Lesson 202 - Junior
Memory Verse
“Jehovah edi ebiet ukpeme mi; Abasi mi onyuñ edi akwa itiat ubọhọ mi” (Psalm 94:22).Notes
Ekim Eke Spirit Ye Uñwana
Ke ini emi Ekebe Ediomi Abasi okodude ke otu mme Philistine, obio kiet kiet emi ekenimde Ekebe emi, ema ebọ ubiere-ikpe Abasi. Ke ini Ekebe emi afiakde ọnyọñ idut Israel, mme Philistine ema ekop inem-esit.
Ikọ Abasi okodu ke esit Ekebe Ediomi Abasi, ndien ibet emi eketie ye Israel nte Bible etiede ọnọ nnyin. Imokop nte edọhọde ete ke Ñwed Abasi esibem ntatenyin iso, ndien ebiet ekededi emi mme owo esukde ibuot enọ mbet Esie, Abasi esidiọñ mmọ. Nso inam ndien mme Philistine mikenyeneke edidiọñ Abasi ke ini Ekebe Ediomi Abasi okodude ye mmọ? Edi koro mmọ mikonimke mbet mme ndikpono Abasi. Mmọ ekedi mme okpono ndem emi mikoyomke ndifiọk akpanikọ; ke ntre ke ini Ikọ ekedide etiene mmọ, mmọ enyuñ esinde enye, ema ebiom mmọ ikpe ke uwem ibak mmọ.
Ikọ Abasi mfin ada uñwana ọsọk mmọ emi enimde enye ke akpanikọ. Edieke owo enyenede ifet ndifiọk akpanikọ emi odude ke Ñwed Abasi, ndien mmọ esin ndidu nte asañade ekekem ke akpanikọ emi, uñwana oro akabare edi ekim ọnọ mmọ, kere ndien nte ekim oro okponde. Mmọ edu ke itie ọdiọkde akan mmọ emi akananam mikopke ibaña Jesus.
Idahaemi Ekebe Ediomi emi okodu ye owo ufọk Levi, ndien mmọ ekama enye nte ọfọnde. Abasi onyuñ ọdiọñ mmọ. Ke ediwak isua ema ekebe ke adañemi Ekebe odude ke ufọk Obed-edom, anditiñ-ntiñ-nnim-ikọ Odọhọ abaña enye ete: “Ndien ekebe Jehovah etie do ke ufọk Obed-edom Gittite ke ọfiọñ ita: Jehovah onyuñ ọdiọñ Obed-edom, ye ofuri ufọk esie” (2 Samuel :11).
Edidiọñ Emi Odude Ke Ubiomikpe
Israel ema enyene ñwọrọ nda edidiọñ ke adañemi Ekebe Jehovah okodude ye mmọ. Ekedi edidiọñ ubiomikpe ke abaña mme idiọk-ñkpọ mmọ, edinyene mfuhọ ke abaña ndudue emi mmọ ekenamde Abasi. “Ofuri ufọk Israel etua eyom Jehovah”.
Emekeme ndikere ete ke mfuhọ emi ubiomikpe ekamade idighe edidiọñ, edi, ubiomikpe ada mme anam idiọk ọsọk Abasi. Ke ini owo enyenede ubiomikpe ke esit, enye odu ke ọkpọsọñ mfuhọ. Ndusuk ini, idinyeneke udọñ ndidia udia mme ndide idap. Ndik ekeme ndinam, enye ekere ete, imọñ ikpa idaha oro, mme ke Jesus ọmọñ edi, ndien ke eyekpọñ imọ isaña ibe ke akwa ukut. Owo emi Abasi etiñde ikọ ọnọ ke usuñ ntem, ndusuk ini esiyom nte Abasi ọkpọkpọñde imọ. Edi owo ọkpọkọm Abasi adaña didie ke abaña ubiomikpe!
Edieke edide anam idiọk, kere edieke Jesus ekpetrede nditọñọ ntak nnọ fi ubiomikpe ke abaña idiọk-ñkpọ. Ukpenyeneke udọñ edikabare esit aba nnyuñ nnyene edinyaña, ndien afo akpatak ke nsinsi. Afo ukemeke nditiene Jesus ke ini eke afo amama. Spirit Abasi enyene ndiduri fi nsọk Enye. Yere ke ini Enye okotde onyuñ ekpede ye afo ke ima ete di ke ufọk Ete, ọtọ oro afo edibọhọde ke nsinsi.
Kere baña mme edidiọñ emi etienede ubiomikpe, ke ini anam idiọk onyimede, onyuñ akabarede ọkpọñ idiọk-ñkpọ esie, onyuñ ọbọhọde, Mbiomo ọnyọñ. Uwem akabare edi obufa ọnọ enye. Enye edi obufa owo ke Christ Jesus. Ifiop esit, idiọk edu, ye editiñ uyat-uyat ikọ ebe efep. Se idade itie eyedi ikwọ idara, Spirit mfọnido ye mmọ efen, ediñwam mmọ emi edude ke unana, ndien se ikponde ikan edi idoreyin nsinsi uwem ye Jesus. Kpukpru emi oto koro Abasi ama ayak ubiomikpe odori anam idiọk man enye ofuhọ abaña mme idiọk-ñkpọ esie onyuñ oyom edifen.
Ñkabare Esit Nditọ Israel
Ubiomikpe akanam nditọ Israel eseme ke iso Ọbọñ. Owut mmọ ete ke mmọ ema ebiat ediomi Esie ndien mmọ efuhọ eti-eti ebaña mme idiọk-ñkpọ mmọ. Nso ke mmọ ekeme ndinam idaha emi?
Samuel ekedi ebiere-ikpe, okonyuñ edi ata Anditiñ-ntiñ-nnim-ikọ Abasi, ndien ama ekeme nditiñ nnọ mme owo se akpanade mmọ enam. Edieke mmọ ekabarede esit, Abasi eyefen ọnọ mmọ onyuñ anam mmọ ekop inemesit. Mmọ ndien ekpenyene ndibiat idiọk-ñkpọ ye ndem emi okodude ke otu mmọ.
Nditọ Israel ema ekop inem ndinam se ededi eke Abasi okoyomde mmọ enam. Mmọ ema emek ke usen oro ndisaña ye Abasi ke ofuri usuñ. Imesikop nte nditọwọñ etrede ikọ ntiense mmọ ye ikọ emi Nyom ndisnaña ye Abasi ke ofuri usuñ”. Oro edi ukem-ukem se Abasi oyomde nnyin inam, kpa “ndisaña ke ofuri usuñ”.
Ke ini anam idiọk akabarede esit, enye ọñwọñọ ndiyak uwem esie nnọ Abasi, ndinam se ededi eke Abasi oyomde. Enye onyime ndiyak mme ñkpọ eke ayatde Abasi esit, nte mme ñkpọ inemesit ererimbot emi, nsu ye eñwan. Ekeme ndidi enye idọhọke Abasi ite ke iyeyak ñkpọ kiet-kiet, koro enye ikemeke ndikere mbaña kpukpru mmọ ini kiet ke ini enye akañade uwem esie ọnọ Abasi, eñwọñọ oro ọdọñọ kpukpru ñkpọ.
Nditọ Israel ema ebiat mme ndem mmọ. Emi ekedi ndiwut nte ke mmọ etọñọ ndikabare esit. Ndien Samuel okot mmọ eka ke Mizpeh man mmọ enyene mbono akam. Samuel ekedi ọkwọrọ-ikọ emi akanamde akpanikọ, andiwat asaña ke mme ebiet mme ebiet ñkpep mme owo usuñ ndinam ñkpọ nnọ Abasi, kpa nte eti asaña utom Ọbọñ, enye ekesima ndibọñ akam mbaña mme owo emi eyomde erinyaña.
Edidemere Ke Mizpeh
Nso utọ edidemere ikodu ke Mizpeh ke adaña emi akwa udim nditọ Israel ekabarede esit mmọ etiene Abasi! Kere nte ekenemde Samuel ke ini mme owo emi ebọñde akam eyom erifen! Ndikut nte anam-idiọk ọbọhọde esinem nditọ Abasi kiet-kiet esit; ndien idara ñko esidu ke Heaven ke adaña emi ekutde ukpọñ kiet emi okosopde. Idara eketie didie ndien ke otu mme angel ke ubọñ, ke adañaemi mmọ ekopde ikwọ itoro eto akwa otu mme anam idiọk, emi ema ekefen enọ mmọ. Itoro esiyọhọ esit mme ukpọñ emi Abasi afakde. Ebiat odudu satan, ndien ima Abasi akara esit mmọ. Edi satan iduọkke odudu ke eñwañ.
Mme Idomo
Ke ufọt kpukpru idara emi ke Mizpeh, mkpo ama odu. Mme Philistine ema eka eñwan. Satan ama aka ndidomo ndibiat mme edidiọñ akwa edidemere oro. Idahaemi Abasi emenen iso ye Israel, ndien edi Enye oyom ndiñwana mme ekọñ mmọ. Ke akpa ifet, Israel eketie nte mmọ emi ebọhọde ke uwem idiọk-ñkpọ obufa, emi mifiọkke se Abasi ekemede ndinam nnọ mmọ ke ini emi edomode mmọ. Mmọ ema ekop ndik enyuñ eseme enọ Samuel ete ọbọñ ọkpọsọñ akam abaña mmọ. Samuel ama anam, ndien nso utọ ibọrọ ke enye ọkọbọ! Jehovah otop akwa uyom obuma emi akanamde mme Philistine edikhe enyuñ edu ke ndutime, ndien ekedi mmem-mem ñkpọ ndibin mmọ mfep.
Edi ñkpọ inemesit ndikut nte Abasi añwanade mme ekọñ nnyin. Ekeme ndidi owo emi enyañade obufa akanam ikwe nte Abasi anamde emi ke uwem esie, edi ñkpọ akwa idara ke esit esie.
Ọyọhọ Edikan
Nditọ Israel esin mme Philistine efeñe, mmọ enyuñ ebine mmọ tutu osim ke Beth-car. Nso utibe erikan! Israel akananam ikwe utọ erikan oro tọñọde ke ini Joshua ye Gideon. Mme ini ema edu emi mmọ ekesibinde ekpri ibat mme Philistine, oro ekesidi ke mmọ ema ebume ediwak ñkpọ eto Nditọ Israel. Israel ema enyuñ eyuhọ ke mme ubak-ubak edikan oro.
Edi idahaemi Israel enyene ọyọhọ erikan. Mmọ ema ebin mme Philistine efiak enyọñ ke isọn mmọ. Ekeme ndidi ufọk ke isoñ mmọ. Ekeme ndidi ufọk mme Philistine ekedu ke mkpaidem ndikut nte mbon ekọñ mmọ ekefeñede enyoñ edi ye ndik eyom uwem, ikamake baba mbuñwum iñwañ, ye enan ye erọn emi mmọ esikamade enyọñ ke adaña emi mmọ ekade ekọñ ye Israel.
Spirit Ekọñ
Akwa ukpuhọre ama odu ke nna Israel. Mmọ ema enyene ndien Spirit ekọñ. Odudu mmọ okoto Abasi, oto ke obufa ebuana emi mmọ enyenede ye Enye, mmọ enyuñ eka iso ekan mme asua mmọ tutu idut mmọ odu ke emem. Mmọ ema ebọñ akam ndien enyene ukeme ndiñwana ye idiọk-ñkpọ.
Erikan kiet idighe utit eñwan. Uwem owo Abasi edi eñwan kpukpru ini, edi “nnyin imakan inyuñ idọdiọñ ikan, oto ke Enye emi akamade nnyin” (Ñwed Mbon Rome 8:37). Ke usen ke usen nnyin inyene ndiyom obufa odudu nto Abasi. Ndien ebuana oro ye Abasi eyenọ uko ndiñwana ye udim ndiọi odudu, nnyin iyenyuñ inyene udọñ ndika ke enyiñ Ọbọñ man ikan.
Questions
MME MBUME- Ekebe ediomi Abasi okodu ke mmọñ ke ini ukpep-ñkpọ emi?
- Ini ewe ke ekebe Abasi akada mme edidiọñ edi? Ini ewe ñko ke akada ubiere-ikpe edi?
- Nso idi ubiomikpe?
- Nso ikedi ntak emi Nditọ Israel ekesemede?
- Samuel ọkọdọhọ mmọ enam nso?
- Nso ke Nditọ Israel ekenam mbemiso mmọ eka mbono akam ke Mizpeh?
- Nso ikotibe ke Mizpeh?
- Nso ikọbiọñọ mme itoro Nditọ Israel?
- Nso ke Nditọ Israel ekanam ye mme Philistine?
- Nso ikanam Nditọ Israel esọñ idem ndikan asua ọyọhọ-ọyọhọ?