Matthew 27:57-66; 28:1-15

Lesson 221 - Senior

Memory Verse
“Koro Enye omonim usen eke Enye edikpede ikpe ọnọ ererimbot ke edinen ido, ke ubọk Owo emi Enye ekemekde; Enye onyuñ ada erinam emi Enye anamde Owo oro eset ke mkpa ayarare owut kpukpru owo ete edidi ntem” (Utom Mme Apostle 17:31).
Cross References

I Edibuk Jesus Christ

1. Ekebuk Jesus ke udi owo inyene, nte eketiñde ke ntiñ-nnim ikọ, Matthew 27:57-60; Isaiah 53:9; Mark 15:42-46; Luke 23:50-53; John 19:38

2. Mary Magdalene ye Mary eken ema eda ese nte ebukde Jesus, Matthew 27:61; Mark 15:47; Luke 23:55, 56

II Ediomi Mme Pharisee

1. Mme Pharisee ema ebeñe enyuñ ebọ uñwam eto mbon Rome ke mmọ ndidomo ndibiọñọ ediset Jesus, Matthew 27:62-66; Psalm 2:1, 3

III Usenubọk Ediset

1. Angel Abasi ama anam odudu mbon ukpeme Rome ọwọrọ ikpikpu, Matthew 28:1-4

2. Angel ama ọnọ mbuk idara abaña ediset Jesus, Matthew 28:2-7; Mark 16:6; Luke 24:6

3. Edọñ iban ete esian mbet Jesus ebaña ediset Esie, ke Enye eyenyuñ osobo ye mmọ ke Galilee, Matthew 28:7; 26: 32; Mark 16:7

4. Idem akpa mme asua Jesus abaña ediset Esie, Matthew 28:11-15; Psalm 78:65, 66; Isaiah 51:9; 42:13-16

5. Jesus osobo ye iban oro nte mmọ ekade ndinam se angel ọkọdọhọde mmọ, Matthew 28:8-10; Mark 16:9

Notes
SE EKPEPDE EBAÑA

Udi Owo Inyene

Kiet ke otu mme ọkwọrọ-ikọ Abasi ke eset ama etiñ abaña mme ntiñ-nnim ikọ emi ebañade mkpa ye edibuk Christ ete: “Owo eke ọsọpde ndikut ñkpọ anyan usuñ ekeme nditiñ nte ñkpọ oyomde nditibe onyuñ ebet ndikut nte ñkpọ oro otibede uwak-uwak, edi, edi Abasi ikpọñ ekeme ndikut ata ñkeñe ñkpọ”. Abasi ikpọñ ekpekeme ndise mbe ke ediwak emana nnyuñ ntiñ ukem-ukem mme ñkpọ emi editibede ke ini mkpa Christ. Kiet ke otu ntiñ-nnim ikọ emi edi enye emi Isaiah, anditiñ ntiñ-nnim ikọ etiñde: “Mmọ enim udi esie ye mme idiọk owo, edi enye odu ye owo inyene ke mkpa esie” (Isaiah 53:9).

Jesus okonim udi Esie ye mme idiọk owo sia ekekọñde Enye nte anam-idiọk ke ufọt inọ iba. Owo ita emi ema ekut mkpa usen kiet, udi enyuñ ebọ ikpọhidem mmọ. Emi ke idem esie ekedi utibe edisu emi ntiñ-nnim ikọ okosude, koro ikañwañake mme anditiñ ntiñ-nnim ikọ emi eketiñde ikọ ebaña Jesus, mmọ ikonyuñ ifiọkke kpukpru ñkpọ emi editibede ke abaña mkpa ye ediset Esie. Mmọdo mmọ ikpekekemeke ndibem iso ntiñ mbaña mkpa Christ edieke mikedighe Abasi akayarade ọnọ mmọ. Anie ke mibọhọke Abasi ekpekeme nditiñ ete ke Jesus eyekpa ye mme idiọk owo edi ebuk ke udi owo inyene?

Mme andikọbọ Jesus ema enam ñkpọ ọsọñ eti-eti ọnọ mbet Esie, akpan-akpan ke ini emi ekekọñde Enye ke Krọs. Kpa ye oro, ke ini ukut emi, Joseph owo Arimathea ama ọwọrọ ada onyuñ ebeñe okpo Jesus. Ke anamde Pontius Pilate ọfiọk ebeñe esie, ema enyime enọ enye ete obuk okpo Jesus. Joseph ama anam emi, ntem ke ekebuk Christ ke udi owo inyene; koro Joseph ekedide owo inyene onyuñ enyene udi emi ema ekediọñ enim nte ido ekedide. Ntem ke Abasi okowut ete ke Ikọ Esie ikemeke ndikpuhọre, ke ndinam kpukpru ñkpọ emi esu ọyọhọ-ọyọhọ, emi ekebemde iso etiñ ebaña ke ediwak isua ke edem.

Ukpeme Ye Ufik-Ñkpọ Mbon Rome

Mme Pharisee ema edi ke ọtọ Pilate ebeñe enye ọnọ mme imọ uñwam ke ndikut ete ke mbet Jesus iyipke okpo Esie isio ke udi. Pilate ama onyime ọnọ mmọ. Ema enim mme ekpeme udi enyuñ edian ufik-ñkpọ mbon Rome ke itiat, emi ọkọbiọñọde owo ndibe nduk do.

Mme Pharisee eketiñ enọ Pilate ebaña ndik emi mmọ enyenede ete ke mbet eyeyip okpo Jesus ewọrọ enyuñ edọhọ ete ke Enye ama eset. Mmọ eti ikọ Jesus emi ọkọdọhọde ete ke iyetọñọ ntak iset. Edi utibe-ñkpọ ete ke eketie nte mmọ ema enyene mbuọtidem ke ukeme Jesus ndiset ke mkpa ekan nte mbet Jesus ekenyenede. Mme Pharisee emi ema efiọk ete ke Jesus ama akpa, edi mmọ ema esuk enyene ndik enyuñ efehe odudu emi Enye akanamde utom ke ini odude uwem, ndien enam kpukpru se mmọ ekekeme ndikpan ukpep-ñkpọ Esie nditọñọ ntak ndemere, mme Enye ndiset. Edieke ekpekedide ubọk owo ama ekeme ndimum Jesus Christ nnim ke udi Esie, Enye okpokosuk odu do. Mme asua esie ema enyene ini mmọ! Ini ekim akayak esisit ndibe mfep, ndien ediye uñwana obufa usen ke akwa uduak Abasi ekpere ndiwọrọ nda. Ke Enye ndiwọrọ ke udi, Christ akabade edi akpa mbuñwum ediset nnyin ke mkpa, idorenyin ke esine-ufọt mme anditiene Christ!

Jew ye Gentile, ererimbot , obukidem, ye andidiọk ekoduk odu ndiwot Ọbọñ Ubọñ, eyom ndibin Enye nduọk ke nsinsi. Mmọ ema enam akpatre ukeme mmọ, edi idahemi Abasi okoyom ndiwut mmọ ukeme, odudu ye ubọñ Esie.

Ukpọk Udi

Nnyin imekeme ndikere nte akafinade mme Pharisee ye mbon Rome ke ini mmọ ekopde ete ke Christ emeset. Etop ediset ke mkpa oro edi ntak emi ikọt Abasi esisiode mkpo idara ye edikan emi minamke mmọ edop uyo. Ema enam akwa utom Abasi ekure enyuñ esọñọ edinyaña ukpọñ nsio ke idiọk-ñkpọ. Iseri odudu mbon Rome emi mme ekpeme udi ekedide nte ibuot, ama ọkpọnọre ana ñkañ-ñkañ, angel Abasi onyuñ akpat akwa itiat emi okofukde inua udi Jesus efep. Ekemem didie Ọbọñ nnyin ndikpat mme ñkpọ emi eketiede nte ubiọñọ ọnọ Enye ndiset nnim ñkañ kiet!

Ema ekan mkpa, obio-ekpo ye udi ñko. Iduhe ubọk ererimbot emi ekekemede ndikpan Enye ke ñkpọ efen ekededi, odudu satan mme ñkari esie inyuñ imumke Ọbọñ inim ke udi. Mfiori ekọñ Ufọk-Abasi emi akande, tọñọ ke usen-ubọk idaresit oro, edi: “O mkpa, erikan fo enye? O mkpa, ifọt fo enye?” (1 Ñwed Corinth 15:55). Ikọ Isaiah ama akabade osu: “Ndidem eyekubi inua enọ enye: koro emekut se miketiñke inọ mmọ, emenyuñ enim ibuot ke se mmọ mikokopke” (Isaiah 52:15; Ñwed Mbon Rome 15:21).

Etop Idaresit

Jesus ama etiñ ọnọ mbet esie ete ke ini eyedi emi mmọ edifuhọde oto ke ñkpọ-ntibe emi edidide, edi ke mmọ eyefiak edara: “Mbufo eyetuaña enyuñ eseme, edi ererimbot eyedara: mbufo eyefuhọ, edi mfuhọ mbufo eyekabare edi idara... Mmọdo mbufo edude ke mfuhọ ke emi; edi nyetọñọ ntak ñkut mbufo, esit eyenyuñ adat mbufo, ndien baba owo kiet idibọhọ mbufo idaresit mbufo” (John 16:20, 22). “Eyet eyedañ ke mbubreyo, ndien idara edi ke usen-ubọk” (Psalm 30:5).

Okoneyo mfuhọ mmọ emi ekemade Jesus ama ebe. Iban emi esit mmọ ọkọbuñọde ke ntak mkpa Andikpep mmọ ebak edi ke udi, esim do ke eti ini ndidi akpa mme andikop etop idara emi angel ọkọnọde: “Enye iduhe mi; Enye emeset kpa nte ọkọdọhọde. Edi edise ebiet emi Ọbọñ akanade do” (Matthew 28:6).

Iban oro ema ebọ etop ediset emi ye idaresit kpa nte edide ye ediwak owo tọñọ ke ini oro. Iban emi ema eka usọp-usọp, ye esit emi ọyọhọde ye idara, ndinam se angel ọkọdọñde mmọ: nditiñ utibe ñkpọ-ntibe oro eketibede nnọ mbet Jesus.

Christ Emi Esetde

Ndo-ndo oro mmọ etọñọde ndika ñkoyom mbet Jesus, Enye ayarade Idemesie ọnọ mmọ. Osuk esidi ntre. Ndo-ndo oro nnyin inimde ikọ-ntiense mmọ emi efiọkde, nnyin iyekut ediset Christ ke idem nnyin (Se Utom Mme Apostle 10:41). Utọ eti utip oro enyene mmọ emi ebakde eyom Ọbọñ, koro eñwọñọ Abasi edi: “Mbufo eyeyom mi, enyuñ ekut mi, koro mbufo edibinede mi ke ofuri esit mbufo” (Jeremiah 29:13).

Etop ediset Jesus ikedighe ñkpọ idara ke otu mme Pharisee. Ke ini mmọ ekutde utibe edinam emi ayañade owo, otibede tọñọ nte ererimbot okodu, se mmọ ekenamde ekedi ndisu nsu, nnọ ubọk-edem, nnam abiaña, ke ndidomo ndiyut akpanikọ oro. Mmọ enọ mbon ekọñ ubọk-edem, man mmọ nte mme andikpeme udi Jesus edọhọ ete ke mbet ema ediyip okpo Jesus. Edi Abasi ama ananam utibe utom Esie (Se Isaiah 28:21; Utom Mme Apostle 13:40, 41; Habakkuk 1:5). Ema ekibi inua mme owo oro ekesude nsu edian Christ (Psalm 63:11; Utom Mme Apostle 13:30).

Etop Eti-mbuk

Ufọk Abasi Christ ọkọtọñọ ke ediset Christ. Ekenyene ndifiori nnyuñ ñkwọrọ etop ye idorenyin ediset ke ebiet ekededi eke owo odude, nte itiat idak-isọñ Eti-mbuk. Jesus iketiñke inọ mbet Esie ite enam utom mmọ ke otu mme Jew ikpọñ. “Mbufo eka ekenam kpukpru mme idut edi mbet Mi” ekedi etop Eti-mbuk. Kpa nte Jesus akakpade ọnọ ofuri owo, ntre ñko ke ofuri owo enyene ndikop eti mbuk ediset Esie. Utom mmọ oro ekekutde Enye ke Enye ama akakpa onyuñ eset ekedi nditiñ eti mbuk oro nnọ mmọ emi mikekwe, oro edi se Abasi oyomde.

Idighe kpukpru owo edara etop Eyen Abasi emi akakpade onyuñ ọtọñọde ntak eset man ọnọ owo utebe-ikpe. Jesus ọkọdọhọ Thomas, owo emi eketiñde ete ke imọ idinimke ke akpanikọ ibọhọke imọ ida ubọk ituk nde unan Christ: ete “Thomas, sia ama okokut Mi, omonim ke akpanikọ? Ọfọfọn ọnọ mmọ emi mikekwe edi enimde ke akpanikọ” (John 20:29).

Mmọdo nnyin imọfiọk ite ke mbuk ediset Christ inyeneke ufọn inọ owo ibọhọke nnyin iyak akpanikọ emi asañade ye enye anam utom ke ukpọñ nnyin. Ke inamde emi, Abasi eyedi ntiense ọnọ nnyin ke abaña akpanikọ Esie. Nnyin iyekop nte odudu ediset oro odude ke uwem nnyin, añwam nnyin ndidu obufa uwem, onyuñ ọnọ nnyin idorenyin ndidu ye Ọbọñ ke nsinsi.

Questions
MME MBUME
  1. Ke nso usuñ ke mme anditiñ ntiñ-nnim ikọ ekebem iso etiñ ebaña edibuk Jesus?
  2. Mme anie ekebem iso ekut Jesus ke Enye ama ekeset?
  3. Didie ke mme Pharisee ekekere ndibiọñọ ediset Christ?
  4. Nte afo ekere ete ke mmọ ema etim enim ke akpanikọ ete Enye eyeset?
  5. Nso idi ntak emi ediset ke mkpa edide akpan idorenyin ọnọ Anditiene Christ?