Lesson 198 - Junior
Memory Verse
“Sese, ndada ke usuñ ntuak” (Eriyarare 3:20).Notes
Ikot Usọrọ Ndọ
Mme akwa otu, iren, iban ye nditọwọñ ekebono ekanade Jesus ekuk, ndikpañ utọñ ñkop mme mbuk emi Enye ọkọnọde. Mme mbuk oro ema enem, ekenyuñ ebuk mmọ ke usuñ emi ekememde, nte emi ñkpri nditọ ekemede ndifiọk. Ke akande oro, ema ekpep mme ñkpọ ebaña Obio Ubọñ Abasi. Ekekot mme mbuk emi mme ñke.
Ini kiet Jesus eketiñ abaña enyene inyene edidem kiet emi eyen esie okoyomde ndidọ ndọ. Enye ekedi eti edidem emi akamade ikọt esie, enye okonyuñ oyom kpukpru mmọ edi edidia usọrọ ndọ ye akamba usọrọ emi etienede ke edem.
Afo emekeme ndikere ete ke kpukpru owo ekpenyene udọñ ndikut edidem ye ọbọñ añwan edọde ndọ, ndinyuñ ñkut esit okure edidem. Nyuñ kere baña kpukpru nti ñkpọ emi mmọ ekpekediade! Mme owo emi esikade utọ akwa usọrọ ndọ oro mfin, ekeme ndidi ema enim okuk ke anyan ini man edikeme ndisine ata ediye ọfọñ ke usen oro; mmọ enyuñ edomo ọkpọsọñ ndinyene mme enọ eke efọnde ekan ndinọ mme ọdọ ndọ emi.
Edi mmọ emi Jesus eketiñde abaña ikenyimeke ndika akwa usọrọ ndọ oro. Edidem ama ọdọñ nditọ ufọk esie eka mme ufọk ikọt esie ete ọkọnọ mmọ ikot usọrọ ndọ, edi mme mmọ emi ikọnọhọ mkpañ-utọñ. Ndusuk mmọ ekeka ke iñwañ mmọ ndinam utom, utu ke ndibọ nduọk-odudu emi edidem ọkọnọde. Mmọ eken eka ke obio ndidep ñkpọ. Owo kiet-kiet ama enyene mbubehe emi akanamde enye etre ndika ke okure edidem ñkadia akwa usọrọ oro.
Edidem ke akpanikọ ekekere ete, ke ndudue ama odu. Ndusuk ini, mme mmọ emi ikọfiọkke ini ndidi. Ntre ke enye ọkọtọñọ ntak ọdọñ nditọ ufọk esie ekedọhọ ete ke ema enam udia ema, ewot enañ ye mme unam eke esehede, ebeñe idem ndidia akwa usọrọ ndọ. Edi mme owo ikenyimeke ndika. Ndusuk mmọ
Onyuñ ewot mme isuñ-utom emi ekedade eti mbuk esọk mmọ. Ọsọñ eti-eti ndifiọk ntak emi owo ekededi akpanamde ntre, nte idighe ntre? Edieke ekpekekotde fi ke utọ usọrọ ndọ oro, ñkere nte afo okpokoyom ndika; ndien ọkpọdọñ fi eti-eti tutu ukemeke ndide idap ke okoneyo oro.
Usọrọ Eke Abasi
Nnyin imetiñ ite ke ñke edi mbuk eke enọde ke ererimbot emi, etiñde abaña ñkpọ obio heaven. Yak nnyin ise anie akada ọnọ edidem emi okoyomde ndifọn mfọn ye ikọt esie. Emi edi Abasi ete, emi enyenede kpukpru odudu ke Heaven ye ke isọñ, emi enyenede mme unam ke tọsin ikpọ obot. Enye oyom ndinam eti ñkpọ ikpọñ-ikpọñ nnọ Ikọt Esie, koro Enye ototim ama mmọ.
Owo kiet-kiet enyene ikot ke usọrọ Eti-mbuk; ikpanaha owo ekededi ataba enye. Edi mme owo ke enọnọ mfaña ukem nte ekenamde ke ñke emi Jesus ọkọnọde. Mmọ eneñede esin ifik enam utom enọ idem mmọ, edomo ndikọ inyene, mme ndibọ inemesit ñkpọ ererimbot emi, edi ibọrọke ibaña ikot Ọbọñ ndibọ erinyaña ukpọñ.
Mme Jew Ke Akpa Itie
Akpa ikot emi ekenọde ekenyene mme Jew saña-saña. Mmọ ekedi mmọ emi Abasi ekemekde, ndien Enye ọkọnọ mmọ akpa itie. Edi ke ediwak ini mmọ ekesiwọñọde ekpọñ Abasi, ekabare ekpono ndem, Mmọ ikenyimeke ndikpañ utọñ nnọ mme Anditiñ-ntiñ-nnim-ikọ emi ekedade ikot Abasi esọk mmọ. Abasi ọkọnọ ediwak mme Anditiñ-ntiñ-nnim-ikọ ekedade ikot Abasi esọk mmọ. Abasi ọkọnọ ediwak mme Anditiñ-ntiñ-nnim-ikọ etiene mme emana efen, ndien Enye ọkọdọhọ ete: “Ami ñko nnyuñ ndọñ kpukpru ikọt mi mme Anditiñ-ntiñ-nnim-ikọ utom ke ọtọ mbufo, mbabak ndọñ, nte, Mbọk, mbufo kpukpru ekabare ekpọñ idiọk usuñ mbufo ... ndien mbufo ikpañke utọñ mbufo, inyuñ ikopke inọ mi” (Jeremiah 35:15). Ke akpanikọ, mmọ ema etọñọ mme Anditiñ-ntiñ-nnim-ikọ ke itiat ke ntak eti ikot mmọ.
Ke ini Jesus okodude ke ererimbot, Enye ama afiak ọnọ mme Jew ifet efen; Enye akafiak ọnọ ikot efen esọk mmọ. Mmọ ñko ekefiak esin. Enye ọkọnọ mmọ item ete ke mmọ idotke ndidia mme ufọn Imọ, do ndien mme akpa mmin ye mme ndiọi owo enem esit ndidi usọrọ oro.
Ubierikpe
Ke mbuk emi Jesus eketiñde, edidem ama enyene ofuri odudu ke idem mmọ emi enye akarade, ntre enye ama ayat esit eti-eti ye mmọ koro mmọ kpukpru eketrede ndidi, oro anam enye ọdọñ mbon ekọñ ekesobo mmọ. Ntem enye ọkọdọhọ nditọ ufọk esie ete eka ke mme efak obio, ye ke ññwaña usuñ, enyuñ ekot kpukpru isen owo edi usọrọ imọ. Enye ọkọdọhọ ete ke ikọt imọ idotke nditie ke okpokoro imọ, ke ntre enye eyenọ ikot etiene mmọ emi edimade mfọn-ido esie. Ata ediwak owo ema edi ke okure edidem. Ndusuk ekedi nti owo ndusuk ndiọi, edi edidem ama adara ndikut mmọ kpukpru.
Ke ini mme Jew ekekọñde Jesus, ema ekabare enọ mme Gentile akwa mfọn iso ye Abasi. Ata ediwak Jew ema ebọ ubierikpe nte mmọ emi ekesobode ke mbuk Edidem. Ata ediwak owo ke otu mme Jew ema ekpaña ke ini ekebiatde Jesus, ema ekabare enọ mme Gentile akwa mfọn iso ye Abasi. Ata ediwak Jew ema ebọ ubierikpe nte mmọ emi ekesobode ke mbuk Edidem. Ata ediwak owo ke otu mme Jew ema ekpaña ke ini ekebiatde Jerusalem ke 70 A. D, ata ediwak ñko ke ekaka iso ndibọ ufen tutu osim mfin emi. Ke Ekọñ Ofuri Ererimbot Ọyọhọ Iba, se iwakde ikan owo 6,000,000 ke ekewot, ñkukure ntak edi koro mmọ ekedi mme Jew. Mme Jew ema esin ikot Abasi, ewot mme isuñ-utom emi ekedade ikot edi, ndien ke akaptre ema ekọñ Jesus ke Idem Esie ke eto.
Ọfọñidem Ndọ
Mme ñkpọ efen ema edu ke mbuk emi Jesus eketiñde. Edidem ama adara akwa otu owo emi ekedide; edi nte enye akasañade ese mbio usọrọ esie, enye ama okut owo kiet emi akasañade otime otime. Enye ikesineke ọfọñ idem-ndọ emi edidem ọkọnọde, ntem ke enye ọkọkpuhọre eti-eti. Owo emi ikenyeneke ido ikem nte okponimde mme ewuhọ okure edidem.
Edidem ama ọfọn ido, okonyuñ okot esen owo oro “Ufan”, onyuñ obup ntak emi enye mikesineke ọfọñidem ndọ. Ndusuk ini edieke owo ubuene emi ekpekenyenede eti ntak edidem ọkpọkọnọ enye ifet ndisine ọfọñ. Edi owo emi ikafañake. Ekedi ndisime edu uwem ke ñkañ esie, ndien enye ikenyeneke se etiñde abaña. Enye ikonimke mme ewuhọ edidem, ke ntak oro enye ekenyene ndibọ ufen. Edidem ọkọdọñ ikọt esie ete emen enye ewọrọ eketop enye eduọk ke ekim ke esien do ke eritua eyet ye erita edet okodu.
Ikot Eti-mbuk ke akaka iso. Ekot nnyin kpukpru; nnyin kpukpru imenyene ifet ndidia mme ufọn Obio Ubọñ Heaven. Edi nnyin inyene ndibeñe idem mbet enye. Abasi ke ọnọnọ owo kiet-kiet “Ọfọñidem ndọ”, oro edi “edisine ñkpọ edinen ido”, “afia edisine ñkpọ” eke ndisana ikọt Abasi. Mme ikọ oro etiñ ebaña idaha owo Abasi ke ñkañ Spirit. Ke akpa ifet, enyene ndifen mme idiọk-ñkpọ esie. Ke oro ebede, enyene ndiyet enye asana, esine enye mme mfọn Abasi. Ke emi okurede, enye ebeñe idem ndibọ uduọk mmọñ Edisana Spirit, emi ọnọde owo odudu ndinam utom nnọ Abasi. Ke ini enye adade se Abasi ọkọnọde enye, ndinam utom nnọ Jesus, enye esine ọfọñidem ndọ, onyuñ ebeñ idem ndika Usọrọ Ndọ Eyen Abasi emi kpukpru nnyin ñko ikpepde ibaña. “Owo eke akande, eyesine enye afia ọfọñidem ntem; ndien ndisioho enyiñ esie mfep ke ñwed uwem, ndien nyenyime enyiñ esie ke iso Ete Mi ye ke iso mme angel Esie (Eriyarare 3:5).
Ema ebeñe kpukpru ñkpọ enọ nnyin, ndien nnyin idinyeneke mfaña ndinọ edieke nnyin mibeñeke idem ke ini Jesus okotde nnyin. Nnyin ikuyak ñkpọ ndomo kiet ọbiọñọ nnyin ke ndinam mbenidem oro emi ediberede mme Usuñ okure Edidem ọnọ nnyin ke ini edisiande Usọrọ-ndọ Eyen Erọñ. Ata ntọtuñọ ekikere nnyin ke usen ke usen ekpedi, “Edieke ikot edide mfin, Ami mebeñe idem ndika”.
Questions
MME MBUME- Ekebem iso enọ ikot usọrọ ndọ esọk mme anie?
- Nso idi ntak emi mmọ mikodotke?
- Anie ọkọbọ akpatre ikot usọrọ?
- Da mme owo ke mbuk emi domo ye mme andiduñ ererimbot.
- Nnyin ikeme ndinam nso ndiwut mbene-idem usọrọ emi?
- Nso iditibe inọ mmọ emi edomode ndinọ mfaña?
- Ini ewe ke nnyin ikere ndikop ikot usọrọ ndọ?