Lesson 216 - Junior
Memory Verse
“Ndiọi owo ye mbon abiaña eyedọdiọñ ediọk eka iso, ebiaña owo, owo eyenyuñ ebiaña mmọ” (2 Ñwed Timothy 3:13).Notes
Israel Edu Ke Afanikọñ
Mme Philistine ekesidu ke mbeñe-idem kpukpru ini eyom ifet ndiñwana ye Israel. Ke ini emi ñko akwa udim ekọñ mmọ ema esobo idem ọtọ kiet ndiñwana ekọñ. Saul okosuk edi ada-ibuot ọnọ mbon-ekọñ Israel, ndien okonyuñ edi utom esie ndiñwana ye mme Philistine, okposuk edi nte David ye ikọt esie ema ekekan mme asua Israel emi ke ndusuk ekọñ.
Ke ini Saul okokutde akwa udim ekọñ mme Philistine, enye ama okop ndik. Eketie nte ñkpọ eke mme asua ekewakde eti-eti ọnọ enye ndiñwana. Mme ada-usuñ emi efiọkde Abasi ke Israel ema esibọñ akam eyom uñwam Abasi ke oruk ini ntem ke ini mmọ minyeneke uñwam, ndien Abasi ñko onyuñ ọnọ mmọ erikan. Mmọ ema ekan mme asua oto ke odudu Abasi.
Akam Emi Abasi Mikopke
Saul ama ọfiọk ete ke ekesinyene erikan eto ke uñwam Abasi; ndien idaha emi ke ini enye ọkọfiọkde ete ke uñwam efen iduhe, enye ñko ama onyime ndikot Abasi nyom uñwam. Edi ke emi Abasi ikeyereke ibe ke ndap me ke Urim ye Thummim mme oku, me ke me anditiñ-ntiñ-nnim ikọ.
Ini ama odu emi Abasi ekesibọrọde akam Saul. Oro ekedi ke ini Saul akasañade ke uduak Abasi. Abasi ama ọnọ enye obufa esit man ekeme ndifiọk uduak Abasi. Edi ke esisit ini enye ama okop inem ebuana ye Abasi emi okotode ke ñkop-uyo. Edi Saul ama afiak edem onyuñ okokoi ọsọñ ibuot ke ediwak ini emi akanamde Abasi ọwọñọre ọkpọñ inyuñ ibọrọke akam esie aba.
Kere utọ enyene-ndik itie emi, emi baba owo kiet mikopke akam fo! Emekeme ndikere nte ekpetiede ye afo edieke owo baba kiet miduhe ndiñwam fi, ndien Abasi ñko inyuñ ikpañke utọñ ke ini afo ọbọñde akam? Ti ete ke Jehovah ama ọdọhọ ete, “Spirit mi idiñwanake ye owo ke nsinsi” (Genesis 6:3). Edieke owo osuk akade iso añwana ye Abasi onyuñ etrede ndikpañ utọñ ke ini Enye etiñde ikọ, ini ekeme ndidi emi Abasi ñko editrede ndikpañ utọñ. Ndusuk owo eyom uñwam eto mme ñkpọ efen kaña; edi ke ini mmọ minyeneke uñwam, mmọ ebine Abasi. Abasi enyene mbọm, ndien kpukpru ini enye akpañ utọñ onyuñ ebet ndikop akam. Edi akpana owo efehe ndik mbak enye edibiat ini akaha ke ndiseme ñkot Ọbọñ.
Usuñ Efen
Saul ikenyeneke ime ke ini enye ọkọfiọkde ete ke Abasi idibọrọke akam esie. Samuel, anditiñ ntiñ-nnim ikọ emi etiede nte ete ọnọ enye okonyuñ esitiñde uduak Abasi ọnọ enye ama akpa, ndien owo efen ikoduhe inọ Saul ndiwọñọre mbine.
Ke mme usen emi Saul ekenyenede ndik Abasi ke esit esie, enye ama anam akwa utom kiet. Enye ama ebin mme mbia-idiọñ ye ifọt iren ye iban efep ke isọñ Israel. Abasi ama ọnọ ewuhọ ete ekuyak oruk mbio oro edu uwem ke isọñ Israel (Exodus 22:18). Mmọ ekedi mme okpono-ndem enyuñ ekeme ndibiat nti edu-uwem ikọt Abasi. Ekese mmọ ema efeñe, ndien baba owo kiet ikoduhe ndika iso ke idiọk odunam emi.
Saul, ke nnanenyin esie, ama odomo ndiyom item nto owo nsaña-ekpo. Enye ama okot nditọ-ufọk esie onyuñ obup mme mmọ efiọk owo nsaña-ekpo ekededi. Kiet ke otu mmọ ama ọfiọk abaña owo nsaña-ekpo ke Endor, ndien Saul ama ebiere ndika ntiene enye.
Saul Ye Ñwan Ifọt
Saul ama ọkpuhọ idem ke okoneyo onyuñ asaña ye nditọ-ufọk esie eka ndiyom idiọk añwan oro, emi akanamde utom ọnọ andidiọk. Saul ekedi anam-idiọk ama onyuñ ọfiọk ete ke imọ ibiat mbet Abasi ke se enye akanamde, edi enye ama okop but ndiyak owo efen ọfiọk abaña. Enye ama ekere ete ke iyekeme ndidip mme idiọk-ñkpọ esie man owo efen okufiọk. Enye ikekereke-kere ite ke eyewet mbuk edika esie mbine ñwan ifọt ke Endor esin ke Ñwed Abasi enọ ediwak owo ndikot ke ata ediwak isua emi edidide. Kpukpru owo emi ekotde Ñwed Abasi idaha emi efiọk ete ke Edidem Saul ama ọkpọñ Abasi Israel onyuñ oyom uñwam oto Satan.
Ke ini Saul okosimde ufọk añwan ifọt emi, enye ọkọdọhọ enye okot Samuel ọnọ imọ. Ke ndo-ndo oro enye osuk etiñde ikọ Samuel ọwọrọ owut idem. Ñwan oro ikenyeneke odudu ke spirit mme akpa-mkpa. Inyeneke se akpakanamde ndida Samuel me owo ekededi mfiak ndi ke ererimbot. Ediwak mbia-idiọñ ye mme okot ekpo emedomo ndinyene nneme ye mme akpa-mkpa tọñọ ke mme usen añwan ifọt Endor, edi baba owo mmọ kiet ikemeke ndinam ntre. Ke ifet enye emi, Samuel ama ọsọsọp ọwọrọ owut idem tutu ñwan emi ikenyeneke ifet ndinam baba ñkpọ kiet.
Ñwan emi ama osio mkpo ke ini enye okokutde Samuel. Enye okodu ke mkpa-idem kpa nte owo kiet ekededi okpodude ke ndikut spirit Anditiñ ntiñ-nnim ikọ emi ama akakpa. Edi Abasi okonyime ọnọ Samuel ọwọrọ edi man edinọ Saul ubiere-ikpe ini kiet efen. Ke ini ñwan oro eketiñde se enye okokutde, Saul ama etiñ ọnọ enye ete ke ekedi Samuel. Ndien Samuel ọdọhọ ete, “Afo anam didie otimere mi ke edinam mi ndọk ndi?” Saul ọbọrọ ete, “Mmetie ke ata itie ukut: ndien mme Philistine ke eñwana ekọñ ye ami, Abasi ama onyuñ akabare ọkpọñ mi, inyuñ ibọrọke aba mi ke ubọk mme prophet, ye ke ndap: mmọdo ñkotde fi, man afo eteme mi se ndinam”.
Ikọ Abasi Ikpuhọkede
Nti mme anditiñ ntiñ-nnim-ikọ eke Abasi idikpuhọkede Ikọ Abasi. Ekeme ndidi Saul ama ọfiọk ete edieke Abasi esinde imọ, iduhe ñkpọ ndomo kiet eke Samuel ekemede ndinam. Samuel eyenam Ikọ Abasi osu.
Ke ini uwem Samuel enye ama anam akpanikọ ọnọ Saul. Enye ama etiñ ọnọ enye abaña nti ñkpọ eke editienede enye edieke enye okopde uyo Abasi; enye ñko ama ọnọ enye ntọt abaña se ntut-utọñ ekemede ndida nsọk enye. Saul ama aka iso ọsọñ ibuot, ndien Samuel ke akpatre ama etiñ ọnọ enye ete ke ebọ enye itie ubọñ enọ owo efen eke odotde.
Ikọ Abasi ikpuhọkede. Samuel afiak etiñ ikọ ubiere-ikpe idaha emi: “Jehovah omonyuñ awabare fi itie edidem ke ubọk ọbọ, ada enye ọnọ mbọhiduñ fo, kpa David: koro afo mukokopke uyo Jehovah”. Samuel ama enyene ñkpọ efen ndidian ke ubiere-ikpe oro: “Jehovah eyenyuñ ada Israel ñko ye afo esin mme Philistine ke ubọk: ndien mkpọñ afo ye nditọ-iren fo eyedu ye ami”.
Saul eyekpa mkpọñ! Nso utọ enyene-ndik mbuk! Oro ikedighe se Saul okoyomde ndikop. Mkpọñ enye ye nditọ esie eyedu ye Samuel ke obio ekpo, edi Saul idibọhọ ndọñesit ke “ikpanesit Abraham,” nte mmọ emi ekekpade ye edinyaña ukpọñ. Nte nnyin ikpepde ito mbuk Lazarus ye owo inyene, akamba ukpe ama odu ke ufọt itie emi Lazarus okodude ke inemesit ye itie emi owo inyene okodude ọbọ ndutuhọ. Jonathan emi akanamde akpanikọ ọnọ Abasi eyeka okodu ye Samuel ke ebiet nti owo.
Unana Idorienyin
Ekeme ndidi Saul ama ekere ete ke eyeyak imọ ika iso idu uwem esisit ke ntak Israel. Edi usen eke enye edinamde ibat ama ekem, ndien mbọm ikoduhe.
Etop emi ama ọnọ Saul mmemidem eti-eti. Enye ama ododu ke mfuhọ emi akanamde enye etre ndidia udia ke ofuri okoneyo kiet ye uwemeyo kiet, ndien ke mmemidem emi enye ama ọduọ. Idem ama enyek ñwan oro, ke ini enye okokutde nte idem okotimerede Saul, onyuñ ekere ete ke enye ekeme ndikere ete ke imọ idi ntak mfina esie, ndien ke enye eyeyom ndiwot imọ. Ñwan emi ama eti enye ete ke enye ama ọñwọñọ ọnọ imọ ete ke nte ededi ke enye idiwotke imọ.
Saul ikanamke ñwan ifọt emi idiọk. Nditọ ufọk Saul ye ñwan oro ema enọ enye uñwam man enye adia udia ikonyuñ ibighike enye ama okop nsọñ-idem ndisaña nnyọñ. Edi enye ikenyeneke idorenyin. Mkpọñ enye eyekpa, n
dien eyenyuñ ebọ ufọk esie ubọñ Israel. Oro edi nte owo emi ama ọkọbọ edinyaña ini kiet onyuñ asaña ye Abasi, edi ekem afiak edem ọkpọñ Enye, ekemede nditak.Questions
MME MBUME- Nso ikedi mfina ke Israel?
- Ekesinyene didie edikan enọ Israel ke mme ini edem?
- Nso idi ntak emi Abasi mikokopke akam Saul?
- Edieke owo osuk akade iso afiak edem ọkpọñ Abasi, nso ke enye ekeme ndibọ nto Abasi?
- Nso ke ñwan ifọt oro akanam ke ini enye okutde Samuel?
- Anie akara spirit mme akpa-mkpa?
- Nso ke Samuel eketiñ ọnọ Saul?
- Eketie Saul didie ke idem ke ini enye ọkọkpọñde ufọk añwan ifọt?
- Tiñ se ewetde ke Genesis 6:3