Lesson 218 - Junior
Memory Verse
“Idiọk-ñkpọ ama ọkọkọri, osioño mkpa” (James 1:15).Notes
Mfuhọ ke Utit
Mfuhọ okokpon didie ke utit uwem Saul! Ke akpa ini enye ekedi enye emi Abasi okokotde, edidem ndimek ikọt Abasi, emi Abasi ye owo ekenemde esit ebaña. Enye akakpa ke ini mfiak edem esie, Abasi ama esin enye, mme okpono-ndem enyuñ ekan enye.
Saul akada esuene emi ọnọ idem esie. Abasi ama ese enye ke mbọm, onyuñ emek enye ke otu owo ete ada nditọ Israel usuñ. Abasi ama ọnọ enye obufa esit, ndien Edisana Spirit ama odoro enye ke idem. Edi ntut-utọñ kiet ama etiene efen ke edem tutu Abasi itiñke ikọ aba ye Saul. Spirit ama ọkpọñ enye, ndien enye inyeneke aba ubiom-ikpe ke esit ke abaña idiọk-ñkpọ. Saul ikekemeke aba ndikan ke mme ekọñ sia Abasi mikọnọhọ uñwam.
Akpatre Ekọñ Saul
Akamba ekọñ ama añwana ke ufọt mme Philistine ye nditọ Israel. Ndien mme udim ekọñ nditọ Israel ekesuk ese Saul nte edidem mmọ ye ebe-iso ekọñ; ndien mme Philistine ema efiọk ete edieke mmimọ idiwotde enye, ke Nditọ Israel eyefeñe ye unana idorenyin.
Mme ọtọmbe, ñkpri ñkama ke ubọk ọtọmbe, ye mme otop ikañ ubọk ikoduhe ke ini eset oro. Ekesida utiga ye idañ, akañ-kañ ye eduat, ndien ke ndusuk ini eda masin utop itiat eñwana ekọñ.
Ke ini mme Philistine ema ekekut Saul, kiet ke otu mme otop-utiga mmọ ama oduri utiga esie onyuñ otop idañ emi ekefede akatiga edidem. Saul ama ada unan mkpa, edi enye ikakpaha ndo ndo oro. Enye ama okot obiom ñkpọ-ekọñ esie ete yak okim imọ ke akañ-kañ owot mbak mme Philistine edida ukpono ke ndibiat uwem esie ye ukara esie ke Israel. Edi obiom ñkpọ-ekoñ ikekereke ndiwot ete-ufọk esie, okposuk edi ekedide akpanikọ ete enye eyekpa nte ededi.
Saul ama ebiere ete ke eduat mme Philistine inyeneke ndiwot imọ, ke ntre enye ama owot idem ke akañ-kañ esie, ndien akpa nte andiwot idem, oduk ke nsinsi ini. Ntem ke owo emi ini kiet, Abasi ekeyetde aran onim ye uyama ini iso akakpa. Enye ekpekenyene nsinsi uwem edieke enye akpakanamde akpanikọ ke ikot Abasi.
Obiom ñkpọ-ekọñ Saul ekekere ete ke ema esuene Israel eti-eti ke ntak iduọ ada-usuñ mmọ, ke ntre imọ idotke ndika iso ndu uwem. Enye ama ọduọ ke akañ-kañ esie ñko onyuñ akpa.
Ukpono Emi Enọde Mme Itie Ndem
Mme Philistine ema edian esuene kiet ke efen. Ekedi ido ndiduñọre idem mbon ekọñ emi ekpañade man esioño nti ñkpọ emi mmọ ekekamade. Ke ini mme Philistine ema ekekut okpo Saul ye eke nditọ iren esie, mmọ ikatañke inyene mmọ ikpọñ, edi ema esibe ibuot Saul, edian ye ñkpọ-ekọñ esie enọ ekenim ke ufọk ndem ke obio mmọ.
Imekere ite ke mme Philistine ema edara koro ema ewot owo usua mmọ; ndien ke ebiet ekededi emi mmọ ebohode ndituak ibuot nnọ ndem mmọ, esimen ibuot Saul edori ndiwut nte mmọ ekekande. Kere utọ esuene ye mfuhọ emi nditọ Israel ekenyenede ke ndikut nte ekesuhọde ada usuñ mmọ itie! Kpukpru mbon Israel ema ebọ ufen ke ntak unana edinam akpanikọ edidem mmọ.
Edikan Ke Mkpa
Didie ke ukpuhọre okodu ke mkpa Saul efen, owo emi akakabarede edi Apostle Paul! Enye ama akañ ukpono ndem añwa-añwa, inyuñ ifeheke ndik ndikwọrọ Gospel Jesus Christ, okposuk edi akanade nte ewot enye ke mbuọtidem esie. Enye ama anam ofuri akpanikọ ke ndinọ mme anam idiọk-ñkpọ ntọt ete ke mmọ enyene ndikabare esit edieke mmọ eyomde ndibọhọ nsinsi ufen. Enye ama ama ukpọñ mme owo eti-eti tutu enye onyime ndiyak uwem esie man añwam mmọ ndika Heaven.
Ke otu mme akpatre ikọ esie ekedi: “Mma ññwana eti eñwan, mma mfehe mbuba mmi mma, mma nsọñọ mmum mbuọtidem ñkama. Ema enim anyanya eti ido ebeñe mi, emi Ọbọñ, kpa Edinen Ebierikpe edinọde mi ke usen oro; idinyuñ inọhọ mi ikpọñ, edi eyenyuñ ọnọ kpukpru mmọ emi emade eriyarare Esie” (2 Ñwed Timothy 4:7, 8). Enye ama osobo ye Abasi esie ke emem. Ama onyime ikot Abasi onyuñ anam akpanikọ tutu mkpa. Utip ke ebet enye kpa nte kpukpru mbon-ekọñ akpanikọ Christ edibọde.
Edi, eke edidem Saul idorenyin ikoduhe. Enye ama ọwọñọde edem ọkpọñ Abasi; ndien enye ikodorike enyin ke baba ñkpọ kiet akan ke Abasi eyenyuñ ọwọñọde edem Esie ọkpọñ imọ.
Ke ini nditọ Israel ema ekekop ke ema ekan ada usuñ mmọ ke ekọñ, mmọ eketie nte erọñ emi minyeneke andikpeme. Mmọ ema efehe ye ndik ekpọñ obio mmọ, ndien mme Philistine ema ediduk ke mme ufọk emi mmọ ekekpọñde.
Uduak Abasi Ke Abaña Nnyin
Ke ini emi David ama anam akamba itie ukara esie ke Ziklag, obio emi mme Philistine ekekarade. Achish, edidem Gath, ama ọnọ David ye ikọt esie, owo 600 unyime ndiduñ mi man mmọ edu ke emem ebọhọ Saul.
Ke ini David ọkọnyọñde ke ekọñ emi enye akañwanade akan mbon Amalek edi, Abasi ama odu ye enye ndien enye ama enyene edikan. Emi ekedi mbon Amalek emi akanade nte Saul osobo; edi koro Saul ama okokpu Abasi ke utom esie, ema edọñ David ndikanam utom oro mma.
Abasi enyene utom ọnọ nnyin ndinam ọtọñọde ke ini Enye anyañade nnyin. Enye ekeme ndise ini iso ñkan nnyuñ mfiọk se nnyin idikemede ndinam, ndien Enye anam uduak Esie nte ekemde ọnọ nnyin. Edi nso iditibe edieke nnyin itrede ndinam utom emi Enye ọkọdọñde? Owo efen enyene ndinam utom oro, onyuñ ọbọ utip. Enyene ndinam utom Abasi, ndien edieke owo kiet etrede mme ayakde ifet utom esie ọduọk, Abasi eyeyom owo efen ndinam utom oro.
Etop Mfuhọ
Idahemi etop edisim David ete ke Saul ye Jonathan ema ekpaña. Owo emi akadade etop emi edi, ekedi ye ñwaha ọfọñ esie ke idem ye ndek ke ibuot esie ndiwut nte ke imọ idi andinọ etop mfuhọ emi. Enye ama ọnuhọ ye esit iseri ke iso David. Enye ekedi ndidomo man ọbọ itoro ọnọ idem esie ke ubọk David.
Ke ini David ama ọkọfiọk ete ke eyen utom emi ama odu ke eñwan ke ini Saul akañwanade ye mme Philistine, enye ama obup abaña owo emi akakande. Nso utọ etop iduọ-esit ke enye okokop! “Kpukpru owo emefeñe ke ekọñ, ediwak owo emenyuñ eduọñọ ekpa. Saul ye Jonathan eyen esie enyuñ ekpaña ñko.” Esidi ñkpọ mfuhọ didie ke ini nditọ Abasi eyakde asua ekan mmọ ndien mmọ efeñe enyọñọ ufọk-ọfọñ mmọ!
Akparawa oro ama aka iso ndinam añwaña nte mme Philistine ekedade chariot ye horse ke ufọt ọkpọsọñ eñwan ebine Saul ye Jonathan. Akparawa oro ete ke Saul ama okot imọ ete idiwot enye. Akparawa oro ama onyime, ọdọhọ ete, ke imọ ima ida anyanya ye okpoho ubọk esie, ndien ke imada mmọ idahemi idisọk David. Enye ama onim ke akpanikọ ete ke David eyenọ enye ukpono, ke ndibiat uwem owo emi ke ediwak idaha esidomode ndiwot David. Edi edieke David okpokoyomde ndida uwem Saul, enye akpakanam ntre ke idem esie.
Ibọrọ David
David ikọbọhọ etop emi nte akparawa oro ekekerede. Utu ke oro enye ye ikọt esie ekabare efuhọ ebaña mkpa Saul ye Jonathan. Mmọ ema etua eyet enyuñ etre udia koro edidem Israel ama akpa.
David ikọfiọkke ite ke mbuk akparawa oro idighe akpanikọ. Enye ama obup enye ete, “Nsinam afo mukefeheke ndinyan ubọk fo ñwot enye emi Jehovah ekeyetde aran?” David emi ekedide kiet ke otu ndimek ikọt Abasi emi ema ekenyuñ eyet aran ndidi edidem, ama enyene ndik ndituk enye emi Abasi ekeyetde aran; edi okpono ndem oro ete ke imọ imakam iwowot enye. Enye ikọbọhọ ekọm ito David. Utu ke oro, David ama ebiere ọnọ enye oto ikọ esie ete ke enye ama owot enye emi Abasi ekeyetde aran, oro edi ndibiere ikpe mkpa nnọ enye.
Mfuhọ David
Ima David ye Jonathan edi ñkpọ etorode ke ofuri ererimbot. Uwem mmọ ema ebiet kiet eken ke ediwak idaha. Ukpọñ Jonathan ekebiet eke David. Jonathan ama afara ke edu uwem, enye ama ama mfara idem David ñko. Enye ekedi owo uko onyuñ ama David emi ekedide owo uko. Mmọ mbiba ekedi mmọ emi Abasi okobonde, enyuñ edara ndibuana ọtọ kiet ke mbuọtidem. Jesus ete: “Baba owo kiet inyeneke ima eke okponde akan enye emi, owo ndikpayak uwem esie nduọk ke abaña mme ufan esie” (John 15:13). Jonathan ama onyime ndiñwam David ikereke mme ufen ke ubọk ete esie. Ndien idahemi David ikwe aba ufan esie. Jonathan ama akpa. David ete: “Esit ayat mi abaña fi, eyen ete mi Jonathan; afo ama enem mi eti-eti: ima oro afo akamade mi edi utibe, akan ima iban. Mbọm! Mbon uko emeduọñọ, ñkpọ-ekọñ emenyuñ esobo!”
Okposuk edi mfuhọ David okokponde eti-eti ọnọ Jonathan, edima ufan esie, enye ikefreke ibaña edidem uko oro, ye mme ekọñ eke enye ekesiñwanade akan ọnọ Israel. Enye ama atua ete: “O Israel, ubọñ amakpa afai ke ñkoñ-koñ ebiet fo: Oh, mbon uko emeduọñọ!” Enye ama ọdọhọ mkparawa iban eti mme nsọñ-urua enọ emi Saul ye mbon-ekọñ esie ekesidade esọk mmọ ke ini enyọñde nte mme andikan ke añwa ekọñ: “Mbufo, nditọ Israel iban, etua Saul eyet, emi ekesinde mbufo ididuot ọfọñ ye ñkpọ inemesit ke idem: emi ọkọkọñọde ọfọñidem mbufo ñkpọ mbana o gold”. Enye ama otoro uko Saul ye Jonathan ke ekọñ edi adian do ete: “Do ke ekeduọk otu-ekọñ mbon-uko; otu ekọñ Saul iyereke aran”. Okposuk edi nte enye ekenyenede ubọñ ke ini edem, ediyet aran emi Abasi ekeyetde enye ye ukpono nte edidem Israel, enye ama akpa nte anam idiọk-ñkpọ, nte emi akananam enye mibọhọ ukpono emi eketiede ntre.
Questions
MME MBUME- Didie ke Saul ọkọtọñọ ukara esie?
- Anie owo ekemek enye nte edidem Israel?
- Nso ñkpọ efen ikotibe inọ enye ke ini oro?
- Nso ñkpọ ke Saul akanam ye mbet Abasi ke ini iso?
- Nso ikotibe ke ini enye ọkọbọñde akam ọnọ Abasi oyom uñwam ke ekọñ?
- Saul akakpa didie?
- Mkpa Saul ye Jonathan okotuk David didie?
- Nso ikedi akpatre ikọ Apostle Paul?