Lesson 210 - Senior

Memory Verse

Koro (mmensehe) nte owo esede; koro owo esede enyin, edi Jehovah ese esit” (1 Samuel 16:7).

Cross References

I Isañ Samuel Ndiyet Edidem Efen Aran

1. “Koro mmokut edidem mi”, 1 Samuel 16:1; 13:14; Psalm 78:70-72

2. Jesse emi otode esien Judah odu ke udim mme anditiñ-ntiñ-nnim-ikọ, Genesis 49:10; Isaiah 11:1; Utom Mme Apostle 13:21, 22

3. Samuel okop ndik abaña Saul, 1 Samuel 16:2, 3

II Uwa Ke Bethlehem

1. Mbiowo enyek idem ke edidi Samuel, 1 Samuel 16:4, 5; Matthew 2:3

2. Esin kpukpru nditọ Jesse emi edude do, 1 Samuel 16: 6-10

3. Owo ese enyin -- Jehovah ese esit, 1 Samuel 16:7

4. Ekot David ke itie ukpeme erọñ, 1 Samuel 16:11, 12; John 7:3-5

5. Spirit Jehovah oduk David ke idem, 1 Samuel 16:13; Isaiah 61:1

III Spirit Ọkpọñ Saul

1. Ebọ Spirit Abasi ekabare enọ idiọk spirit, 1 Samuel 16:14

2. Saul oyom David, ebre-harp, okut, 1 Samuel 16:15-19

3. David okut mfọn ke iso Saul, 1 Samuel 16: 20-23

Notes

SE EKPEPDE EBAÑA

Mme Item Emi Enọde Samuel

“Ekem Jehovah ọdọhọ Samuel, ete, Adaña didie ke afo editua Saul, sia mma nsio enye mfep ke idaha edidem Israel?” Samuel ama atua abaña Saul, ọfuhọ eti-eti etiene usuñ nte Saul okodude uwem. Ini ama edi emi Abasi ọkọdọhọde ete ke Samuel ama atua ebighi ekem. Ke ini owo akpade mme ke ini owo ọduọde ọkpọñ mbuọtidem, emi otimde ọdiọk akan mkpa, nte ido esidide, esituk mmọ emi ekperede enye idem ndien mmọ esitua ebaña ukpọñ oro eke atakde. Edi ini esidu emi anade etre editua eyet enyuñ eka iso ke edinam utom Jehovah. “Sin aran ke nduk fo yọhọ; ndien ka”, ekedi ewuhọ emi Jehovah ọkọnọde Samuel.

Ke ini nditọ Israel ekeyomde edidem, Jehovah ọkọdọhọ Samuel ete, “kop uyo mmọ, nyuñ nim edidem nọ mmọ” (1 Samuel 8:22), edi ke ini Enye ọkọdọñde Samuel ke ọtọ Jesse, Enye ọkọdọhọ ete, “mmokut edidem mi ke otu nditọ-iren esie”. Edi enyin Jehovah ama otim oduk ke esit mme tọsin ke Israel, ama onyuñ okut owo emi esit Esie okonyimede.

Samuel ama ọfiọk ete ke Saul ama adianade ọkpọñ Jehovah, oro esin enye ọkọdọhọde ete, “Saul ama okop, enye eyewot mi”. Nso ukpuhọre akada itie ntem ke isua ifañ emi ke idem eyen Kish, emi, ini kiet akasañade ke otu mme prophet! Andinyaña nnyin ama oduri mbet Esie utọñ ete, “Ekpeme, enyuñ ebọñ akam, mbak mbufo ediduk ke idomo” (Matthew 26:41). Eti editọñọ inọhọ owo isọñ nte ke utit eyefọn. Jesus ọkọdọhọ mme Jew emi ekenimde Enye ke akpanikọ ete, “Edieke mbufo esọñọde eda ke ikọ Mi, mbufo edi mbet Mi ke akpanikọ” (John 8:31).

Ndik Ye Nnyek-idem

Ke ini Samuel ama ekedi ke Bethlehem, mbiowo obio oro ema enyek idem ebaña edidi esie, emi owutde uteñe ye odudu emi owo Abasi emi ekenyenede. Ediwak ini, ke ebiet emi eren mme ñwan emi edide owo Abasi odude, mme anam idiọk-ñkpọ esidu ke nnyekidem ke idak ubiom-ikpe. Ana edi Ahab ama enyek idem ke usen oro ke ini Elijah okosobode ye enye ke inwañ-vine Naboth. Felix ama enyek idem ke ini Paul ebuende ikọ abaña edinen-ido, mfara-idem ye ikpe emi edidide.

Eliab, Ediye Erenowo

Nte nditọ iren Jesse ekesañade edi ke iso Samuel, enye ama ese anyan, ediye Eliab, onyuñ ọdọhọ ete, “Nkọm enye emi Jehovah ediyetde aran odu enye ke iso”. Emem didie owo ndinam ndudue! Owo ekeme ndise owo onyuñ ọdọhọ ete ke enye odot; edi Abasi, emi esede esit, ekeme ndidọhọ ete enye ọyọhọ ye “unan, ye ñkukip, ye obufa ufen” (Isaiah 1:6). Ediwak ini esinyene idorenyin ke owo emi enyenede akamba enọ ndida nnam utom nnọ Jehovah, edi Abasi ete, “mmesin enye: koro (mmensehe ) nte owo esede; koro owo esede enyin, edi Jehovah ese esit”. Esisin ndida ediwak owo emi enyenede enyọñ -enyọñ ukeme nte anam utom ke inwañ Ọbọñ koro esit esie ọwuhọde ke mme ñkpọ isọñ emi. Ikot Gospel enyene “owo eke amade” edi ata ekpri ibat enyime ndiyere.

Eliab ekedi kiet ke otu mmọ emi Saul ekemekde esin ke udim ekọñ esie. Enye ekeme ndibe udomo ke idaha eke ikpọhidem, ndien nte ededi, idaha ifiọk esie ama okoñ, edi ikot eke Abasi ama okoñ idaha akan eke udim ekọñ Saul. Abasi enyene mme usuñ edinam ñkpọ emi eneñede-okoñ akan eke owo. “Koro mme ekikere mbufo midige mme ekikere mi, mme usuñ mbufo minyuñ idige usuñ mi: emi edi uyo Jehovah. Koro kpa nte enyọñ okoñde akan isọñ, kpa ntre ke mme usuñ mi ekoñ ekan mme usuñ mbufo, mme ekikere mi enyuñ ekoñ ekan mme ekikere mbufo” (Isaiah 55:8, 9). Nnyin ikpowut didie esit ekọm, ikponyuñ itiñ-enyin didie nte isañade, man ebat nnyin ke mmọ emi edotde ndidu ke mme ñkoñ-ñkoñ uduak oro! Nso ifet ke inyene ntem! Ndikere nte ke ekot nnyin ndidi ndidem ye mme oku nnọ Abasi! Eyak nnyin itim ikpeme esit nnyin, mbak iditie nte Eliab, emi ekesinde.

Abinadab, Udiana Owo Ke Udim

Nso utọ ifet akana emi ọnọ Abinadab ọyọhọ eyen Jesse iba! Akana eyet owo aran enim ke edidem ke ufọk esie. Ema esin akpan eka esie; idahemi eketie nte ifet enye emi ekenyene enye. Eti ini akana emi ke iso esie, ndien ema ewọñọre uñwana nduñọre emi otode heaven ese enye. Edi ibọrọ ekedi, “Jehovah inyuñ imekke emi ñko”. Enye ikebeñeke idem-esie inọ ifet enye emi.

Kere se ediwọrọde ke ini mme owo edidade ke iso Ebierikpe ofuri ererimbot, ke ini kpukpru mme idut edibohode ke iso Esie! Enye eyedọhọ ndusuk owo ete, “Edi, mbufo emi Ete Mi ọdiọñde”; edi ye mmọ efen, “Edianare Mi, mbufo emi edide mbon nsobo”, Ndien ini ididuhe aba ndikabare esit. Nte ifet efen eyedu? Baba, ididuhe ke ofuri anana-ibat nsinsi ini. Idahaemi edi ifet nnyin ndibeñe idem mbaña Heaven. Kere baña owo emi Jesus eketiñde ye enye ete, “Ñkpọ kiet ọsuhọ fi”. Nte enye eyeda ke usen oro ye akwa ubiak ke esit esie, ọdọhọ ete, “O, nsinam mme ñkenamke”? Nte afo eyeyak ñkpọ ekededi akpan fi ndikop nte edọhọde ete, “Edi mbufo emi Ete Mi ọdiọñde”? Abinadab ama ebe ke iso Samuel, edi ubierikpe ekedi, “Jehovah inyuñ imekke emi ñko.”

Shammah

“Ndien Jesse anam Shammah asaña ebe”. Ema ekot Shammah ke udim ekọñ Saul, edi ikemekke enye ndida udim ekọñ Jehovah usuñ. Jehovah ese esit, ndien ke Enye ke edomo mme edinam. Nso idi ibọrọ fo ke ikot Abasi? Nte afo ke anam kpukpru ñkpọ ke odudu fo ndidu ke otu mmọ emi emekde?

Nditọ Iren Eken

Nditọ iren Jesse eken ema esaña ebe ke udomo emi, edi ibọrọ okosuk edi ukem-ukem. “Jehovah imekke mmọ emi”. Nte eyesin kpukpru nditọ iren Jesse? Nte Abasi ikọdọhọke Samuel ite ke Imọ imenyene edidem ke otu nditọ iren emi? Samuel ama obup Jesse ete, “Nte mkparawa ekure”? Baba, eyen-ọwọñ osuk kaña, enye emi Abasi osuk esede, emi okodude ke ikọt ekpeme erọñ. Enye ekedi akparawa, ikekemke nte ekot enye edi usọrọ ye nditọ eka esie, mme ndisin enye ke otu mmọ emi edotde ndibọ anyanya. Edi Samuel ọdọhọ ete, “Dọñ ekeda enye edi: koro nnyin midisuhọkede itie tutu enye edi ken”.

Ediyet David Aran

Okposuk edi nte Abasi ekemekde David koro nti ñkpọ okodude ke esit esie, kpa ye oro, David ama eye uyai, onyuñ ọfọn ndise ke ini ekedade enye edi ke iso Samuel. Uyo Abasi ekedi, “Daha ke enyọñ, yet enye aran: Koro edide emi edi enye”. Samuel ama eyet enye aran ke ekpri ido edinam ñkpọ ke iso nditọ ete esie; edi, nte ido David ekedide emi ama ọkọtuñọ akan nte ekutde ke enyin, ediyet aran oro ama okpon akan ndiduọk aran ke ibuot esie. “Ndien Spirit Jehovah oduk David ke idem toto ke usen oro, aka iso”.

Abasi emi okotde esinọ mfọn ye ukeme ndiyere ikot, ndinyuñ nduk ke itie edinam utom. Nso ikpọ ñkpọ ke mme owo esinam ke ini Spirit Jehovah ọyọhọde mmọ ke idem! Spirit Jehovah ama oduk Gideon ke idem, ndien enye ama ofuri obukpoñ ke ini Israel ekeduñde ke mme aba itiat ye ebiet udibe ke ntak mbon Midian. Spirit oro okosuk odu ke enye ke ini enye ye owo ikie ita, ekekande otu mbon Midian. Spirit Jehovah okoduk Samson ke idem, ndien enye owot tọsin mme Philistine ke mbañ enañ. Ekedi Spirit Jehovah okoduk David ke idem ke ini ekeyetde enye aran, ndien edi ukem Spirit oro okonuk enye ndikañwana ye akwa anyan owo Gath emi mme udim ekọñ Israel ekefehede, ekenyuñ ebakde eti-eti. Ekedi Spirit oro akañwam enye ndinyene edikan ke mme usen nnanenyin oro Saul ekebinede enye. David ekebere ke Abasi ke kpukpru mme usen esie, ndien Abasi ama onyuñ odu ye enye tutu osim utit.

Nnanenyin Saul

Ke ini ekediọñde David ke ñkañ Spirit, Saul okodu ke ata itie mfuhọ. “Ndien spirit Jehovah ọkpọñ Saul, idiọk spirit emi otode Jehovah onyuñ ọtuhọ enye”. Ndien Apostle Paul ọnọ nnyin ntọt ete, “Ekunyuñ eyat Edisana Spirit Abasi esit , emi edi ke Enye ke ema efik mbufo idiọñọ ebeñe usen erifak”. Nso idiọñọ emi ọyọhọde ye ubọñ ke nnyin inyene emi edide Edisana Spirit! Edi, nso utọ idiọk itie ke edidi ke ini iyatde Edisana Spirit esit ndien Enye ọwọrọ! Enim ufañ ke utọ esit oro enọ spirit itiaba emi ediọkde ekan emi akananam owo oro ọfiọkde. Ke akpanikọ Saul ọsuhọ nte uwut-ñkpọ nte ke akpatre itie owo oro ọdiọk akan akpa. Utọ oro iditibeke edieke nnyin inamde ntọt oro ndien “iyatke Edisana Spirit Abasi esit.” Eyak nnyin ibiet David emi ekebetde Jehovah okonyuñ okopde odudu Esie osim ke ini enye ebede ke itihere mfut mkpa.

Questions

MME MBUME

1. Nso ikoduk esit Samuel ke abaña Eliab?
2. Nso idi ukpuhọre owo ndimek owo, ye Abasi ndimek?
3. Nso idi enyiñ akpa ye ukperedem nditọ - iren Jesse?
4. Ekeman David ke mmọñ?
5. Nso ikedi ubọk utom David mbemiso ediyet enye aran enim ke edidem?
6. Nso ke eyen-ufọk Saul eketiñ abaña David?
7. Anie okodu ke ini ekeyetde David aran?
8. Nso ke eda Spirit Jehovah ndidoro David ke idem edomo mfin emi?
9. Nso idi ntak emi ekerede ete ke mbiowo Bethlehem ema enyek idem ke ekutde edidi Samuel?
10. David okoto ke ewe esien?