Lesson 200 - Junior
Memory Verse
“Jehovah okot Samuel: ndien enye ete, se mi mi” (I Samuel 3:4).Notes
Ekọm Ke Ibọrọ Akam
Akam Hannah ekedi ikwọ ekọm. Esit esie ọkọyọhọ ye nditoro Abasi koro Enye ama ọbọrọ akam esie. Ke ini efen ke edem, enye ama asaña ye ebe esie aka ke Shiloh “ndituak ibuot, nnyuñ ñwa uwa nnọ Jehovah mme udim”. Hannah ama oyom ñkpọ emi ọfọnde eti-eti onyuñ ọsọñde urua ke esit-esit esie ndinọ Ọbọñ. Enye ikenyeneke nditọ, edi ama ọbọñ akam ete yak Abasi ọnọ imọ eyen eren. Onyuñ ọñwọñọ ete ke iyeyak eyen oro inọ Ọbọñ man anam utom Esie. Nte enye akatuade onyuñ ayakde idem esie ke iso Ọbọñ, enye ama ọbọñ akam emi okotode esit esie. “Mkpọk-inua esie enyuñ enyeñe, edi owo ikopke uyo esie”.
Ndiyak Ñnọ Abasi
Ke ibọrọ akam oro, Abasi ama ọnọ Hannah eyen eren emi enye okokotde Samuel. Ke ini enye ekedide kaña eyenọwọñ, eka esie ama ada enye aka ufọk Abasi ke Shilon. Man okosio akaña esie, enye ama ada eyen eren esie, ñkukure eyen esie ke ini oro, man akayak enye ọnọ Abasi. Eli ekedi andise ñkpọ mbaña ufọk Jehovah. Hannah ama ọkpọñ Samuel do ọnọ enye man eyen esie ekpekpep mme usuñ Abasi okponyuñ anam utom Esie.
Itoro Andinọ
Ikwọ Hannah ekedi akam emi okotode esit esie ke adaña emi akayakde Samuel ọnọ. Enye akadara onyuñ enem esit koro Abasi akanamde akamba ñkpọ ọnọ enye. Emi ọkpuhọre didie ye akam ndusuk owo ke ini mmọ edomode nditiñ nnọ Abasi mme ñkpọ eke mme imọ inamde inọ Enye ye se inọde Enye! Hannah ikakam isiakke siak saña-saña enọ-ikwọ emi Abasi ọkọnọde enye. Mme enye nditiñ prophecy nte ke eyen imọ edidi akamba owo, onyuñ anam nti ñkpọ. Hannah ekemenere Abasi, Andinọ, idighe Samuel emi ekedide enọ. Enye ọkọdọhọ ete, “koro edinyaña fo adatde mi esit ... koro efen miduhe ke mibọhọke afo”.
Ikwọ ekọm Hannah ama ebiet ikwọ edikan David eti-eti; “Mmama fi, O Jehovah, odudu mi! Jehovah edi akwa itiat mi, ye ufọk ekọñ mi ye andinyaña mi; Abasi mi edi akwa itiat mi; nyebuọt idem mi ye enye; otu-ekọñ mi, ye nduk erinyaña mi, ye edikọñ ebiet mi. Nyeseme nnọ Jehovah, emi ekpetorode” (Psalm 18:1-3).
Hannah ama atuak ibuot ọnọ Abasi ke mfọn-mma Esie ye ọniọñ Esie. Nte enye eketiñde abaña odudu Abasi ye akpanikọ Esie, enye ama etiñ ñko abaña mme ñkpọ eke enye ekenyenede ifiọk abaña. Mme owo esiwak ndida itoro nnọ idem mmọ, ke abaña eti ñkpọ ekededi emi odude ke uwem mmọ. Edi Hannah ama ọfiọk ete ke Abasi edi andinọ odudu, inyene, idaha ye edidiọñ ke uwem nnyin. “Jehovah anam owo ebuene, onyuñ anam enyene ñkpọ: enye ọduọk ke isọñ, onyuñ emen onim ke enyọñ”.
Mme Ntiñ-Nnim-Ikọ
Hannah iketiñke se Abasi akanamde ke ini edem ikpọñ, edi ama etiñ abaña ini iso ñko. Akpanikọ Abasi ke ini edem ama ọnọ enye nbuọtidem ke abaña ini iso. Ke esede edikan emi otode uñwam Ọbọñ, Hannah ama etiñ esin ofuri ikọt Abasi. “Enye eyekpeme ukot mbon ima esie”. Mme utibe ikọ emi ewut mbuọtidem ye idorenyin ke Abasi. Mmọ ñko edi eñwọñọ ọnọ ikọt Esie, koro Abasi ekedemere Hannah nditiñ mmọ. Ikọt Abasi ekpenyene ndinim ke akpanikọ, enyuñ enam item enyuñ ebuọtidem ke Enye.
“Koro midige ke odudu ke owo ọsọñ idem”. Abasi eyekpeme onyuñ ọnọ ke odudu ke owo ọsọñ idem”. Abasi eyekpeme onyuñ ọnọ mmọ eke eberede edem ke Enye edikan. Gideon edi ata eti uwut-ñkpọ nte ke edikan itoho ke odudu ediwak owo. Nnyin ima ikpep ibaña Gideon ye ekpri udim ekọñ 300 esie emi ekebinede enyuñ esobode ofuri udim ekọñ Midian emi ekewakde eti-eti tutu mmọ ye mme camel mmọ ikenyeneke ibat (Ọyọhọ Ukpep-ñkpọ 194).
Mbon utọk Jehovah edi mmọ eke midaha ye Enye. Mmọ edi mme asua Esie. Hannah ama ọdọhọ ete ke “enyenuak” mmọ. Oro ekedi se ikadade itie ke eyo Nditọ Israel, ama onyuñ aka iso ntre ke Hannah ama ekpeme onyuñ anyaña ikọt esie.
Esie ke adaña emi esobodesobo mme asua Esie. Ntre ke edisuk edi tutu esobo akpatre asua (1 Ñwed Corinth 15:25, 26) ndien Christ akara ke nsinsi nsinsi (Eriyarare 11:15).
Ediwak ukpep-ñkpọ edu enọ nnyin ke ediye akam Hannah emi. Nnyin ikpakam ikpep ndibuak itoro ye ekọm ke akam nnyin! Nnyin ikpakam imenere Abasi edinyaña nnyin, inyuñ ifiọk ite iyenyene ukem idara emi Hannah ekenyenede ke adaña emi nnyin inọde Ọbọñ se ikperede nnyin ye se imade ikan ke esit nnyin, ñko adaña emi ikpede mme akaña nnyin, kpa ye mme mmọ oro ikakañade ke ini idude ke nnanenyin (Psalm 66:13, 14)!
Samuel
Nso ikotibe ye ekpri eyen-eren oro, Samuel, emi Hannah ọkọnọde Jehovah ke “ebuọt”? Hannah ikefreke enye, ikonyuñ idọhọke ite utom imọ okure ke ibuot esie. Kpukpru isua enye esinam ekpri ọfọñ-idem onyuñ ada ọsọk enye ke ini enye akade Shiloh ndifọp uwa ke isua ke isua. Ke akpanikọ, ini kiet ekededi emi enye okutde Samuel, Hannah ama esiti akwa mfon-ido Abasi ke edibọrọ akam esie.
Ndinam Utom Nnọ Abasi
Samuel aka iso ọkọri. Enye ama okut unen ke iso Abasi ye ke iso owo. Enye ama esin ifik onyuñ “anam ñkpọ Jehovah ke iso Eli”. Ndusuk owo ekeme ndidọhọ ete ke utom iduhe inọ eyenọwọñ ke Gospel emi. Utom ama odu ọnọ Samuel, enye ñko ekedi eyenọwọñ. Ekeme ndidi enye ekesika utom ọnọ Eli onyuñ añwam ke nditim ufọk Jehovah nnim nte ọfọnde. Idiọk uwem nditọ Eli ye nsọñibuot mmọ ndinam ñkpọ nte emade, ikanamke Samuel ọdiọk. Samuel ama enem-esit ndidu ke ebiet emi eka esie akayakde enye ọnọ. Enye ọkọdọhọ ete, “Adaña ini nte enye edidude uwem, enye edi ebuọt Jehovah”.
Ikot Esie
Ikekureke ke eka esie ndiyak enye nnọ. Abais ama okot Samuel ke idem esie ñko. Eyen emi enyenede mfọn iso akan edi enye emi ete ye eka esie eyakde enọ Abasi. Ndusuk ete ye eka fo ema eyak fi enọ, edi Abasi oyom afo ayak uwem fo ọnọ Imọ. Abasi oyom afo eyere ikot emi Enye okotde fi. Abasi oyom mbon utom emi enyimede ke ofuri esit, emi edinyimede ndida itie emi Enye ọnọde mmọ.
Ndinyime Ikot Abasi
Abasi akayarade idem owut Samuel ke ata utibe-usuñ. Ke okoneyo kiet ke adaña emi Eli ama okoduk ke bed, ndien Samuel ọsuhọre ana ndide, Samuel okop nte ekotde enye enyiñ. Ke ndikere nte ke edi Eli okoyom imọ, Samuel nte eti asaña-utom efehe aka ubet Eli. Edi Eli ete imọ ikokotke onyuñ anam enye afiak akanana. Ama otibe ntem ikata tutu ke akpatre, Eli ama ọfiọk ete ke edi Abasi okokot Samuel. Eli ama ọdọhọ Samuel ete yak eyere ke ini uyo Abasi okotde enye.
Samuel ọtọñọ ntak aka ọkọsuhọre anana, ke ekere ke esit esie mme Abasi eyetọñọ ntak okot sia enye mikeyereke ke ini Abasi okokotde ke akpa. Samuel ama ebeñe idem ndikpañ utọñ nnọ uyo Abasi. Ekedi akamba ifet ye utom ọnọ Samuel ndifiọk uduak Abasi. Ọbọñ edi, onyuñ ada, ndien okot, “Samuel, Samuel”. Enye ọbọrọ, “Dọhọ; koro owo fo ọmọñ okop”.
Ikot Abasi
Ndusuk ikot eke Abasi okotde fi idighe nte eke Samuel. Abasi ekeme ndikot fi ke enyiñ nte Enye okokotde Samuel, edi onyuñ ekeme nditre. Ndusuk ini Abasi esitiñ ke suñ-suñ uyo. Ediwak ini esitiñ ke esit. Esinam owo ọfiọk nte ke idiọk-ñkpọ modo ke esit ye uwem owo. Abasi esiwut owo udọñ ndiyom Andinyaña. Ekeme ndidi afo emenyene udọñ ndibọñ akam nnyuñ mbeñe Abasi ete efen ke mme idiọk-ñkpọ fo. Ekeme ndidi afo emenyene udọñ ndidi owo Abasi ndinyuñ mfiọk ete ke emenen ye Abasi. Oro edi ikot eke Abasi okotde fi. Ekeme ndidi afo ukọfiọkke ke akpa. Tọñọ ke ini emi ka iso, afo enyene ndifiọk ete ke Abasi oyom fi eyere nte Samuel, ‘Dọhọ; koro owo fo ọmọñ okop”. Kpa ke idem ini emi owo ama ọkọbọ edinyaña, Abasi ekeme ndikot enye ndọñ saña-saña utom, ndinam ata akpan utom nnọ Enye. Ima fo ke Ọbọñ ye ke utom Esie akpakam enyik fi eyere Enye ete, “se mi mi “.
Etop Emi Ekedọñde Enọ Samuel
Abasi ama enyene etop ọnọ Samuel. Ikabañake Samuel ke idem esie. Abasi ikọdọhọke ite ke iyenam Samuel edi akamba owo, mme ke Samuel enyenam mme ikpọ. Akpa etop emi Abasi ọkọdọñde ọnọ Samuel ekedi ibio-ibio; ekedi mfuhọ-mfuhọ; ndien ekenyene owo eñwen. Etop oro akabaña ufọk Eli.
Mbemiso osim ini emi, Abasi ama oduri Eli utọñ ete ke enye ikedighe oku emi anamde akpanikọ, ñko ke enye ama okpono nditọ esie akan nte enye okponode Abasi. Eli ama ọfiọk ete ke nditọ esie ekedi oburọbut. Ema etiñ enọ enye ete ke nditọ esie oro eyekpaña usen kiet, ndien ke Abasi eyenam oku efen emi edinamde akpanikọ adaha ada. Eli ye nditọ iren esie ikebeñeke Abasi ite efen ọnọ mme imọ. Utu ke oro, mmọ ekesuk ekaka iso enam kpa nte eke akpa, inamke ntọt Abasi.
Idaha emi, Eli ama ọsuhọre idem esie ndibup Samuel, ekpri eyen ye eyen ufọk esie, mbaña etop oro otode Abasi. Eli ikofubeke ufup mme ndinyene idiọk esit ite ke Abasi ama etiñ ikọ ọnọ Samuel utu ke etiñ ọnọ imọ. Eli ama anam nnen-nen okposuk edi ekedide ñkpọ but ọnọ enye. Samuel ama etiñ kpukpru etop oro ọnọ Eli. Ikodipke ndomo ñkpọ kiet. Enye ikokopke inemesit ke ndimen idiọk etop emi nsọk Eli, edi Samuel ama anam akpanikọ onyuñ okop uyo ọnọ Abasi.
Edikabare Esit Ikoduhe
Etop emi Abasi ọkọdọñde ọkọwọrọ ete ke Enye idifenke ke mme idiọk-ñkpọ nditọ iren Eli. Ubierikpe emi ama ọsọñ eti-eti edi ekedi nnen-nen, koro owo ikemeke ndisuk nnam idiọk nnyuñ nnyọñ ke ifure. Mmọ ikakpañke utọñ inọ ntọt Abasi, mme nduari eke Eli (1 Samuel 2:24, 25). Mmọ ema esabare uwa Jehovah ( Samuel 2:15-17). Mmọ ekedi mme anditiene satan ikonyuñ ifiọkke Abasi (1 Samuel 2:12). Mmọ ema eka iso enam idiọk tutu Abasi ikọnọhọ mmọ aba ifet ndikabare esit (Genesis 6:3; Mme Ñke 29:1). Eli ama okut esuene ye unana koro enye eketrede ndinam utom esie. Enye ama esisua ọnọ nditọ esie iren, edi ikọnọhọ mmọ ufen ke ini ọkọfiọkde abaña mme idiọk-ñkpọ mmọ ye ke ini ekedide enye emi ọkpọtunọde mmọ ke ido edinam ñkpọ mmọ ke ufọk Jehovah.
Ukpono Emi Ekenọde Samuel
Abasi ama anam etop oro Samuel akadade ọsọk Eli ọwọrọ osu. Emi ama ada ukpono ọsọk Samuel, okonyuñ ọsọñọ owut ete ke enye edidi prophet Abasi ke iso ofuri Israel. Abasi ama odu ye Samuel. Abasi ndidu ye Samuel ama ada ediwak ọniọñ ye mfọn ọnọ Samuel ukem ukem nte edinyuñ edide ye nnyin mfin.
Questions
MME MBUME- Nso idi ntak emi akam Hannah ọkọyọhọde ye ekọm ye itoro?
- Nso idi ntak emi enye akayakde Samuel “ọnọ” Jehovah ke ebuọt?
- Nso idi ntak emi akanade nte Hannah ayak Samuel ọnọ Jehovah?
- Nso utọ owo ke Eli ekedi?
- Nso idi ntak emi Samuel mikeyereke Abasi ke akpa ifet?
- Nso ke Samuel ọkọbọrọ ke ini enye ọkọfiọkde ete edi Abasi okokot imọ?
- Etop emi Abasi okotobode Samuel ekenyene anie?
- Nso idi ntak emi Abasi mikefenke inọ nditọ Eli?