1 Samuel 28:3-25

Lesson 216 - Senior

Memory Verse
“Ebup ewuhọ ye ñwed ntiense: ke mmọ minyimeke ndidọhọ nte ekemde ye ikọ emi, ke edi mmọ eke midikwe usiere” (Isaiah 8:20).
Cross References

I Idiọk Itie Saul Emi ekesinde

1. Samuel, Anditiñ ntiñ-nnim ikọ eke Abasi emi ekesinọde Saul item ama akpa, 1 Samuel 28:3; 25:1; 9:27

2. Mme Philistine ema etọñọ ntak esop idem ọtọ kiet ndiñwana ye Israel, 1 Samuel 28:4

3. Ndik Saul ekedi ntọñọ ubiere-ikpe emi ekenọde koro enye ekesinde Abasi, onyuñ ọsọñde ibuot, 1 Samuel 28:5; 13:13; 15:26-29

4. Saul ikekemeke ndibọ Abasi ibọrọ, 1 Samuel 28:6

II Saul Aka Ọtọ Abia-Idiọñ Ke Endor

1. Mbet Abasi emi ọkọbiọñọde ubre-idiọñ ye utiene-ekpo ama eneñere añwaña, Exodus 22:18; Leviticus 19:31; 20:27 Deuteronomy 18:9-12; Isaiah 8:19, 20

2. Saul ama eneñere asua ubre-idiọñ ke akpa, 1 Samuel 28:3, 9

3. Ke ndiyom ebre-idiọñ, Saul ama ọtọñọ ntak edi andikokoi mbiat mbet Abasi, 1 Samuel 28:7-10; 15:23

III Ediwọrọ Ndi Samuel, Owo Abasi

1. Abia-idiọñ ama onyime ndida nsaña-ekpo esie nnam ebeñe Saul ke abaña Samuel, 1 Samuel 28:11

2. Mkpa-idem esie ke ini Samuel ọdọkde edi owut ete ke enye ikedighe ke odudu ye ke ikot ñwan emi, 1 Samuel 28:12; Ezekiel 14:7, 8

3. Saul ama ọdiọñọ Samuel ke ini ebre-idiọñ oro etiñde ọnọ enye, 1 Samuel 28:13, 14

4. Saul ama odomo ndikpono Samuel nte ke ini edem, 1 Samuel 28:14; 13:10; 15:13

IV Etop Abasi Emi Samuel Ọkọnọde

1. Saul okoyom item sia Abasi mikọbọrọke akam esie aba, 1 Samuel 28:15

2. Etop emi Samuel ọkọnọde Saul ikedighe obufa, ikonyuñ ikemke ye uduak esie, ekedi editọñọ ntak nsua nnọ enye, 1 Samuel 28:16-18; 13:13, 14; 15:26-29

3. Ema etiñ enọ Saul ete ke enye ye nditọ iren esie eyekpaña ke ndañ nsiere, ndien ke eyenyuñ ekan Israel, 1 Samuel 28:19

4. Saul, emi Abasi ekemekde ke mbemiso, okodu ke mfuhọ unana idorenyin, edi kpa ye oro, okokoi esin ndikabade esit, 1 Samuel 28:20-25

Notes
SE EKPEPDE EBAÑA

Unana idorenyin Owo Emi Akañde Mbuọtidem

Ke akpanikọ, mbuk uwem Saul, akpa Edidem Israel, edi mbuk owo unana-iwuk. Saul ekedi owo nsọñ-ido ye mmem-ido, enye owut mme asua esie mbọm onyuñ ada esit usua demon ebine mbon ima esie. Saul ekedi asaña-utom Abasi emi ekenyenede nsuk-idem, edi ke esisit ini enye ama akabade edi uwut-ñkpọ nsọñ-ibuot ye emiom ye ñkok-idem. Enye ama okop uyo Abasi ke kpukpru idaha ke editọñọ ikot esie, edi ikebighike-bighi tọñọ nte enye akada ubọñ, enye ama ọtọñọ ndimiom Abasi ñkan owo ekededi tutu ke akpatre, Abasi ye owo ema esin enye.

Andibiaña owo ama ada ndusuk itie ke ñwed Abasi emi ekpepde isọñ akpanikọ ndien ke edida mbufiọk ye ñkari nneñede enye mbon, anam mbon eke mmimaha akpanikọ ekere ete ke se ekpepde mme imọ ọwọrọ ọkpọñ ata akpanikọ. Ndusuk edọhọ ete ke ukpep-ñkpọ emi ekpep usuñ nte ekpenyenede ebuana ye mme spirit akpa mkpa; edi ke ini nnyin ineñerede ise ukpep-ñkpọ emi ke iñwañ-iñwañ esit, nnyin iyekut ite ke idighe ntre. Mme ikọ ntiense ewak ekem ke ukpep-ñkpọ kiet emi ndibiat ukwañ ukpep-ñkpọ oro ofuri ofuri.

Saul okodu ke nnanenyin. Mme asua Israel ema esọñ odudu eti-eti. Saul ikenyeneke ọnọ item ito owo mme Abasi ndida enye usuñ. Kpukpru ñkpọ ema edop enye uyo ndiwut nte ke Abasi ama esin enye. Ñkukure se ikemede nditebe nnyin ikpe ke ndidọhọ nte ke Abasi ikọkpọñke Saul ofuri-ofuri edi ke emi Abasi edide ndinọ enye ubiere-ikpe nsobo esie, ye ke emi Abasi mmikayakke andidiọk ọbiọñọ ke ndiwut idem esie nte Samuel, nnyuñ nnam ebre-idiọñ ekere ete ke ekedi odudu imọ.

Nnyin imokut edidem Israel emi okokoñde ke ibuot ye ke afara akan kpukpru nditọ Israel, ke emi ama ọsuhọde itie esie okosim ukpuhọde idem, ke ntaha edisine ñkpọ ye ndot-ndot iso ye ndodobi enyin ye mba ọbiọñ, adaha etiene abia-idiọñ. Enye ama ọsuhọde ke spirit okosim idaha editim nnim ke akpanikọ nte ke abia-idiọñ ekpekeme ndikot Samuel nsio ke obio ekpo. Enye ama afiak edem okosim idaha emi enye efrede ete ke se ededi emi mme isuñ-utom Satan edinamde ke odudu efen, edi odudu andidiọk ye abiaña.

Baba eti ñkpọ kiet itoho ke usuñ idiọk iwọrọ. Ete nsu ikemeke nditiñ akpanikọ ibọhọke ke enye ndinam enyime ata abiaña esie. Ke ñkpọ-ntibe enye emi, eyihe iduhe nte ke satan okoyom ndinam ñkpọ nnim emi mme owo editienede ke ini iso, edi Akwa Abasi ama ọbiọñọ enye. Mme asua akpanikọ ekeme ndiwọñọre ñkpọ-ntibe emi man ekekem ke uduak mmọ, edi mbio emi emade Abasi ye akpanikọ Esie ekut ete ke mmọ inenke.

Akpatre Erisin Ye Ibọrọ Abasi

Akana nte Saul ọkpuhọde idem esie, asaña ebe ke nna-ekọñ mme asua, ñkpọ nte itiat duop okosim Endor. Ke enye ama okokut ñwan oro, ekenyene ndikpe ye enye man abiat mbet Abasi ye ewuhọ esie emi enye okowukde ete enọ owo eke edibiatde mbet Abasi ufen. Ke ndinam emi enye ama abiat mbet Abasi ye ewuhọ esie ñkọ. Edinam emi ekedi ñkoi nnam, koro enye akasiande ñwan oro ete ke ñkpọ idinamke enye edieke enye okopde uyo imọ. Enye ama ọfiọk ete ke imọ ikanam idiọk-ñkpọ, nte ñwan oro eketide enye; edi enye okokokoi anam nte mme udọñ esie ekedide. Enye ama ọfiọk ete ke usuñ esie akañwañwana ye kpukpru usuñ Abasi; kpa ye oro, enye okosuk etiene usuñ esie inyuñ inyimeke ndisioño idem mfep. Enye ama eneñere ọsọñ esit ke edinam idiọk.

Ñkpọ ikoduhe ke ebeñe esie emi akpanamde ñwan oro ofiori ke ñkpa-idem. Edi ñkpọ ama odu emi ekesinde idem akpa enye usọp-usọp. Emi edi uwut-ñkpọ nte ke enye ikenyeneke se akanamde baba kiet ke usọp-usọp edinam emi eketienede ebeñe Saul nditiñ ikọ ye Samuel.

Ebre idiọñ emi ke Endor ama enyene adaña emi enye ekesidukde etre ke obio ekpo, oto ke odudu idiọñ esie, ini emi, Abasi ama anam enye okut ñkpọ emi ọkọtuñọde akan oro adian do, koro emi akayarade oto ke akwa ndik emi akanamde enye ke ndikut “ata akwa owo nte otode ke isọñ ọdọk”. Emi ikedighe se enye ekekerede. Emi ikonyuñ idighe se enye okoyomde ndikut. Enye ikenyeneke ifet ndida odudu idiọñ esie nnam utom kaña, ikonyuñ inyeneke ini ndinam abiaña esie mme ndibine idiọk odudu esie. Ñkpọ emi enye okokutde ikedighe ke ini enye okoyomde. Emi ekedi eriyarade emi okokponde akan onyuñ asañade ke usuñ efen emi mmidighe nte enye ekesikutde ke akpa. Ntak ekedi koro emi okotode odudu Owo emi okokponde akan enye ye Satan, ete ufọk esie.

Ke ndikere mbaña enyene ndik ñkpọ ntibe emi, imokut ite ke Abasi anam ñkpọ ukpuhọ-ukpuhọ etiene nte ñkpọ okonyuñ edide ukpuhọ-ukpuhọ. Saul ekedi isio-isio owo, isio-isio edidem, emi ekenyenede saña-saña itie ke mbuk ñkpọ-ntibe idut eke mminyeneke se edade edomo ye idut ekededi ke ererimbot.

Owo ikemeke ndinyik Abasi ete asaña ke usuñ ye mbet ye ido owo. Edieke Abasi oyomde ndikama oruk usuñ ntem nnam, Enye ekeme ndinam ntre, onyuñ ọwọñọde ọkpọñ usuñ ye ido eke Enye esidade anam ñkpọ. Edi oro iwutke ite ke Abasi ononim edu eke anade anam ñkpọ etiene kpukpru ini. Edieke okpokoyomde Samuel ọdọk edinọ Saul emi ama ọkọkpọñ Abasi ubiere-ikpe nsobo, Enye akpanam oro ke mmikam inimke ewuhọ nte ke ana owo anam akpa-mkpa ọwọrọ edi kpukpru ini. Enye ndinam emi inyuñ iwutke ite ke Enye eyetọñọ ntak anam oruk edinam emi ñko ke ini ekededi ke iso. Abasi akanam mbet ọnọ owo edi inamke inọ idem Esie. Enye anam ñkpọ etiene nte anana utit ifiọk Esie ye unyime ubọñ Esie edide. Nnyin imenehede inen ke ndidọhọ nte ke edi Abasi akanam Samuel oto ke obio ekpo edi, ke ntak mfina emi. Ke ndinam ntem Abasi ama ọkpọnọrede Saul onim ñkañ kiet, onyuñ ọkpọnọrede ebre-idiọñ onim ke ñkañ eken ke ntak emi Enye otimde ọdiọñọ man ekekem ke mme uduak Esie.

Saul okoyom nnọ-item. Enye okoyom mme item eke okponde. Edi enye ikọbọhọ baba kiet. Owo iwetke ite ke enye ke idem esie ama okut Samuel. Editiñ nte eketiede emi ebre-idiọñ eketiñde ọnọ enye, ama ekem ndinam enye ọdiọñọ ete ke Samuel ama odu do, ndien uyo emi enye okokopde ekedi eke Samuel. Edinam ebre-idiọñ ama eneñede owut ete ke Samuel ama otim owut idem ndien ikedighe ebre-idiọñ ndikpuhọde idem esie nte mme anam utom andidiọk eken esiwakde ndinam ke abiaña. Ñkpọ-ntibe emi ibereke ye nsu-nsu mbuk emi enimde ke akpanikọ ete ke ekeme ndibọ etop uñwam nto obio ekpo, koro ke idem ñkpọ enye emi, ubọk Abasi odu mi, nnyin imokut ite ke Saul ọkọbọ uyo emi ọkọtọñọde ntak etiñ enọ enye abaña nsobo esie ikpọñ; ñkukure se ekediande ekedi nte nsobo emi edidade itie ke akpatre. Mme mmọ emi ekpọnọrede uduak Abasi enim ñkañ-ñkañ enyuñ eyomde ndọñ-esit ye inemesit emi mmidighe unen mmọ, eto obio-ekpo mme usuñ efen ekededi eke otode andidiọk, idikopke ata ndọñ-esit ke mmibọhọke uyo nsobo emi edisuade ọnọ mmọ. Usuñ kiet kpọt odu, oro onyuñ edi usuñ Abasi!

Mme Utip Edisin

Edi akpanikọ nte ke emi edi kiet ke otu ukpep-ñkpọ ke Ñwed Abasi emi enyenede mfuhọ akan. Baba inemesit iduhe ke ndifiọk nte ke ukpọñ owo emi mmidikpaha ke nsinsi, ke ọsọsuhọde aka ke nsinsi nsobo. Emi ekedi owo emi ama ọkọfiọk ima Abasi, emi ama okonyuñ atabi mme edidiọñ emi etode Abasi. Idahemi nnyin imokut nte enye asañade mbọm-mbọm, inyuñ inyeneke idorenyin koro kpa ke idem ini akwa ñkpọ-ntibe emi, baba erikabade esit ikoduhe ke abaña edikpọñ Abasi emi enye ọkọkpọñde.

Ñkukure ñkpọ emi ekebetde Saul ke iso ekedi inua-otop emi ebede oduk nsinsi ini. Ñkukure ikọ efen emi enye okokopde oto Samuel ekedi: “Mkpọñ afo ye nditọ iren fo eyedu ye ami”. Emi ọkọwọrọ ete ke eyesọp ndisibe enye mfep ke isọñ mme andidu uwem, emi idorenyin odude, ndien eyenyuñ ekut enye ke otu mme akpa-mkpa ikaba, emi idorenyin ama ekebe. Enye idikemeke ndidu ke ebiet idara ye ata inemesit ye Samuel koro nnyin imokot ke mbuk owo inyene ye Lazarus, ite ke akamba ukpe ama odu ke ufọt ndiọi owo emi ekekpañade ye mbon emi ema ekenyọñọ eka ndidu ye Abasi. Se akwa ukpuhọde emi okodude ke ikọ nsua-nnọ emi okotode Samuel osim Saul, ye idorenyin emi okodude ke ikọ eke owo inọ oro ọkọkọñọde ke eto okokopde oto Jesus: “Mfin emi afo eyedu ye Ami ke Paradise.” Inọ oro ama akabade esit; Saul ikakabakede!

Saul ama anyanade ana ke isọñ ke unana idorenyin ye mfuhọ ye mkpọfiọk. Ke edinyenyik, enye ama adaha ke enyọñ, etie ke bed onyuñ adia udia emi ekenamde usọp-usọp. Enye ikanamke ntre koro enye okoyomde udia, sia idorenyin esie ama okure ye kpukpru nti ñkpọ ye mme ñkpọ eke ekpenamde uwem enem enye. Owo ikpekemeke ndikere mbaña ñkpeñenyeñ ye ndobo emi ekekande otu owo emi ekebonode ebet do ekuk. Mbubru ye nnam-inua mme nduai-idem editie mbet ekọñ ke edem usen ikoduhe nte esiwakde ndidi. Nte ededi, mmọ ema edia ñkpọ ke ndop-uyo, esit mmọ odobi ye mme ikọ nsobo emi eketiñde enọ mmọ ke okoneyo oro.

Mkpọñ oro ama esiere. Owo emi Abasi ekemekde ọnọ nti utom, enye emi ekebemde iso enyene inemesit ini kiet ndifiọk nte ke Spirit Abasi eke ọfọnde onyuñ ananade ndo, odoro imọ ke idem, onyuñ etiñde ikọ ebe ke imọ onyuñ ada imọ usuñ, ama ọwọrọ asaña ke okoneyo oro!

Questions
MME MBUME
  1. Nso ekedi ntak emi Abasi ekesinde Saul?
  2. Anie ekesidi andinọ Saul item?
  3. Nso ikedi afanikọñ emi okosimde Israel, ye Saul nte ada-usuñ mmọ ke utọ ini emi?
  4. Nso utọ mme ọnọ-item ke Saul ekenyene ke ini emi?
  5. Nso ke Saul akanam ke ini afanikọñ emi?
  6. Edinam Saul okowut nso, akpan-akpan ke abaña ñkpọ spirit esie?
  7. Nso ikedi mbet Abasi ke abaña ubre-idiọñ ye ukpono-ndem?
  8. Saul akanam nso ke abaña mbet Abasi emi ke akpa? Nte edinam esie ama ọkpuhọre ke ini afanikọñ emi?
  9. Nte itie edikot ke ukpep-ñkpọ emi ọnọ ndusuk nsu-nsu Prophet isọñ ndika iso ke ukpep-ñkpọ mmọ?
  10. Nte ema ebọrọ ebeñe Saul emi okoyomde ndifiọk se iditibede? Nso ikedi udori esie ke utọ ini emi?