Lesson 195 - Junior
Memory Verse
“Jehovah edi odudu mi ye ikwọ, omonyun edi erinyaña mi” (Exodus 15:2).Notes
Emem ye uforo Nditọ Israel okodu adaña ini nte mmọ ekenamde ñkpọ Abasi ke ofuri esit. Ke ini emi mmọ ekedude ke ñkañ Abasi, mmọ ema enyene odudu, ema enyuñ enyene ukeme ndikan mme idut efen. Abasi ama ọñwọñọ ete ke edieke mmọ, edisukde ibuot inọ Imọ ke iyenam mmọ edi ibuot, edi mme idut efen eyedi isim. Ke ediwak ini Israel ekedi isim, ke ndidu ke idak ukara mme idut ukpono ndem emi mikamaha Abasi. Idiọk itie mmọ ekesidi ubiere-ikpe ke ntak idiọk-ñkpọ mmọ.
Ntọñọ Ubọhọ
Samson ekedi kiet ke otu mme ekpe-ikpe emi Abasi ekemenerede man enye afak Israel osio ke ufin. Abasi ama ọñwọñọ ọnọ eka Samson ete ke eyen esie eyetọñọ ndifak Israel ke ubọk mme Philistine. Nte enye okokponde, ntre ke enye akakabare okop odudu eti-eti, ekeme ndidi ama okop odudu akan kpukpru owo. Ndusuk ini Spirit Abasi eyesuhọre oduk enye ke idem, kpa ke idem ini emi enye akakade iso ọkọri, enye ama esinam mme ñkpọ emi mmọ efen mikekemeke ndinam.
Nditọ Philistine ekedi mme anam idiọk-ñkpọ, ndien Abasi ama ọnọ ubierikpe esọk mmọ. Mmọ ema enyene ifet ndikabare esit edi mmọ ikonyimeke ndiyak idem mmọ nnọ Abasi. Ke ini emi ubierikpe mmọ ama ọtọñọ ndidi ntiene mmọ oto ke ubọk Samson.
Ndiñwana ye Idiọk-ñkpọ
Nditọ Abasi mfin enyene ndiñwana kpukpru ini ye idiọk-ñkpọ. Nnyin idikaha ke idem nnyin ikañwana ekọñ ye anam-idiọk, edi nnyin ibọbiọñọ idiọk edinam ke ebiet ekededi eke nnyin ikutde. Nnyin idodomo ndida anam-idiọk nnọ Jesus man enye akpakabare esit onyuñ ọbọ erinyaña, edi nnyin ikemeke ndifumi idiọk-ñkpọ, mme ndinyene ebuana ke mmọ. Nnyin inyene ndidianare nda nnọ akpanikọ emi odude ke Ikọ Abasi inyuñ iñwana ye se idiọkde. “Uteñe Jehovah edi ndisua idiọk” (Mme Ñke 8:13).
Samson ama enyene ediwak ifet ndisobo ndusuk mme Philistine, ndien enye ama ada ikpọñ owot ediwak mme asua. Mme Philistine ema edu ke mfina ebaña odudu Samson. Didie ke mmọ edikeme ndinam enye edi owo ñkpọkọbi? Didie ke mmọ edibọ enye odudu?
Mme Phlistine ema edọñ ofuri mbon ekọñ man ekemum owo kiet emi akadade utọ nsobo oro edi ke otu mmọ. Ke ini Nditọ Israel ema ekekut nte udim ekọñ Philistine edide, ndik ama anam mmọ. Utu ke mmọ ndikpañwam Samson, mmọ ekedọñ tọsin mbon Judah ita ete ebọp enye enyuñ eyak esin ke ubọk mbon Philistine. Mmọ ekedọhọ Samson ete: “Nte afo ufiọkke ete ke mme Philistine edi mme etubom nnyin? Nso ke afo anam emi ye nnyin?” Nso idi ntak emi edinam Samson akpadade iyaresit mme asua ye ñkpọ ndik ọnọ kpukpru Nditọ Israel?
Unyime
Oro ekedi ufep ufep usuñ ndida nse mfina oro. Abasi ama emenere Samson onim nditọñọ edifak Nditọ Israel, ndien edieke Nditọ Israel ekpeketienede enye eñwana, mmọ ekpekekan mbon Philistine usọp usọp. Utu ke oro, Nditọ Israel ema eyuhọ ndiduñ ye mme anam idiọk-ñkpọ emi ekesinde mmọ ke ufin. Mmọ ema enyene ndik ndisọñọ nda ke se mmọ ekefiọkde ete edi nnen-nen.
Owo ekeme ndifehe ñkpọñ esuene mme ukọbọ emi edide ke ekpri ini ke enye ndida ke ñkañ mme anam-idiọk-ñkpọ, edi Abasi ke esese. Ubierikpe emi Enye edinọde mmọ emi enyenede ebuana ye idiọk-ñkpọ ke akpatre, eyesọñ mmọ ndibiom akan ekpri ufen emi owo enyenede ndibọ ke ini emi, ke ntak emi enye ọsọñọde ada ke akpanikọ idahemi.
Ọkpọ-mbañ
Nditọ Israel ema ekabare ebọbiọñọ andinyaña mmọ, enyuñ ebọp Samson ke obufa uruk enyuñ eyak mme Philistine eda enye ekesin ke ñkpọkọbi. Edi Abasi ekemenere Samson onim man ọtọñọ ndifak Israel ndien Enye ama ọnọ Samson odudu ndikibi mme uruk oro nte ñkpri uruk emi ekefọpde ke ikañ.
Samson ama emen akpa ñkpọ emi enye okokutde nte ñkpọ ekọñ ndida ñwana ye mbon Philistine. Oro ekedi ọkpọ-mbañ ass. Samson ama ada ọkpọ mbañ oro ikpọñ-ikpọñ owot tọsin mme Philistine kiet. Abasi ama ọtọñọ ndifak Israel oto ke odudu owo kiet. Nnyin imesikop nte etiñde ete ke Abasi adade ye nnyin, imakan ediwak, okposuk edi idade ikpọñ.
Samson ama enyene akamba edikan ke ekọñ. Idahemi enye ama okop nsatitọñ. Nso iditibe ye enye edieke enye mikwe mmọñ? Nte edikan esie edidi ikpikpu mme nte enye eyekpa nsatitọñ? Samson ama okot Abasi oyom uñwam, ndien uñwam ama edi ke mbiet mmọñ emi okotode ke ọkpọ-mbañ. Samson ama ọñwọñ onyuñ enyene odudu ndiñwana ekọñ efen.
Ofut Spirit
Nnyin imekeme ndida ọkpọ-mbañ emi ndomo ye Ikọ Abasi, ñkpọ ekọñ owo Abasi ndida ñwana ye idiọk-ñkpọ. Apostle Paul ama ewet ete: “Enyuñ eyara erinyaña nte ndun ke ibuot, enyuñ ekama ofut Spirit, emi edide Ikọ Abasi” (Ñwed Mbon Ephesus 6:17); ñko: “Ikọ Abasi enyene uwem, onyuñ ananam ñkpọ, onyuñ ọsọp akan kpukpru ofut iso iba” (Mme Hebrew 4:12). Abasi oyom nnyin ida Ikọ Esie iñwana ye se idiọkde. Edieke satan odomode nnyin man inam ñkpọ, nnyin imekeme ndibọrọ enye, “Ikọ Abasi ọdọhọ mi ñkunam, ndien ami ndinamke.” Ke ini andidiọk okodomode Jesus, se Enye akadade akan ekedi, “Ema ewet ete.” Satan inyeneke odudu ke ibet Abasi.
Nnyin inyeneke ñkpọ-ekọñ ikpọñ ito Ikọ Abasi, edi imenyene odudu idian do. Ini kiet ke ini Prophet Jeremiah ekekerede ete ke imọ ikpọñ ke ererimbot emi ikama Abasi inyuñ ikop uyo Esie, enye ama okut ubak Ñwed Abasi; ndien ọkọdọhọ ete “Emekut ikọ fo, ndien ndia mmọ; ndien ikọ fo ekabare edi ñkpọ idara ye inemesit mi” (Jeremiah 15:16). Enye ikataha ñwed emi ekedade ewet mme ikọ oro, edi enye eketeti onyuñ esin mmọ ke esit esie. Oro ama ọnọ enye obufa uko ndika iso ndu uwem nnọ Abasi.
Nazarite
Nnyin ikemeke nditiñ nte edikan Samson okpokokponde akan se ekedide oro edieke enye okpokodude uwem emi enemde Abasi esit kpukpru ini. Eka esie ama ayak enye ọnọ utom Abasi, nte Nazarite mbemiso enye amana; ndien edieke enye ọkpọkọsọñọde ada ke ediyak idem nnọ oro, enye okpokodu edisana uwem ọnọ Abasi ye owo. Kere baña mme edidiọñ emi enye ọkpọkọbọde edieke enye okpokomumde odudu spirit ye eke ikpọhidem oro akama!
Nditọ emi mme ete ye eka mmọ edide mbon Abasi enyene ata utibe inyene ye akamba utom ñko. Edieke mme ete ye mme eka nnyin ekeyakde nnyin enọ Abasi nnyin imenyene eti editọñọ ke abaña edinyaña ye ndidu uwem owo Abasi. Mme edidiọñ oro etọñọ toto ke ini emi nnyin imanade. Edi edieke nnyin isinde ndisaña ke usuñ emi Abasi ebeñede onim ọnọ nnyin, nnyin iyebọ ufen emi ọdiọkde akan eke mmọ emi mifiọkke Eti-mbuk emi. Ke ibọrọ akam mme ete ye eka, Abasi iditreke ndisin ubiomikpe ke esit ñkpri nditọ, edi Enye idinyañake baba owo kiet ke midighe uduak esie. Owo kiet kiet enyene ndikabare esit, ndien edieke enye esinde ndinam oro, enye eyetak ke nsinsi, okposuk edi nte ete ye eka esie ema ekebọñ akam.
Mbak kiet ke akaña ndidi Nazarite ekedi ndiyak idet ọniọñ, ndien Abasi ama anam saña-saña mbet ke abaña Samson ete ke inaha akadañ ndomo kiet otuk ibuot esie. Idighe kpukpru owo emi enamde akaña, enyuñ eyakde idet mmọ ọniọn enyene odudu nte Samson, edi etie nte ama enyene ebuana emi idet esie ekenyenede ye odudu esie. Adaña nte idet esie okosuk edide anyan mme Philistine ikekemeke ndikan enye.
Ndinam Ufan Ye Owo Philistine
Samson ama ọnọ asua ifet ndiñwana ye enye ke ini enye akasañade ye mme Philistine onyuñ osobo ye Delilah. Ke ini mmọ ekopde ete ke enye okodu ke otu mmọ, mme Philistine ema enọ Delilah ubọkedem man atap enye esin mmọ ke ubọk. Ke ndinam abiaña nte ke imama enye, Delilah ama ebeñe enye ete etiñ ndibe odudu esie ọnọ imọ. Samson ama ọdọhọ ete ke edieke ebọpde imọ ke obufa uruk itiaba (Mkpọsọñ uruk nte enye emi edade willow enam ) ke imọ iyekop mmemidem nte owo efen. Mme asua ema edu do ndibọp enye ndondo oro ke obufa uruk; edi ke ini Delilah ọdọhọde ete,”Mme Philistine emọñ emum fi, Samson ,” enye adaha ada okibi se ekedade ebop enye nte ñkpọ emi ekefọpde ke ikan. Ndien onyuñ ọbọhọ.
Samson ekpekenyene ndifiak edem ñkpọñ Delilah akpan akpan ke enye ama ọkọfiọk ete ke ama atap imọ. Edi enye ama afiak aka; ñko Delilah ama afiak ekpep ndibe odudu esie. Ini enye emi Samson ama ọdọhọ enye ete ke edieke ebọpde imọ ke obufa uruk emi mikadaha ibọp ñkpọ akananam imọ idinyeneke odudu aba. Mme Philistine ema ebọp enye ye obufa uruk ke ini enye edede idap, edi ke ini enye edemerede enye ama okibi mmọ nte emi ekpedide uruk idet. Etie nte Samson ama okop inem ke ndibiaña mme Philistine ye esen-esen ndutiñ emi, edi enye akanam mbubru ye ñkpọ-ndik, ndien usọp-usọp enye ekenyene ndikoduk ubọk asua oto ke ntak mbubru esie.
Ke usen ke usen Delilah ke ekpe enye ubọk ete owut imọ ndedibe odudu esie, ndien ke akpatre mmọñ-eyet esie ama enyene edikan. Samson ama etiñ akpanikọ ọnọ enye, ete ke imọ idu ke akaña Nazarite, ndien ke akanam ke akadañ itukke imọ ibuot, ñko ke edieke edikporode imọ idet ke iyetie nte owo efen. Delilah ama anam ekporo idet esie, ndien ke ini efen emi mme asua esie edide etiene enye, enye ikenyeneke odudu aba.
Ndiduọ Ke Idomo
Owo ekededi eke ebrede ye idomo enyene ndifiọk ete ke eyekan imọ ubọk ke akpatre. Ikọ Abasi oduri nnyin utọñ: “Eñwana ye Satan, ndien enye eyefehe ọkpọñ mbufo” (James 4:7). Samson ama ọduọ ke idomo utu ke ndiwọñọre ñkpọñ enye, ndien mme Philistine ema emum enye enyuñ ebiere ikpe mkpa enọ enye, enyuñ enọ enye ọkpọsọñ ufen ke ufọk-ñkpọkọbi. Ema ekap enyin esie esioño ndien enye okodu ke ekim.
Nnyin imekeme ndikut nnanenyin emi edide etiene andifiak-edem oto ke enye ndikpọñ Abasi. Owo emi enemde Abasi esit esikakan asua esie, edi edieke enye akanade edem owut Andinyaña, satan akabare edi ete-ufọk esie, eyenyuñ anam enye anam ọkpọsọñ utom nte utip ndibeñe mbet mkpa nsinsi. Andifiak edem ọduọk utibe uñwana Eti-mbuk onyuñ etie ke ekim idiọk-ñkpọ, enyin okim enye abaña nti ñkpọ emi Abasi onimde ọnọ mmọ emi emade Enye.
Edikabare Esit
Samson ama enyene ini ndikere mbaña Abasi ke ini ufin esie ke ufọk-ñkpọkọbị. Enye ekebiet idiọk Udọ emi ama eketie “Okut idem esie” ke ufọk-edi ke esen idut ke enye ama akabiat okuk esie ke idiọk usuñ. Samson ama ọfiọk ete ke edi mme idiọk-ñkpọ esie akada mfina oro ọsọk imọ, ndien enye ama akabare esit esie etiene Abasi.
Idet Samson ama ọtọñọ ndikọri, ntre odudu ama oto Abasi edi. Usen kiet ke ini mme Philistine eketorode ndem mmọ ke ndimen Samson nsin mmọ ke ubọk, ema ekesio Samson edi ke iso mmọ man mmọ enam mbubru ye enye. Ediwak owo ema ebono ke akwa ufọk emi odunam oro okoyomde ndida itie, owo tọsin ita ekedu ke enyọñ ufọk oro. Edi ke ebiet emi mme okpono ndem emi ekedude mi ke Samson ekemenere esit ọnọ Abasi Israel, onyuñ ọbọñ akam ete: “Ọbọñ Jehovah, ti mi, mbọk, nyuñ Sọñọ mi idem, ini kiet emi.” Abasi ama okop akam esie onyuñ ọnọ enye utip mbuọtidem esie. Ke Mme Hebrew ibuot duopekiet nnyin imokot ite ke okoto mbuọtidem Samson “ọwọrọ ọkpọñ mmem-idem” onyuñ “akabare okop idem”
Edifiak Ntiene Ikot Abasi
Samson etiñ ete emen imọ esik ekpere ufọt obubọk akwa ufọk oro, emi ekekerede ete ke enye oyom ndibere nduọk odudu. Edi Abasi okokot enye ete osobo mme Philistine, ndien ke akpatre ini uwem esie Samson ọtọñọ ntak emen utom oro anam. Enye ama okot Abasi ete ọnọ imọ odudu, ndien ke enye ama okokot ibifik esin ke idem, ama owuri ufọk oro ofuk akwa udim owo oro. Ama owot mme tọsin. Samson ama akpa ye mmọ, edi ke mkpa esie enye ama owot awak akan se okowotde ke ini uwem esie, do ke Israel ekesio mme asua mmọ usiene.
Questions
MME MBUME- Nso ke Samson akanam eke enye mikesiwakke ndinam?
- Nso ikedi ntak emi ekenamde enye edi ebierikpe?
- Didie ke Samson akanam utom oro?
- Nnyin inam didie ifiọk ite ke Nditọ Israel ikadaha ye Samson?
- Nso ikanam odudu Samson ọkpọñ enye?
- Nso ke mme Philistine ekenam ye Samson ke ini mmọ ema ekemum enye?
- Tiñ yarade nte akpatre usen uwem Samson eketiede.
- Nso ikanam Samson afiak enyene odudu?