Lesson 183 - Junior
Memory Verse
“Mmọ eke ekotde ewak, edi mmọ eke emekde iwakke” (Matthew 22:14). (Matthew 20: 16 English Version).Notes
Mbon-Utom Ke Iñwañ-Vine
Ñke emi Jesus ekekpepde mi abaña Obio-Ubọñ Heaven. Edi akpanikọ eda owo emi okoyomde mbon-utom ke iñwañ-vine esie edomo ye Abasi ke Idemesie. Abasi ada ikpọ iren ye ikpọ iban, mkparawa iren ye iban asuan Eti-mbuk, man etiñ mbuk erinyaña emi otode Iyip Jesus enọ mbon efen. Abasi ekeme ndikpada mme angel mme usuñ efen, edi Enye akayak ifet emi ọnọ ikọt Esie. Enye ke oyoyom mme anam utom. Ufañ odu ke iñwañ-vine Esie ọnọ kpukpru owo emi ediyerede ikot Esie.
Ke ñke emi, owo emi akababak aka ke usenubọk ndida mbon-utom. Enye ama anam ediomi ye ndusuk mbon-utom ndikpe mmọ penny kiet ke usen. Etiñ enọ nnyin ete ke penny ekedi okuk Mbon Rome emi ke ibat okponde akan kobo kiet emi nnyin idiọñọde, ñko ke enye ekedi nnen-nnen ye utip utom emi ọfọnde ke ini oro. Ke ema ekenam ediomi emi abañade se edikpede, mbon-utom ema eduk ke iñwañ-vine.
Ndida Mfen Efen.
Ete-ufọk emi ama afiak aka ndida mbon-utom. Ke ọyọhọ hour ita (ñkanika usukkiet usenubọk ) enye okokut mbon efen edade efen efen ke añwa urua. Enye okot mmọ ete edinam utom ke iñwañ-vine onyuñ ọñwọñọ ndikpe se inende.
Ke ọyọhọ hour itiokiet ye usukkiet (Ke ñkanika 12 uwemeyo ye ke ñkanika 3 ke uwemeyo) enye afiak ọwọrọ aka. Enye ama okut kpa mbon efen edade efen efen , emi enye ọkọdọhọde ete edinam utom enọ imọ. Ke ọyọhọ hour duopekiet, mbomiso utom usen okure, enye akafiak ọwọrọ aka ini kiet efen. Enye ọdọhọ mmọ emi mikenyeneke utom ndinam eduk ke iñwañ-vine esie nte mbon-utom. Enye ama ọñwọñọ ndikpe se inende.
Enyene Mme Jew Ke Akpa Ifet Ye Mme Gentile Ñko
Ikot emi Abasi okotde mbon-utom ke aka iso ke ata ediwak isua. Ndusuk, ikot emi ekebakde ekot ke usenubọk oro ekebiet enye emi ekekotde mme Jew, emi ekedide akpa mbon emi Abasi okokotde. Jesus ekebem iso edi etiene mme Jew. Ke ini Jesus okosiode mbet duopeba ọdọñ ndikwọrọ Eti-mbuk (ọyọhọ ukpep-ñkpọ 81), item Esie ekedi, “Ekuwaha eduk ke usuñ mme Gentile.” Mmọ ekenyene ndikwọrọ nnọ mme Jew (Matthew 10:5, 6).
Okposuk edi emi mme Jew ekedide akpa mmọ emi ekekotde, mmọ ikedighe ñkukure mmọ emi Abasi okokotde. Nte akakade iso, ikot emi ama osim mme Gentile ñko. Ke Utom Mme Apostle ọyọhọ ibuot duopekiet, Peter etiñ se enye okokutde ke emi Abasi ọkọdọñde enye ete ọkọkwọrọ ikọ Abasi ọnọ mbon-ufọk Cornelius, centurion owo Gentile, ke Caesarea. Peter ọdọdọhọ ete, “Ke akpanikọ mmokut nte Abasi iteñeke owo enyin, edi ke kpukpru idut Enye adadara owo ekededi eke abakde Enye onyuñ anamde nti ido” (Utom Mme Apostle 10:34, 35). Ke ema ekekop mbuk ebaña se Peter okokotde mme mbet edọhọ ete, “Ama edi ntre ndien, Abasi ayak mme Gentile ñko ekabare esit eduk uwem” (Utom Mme Apostle 11:18).
Ọtọñọde ke ini oro tutu osim emi, Abasi ọmọnọ ikot ete edinam utom ke iñwañ-vine Esie. Mmọ emi enyimede, emi “ikobiomde mbiomo usen inyuñ ifọbọde eyo” ndinam Eti-mbuk ọsọñọ ada ke ini akwa ubiọñọ okodude. Mmọ emenam utom enyuñ ebọñ akam ndinam mme ukpep-ñkpọ Christ etara eduk ke mme utit ererimbot.
Etiñ enọ nnyin ete ke nnyin iduñ ke akpatre ini idọk. Ke akpanikọ ikot mfin emi ekotde mbon-utom ebiet ikot emi ekekotde ke ọyọhọ hour duopekiet. Idọk ekpere ndikure edi ifet ke ododu ndiyere ikot Abasi.
Mme Anam-Utom Idighe Mbon Ifu
Abasi inyikke owo ete anam utom ke iñwañ-vine Imọ. Enye ada mbon-utom man ekpe mmọ utip, ndinyaña mmọ nsio ke ubuene eke spirit. Edimek edi se owo kiet kiet enyenede ndinam. Usen kiet owo kiet kiet eyeda ke iso Abasi ndibat ibat uwem esie (Ñwed Mbon Rome 14:12) ye mme utom emi enye akanamde edide eti mme idiọk. Nte afo adada ofuri usen efen efen, unamke se idotde unọ Abasi, unamke se iwọrọde ñkpọ?
Ediwak Oruk Utom
Abasi ada mbon-utom ye ntak, oro edi man enam utom ke iñwañ-vine Esie. Ufañ iduhe inọ mmọ eke midinamke utom, ufañ iduhe inọ mmọ emi eyomde ndifu ifu. Ikekpehe mbon utom, ke ñke emi, ite enam saña-saña utom nte editọ ñkpọ, edidiọñ eto, edifuñ isọñ, mme edikpeñe mfri. Abasi, ñko, oyom mme owo emi edinamde utom emi Enye oyomde ete enam.
Ke iñwañ-vine nsio-nsio oruk utom edu ndinam mbemiso ekeme ndikpeñe mfri. Ke akpa ifet enyene nditọ mme vine, enyene ndinam oro ke eti ini, eduọk mmọñ, ediọñ, enam mbiet, esime ibọk, ndusuk ini enọ udia. Enam kpukpru emi man idọk ọfọn. Ñko ke iñwañ-vine Ọbọñ nsio-nsio nkọk utom edu, emi edianade ye edinam Eti-mbuk ye erinyaña mme ukpọñ. Idighe kpukpru owo emi eyerede ikot Abasi enyene ndidi ọkwọrọ-ikọ mme anam-utom emi ọnọde mmọ emi eyomde edinyaña item. Nso oruk mboho ke ekpedi edieke mme ebre-ñkpọ mibreke ñkpọ ikwọ mmọ, edieke miduhe andikwọ ikwọ, edieke miduhe anditiñ ikọ ntiense, owo inyuñ ibọñke akam? Nso oruk itie okpodu ke akamba itie-utom nnyin edieke miduhe andikot, ye andibọrọ mme leta, edieke ufọk umiñ ñwed ekpetiede ifu, edieke owo minọhọ ñwed etop eka mme ebiet, edieke owo mikpọrike isọñ minyuñ iduepke ntọñ ke ñkpọ mbana ufọk, edieke owo minọhọ ikọ ndọñesit ye item, baba owo kiet minyuñ ibọñke akam?
Ndusuk afo emeyik se eyenọwọñ ekemede ndinam. Enyene ndikot mme owo edi ke Sunday School ye ke mme mboho. Owo enyene ndibọñ akam mbaña mme ukpọñ emi etakde. Enyene ndikwọ mme ikwọ, enyuñ etiñ ikọ ntiense . Owo enyene ndibọñ akam mbaña mme mboho ye ñwed etop ikọ Abasi. Nte emi idighe mme utom emi eyenọwọñ emi enyañade ekemede ndinam? Nte mme owo eyom ndida mfen efen ke ini mmọ ekemede ndibọ mme enọ mmọ eke spirit, nnyuñ nnam mme talent mmọ ekọri, ndinam idem mmọ ọfọn nnyuñ ñkabare ndi nti mme anam-utom edieke Ọbọñ ebighide ndidi?
Ikot Emi Abasi Okotde Nditọwọñ.
Ndusuk eda ikot emi ekebakde ekot ke usenubọk edomo ye ikot emi Abasi okotde nditọwọñ. Ndusuk emeyere, ndien nte Christ ebighide ndidi, mmọ emebiat ediwak isua enam utom Ọbọñ. Mbon eken ikeyereke ikot emi ke ini mmọ ekedide nditọwọñ. Ndusuk, Abasi anam akpanikọ ndifiak ñkot mmọ, ke nsio-nsio ini ke uwem mmọ, edi mmọ eyekut idem mmọ ke ọyọhọ hour duopekiet ke uwem mmọ, ekeme ndidi ñkani owo ye mmọ emi mibọhọ edinyaña. Nte mmọ ifiọkke ite ke ini mmọ ndinam utom nnọ Abasi ekpere ndikure? Enyene mbọm adaña didie ke ini mme owo esinde ikot Abasi! Enem onyuñ odoro udori adaña didie ke uwem ke ini mmọ eyerede ikot ndinam utom ke iñwañ-vine Abasi!
Ọyọhọ Hour Duopekiet
Enyene ndik adaña didie ke ini owo okutde mkparawa esinde ndiyere ikot ndinam utom Abasi! Ndusuk, mmọ eduak ndika “iñwañ-vine” ke ọyọhọ hour ita, itiokiet mme usukkiet. Mmọ itimke ifiọk mme iyedu uwem isọñ; ekeme ndidi emi edi ọyọhọ hour duopekiet ke uwem mmọ. Etie nte ediwak owo ifiọkke ite idọk ekpere ndikure. Ọyọhọ hour duopekiet ke ebe usọp-usọp, Abasi ke okokot ete eduk ke iñwañ-vine Esie mfin. Anie ọdiọñọ mme akpatre ikot edi emi?
Mme Utip Utom
Ikpehe efen ke ñke emi, emi Jesus ekekpepde, oro edi edikpe utip utom. Ke ama ekesim mbubreyo, ema ekot mbon-utom man edibọ utip utom mmọ. Mmọ emi ekenamde utom hour kiet kpọt ekebọ ukem ibat okuk nte mmọ emi ekenamde utom ofuri usen oro. Mmọ ekebọ penny kiet, ekenyuñ ebọ mbemiso mbon efen. Emi ke akpanikọ, ekedi ukpe okuk emi okpuhọrede ye usuñ emi enamde ke ererimbot mfin. Usuñ Abasi ibietke usuñ owo. Okposuk edi emi owo emi ọbọde edinyaña anamde utom ọnọ Abasi koro enye amade ndinam ntre, Abasi enyene ñko utip ndinọ mmọ emi enamde akpanikọ.
Ndusuk ema eseme, edi eseme mmọ ikenenke ke iso Abasi. Mmọ emi ekesemede mi ekebọ utip utom mmọ, enyuñ enam mmọ enyọñ. Abasi inemke esit ye mmọ emi ekerede ete mme imọ imenam ikaha ke ini mbon eken enamde ata esisit, mme ndidọhọ nte ke mme imọ ibọ esisit mfọn Abasi ndien mbon eken ebọ uwak uwak .
Eke Mme Anam Akpanikọ
Abasi ikpehe mmọ emi ekebemde iso enyaña ke ata anyan ini awak akan, mme mmọ emi ebietde nte eneñere enam ñkpọ enọ Enye awak akan. Edomo utom nnyin ke iñwañ-vine Abasi etiene oruk esit emi nnyin idade inam utom emi nnyin inamde, idighe uwak. Afo eyebọ “penny” fo edieke afo anamde akpanikọ ke utom emi Abasi ọnọde fi, edieke afo anamde ofuri ukeme fo ọnọ Jesus ke ukpono ye ubọñ Esie, “Ndien nyenọ mbufo se inende.”
Edieke utom emi afo anamde ọnọ Abasi edide ndiwut talent fo utu ke ndiwut ima ye mbọm Abasi, edieke afo akanamde se akanamde ke esit ufup edi unamke ke “ofuri esit nte ñkpọ eke enamde enọ Ọbọñ,” edieke edide ke ufọn idem fo ke afo akada ñkukure ifet emi afo enyenede nditim nnam mme utom emi owo mikwe ke enyin, nte afo omodot ndibọ utip?
Ekot Enyuñ Emek
Ñke emi ama etre ye ikọ emi “Ntre ke mme ekperedem eyebem iso, mme ebe-iso eyenyuñ ekpere edem: koro mmọ eke ekotde ewak edi mmọ eke emekde iwakke.” Mmọ emi edide akpatre emi enyañade, edi ekenamde eti utom enọ Abasi eyebọ “se inende,” ukem nte mmọ oro ekebemde iso enyaña.
Ikot ndidi anam-utom ke iñwañ-vine Abasi aka etiene kpukpru owo. Ekot ediwak, edi idighe kpukpru owo eyere ikot emi, ke ntre, owo imekke mmọ. Abasi edi andikot, mme emek fi ọkọñọ ke afo. Abasi ekeme ndimek fi ukem nte Enye okotde fi. Emekot fi. Nte emek fi?
Questions
MME MBUME- Ke nso ntak ke ekekot mme anam-utom?
- Nso edi ntak emi ndusuk owo ekedade efen-efen?
- Nso ke owo oro okodiomi ndikpe?
- Nso oruk utip ke Abasi ekpe?
- Mme anie ke Abasi ọnọ “okuk kiet ke usen?
- Ke nso usuñ ke ekpere edem ekeme ndidi ebem iso?
- Nso ukpuhọre odu ke ndikot ye ndimek?