Lesson 193 - Junior
Memory Verse
“Abasi okonyuñ emek ñkpọ eke edide mmeme ke ererimbot man Enye esuene mkpọsọñ ñkpọ” (1 Ñwed Corinth 1:27).Notes
Mbeñidem Ndinam Ñkpọ
Gideon ama añwana akpa ekọñ akan ọnọ Abasi. Enye ama owuri mme itie uwa Baal ndien mme owo ema enyuñ ediọñọ ete ke idiọk ndomokiet idisimke mme imọ koro mme imọ isuenede abasi mme okpono ndem. Nditọ Israel ema ebere ye Gideon enyuñ ebeñe idem ndika ñkañwana ekọñ ye mbon Midian ye mbon Amalek, kpa nte Akwa Abasi okowukde mmọ.
Emana nditọ Israel enye emi akanam ikaha ekọñ. Ke isua itiaba mmọ ekesidibe ke aba itiat ye mme obube man ebọhọ mme asua emi ekekande isọñ mmọ ekuk; ke ntak emi mmọ ikenyeneke udia nte ekemde. Nte mmọ eyesọñ idem ekem nte ekade ekọñ ye mmọ emi ema ekenyene ifiọk ekọñ?
Owo Ewak Ekaha
Ke ini Gideon akabatde mme owo emi ekewọñọde edi nditiene enye ñwana ekọñ, mmọ ekedi 32, 000. Ndusuk enye ekekere ete ke ediwak ibat mbon ekọñ ekeme ndiñwam ke itie ifiọk uñwana ekọñ emi mmọ mikenyeneke. Ndien Abasi ọdọhọ enye ete ke mme owo ewak ekaha. Gideon ikafañake, edi okop uyo Abasi, edieke Abasi ọkọdọhọde ete mme owo ema ewak ekaha, ọwọrọ mme owo ema ewak ekaha.
Ndusuk, akpakpa nnyin idem ntak emi Abasi ọdọhọde ete mme udim ekọñ ewak ekaha. Ke akpanikọ ọkpọfọn ndinyene ediwak akan ndidi ekpri udim emi mikemke. Nso idiọk okpodu ke mmọ nditiene ñka, ndusuk ekpeyom mmọ? Edi emi ekedi ekọñ Abasi, Enye okonyuñ ọdọhọ ete ke mbon ekọñ ewak ekaha. Ekeme ndidi sia mmọ ekekopde ndik ekedi ntak kiet emi akanamde Abasi okuyom mmọ. Abasi ama ọdọhọ Gideon ọnọ kpukpru mbon esit ndik efiak enyọñ. Ndusuk Gideon ama edighe ndikut mbahare iba ke otu mbahare ita udim ekọñ esie efiakde enyọñ ufọk okoneyo oro esierede usen ekọñ. Edi enye ọkọbuọt idem ke Abasi.
Uñwam Iduhe Ke Abasi Miduhe
Abasi ekenyene ndiñwana ekọñ oro ye mbon Midian. Edieke kpukpru owo 32,000 emi ekpekekade ekọñ mmọ ekpekedọhọ ete, “Nnyin imenyene odudu. Nnyin imekeme ndikan ke ekọñ emi ke Abasi miñwamke.”
Ediwak ini mme anditiene Christ emi ekeberede ye Abasi ke editọñọ, ekabarede etiene usuñ idem mmọ enyuñ efre ete ke mmimọ inyene ndiyom uñwam Jesus ke kpukpru se mmimọ inamde kpukpru ini. Jesus ama ọdọhọ ete, “Koro esiode Mi efep, mbufo ikemeke ndinam baba ñkpọ kiet” (John 15:5). Utom eke inamde inọ Abasi okut unen ke ini Spirit Abasi adade usuñ. Eyak nnyin itim ikpeme ndibeñe Enye ndida nnyin usuñ ke kpukpru ñkpọ ndinyuñ ñkpep nnyin se inyenede nditiñ man ikpekeme ndidi edidiọñ nnọ mmọ eke nnyin idomode ndiñwam.
Etiñ mbuk ebaña ọkwọrọ ikọ emi ekekerede ete imọ inyeneke ukeme, enye onyuñ ọbọñ akam ọkpọsọñ ete Abasi ọnọ imọ etop emi editukde esit mme owo. Abasi ama ọbọrọ akam onyuñ ọdiọñ utom esie. Ke ini esisit Spirit Abasi ikoduhe aba ke ukwọrọ ikọ esie nte eke akpa. Ema edidiọñọ ntak ke ini enye ọdọhọde ete: “Ke editọñọ ñkenyeneke ukeme, ñkenyene ndibere ọkpọsọñ ke Ọbọñ, edi idahemi mekeme ndinam nte ọfọnde ke idem mi.” Ata ọyọhọ ọkwọrọ ikọ Abasi emi enyenede Spirit Abasi ke uwem esie, ikemekekeme ndikere ite ke imọ imekeme ndinam ñkpọ ndomokiet ke idem esie.
Ọyọhọ Udomo Iba
Abasi ama ọdọhọ Gideon ete ke owo 10,000 oro ekesuhọde esuk ewawak ekaha, oro ekesin Enye ọnọ udomo efen. Gideon ama ada mbon ekọñ oro aka ke mmọñ man ekeñwọñ mmọñ. Mmọ ekeñwọñ didie mmọñ? Tọsin owo usukkiet ye ikie itiaba etọñọ edọñ esin iso ke mmọñ eñwọñ. Mmọ ikeyepke mme asua. Edi mbon ekọñ ikie ita ema edu emi ekedude ke mbeñidem. Nte akanam omokut nte ebua edeide mmọñ? Esitie nte enye oyom ñkpọ ke ini enye ọñwọñde mmọñ. Abasi okoyom ikọt Esie eyep mme asua, oro edi, ekpeme. Ekeme ndidi owo ikie ita oro ekeda ubọk mmọ ekoi mmọñ eñwọñ ke ini mmọ mikọtọñọke edọñ mikonyuñ ibọpke enyin. Mme mmọ emi ekedi mbon emi Abasi okoyomde ndida ñwana akpa ekọñ ye mbon Midian.
Mme Ñkpọ Ekọñ Abasi
Etie nte udim oro ama ekpri akaha ke ndimen ndomo ye akwa otu udim ekọñ mbon Midian emi ekedude ke itihere. Ndusuk mbon Midian ema ekere ete ke edidi ñkpọ mbubru edieke mme imọ ibinede ekpri udim ekọñ Gideon (emi ekamade obukpoñ, ukpọk abañ ye nsarañ ikañ).
Ih, obukpoñ, ukpọk abañ ye nsarañ ikañ ekedi ñkukure ñkpọ ekọñ emi mbon ekọñ Gideon ekekamade emi ikonyuñ idighe ñkpọ ekọñ emi mme ikpikpu owo ekpekemede ndida ñwana ekọñ nyene edikan. Edi mmọ ekedi ñkpọ utom eke Abasi. Sededi eke Abasi akamade ndida nnam uduak Esie edi se ifọnde ikan se owo ekpekerede ndinyene. Eduat ye ofut ikoduhe ke otu nditọ Israel. Mmọ ekedu ke ufik, okonyuñ edi mmem-mmem ñkpọ ndisin idut emi minyeneke ñkpọ ekọñ ke ufin. Ke ntre, ke ini Israel ekekade ekọñ mmọ ikenyeneke ñkpọ ndomo kiet emi akpanamde mmọ etiñ ke utit ete, “Okoto ke odudu ye ukeme nnyin ekesin nnyin ikan mme asua.”
Iban Ndọ Christ
Eyak nnyin idomo udim ekọñ Gideon ye ufọk Abasi Christ. Usen kiet ibighike, Jesus eyefiak edi nditañ iban ndọ Esie ñka Usọrọ Ndọ. Spirit Abasi odu ke ererimbot mfin emi ndibeñe ikọt Esie idem, ndinam mmọ ediọñọ idaha mmọ ke iso Esie. Ewut nnyin idaha emi nnyin inyenede ndida ke Ikọ Abasi. Ke ema ekenyaña nnyin, eyet nnyin isana, enyuñ enọ nnyin uduọk-mmọñ Edisana Spirit, ñkpọ ke ọsọsuhọ nnyin ndinam. Ekpep nnyin: “edian eti ido ke mbuọtidem mbufo, enyuñ edian ifiọk ke eti ido, enyuñ edian erifara ke idem ke ifiọk, ye ime ke erifara ke idem, ye uteñe Abasi ke ime, ye iman ke uteñe Abasi, ye ima ke iman” (II Ñwed Peter 1:5-7).
Kpukpru mbon ekọñ Gideon ekedi nditọ Israel, nditọ Abasi. Ediwak owo edu mfin, emi edọhọde ete idi nditọ Abasi inyuñ ibuọtidem ke Jesus. Edi Abasi ke ọdọñ idomo osim mmọ man ediọñọ mmọ emi edide ata mme andinim ke akpanikọ emi enamde mbeñidem ndisobo ye Jesus, Ebe Ndọ, ke ini Enye edidide. Mbon esit ndik ye mmọ emi minimke ke akpanikọ eyekut ete ke mme imọ idighe nditọ Abasi ke baba usuñ kiet, ndien eyenyuñ enyene udeme mmọ ke mkpọdiọhọ ikañ. Mmọ ekeme ndidọhọ ete mme imọ imonim ke akpanikọ, edi ana mmọ ewut ke ndinam se Jesus owukde. Enye ọkọdọhọ ete: “Edieke owo amade Mi, eyenim uyo Mi; ndien Ete Mi eyema enye, nnyin iyenyuñ idi ididuñ ye enye” (John 14:23).
Ekeme ndidi mbon efen ema etiene Ọbọñ ke mbuọtidem ke esisit ini, edi ke ntak emi Jesus midighe usọp-usọp nte mmọ ekekerede ete Enye eyedi, mmọ idọñke aba enyin do inyuñ ineñekere iyom Enye. Mmọ ekeme ndidu eti uwem enyuñ edọhọ ete mme imọ ibet Jesus. Nte mmọ ebet ke akpanikọ? Ke ini mmọ eyomde ndide ke okoneyo nte mmọ ekere ete Jesus ekeme ndidi mbemiso eyo esiere? Nso utọ eti ekikere ke edi ọnọ owo emi odude ke mbeñidem?
Owo ifañ etie ke ndue idem enyuñ enam ñkpọ emi mmọ mikpamaha ndinam ke ini Jesus edidide? Mme mmọ ekpekere ete Jesus ikpedighe kaña tutu mme imọ ida akwa idaha ke ererimbot emi; mme tutu mme imọ inyene ini ndikop inem ke inyene uwem emi ke anyan ini kaña? Nso idi akpa ekikere mmọ ke usen-ubọk? Nte mmọ ke enam uduak mmọ, mme ke edọhọ ete, “Jesus, nte edidi mfin emi?”
Udọñ Ke Abaña Editọñọ Ntak Ndi Christ
Nte omoyom Jesus edi mfin? Edieke oyomde ndisobo ye Enye nam mbeñidem. Jesus ama ekpep mbet Esie ndibọñ akam, “Yak Ubọñ Fo edi.” Ọbọñ oyom ikọt Esie enyene utọ ufiop udọñ oro ndikut Enye man mmọ ekpeseme ekot Enye, “Di, Ọbọñ Jesus, di iwiwa.” Ñwan ndọ ke anam oro. Enye ke ebet ndikop mme ikọ oro: “Eyak nnyin idara inyuñ idat esit, inyụñ inọ Enye ubọñ; koro ekem ini ndọ Eyen-erọñ, Ñwan Esie otim idem ebeñe Enye” (Eriyarare 19:7).
Abasi ama anam John okut onyuñ ese Obufa Jerusalem ke Isuo Patmos ye nte ubọñ esie editiede ke uwem emi ebede. Ekikere ubọñ oro, emi nnyin kpukpru ikpamade ndikut akpana ọnọ nnyin esit eke ikpekpede ibiere ndisobo ye Jesus ke kpukpru usuñ.
Jesus ama ọñwọñọ ete ke ikọt Esie eyebiet Enye. “Edieke Enye ediwọrọde owut idem nnyin iyebiet Enye, koro nnyin iyekut Enye nte Enye edide” (1 Ñwed John 3:2). Iban ndọ Christ eyenyene ikpọhidem ubọñ kpa nte Jesus ekenyenede ke ini Enye ama ekeset ke mkpa, eyenyuñ ekara enyuñ eda ubọñ ye Enye ke nsinsi-nsinsi.
Ufọk Abasi Christ oro oyomde Jesus, ebeñede idem ndinam kpukpru se Enye ọdọhọde mmọ enam, enyuñ esañade ke uñwana emi Enye ọnọde, eyedi Ñwan ndọ Christ. Mmọ eyebiet mbon ekọñ Gideon akadade mmọ añwana ekọñ enyene edikan ọnọ Israel. Mmọ eyedi ekpri ke ibat ke edade edomo ye mmọ emi ekotde idem mmọ ikọt Christ emi minyuñ inamke mme item Abasi. Eyemek Ñwan ndọ Christ koro enye ama ọsọñọ ada ke akpanikọ anam kpukpru se Abasi oyomde enye anam. Kpukpru owo enyene ifet ndidu ke otu mmọ emi enamde akpanikọ.
Questions
MME MBUME- Owo ifañ ke Gideon ekenyene ke ini enye okokotde nditọ Israel ebeñe idem ndika ekọñ?
- Nso ke Abasi eketiñ abaña ibat mmọ?
- Nso ikedi akpa udomo ndidiọñọ mme mmọ edi nti mbon ekọñ?
- Ọyọhọ udomo iba ekedi nso?
- Mbon ekọñ ifañ ekenyọñ ufọk ke ini kiet? Owo ifañ ekesuhọ?
- Nso utọ ñkpọ ekọñ ke udim ekọñ Gideon ekenyene?
- Anie edidi ñwan ndọ Christ?