Lesson 214 - Senior

Memory Verse

“Kpukpru owo esuk idem enọ mme enyene-odudu emi ekarade; koro odudu iduhe ke mitoho Abasi, ndien mme enyene-odudu emi edude kemi, edi Abasi okonim mmọ” (Ñwed Mbon Rome 13:1).

Cross References

I Saul Ebine David Ikpaha Mba

1. Ndimek iren-owo Saul 3,000 ema ewak ekan mbon ekọñ David ke ñkpọ nte owo 5 ke 1, 1 Samuel 24:1-3; 23:13; Psalm 33:16-20

2. Ukọbọ ye idomo David ama añwam enye ndinyene iwuk ke Abasi, Psalm 57:1-11

II Eti Edu-Uwem David

1. Mmọ emi mikoyomke nda-usuñ Abasi ema enọ idiọk item emi akanamde David obumerede, 1 Samuel 24:4; Psalm 1:1, 2;1 Ndidem 12:6-11; Job 2:9, 10

2. David ama atua mkpọfiọk ke edinam esie, okposuk mikedighe edinam ibak, 1 Samuel 24:5-7; Exodus 22:28; Utom Mme Apostle 23:5; Nwed Mbon Rome 13:1; 1 Peter 2:17

3. David ama okpono Saul nte edidem ye nte enye emi Abasi ekeyetde aran onim, 1 Samuel 24:8, 10; 15:30; 10:24; Daniel 6:21

4. Ikọ ntiense David ama owut ete ke David ikenyeneke usua, mme edisin esit nnyom ebekpo ubọñ, 1 Samuel 24:9-11; Ñwed Mbon Galatia 5:20; John 5:44

5. David ama ayak ubierikpe ye usiene ọnọ Abasi onyuñ enyene nnen-nnen ima ọnọ mme asua esie, 1 Samuel 24:12-15; Exodus 23:4, 5; Leviticus 19:18; Deuteronomy 32:35; Psalm 20:6-8; 35:1-28; Mme Ñke 20:22; 24:17, 29; 25:21, 22; Matthew 5:43, 44; Mme Hebrew 10:30

III Saul Ọkpuhọre Ido Ke Esisit Ini

1. Uwem owo Abasi ye mbọm David ama otuk Saul, enye oyom ndinam emem, 1 Samuel 24:16; Mme Ñke 15:1

2. Saul ama onyime edisana ido David, 1 Samuel 24:17-19; Mme Ñke 25:21, 22

3. Saul ama ọfiọk ete ke Abasi odu ye David ndien ke edi enye edidi udiana edidem, 1 Samuel 24:20

4. Ema enam ediomi nditre ekọñ ye uñwọñọ ke se ibañade ufọk Saul, 1 Samuel 24:21, 22; 20:15; 2 Samuel 9:1-11

Notes

SE EKPEPDE EBAÑA

Saul, Edidem Emi Ekesinde, Ye David Owo Nduyo

Itie edikot ke ukpep-ñkpọ nnyin ada ido owo iba ke Ñwed Abasi owut nnyin man inyene ufọn ke itimde iduñọre edu uwem ye mme edinam mmọ. Saul ekedi edidem Israel, emi owo Abasi ekeyetde aran onim ke ñkop uyo ye nda-usuñ Abasi, emi ofuri Israel ekenyuñ enyimede. Ke ediwak mme idiọk ido, nsọñ-ibuot, ye ntut-utọñ, Abasi ama esin Saul edi ayak enye odu nte edidem, owo efen ekedi David, akparawa eren, emi owo Abasi okosuk eyetde aran onim ke edidem ke ñkop uyo ye nda-usuñ Abasi, emi ibat-ibat owo ekenyimede nte ada-usuñ, edi ediwak ekediọñọ enye nte okop odudu ye owo uko. David ama ọsuhọre idem, onyime ndinam utom ke ebiet ekededi emi Abasi onimde enye; edi enye, ke ediwak isua ama oduyo ọkpọñ mbon esie ye idut emi enye akamade eti-eti.

Ke ediwak ini, nte nnyin ikutde ke edinam ye uduak Abasi ye nnyin ye ke mmọ efen, etie nte ndusuk ñkpọ emi mikpanaha otibe esitibe. Owo Abasi, David, ama ọbọñ akam ọnọ Abasi oyom uñwam ye odudu ke ini mme asua esie ekefikde enyuñ ekọbọde enye. Enye eti Abasi ete: “Koro idiọk owo oburede ke udọñ ukpọñ esie; onyuñ otoro ñwo, esin Jehovah ke ndek.” Enye aka iso etiñ ete “Idiọk owo ke akwa iseri esie idiyomke (Abasi): “Abasi iduhe” edi ofuri ekikere esie... Enye ọdọhọ ke esit esiemọ, ete Ndisehekede; ke ofuri emana ami ndi owo emi mididuhe ke idiọk” (Psalm 10:3, 4, 6). Edi kpukpru ñkpọ emi ekedi ata nti ukpep-ñkpọ ọnọ David; koro oto ke mkpọsọñ idomo, odudu ye ifiọk esie ema ekpon, idorenyin esie ke Abasi onyuñ ọkọri. Enye ama ọfiọk ete ke Abasi eyedọñ uñwam emi otode Heaven, ndinyaña enye nsio ke esuene idiọk owo eke okoyomde ndimen enye mmen; ekpedi nte mmọ ema ekenenim afia enọ ikpat esie enyuñ etibi obube ke iso esie, ke akpanikọ, David ama okut nte Abasi ọbọrọde enye, ye nte kpukpru ñkpọ ekedide ke ufọn esie, koro enye eketiñde ete ke mme idiọk owo eduọñọ ke obube ye afia emi mmọ ekenimde enọ enye. Ke kpukpru emi David okosuk otoro Abasi (Psalm 57:3, 6-11).

Mme idomo ye mfina kpukpru ini idighe uwut-ñkpọ ete ke iso Abasi ọwọñọre ọkpọñ nnyin. Ke inemesit ye ima ke Abasi ese nditọ Esie emi ebọde ufen, emi Enye okutde ete ke edot ndiyak mme idomo ye ubiak osim mmọ man oto do ekpesio se mifọnke-ima ke uwem mmọ efep. Obubit enyọñ ndifuk uñwana Abasi emi ayamade ndisọñọ unyime Esie ke nnyin, iwutke ite ke uñwana Abasi oro ebe efep. Mme ini idomo emi osim kpukpru mmọ oro esañade ke ido Abasi, emi emade edinen-ido, enyuñ eyomde mfọn-mma. Ke ini idude ke utọ mme idomo ntre, ọfọn nnyin ndidọhọ nte David ọkọdọhọde: “Esit mi ọmọwuhọ, O Abasi, esit mi ọmọwuhọ; nyekwọ ikwọ, nnyuñ ntoro.... O Abasi, menere idem fo ke enyọñ: yak ubọñ fo akan ofuri isọñ” (Psalm 57:7, 11).

Ndibin owo mkpọñ obio ye mbon ima esie ekeme ndida akamba ubiak ọsọk owo ekededi. Ndibat owo nte asua nnyuñ mbine enye nte abiat ibet ekeme ndidemere ntimeresit ekpededi owo emi etiede nte David, akpan – akpan ke ini idiọk uduak mme ubiom-ikpe miduhe ke esit owo emi ebinede. Ndinuk owo oduñ ke mme aba itiat ke akai ikọt ndien enye oyoyom se adiade ye mme ñkpọ inem uwem, ndibin owo mkpọñ inemesit ufọk ye ukpeme ye ifure emi enye akamade, ndidiọñọ kpukpru mme ubiak, biọñ, nsat-itọñ, ntabidap ye mfina emi esit owo ekemede ndibiom, ekpenyene ndifina owo, ekpededi enye edi owo emi ọsọñọde ada ye Abasi. Edi kpukpru mme idomo emi okosim owo emi Abasi ekemekde ete edi edidem, owo ima Abasi, ndien añwam ke ndikpep enye ntọtuñọ akpan ikọ akan se enye ama ọkọdọdiọñọ onyuñ ọnọ enye ñkoñ ñkan ye ọyọhọ mbuọtidem ke Abasi akan nte enye okokutde ete ke odot ndinyene, “kpukpru ñkpọ esaña ọtọ kiet enam ufọn enọ mmọ eke emade Abasi” (Ñwed Mbon Rome 8:28). David ọkọdọhọ ete; “Ke ini spirit mi etiede ke mfuhọ, ndien afo ọfiọk isañ mi” (Psalm 142:3). Ndien enye ọkọdọhọ ke mbuọtidem, koro enye ọkọbọde eñwọñọ ete okposuk edi nte idiọk enyọñ edobide, mme ukọbọ enyuñ ekponde, ke akpatre, “nti owo eyekan mi ekuk; koro afo edifọnde ye ami” (Psalm 142:7).

Saul ama enyene ukpuhọre ye David. Ke ini ekeyetde Saul aran enim ke edidem ke akpa ifet, enye ama enyene nsukidem ke spirit, edi ikebighike enye akabare edi anam uduak idem esie ye owo nsọñ-ibuot. Enye ikedaha “nsọñ-idem idọdiọñ ika iso” ibe ke mme idomo, man akpayarare ukpeme Abasi ke idomo, emi edide ndinam enye ọfọn ama; ikonyuñ ikọrike ibe ke mbuọtidem iduk “ke mbuọtidem” man okut edinen ido Abasi nte eyararede enọ nnyin ke ini itienede nsinsi item: “Edinen owo edida mbuọtidem odu uwem” (Psalm 84:7; Ñwed Mbon Rome 1:17). Utu ke ndinam emi, Saul ama asaña ke odudu idem esie, ke ifiọk idem esie, ye nte udọñ ye uduak idem esie ekedide. Uwem esie ama abiara ofuri ofuri. Uwem esie akpana enyene ọyọhọ unen, edieke enye (Saul) akpakasañade ke usuñ Abasi.

Enye Emi Abasi Ekeyetde Aran Onim

Ema esiyet mme anditiñ ntiñ-nnim ikọ, mme oku, ye ndidem ke Akani Ediomi aran enim enọ utom mmọ. Emi ekedi ndiwut ete ke ikot mmọ oto Abasi, ñko ke adaña ini nte mmọ edikade iso nte ekemde ye uduak Abasi, ke Abasi eyemum mmọ akama, ekpeme mmọ, onyuñ ada mmọ usuñ. Ediyet aran ekedi ñko idiọñọ ata akamba ediyet aran, oro edi ediyet aran eke spirit, emi edinyenede kpukpru mmọ emi Abasi edikotde ndidi nditọ Esie ke ini Obufa Ediomi. Ediyet aran eke Akani Ediomi ama odot ye ndimek mme anam utom Abasi, ifinake mme nso utọ itie ke ekekot mmọ ndida, sia utom mmọ mikenyeneke ọyọhọ unen ke esiode oro efep. Kpasuk ntre, baptism Edisana Spirit ye ikañ, ediyet aran eke spirit emi enọde idahemi esọk kpukpru mmọ emi esinde ifik eyom enye ke mbuọtidem, edi ata akpan ñkpọ, onyuñ odot man ọnọ unen ke utom emi nnyin inamde inọ Abasi, ifinake mme ewe iso utom Esie ke ekot nnyin idinam.

Samuel ama eyet Saul aran onim. Spirit Abasi edidoro enye ke idem ke ini oro nte ntiense ete ke edinyime Abasi odu ye enye. Abasi ama ọnọ enye obufa esit emi, nte nnyin ikutde, ekedide ntiense abaña idaha owo Abasi esie. Saul ama etiñ ntiñ-nnim ikọ ke otu mme anditiñ ntiñ-nnim ikọ, ndien emi okowut ete ke enye ama ọbọ edinyime Spirit Abasi ye udomo odudu Abasi, ñko ete ke enye, ke ini oro, ama otim asaña ekpere Abasi. Edi nnyin imọfiọk ite ke edi mmem – mmem ndiyat Spirit Abasi esit. Eduri nnyin utọñ ebaña ñkpọ ndik emi odude ke ndika iso nnam emi tutu osim idaha emi Abasi esinde nnyin edieke ikoidekoi ika iso inam enye. Ama odu ini emi Saul akayatde Spirit Abasi esit eti eti tutu enye ikemeke aba ndinyene nda-usuñ Esie. Edi David ekekere ete ke edi Abasi okonim Saul ke itie edidem, ke onyuñ edi, itie Abasi ikpọñ ndidorode enye mfep.

Ke obio ekededi ke ererimbot, emi esañade ke mbet emi enọde ewuhọ ye nnen-nnen ukara ukpono eke odotde, edi akpanikọ ete ke odudu emi ọbọpde mbet edi odudu emi ekemede ndikpuhọ mbet oro, ndien ukara emi onimde owo kiet – kiet ke mme itie utom edi ñkukure odudu emi ekemede ndidorode mmọ mfep ke mme itie utom oro. Mme owo emi minyimeke edinam emi edi mmọ emi eñwanade ye eti ukara, emi ke ata akpanikọ, edide mme abiat-ibet mme mbon nsọñ-ibuot. Ifet iduhe inọ baba kiet ke otu mme idiọk-ñkpọ emi ke edinen ukara Abasi mme ke esit nditọ Abasi. David ikesineke ke baba kiet ke otu ñka emi, kpa nte ukpep-ñkpọ emi owutde.

Ema eyet David aran enim ke edidem ndo-ndo oro esinde Saul. Edi David ama enyene spirit emi mikayakke enye anyanare ubọk esie ndibọ mme ndinyaña ñkpọ emi ebietde unen esie, okposuk edide Abasi ọkọnọ mme unen oro, enye ikonyuñ iyomkeyom ndomo ata esisit (1 Ñwed Corinth 13:5). Ekedi mmem mmem ọnọ enye ndikpekere ete sia edide Abasi ekemek imọ ke edidem, utom imọ edi ndikara obio nte enende ndinọ Abasi ukpono ye ubọñ, nnyuñ ñwuri kpukpru ñkpọ emi edibiọñọde mme ediñwanade ye Abasi. Enye ekpekekere ñko ete sia ekeyetde imọ aran ke ema ekesin Saul, ñko sia ema eketiñ enọ Saul ete ke owo efen eyeda ubọñ esie, edi utom imọ ndika iso nnam uduak Abasi iñwañ-iñwañ nte ewutde.

Odu mme ini emi etiede nte nnyin imotim ikut uduak Abasi ke ndusuk ñkpọ, edi nnyin ikemeke ndinam ñkpọ man nnyin ikubem ini Abasi iso. Ekeme ndiyarare ọyọhọ uduak Abasi nnọ nnyin kiet-kiet edi idighe kaña ini emi Abasi edinamde uduak oro. Ana nnyin itim ifiọk ite ke idighe uduak Abasi ikpọñ ke nnyin inyene ndibet ke kpukpru ñkpọ, edi inyene ndibet ini Abasi ñko.

Sia Abasi enyenede ofuri odudu, edieke enye oyomde enam ñkpọ ekededi Enye eyekut ete ke emen kpukpru ñkpọ emi ekemede ndibiọñọ mme ndikpan uduak Esie efep. Ema etetim etiñ ete ke Abasi esinam mme uduak Esie ọwọrọ ada ebe ke mme owo eke enamde ñkpọ esaña ke uduak esit mmọ. Abasi enyene ọyọhọ odudu, Enye ekeme ndinam ñkpọ ke ọyọhọ odudu Esie ibiatke unen edimek emi ekeyakde enọ owo.

Oto nte uduak Abasi ke abaña ñkpọ ekededi ọwọrọde ada ke nnyin itim ifiọk, sedide ekikere Abasi ke abaña uduak oro. Edieke Abasi minọhọ ọyọhọ uñwam ke ñkpọ, ekeme ndidọhọ ete ke idighe ata uduak Esie ete enam ñkpọ oro ke ini oro.

Mbemiso ini nnyin ekem ndida itie utom, Abasi ekeme ndisian nnyin mbaña utọ utom emi nnyin idinamde, man nnyin inam mbeñe idem ke akam, ke ediyak idem nnọ, ye ke ukpep-ñkpọ, ke abaña itie utom oro. Enye iwakke ndinam nnyin ifiọk utọ ñkpọ oro. Edi edieke Abasi emekde ndinam enye ke utọ usuñ oro, edi koro Enye enyenede ọyọhọ odudu ndinam ntre. Ndien edieke Enye emekde nditim nnyin idem ke anyan ini ukpep-ñkpọ eke nnyin idisobode ye nsio-nsio mfina ke abaña itie emi Enye okotde nnyin, inyuñ idehede ibemiso itiñ inọ nnyin, ke abaña ufọn nnyin,oro ñko edi ọyọhọ-ọyọhọ unen Esie. Edi edieke nnyin inamde ñkpọ ke odudu idem nnyin inyuñ isin ndibet ndutim Abasi ke abaña edinam oro, nte ekemde ye anana utit ifiọk Esie ye uduak emi owo mikemeke ndineni; nnyin iyekut nte ubiọñọ osimde uduak Abasi ke abaña nnyin ye nte ekikere Abasi ke abaña nnyin ebighide ndisu oto ke unana ifiọk nnyin. Nnyin iyenyuñ ikut ñko ite ke “ukpep-ñkpọ wilderness” nnyin eyebighi akan nte ekpedide, ndien eyenam ifet nnyin ndinam ñkpọ nnọ Abasi ọyọhọ-ọyọhọ ebet ata anyan ini.

David eketiene ekpri ubak emi eketiede nte nti item mmọ emi ekesañade ye enye. Ke ndinam kpa emi, enye ama anam ñkpọ emi enye ọkọsọpde atua mkpọfiọk. Ndisibe ekpri ubak ọfọñ edidem ekpetie nte ekpri ñkpọ, akpan-akpan ke ini ekenyikde enye ete owowot edidem. Se enye akanamde ama atuaha ye idaha ukpono edidem, edi oro ekedi ekpri ñkpọ ke ndida ndomo ye se enye ekenyenede ọyọhọ ukeme ndikpanam emi okonyuñ etiede nte enen enye ndinam. Mmọ emi ekenọde David item ekeda ikọ nsọñọ-idem emi Abasi ọkọnọde enye eyut ekabare nte ntak, emi enye, ke akpanikọ okonyuñ eberide idem eti eti ke ini idomo emi.

Edi mme owo oro ikọdiọñọke uyo Abasi nte emi David ọkọdiọñọde, onyuñ edi akpanikọ ete ke mmọ ikoyomke ndisaña ke nda-usuñ Abasi ñkan kpukpru ñkpọ efen nte emi David okoyomde. David okoyom Abasi anam kpukpru ñkpọ ọwọrọ ada ofuri ofuri, koro enye ọkọfiọkde ete ke usuñ emi kpọt ke Abasi edida ubọñ ye ukpono ndien edikan onyuñ odu ke uduak oro. Ndusuk owo ekpedọhọ ete ke enye ama enen ke edinam esie sia enye ama ekekeme ndimen ubak ọfọñ oro ñwut man ayarade owut ete ke enye ikoyomke ndinam Saul idiọk; edi enye ndibiọñọre ke inua aba-itiat emi Saul ọkọwọrọde ke ndo-ndo oro akpanam akamba ñkpọ. Koro suk idem ekpri edinam emi ekebietde eñwan ye enye emi Abasi ekeyetde aran onim, David ama ọbọ ufen ke spirit esie. Enye ekenyene suñ-suñ spirit ọnọ Abasi ye uduak Abasi. Enye ama esibọñ akam kpukpru ini ete yak Abasi okuyak imọ ikabare idi anana esit mbọm ke usuñ kiet ekededi ke spirit esie mme ke ido esie ke abaña Abasi mme ikọt Esie. Emi ekedi kiet ke otu mme ntak emi Abasi ọkọdọhọde ete ke David edi owo ima Imọ ke enye ñko ama enyene esit eke ọfọnde ama. David okoyom ukpono ye ubọñ Abasi ye ufọn ikọt Abasi ke kpukpru ñkpọ emi enye akanamde; ndien okposuk edi oro enye akanamde ikpọ ndudue, kpukpru ini enye okodu ke mbeñidem onyuñ enyene udọñ ndinyime mmọ nnyuñ ntua mkpọfiọk ke ofuri esit mbaña mmọ (Psalm 51:1-19). David ama eneñere okpono enye emi Abasi okosiode onim onyuñ eyetde aran koro ọfiọkde ete ke Abasi emekeme ndikpeme mme unen ye edinam esie ke edide ekem ini Esie.

Ndikpekeda ediyet Saul aran ke ekpri ñkpọ ekpekenam David ke idemesie ada ediyet aran esie ke ata ekpri ñkpọ akan nte enye ekpekerede. Nda-usuñ Abasi ama anana ndudue ke emi Samuel akayakde nditọ Jesse itiaba esaña ebe ndien itọhọke aran ke ibuot mmọ baba kiet koro enye mikenyeneke ntiense ito Spirit Abasi ete ke enye emi Abasi ekemekde ama ọbiọñọre. David, ke akpanikọ, ama ọbọñ akam ntọtuñọ-ntọtuñọ nte enye otode ke iñwañ edi ndibọ ediyet aran esie. Ke ata akpanikọ Enye ama esinam ntre ke mme ọfiọñ ye isua mbemiso edisim ini emi. Enye ikpekedotke ndibọ ediyet aran oro edieke enye mikpeketimke ibeñe idem esie. Ndien ndisuene saña-saña ufọn emi ediyet ọkọnọde owo efen ekpedi enye ndidọhọ ete ke ediyet aran eke imọ inyeneke ufọn emi okponde akan odudu owo ndiwọñọde nnim ñkañ kiet.

Nte nditọ Abasi ye mme anam utom ọtọ kiet ke iñwañ utom Abasi, ukem utom oro odoro nnyin kiet kiet ke abaña edu uwem nnyin ye mmọ emi Abasi eyetde aran enim ke mme akpan itie utom ke iñwañ utom Esie. Ekot mmọ emi esin ke itie eke okponde akan eke ndidem ererimbot emi ekarade ñkpọ ikpọhidem. Eke mmọ idighe ubọñ ererimbot emi, mmọnyọ, mme ebekpo. Mmọ inyeneke ọyọhọ odudu eke edidem. Ekeme ndidi ke ofuri ererimbot idiọñọke nda-usuñ ye odudu mmọ. Edi edimek mmọ ye utom mmọ edi eke ata akpanikọ, ke nditim ntiñ.

Mmọ emi Abasi ekemekde ete ebọk mme erọñ Abasi, ese ebaña mmọ, esua enọ enyuñ etunọ mmọ ke ini odotde ndinam ntre idighe se ekpebatde nte mmọ emi ekpride ke idaha ekan nte David akadade Saul emi Jehovah ekeyetde aran onim. Mmọ esọñọ eda enyuñ eduọ ke iso Abasi inyuñ idighe ke iso owo. Mmọ enyene ndinam ibat nnọ Abasi ke kpukpru se mmọ etiñde enyuñ enamde. Edieke mmọ minamke akpanikọ ke mme utom mmọ, edi Abasi editunọ onyuñ onim mmọ nsan-nsan edieke oro ediñwamde ke ñkọri utom Esie. Eke nnyin edi ndinyene akamba ukpono nnọ enye emi Abasi eyetde aran onim, nnyuñ nyak mme ñkpọ oro edide Esie ọyọhọ-ọyọhọ nsin Enye ke ubọk man Enye anam ye mmọ nte Enye amade, ke ini Enye amade.

Ediwak utibe nti edu uwem edu ke uwem edidem Israel emi, ekedide abak Abasi. Ediwak ñkpọ edu eke ekpewetde ke abaña edinam emi, ye mme edinam eken ñko, nte itie edikot ke ukpep-ñkpọ emi anamde owo ekere. Ke ukpep-ñkpọ ini iso, emi David ọtọñọde ntak ọsuhọ uwem Saul, nnyin iyefiak inyene ini efen ndikpep ñkpọ mbaña nti ido ye edu owo Abasi emi, emi etiñde enọ nnyin ebaña nti idaha emi Abasi okoyomde oto mmọ ke ini oro. Nnyin iyekpep ñko ibaña mme nti idaha emi enyenede nnyin emi idude uwem ke eyo ọyọhọ edidiọñ Gospel mfọn, ini emi nti ikọt Abasi ke eyo oko ekeyomde ye akwa udọñ, idem onyuñ akpa mmọ abaña nti ñkpọ emi ediyakde ke mfọn enọ kpukpru mmọ emi ediyomde ndituak ibuot nnọ Abasi ke mbuọtidem ye akpanikọ.

Questions

MME MBUME

1. Mme anie ke ekeyet aran enim ke ini Akani Ediomi?
2. Eyet didie mme owo aran ke eyo emi? Nso inyuñ idi ọyọhọ utip emi odude ke eñwọñọ emi enọde mmọ eke eyetde aran ntem enim?
3. Nso idi ntak emi David ekedide owo nduyo?
4. Nte ọfọn kpukpru ini ndida item mmọ emi misañake ke nda-usuñ Spirit Abasi?
5. Didie ke owo ekeme ndifiọk ini emi edide uduak Abasi ndinam ñkpọ ekededi?
6. Nso ñkpọ efen ke nnyin ikpoyom ke ebede uduak Abasi ke edinam nnyin?
7. Akananam nte Edisana spirit ada usuñ ke ido emi añwanade ye kiet eken? (Kot ke 1 Ñwed Corinth 14:33, 40).
8. Usiene enyene anie?
9. Nso ido ke David akada etiene ediyet Saul aran?
10. Nso eñwọñọ ke David akanam ọnọ Saul ke ini mmọ ema ekenam emem ye kiet eken?