Lesson 186 - Junior
Memory Verse
“Eyen Owo ekedi ndiyom ndinyuñ nnyaña se isopde” (Luke 19:10).Notes
Ọkpọsọñ Udọñ
Etop Jesus ye mme utibe-ñkpọ emi Enye akanamde ema esuana ke ofuri Judea ye Galilee. Ọtọ nte Jesus akaka, akwa otu owo ema etiene Enye ye udọñ ndikut nte Enye anamde utibe-ñkpọ, okposuk ndusuk mmọ mikoyomke ndinam utom nnọ Enye.
Ini kiet ke isañ Jesus ndika Jericho, owo kiet emi esibọde utomo, emi enyiñ esie ekedide Zacchaeus, ama okut idemesie ke otu mme owo emi ekekade man ekese nte enamde utibe-ñkpọ. Ndusuk enye ikekereke ite imọ imekeme ndikabare ndi mbet Jesus, edi sia etiede nte kpukpru owo ekeyom ndikut owo Nazareth emi, enye ñko ama esik ekpere. Edi enye ekedi ata ibio owo emi mikekemeke ndikut ñkpọ mbe ibuot mme owo emi ekedade enye ke iso, ndien ata ediwak owo ema eda ekan ekuk, ntre enye ikekemeke ndikut se ikakade iso. Zacchaeus ama ọsọp efehe ọkọdọk eto Sycamore emi akadade ekpere usuñ emi Jesus edisañade ibe. Do ke enye edikeme ndidoro ñkut Jesus ke ini Enye edisañade edi ndibe, okposuk owo midikwe enye.
Inyene
Zacchaeus ekedi owo inyene, ndien Jesus ama ekpep ete ke edi ọkpọsọñ ñkpọ mbon inyene ndiduk Heaven. Emi ikowutke ite ke Jesus ikamaha mbon inyene ukem nte Enye akamade mme ubuene, edi okowut ete ke mmọ ikemaha Jesus. Ediwak ini, mbon inyene ekere ebaña okuk mmọ ekan nte ekerede ebaña Abasi. Ke ntre mme Pharisee ke ekikere mmọ ema eyik mme ekpri owo publican emi ọkọdọkde eto ekeme ndinyene edinyaña. Edi mme Jew ema esua enye koro enye ekedide ọbọ utomo. Ke ekikere mmọ, utọ mme owo ntem ema eduọk idori-enyin ndinyene edinyaña. Oro ekeme ndidi ntak kiet emi mmọ mikọnọhọ Zacchaeus ifet ndifaha nduk ke otu owo man asaña ekpere Jesus.
Nda-Usuñ Abasi
Anie ekpekere ete ke edidọk eto emi Zacchaeus ọkọdọkde eyeda enye ọkọsuñọ ke edikabare esit? Ndusuk nnyin imekeme ndida ekikere mfiak edem, inyuñ ikut mme ñkpọ-ntibe ke uwem nnyin emi akadade nnyin adian ye Jesus. Nnyin imekeme ndikere ite edi nnyin ikanam ekikere ibaña uwem nnyin, mme ndikere nte ke mme ñkpọ-ntibe oro ekenyuñ etibe ntre; edi nte esit nnyin okokopde biọñ abaña erinyaña ukpọñ, Abasi ke usuñ Esie ama ada nnyin usuñ tutu ikop ibaña akpanikọ, inyuñ ibuọt idem.
“Owo Eke Amade”
Ukpep-ñkpọ Jesus ekedi, “Eyen Owo ekedi ndiyom ndinyuñ nnyaña se isopde.” Ke enyin Esie, owo ekededi emi mikabakere ikpọñ idiọk-ñkpọ, edi anam idiọk-ñkpọ. Ekpedi enye edi ubuene, me enyene ñkpọ owo, mme Jew, mme owo mme Idut, eyen-ufọk, me ete-ufọk, ọdiọñọ ñwed me enye emi midiọñọke ñwed, owo ekededi enyene ukem ifet ndibọ erinyaña, edieke enye akabarede esit onyuñ onim Jesus ke akpanikọ.
Ata andinim ke akpanikọ ọfiọk ete owo ekededi eke eyomde erinyaña, ekeme ndinyene, edi idighe kpukpru owo ekekeme ndinyene utọ ukpep-ñkpọ oro. Ke ini editọñọ utom ukwọrọ-ikọ John Wesley, mme owo ema edu emi ekenimde ete ke odu ibat-ibat owo ifañ emi enyenede unen ndinyene erinyaña. Mme owo emi ekenamde utom ke iñwañ, ye nditọ iren emi ekesikpemede ufene, ye mme ubuene emi ekesinamde utom ke mme ikpọ ufọk utom ye ke mme obube udọk ukañ, ikenyeneke idori enyin. Edi ke Abasi ama akanyaña John Wesley, onyuñ anam esit esie asana, Abasi ama osio enye ọdọñ ke mme obio ke England ye ke mme efak ke London ete ọkọkwọrọ ikọ man, “owo eke amade” ekpedi edibọ erinyaña: ekpedi ọtọ iñwañ, mme onyuñ edide eyen-ọbọñ, ekpeme ufene ye ọkwọrọ-ikọ, anam-idiọk emi anade ke usuñ-udiọñ-edim ye owo ufọk Abasi emi enyenede ukpono.
Mi ke akwa idara akasuana oduk ke ofuri iso isọñ! Unana ikekemeke ndifik owo aba. Idara ke esit mme owo ama anam mmọ efre ebaña unana mmọ. Akwa edidemere ama ada itie ndien tọsin owo ema emana eduk ke obio Ubọñ Abasi. Mmọ ema ekwọ itoro enọ Abasi emi akamade, onyuñ edepde mmọ ke nsọñ-urua Iyip Esie. Ndien nte mmọ esuk ekade iso ndibọñ akam, nnyuñ ntiñ nnọ Jesus nte mmọ emade Enye, Abasi ama anam esit mmọ asana ñko.
Ediwak mme ọwọrọ-iso owo emi ekekerede ete ke edi mme imọ ikpọñ ke ekeme ndinyaña, ema eyat esit ebaña ukpep-ñkpọ John Wesley. Mmọ ema ediañare idem mmọ ekpọñ otu mbon idara emi ekekpepde enyuñ enyenede ọyọhọ erinyaña ukpọñ, ndien mmọ ema eduọk edidiọñ emi mmọ ekpekenyenede edieke mmọ ekpekekpañde utọñ enọ mme ukpep-ñkpọ akwa owo Abasi emi. Mmọ eketie nte mme Pharisee emi ekekutde ndudue enọ Jesus koro Enye akakade ke ufọk Zacchaeus.
Ke ini Jesus akasañade edisim eto emi ekpri ọbọ-utomo emi ọkọdọkde okodibe, Enye ama emenere enyin ese enye nte ñkpọ emi Enye okokutde ini Zacchaeus ọdọkde eto oro. Jesus ọfiọk kpukpru ñkpọ, ama onyuñ ọfiọk ete ke ekpri owo oro ama ọdọk ke enyọñ eto oro. Enye ama onyuñ ọfiọk ñko ete ke Zacchaeus eyema ndida Imọ nnyọñ ufọk.
Edineñere Ukwañ Usuñ
Jesus ama ọdọhọ Zacchaeus ete: “Wawara suhọre di; koro mmenyene ndidañ ke ufọk fo mfin.” Ediwak Pharisee oro ekebatde idem mmọ ke ndinen, ikoyomke Jesus ke ufọk mmọ, edi Zacchaeus ama ọsọsọp nte ekekeme, ọsuhọre ke enyọñ eto. Zacchaeus ikọdọhọke ite ke Jesus ikenyeneke ñkpọ ikem nte ekpedide udia ke ediye ufọk imọ. Enye ama ọfiọk ete ke Jesus okpon idaha akan owo. Jesus ndisobo ye enye ama ada ubiom ikpe esin ke esit Zacchaeus ke abaña mme idiọk-ñkpọ esie, ndien ke ndo-ndo oro enye ekekemede ndisioro uyo, enye ama ọdọhọ Jesus ete: “Ọbọñ, ke nnọnọ mme ubuene ubak inyene mi; onyuñ edieke ñkọbọde owo ñkpọ ke ñkan ubọk, nsosio usiene utim ikanañ.”
Nso idi ntak emi Zacchaeus eketiñde ikọ oro? Ke ekikere esie, enye ama ọfiọk ete ke Jesus ikọfiọkke ibaña mme idiọk-ñkpọ emi imọ ikanamde. Edi Zacchaeus ama adara Jesus eti-eti, idighe koro Enye akakade ndidañ ke ufọk esie ikpọñ, edi ñko nte Andinyaña ke esit esie. Ndien ke ini Jesus ebede oduk ke esit owo ekededi, kpukpru idiọk-ñkpọ enyene ndiwọrọ. Ke idiọk-ñkpọ ama ọkọkpọñ esit esie, enye ama ọbọ erinyaña, enye ndien ama ọdiọñọ ete ke imọ inyene ndineñere se ikakwañade. Owo iditiñke tiñ inọ owo emi enyañade ke akpanikọ, ete ke enye enyene ndineñere mme ndudue usen edem; spirit Abasi ye Ikọ Esie eyekpep enye ndinam oro. Eyen Abasi ọbọ erifen oto Abasi, ndien ana nte enye oyom erifen oto owo ñko.
Efen Enọ
Zacchaeus ama asaña ye Jesus ọnyọñ ye idara ke esit koro ema efen mme idiọk-ñkpọ esie. Nso ikotibe ye mme owo emi ekedade ese? Nte mmọ ema enem esit koro ekenyañade anam idiọk-ñkpọ? Nte mmọ ema edat esit koro ekpri Ọbọ utomo emi miditukke mmọ aba? Baba. Mmọ ikekemeke ndikut ukpuhọre emi akadade itie. Edinen-ido idem mmọ ama anam enyin mmọ okim. Mmọ ekesuk ekot enye idiọk owo, enyuñ ekere ete ke Jesus iditreke ndisabade Idem Esie ke Enye ndika ñkadañ ke ufọk utọ idiọk-owo oro. Mmọ ekebat mme Ewet-ñwed ye mme Pharisee nte ata mbon Abasi ye nte nditọ Abraham, koro mmọ ekesinde ifik eti-eti ke edinam utom Ibet. Edi ke ifet efen Jesus ama ọdọhọ ete ke edieke mmọ ekpedide nditọ Abraham, mmọ ekpenam mme utom emi Abraham akanamde.
Abraham ama onim Jesus ke akpanikọ onyuñ odu edisana uwem. Jesus ama etiñ añwaña ọnọ mmọ ete: “Mbufo edi nditọ ete mbufo, kpa satan, enyuñ eyom ndinam obukpo udọñ ete mbufo” (John 8:44). Mmọ oro enamde uduak Jesus edi nditọ Abraham ke akpanikọ, ekpedi mmọ edide mme Jew, me enyuñ edide owo mme Idut. “Edieke mbufo edide eke Christ, mbufo enyuñ edi nditọ Abraham; nte uñwọñọ edide, mbufo edi mme ada-udeme enyene” (Ñwed Mbon Galatia 3:29).
Questions
MME MBUME- Anie ekedi Zacchaeus?
- Nso idi ntak emi mme Jew ekesuade enye?
- Nso ke enye akanam man ekpekeme ndikut Jesus?
- Nso ke Jesus akanam ke ini Enye okosimde eto emi?
- Zacchaeus ọkọbọrọ Jesus didie?
- Nso idi edineñere ukwañ usuñ?
- Nso utọ ukpep-ñkpọ ke Ikọ Abasi emi John Wesley ọkọkwọrọde akanam idem akpa mbon England?
- Didie ke nnyin ikeme ndiwut nte ke imema Jesus?