Lesson 184 - Junior
Memory Verse
“Owo ekededi eke onyuñ oyomde ndidi ebe-iso owo ke otu mbufo eyeduk ufin ọnọ mbufo” (Matthew 20:27).Notes
Ikot James Ye John
Ke otu mbet Jesus duop-eba ama odu nditọ-eka iba emi ekekerede James ye John. Usen kiet Jesus ama okot mmọ ete etiene Imọ ke ini Enye ekebede ke ebiet emi mmọ ekediọñde iyire iyak mmọ. Mmọ ema ekpọñ ubọk utom mmọ man ekabare edi mme ọkọ-owo.
James ye John ema etiene Jesus ke ofuri esit mmọ ke isua ita. Enye ama osio mmọ enyiñ, nditọ obuma, ndusuk okoto ke uko emi mmọ ekenyenede ke ndiñwam Enye. Ini kiet mmọ ema eyom ndikot ikañ oto ke Heaven edisobo ndusuk mbon Samaria emi ekediọkde ido ye Jesus. Ñko ke ini mmọ ekekutde nte owo ebinde demon ọduọk ke enyiñ Jesus, minyuñ isañake ye mmọ, mmọ ema edọhọ Jesus ete asua ọnọ enye.
Jesus ama ọfiọk ete ke James ye John ema Imọ eti-eti, ndien ñko ke mmọ ekenam se ekekerede ete enen man eñwana ndinem Enye esit, nnyuñ ñwam Enye; edi Jesus inamke mme ñkpọ ke usuñ nte owo anamde. Enye ama anam añwaña ete ke Imọ ikopke idiọk esit ibaña mbon Samaria, ndien ke ikedi ndiwut mmọ usuñ nte ebọde erinyaña idighe ndisobo mmọ. Ndien Enye ọnọ ntak ete ke owo emi ekebinde demon ọduọk akada ye mmọ sia mikañwanake-ñwana ye mmọ.
Mmọ Emi Edianade Jesus Ekan
Jesus ama ama James ye John, ukem ye Peter, mmọ ekedi mbio emi ekpekotde ete “mmọ emi edianade Jesus ekan.” Mmọ ema esaña ye Jesus ekan mbet eken. Mmọ ema edu ye Enye ke Obot Edikpuhọre-idem, ke ini emi ekenọde Enye Ubọñ; ndien mmọ ema ekop nte Moses ye Elijah enemede nneme ye Jesus.
Ke ndusuk idaha Jesus esida suk Peter, James ye John adian Idem ke ini Enye akade ndinam akwa utibe-ñkpọ. Ini kiet ema ekot Enye ete edinam eyen-añwan emi ama akakpa eset. Enye ama ebin kpukpru mmọ eken ke ufọk efep, ndien Peter, James ye John ekedi ñkukure mmọ emi ekekutde Enye etiñde ikọ ndien ekpri eyen-añwan ọtọñọ ntak odu uwem.
Akande oro, ekekot John ete Edima Mbet. Emi ama anam enye okop inemesit eti-eti sia Jesus akamade enye ntem.
Obio-Ubọñ Ke Esit
Ke kpukpru emi, James ye John ikọfiọkke kaña se Jesus akadade nte ata ọwọrọ-iso ñkpọ. Mmọ ikọfiọkke ite ke Obio-Ubọñ Esie enyene nditọñọ ke esit mmọ ke ebiet emi baba owo kiet mikemeke ndikut, ndien ñko ke ididighe utọ obio-ubọñ eke Caesar. Mmọ ekekere ete ke akpanikọ Jesus eyedi akwa enyene odudu edidem ke ini Enye ediwukde ebekpo Esie, ndien ke Enye eyeyom mmọ emi edidide ibuot ukara ye mbon-ekọñ man eñwam Enye ke ukara, enyuñ ebuana ke ukpono Esie. Anie owo efen ke ebede mmọ, ekenyene unen emi okponde ntre ndinyene oruk mfọn oro nto Jesus? emi edi se mmọ ekekerede.
Ebeñe Emi Minenke
Etie nte eka James ye John ama okohore idem eti-eti koro Jesus okokotde nditọ esie adian Idem; ndien edi akpanikọ, enye ama ekere ete ke ebeñe imọ ama ọfọn ke ini enye ọkọdọhọde Enye ete: “Nọ uyo ete nditọ mi iba emi editie, kiet ke ubọk nnasia Fo, kiet ke ufien, ke Obio Ubọñ Fo.”
Jesus ama ọfiọk ete ke mmọ ikọfiọkke se ekebeñede. Ke esit mmọ, mmọ ema ekut obio ubọñ eke ererimbot emi nte esinọde owo ukpono nte edidem, enyuñ ekponode mme owo efen emi edide mbon-ekọñ edidem ye mbọñ. Uduot obukidem oyom itoro. Edi Jesus okoyom ukpuhọre spirit ke esit mme anditiene Enye. Enye okoyom ndida uwem Esie ñwut nte Enye okoyomde mmọ edu uwem.
Asaña-Utom
Jesus ama ọdọhọ ete ke Imọ ikodu ke otu mmọ nte asaña-utom, oro edi nte eyen-ufọk. Enye ekedi ndinam nti ñkpọ nnọ mbio efen inyuñ iyomke mmọ enam ñkpọ enọ Imọ. Mmọ emi ekeyomde ndidi mme andikpon ke Obio-Ubọñ Esie nnyuñ ntie ñkpere Enye ekenyene ndinam nte Enye akanamde. Enye ama ọdọhọ ete: “Edieke owo ekededi oyomde ndidi ebeiso, enye enyene ndikpere edem, ndinyuñ nsaña utom nnọ kpukpru mmọ eken” (Mark 9:35).
Mbet ekekere nte afo ye ami ikpekerede ite, man owo edi akwa owo enye enyene ndinam ikpọ ñkpọ ke ererimbot, ndusuk ini enye edi andida mme owo usuñ. Ke mme obio-ubọñ ererimbot, etubom ekọñ emi ama akakan ke mme ekọñ ọnọ obio esie ke ekpono; ye owo emi ayarade ñkpọ oto ke akwa ifiọk nduñọre, mme owo emi enyenede akwa inyene oto ke eti Ubọk-Utom esie. Ererimbot ekpono oruk mme owo emi; edi ibat-ibat owo ke otu nnyin ekeme ndinyene ukpono ke utọ usuñ emi.
Esit enem nnyin didie ke emi Jesus ọkọdọhọde ete: “Ọfọfọn ọnọ mmọ eke ebuenede ke spirit: koro Obio Ubọñ Heaven enyene mmọ. Ọfọfọn ọnọ mmọ eke owo ekọbọde mmọ kabaña edinen ido: koro Obio Ubọñ Heaven enyene mmọ” (Matthew 5:3, 10). Nnyin ifinake idem ke se ererimbot ekerede ebaña nnyin, adaña nte uwem nnyin enemde Jesus esit. Enye eyenọ nnyin utip ke mme ñkpri utom mfọnido, edieke nnyin inamde akpanikọ ke se Enye okotde nnyin ete inam. “Ndien owo ekededi eke edidade cup mbit-mbit mmọñ ọnọ kiet ke otu ñkpri owo emi ọñwọñ ke enyiñ mbet Mi, ke akpanikọ ke ndọhọ mbufo enye iditreke-tre ndibọ utip esie” (Matthew 10:42).
Ama akpa mbet idem eti-eti ke ini mmọ ekutde nte Jesus emende ekpri eyen-ọwọñ odori ke ukot Esie onyuñ ọdọhọde ete: “Mmọdo owo ekededi eke edisuhọrede idem nte ekpri eyen-ọwọñ emi, kpa enye okpon akan ke Obio-Ubọñ Heaven” (Matthew 18:4).
Otim owut ete ke mbet duop eken ekenyene ukem ekikere emi James ye John ekenyenede ebaña Obio Ubọñ Christ. Mmọ ikekopke inemesit ibaña mbet iba emi, koro ekekerede ete ke mmọ ekeñwana ndibe mbet duop eken iso nyom ikpọ itie.
Ndinam Akpanikọ Ke Ñkpri Ñkpọ
Ke ñke kiet emi Jesus okotopde, ọboñ ọdọhọ asaña-utom esie ete: “Omotim anam, afo eti owo: sia afo akanamde akpanikọ ke ekpri ñkpọ, di andikara obio duop” (Luke 19:17). Kere ukpuhọre! Enye ama anam akpanikọ ke ata ekpri, ndien idahemi ema enọ enye odudu ndikara idut duop.
Ndinyime Ndibọ Ukut Ke Nt ak Christ
Mme Isuñ-utom Jesus ikọfiọkke ite ke mmọ ekebeñe se mifọnke, ndien ke ini Jesus okobupde mme mmọ eyenyime ndikut ukut ye Enye man oto do mmọ ekpebọ utip emi mmọ eyomde, mmọ ema esọsọp enyime.
Jesus ama ọfiọk esit mmọ, onyuñ ọdọhọ ete: “Ke akpanikọ mbufo eyeñwọñ cup Mi … edi nditie ke ubọk nnasia Mi ye ke ufien inyeneke Mi ndinọ, edi enyene mmọ emi Ete Mi okonimde oro ọnọ.” Ndikpa ke ntak Christ idinamke mmọ enyene itie ke Heaven edieke miyetke esit mmọ asana oto ke Iyip. Owo kiet kiet enyene ndibem iso mbọ erinyaña ukpọñ mbemiso enye ọbọ utip utom esie ke Heaven.
Ke otu mbet duopeba James ekedi akpa owo emi ekewotde ke ntak Ikọ Abasi. Enye, ye mme Isuñ-utom eken, ema enam utom Christ ke ndika ke kpukpru ebiet nnyuñ ñkwọrọ ete ke Jesus ama akpa ndisio isop idiọk-ñkpọ ndien ke ama ọtọñọ ntak eset. Ukpep-ñkpọ emi ama anam ediwak owo ekop iyaresit eti-eti koro mmọ ikoyomke ndinim ke akpanikọ ete ke Jesus edi ata Eyen Abasi ndien ke ama eset ke mkpa. Edidem Herod okoyom ndinem mme Jew emi ekesuade Jesus esit, ke ntre enye omum James onyuñ esibe enye ibuot ke ofut. James ama ọdọhọ ete ke imọ imonyime ndikut ndutuhọ ke ntak Christ; ndien ke ini emi ekedomode enye, enye ama akan.
John, ñko ama ọbọ ukpep-ñkpọ emi Jesus ekekpepde ke ini emi. Enye ekedi Apostle emi ekebinde esio okodu ikpọñ ke Isuo Patmos oto ke ntak ukwọrọ Ikọ Abasi esie. Abasi ama okpono mbuọtidem esie ke ebiet oro ke ndinam enye enyene ñkukut ini iso. John ama okut Obufa Jerusalem ye enyiñ esie ke otu enyiñ mme Apostle duopeba, ke mme itiat idak-isọñ. Ke ini oro enye ikekereke ibaña ndimenere idem esie, ndien enye ama eneñere ọsuhọre idem ke ini enye okokutde ukpono emi Abasi okonimde ọnọ enye. John ama ewet kpukpru se enye okokutde, emi odude ke Ñwed Abasi emi edide Ñwed Eriyarare.
Utom Edinyime Esit
Kpukpru nnyin imekeme ndinyene spirit emi onyimede ndiñwam mbio efen akan ndiyom kpukpru ñkpọ nnọ idem nnyin. Ke nnyin ima ikọbọ erinyaña ukpọñ, nnyin inyene ndika iso mbọñ akam nnyuñ ñkpep Ikọ Abasi. Nte nnyin ibọñde akam, inyuñ iyakde idem nnyin inọ Jesus, ntre ke edi mmem mmem ọnọ nnyin ndinam se Jesus oyomde nnyin inam, okposuk edi ke akpa ifet nnyin ikerede ite ke nnyin ikemeke ndinam ñkpọ oro. Nnyin imekeme ndikut mme ufan nnyin enyenede mme ñkpọ ererimbot emi ekan nnyin; ekeme ndisọp mkpono mmọ ke ini baba owo kiet misehe nnyin. Edi Jesus okut esit nnyin, ndien edieke nnyin inamde se inemde Enye esit ke usuñ ekededi, Enye eyedọhọ nnyin ke usen ikpe ete: “Omotim anam, afo eti asañutom ye owo akpanikọ: afo akanam akpanikọ ke se miwakke; nyenim fi ekpeme ediwak ñkpọ; duk ke idara Ọbọñ fo” (Matthew 25:23).
Questions
MME MBUME- Nso ke mbet ekekere ebaña Obio Ubọñ Christ?
- James ye John ekedi mme anie?
- Nso ke James ye John ekeyom?
- Ke ukpep-ñkpọ emi Jesus akada Idem Esie nte nso? asaña-utom, mme ete-ufọk?
- Ke nso utọ idaha ke Enye okoyom mbet Esie enim idem mmọ?
- Nso ke mbet ekedọhọ ete ke mme imọ imonyime ndinam nnọ Jesus ?
- Didie ke James akayarade ete ke iyeyak kpukpru ñkpọ ke ntak Jesus?
- Nso ufen ke John ọkọbọ ke ndikwọrọ mbaña Jesus?
- Nso utip ke John okokut abaña idem esie ke ini enye okokutde Obufa Jerusalem?
- Didie ke Ọbọñ aduak ndinọ ndinen ikọt Esie utip?