emi ekenyuñ ekade eketuak ibuot enọ Andinyaña owo. Imonyuñ ifiọk ibaña mme mbuk mme ọfiọk-ñkpọ owo eketode Edem Usiaha-utin, ibaña Simeon ye Anna emi ekenamde ñkpọ enọ Abasi ke Itie-ukpono, ye nte Spirit Abasi akadade mmọ usuñ, añwam mmọ ndidiọñọ idaha ekpri eyen emi nte Abasi, emi ediwak tọsin iren ye iban eketrede ndikut ke ofuri ini utom Esie ke ererimbot. Edi ekpri ibat owo emi ekefiọk ata uduot edisana nsek Eyen emi. Mmọ ikedaha Enye nte ikpikpu Eyen. Mmọ ema ekpono Enye sia ekefiọkde ete Enye edi Eyen Abasi, idorenyin emi ofuri uduot-owo ekebetde.
Ukem edinam emi ke akaka iso ke nsio-nsio usuñ mfin. Ediwak edu emi edide ke itie-ukpono Abasi Esie ndituak ibuot nnọ Enye ke ido, emi akananam miduhe ke otu ata mbet emi etienede Enye eka crọss! Ediwak edu emi etienede Enye ke ido emi misañake ke nde ikpat Esie. Ediwak owo idaha Enye nte Eyen Abasi koro ke ekikere mmọ; Enye edi ikpikpu andikpep, Anditiñ-ntiñ-nnim-ikọ, midighe edi eti uwut-ñkpọ. Edi tutu emi, ke ododu “mme ekpem-erọñ’, “mme ọfiọk-ñkpọ owo”, ye mme asaña utom akpanikọ emi Spirit adade mmọ usuñ, emi efiọkde se Enye edide; Eyen Abasi, ye Andinyaña uduot-owo.
“Nso Ke Jesus Akanam?”
Edisana Spirit etiñ ebe ke Apostle ọnọ nnyin ete, Jesus ekedi etiene oruk Esie, edi mmọ ikadarake Enye. Jesus akada ubọhọ ke idiọk-ñkpọ edi. Enye ekedi ndikọk mmọ eke edọñọde nnyuñ nnam mme akpa-mkpa eset. Enye ekedi ndikpe ekọm-urua edifak nnyin, nnyuñ nsiak usuñ man oto do nnyin inam emem ye Abasi. Enye ekedi ndikpep nnyin usuñ nte ikpodude uwem, nnyuñ ñwut nnyin se ibet Abasi ọwọrọde ọyọhọ-ọyọhọ. Ndien mmọ emi edarade Enye, Enye ọnọ mmọ unen ndikabare ndi nditọ Abasi, ye mme enyene udeme ye Enye ke ediwak edidiọñ nsinsi ini.
Christ akada Uñwana edi. Ekot Enye “uñwana ererimbot”. Uñwana emi Enye akadade edi ọnọ nsinsi uwem ye ata emem ye Abasi. Enye inimke ubiọñọ ndomo kiet inọ nnyin ndimek Enye nte Andinyaña, Ọbọñ ye Edidem oto ke ndibuọt idem ke mme eñwọñọ Abasi. Mme owo ke kpukpru idut, uduot ye idaha ye ini enyene unen ke Uñwana emi ye mme edidiọñ Esie. Mbọm ye edinen ikpe Abasi anam Uduak Erinyaña ke usuñ nte kpukpru owo ekemede ndinyene uñwana emi ekemde ndimum idaha nsinsi erinyaña owo ñkama edieke owo edibọde erinyaña, onyuñ asaña ke Uñwana eke eyararede enọ enye. Edi ke emi, kpa nte ekedide ke ini Enye ekedide ke obukidem, Jesus edi, edi mme owo idarake Enye; Enye etiñ ikọ edi mme owo ikopke; Enye ekpe ubọk edi mme owo ibọrọke; Enye okot edi mme owo esuk eka iso ndisin.
Nso Ikedi Ntak Edidi Esie?
Ediwak ñkpọ edu ke Uduak Erinyaña emi esit obukidem mikemeke ndifiọk, koro eda spirit efiọk mme ñkpọ spirit. “Nso ikedi ntak edidi Christ?” edi mbume emi ekemede ndibọrọ ke ini ekerede ebaña anana utit ima, mbọm, mfọn-ido ye anyan ime Akwa Abasi Ibom. Edi idighe tutu nnyin ifiọk kpukpru se idide ibọrọ mbume emi ndien ikeme ndinyene edinyaña. Ñkukure edi nnyin ndinim ke akpanikọ ke ofuri esit ite ke Enye ama edikpe ekọm-urua man nnyin ibọ edinyaña.
Mmọ emi minimke Enye ke akpanikọ, enyuñ ededọhọ ete Enye ikedighe ke obukidem, minyuñ ibatke mme utibe ñkpọ, edi eyikde mme ukpep ñkpọ Esie, edi mme mmọ emi edude ke otu mmọ emi edude ke otu mmọ emi ediduọde eduk ke idak ukara asua Christ ke ini Ukut Jacob. Ufọt isọñ iduhe. Nnyin ikemeke ndisio idem nnyin nnim ñkañ-ñkañ, koro ana nnyin inyime Christ nte Ọbọñ ye Andinyaña, isaña ke Uñwana Esie, inyuñ ibọ enọ nsinsi uwem, midighe isin inyuñ ikañ Enye inyuñ isọñ ibuot ye Enye añwa-añwa. Mmọ eke enyimede Enye, Enye ọṅọ nsinsi uwem, ye unen ndikabare ndi nditọ Abasi, ye ukeme ndidi mme anam-utom ke iñwañ Esie mi ke isọñ. Mmọ emi esinde Enye inyeneke ñkpọ efen, ikan ndibiat nsinsi ini ye mme andisin Christ eken, oro edi, mbon mbubiam, mme osu nsu, mme owot owo ye mme inọ ọkọrọ ye satan ye mme angel esie.
Uduak emi okpon adaña didie! Utom Esie ọfọn ama onyuñ ọyọhọ adaña didie! Oto ke eritọñọ tutu osim utit ini, oto ke ñkoñ-ñkoñ tutu osim ata usuhọre owo, osim owo emi ọfọnde ido ye ata idiọk owo! Emi ekedi mmem-mem ndida itie koro Jesus ama ọkọsuhọre idem edi ke isọñ man odu uwem, ọbọ ufen, akpa onyuñ eset ke mkpa man ọdọk ke Enyọñ! “Ekọm enyene Abasi ke enọ Esie emi ayañade edeme” kpa Christ, Ikọ Abasi emi akakabarede edi obukidem!
Questions
MME MBUME- Nso ikpehe uwem Christ ọkọtọñọ ke ini Enye akamanade?
- Nte Christ ama ododu mbemiso Enye amana ke Bethlehem? Siak mme itie ñwed Abasi ndida nsọñọ ibọrọ fo.
- Siak mme enyiñ emi ekotde Christ ke Ñwed Abasi.
- Nte Mbuot-Abasi edi owo kiet mme ewak ekan kiet?
- Nso ikedi akpan ntak Christ ndidi ke ererimbot?
- Anie ekedi andibem Christ iso?
- Nso idi ntak emi ekotde Jesus ete “uñwana ererimbot”?
- Nso utọ unen ke enọ kpukpru owo emi edarade Christ?
- Christ ekedi etiene mme anie? Nte mmọ ema edara Enye?
- Nso ubiọñọ edu ke ikot ndibọ erinyaña Abasi?