Lesson 210 - Junior

Memory Verse

“Koro edi Abasi ekpe ikpe: enye ọsuhọre owo kiet, onyuñ ofori owo eken” (Psalm 75:7

Notes

Ini Idaresit

Abasi ama esin Saul ke idaha edidem Israel ke ntak ntut-utọñ esie. Samuel ama ama Saul eti-eti ke ini emi enye akakarade Israel nte ọfọnde, ndien Oku emi ama odu ke akwa mfuhọ ndikut nte Saul mikodotke aba nte eti edidem emi Abasi akpadade anam utom.

Usen kiet Abasi ọdọhọ Samuel ete: “Adaña didie ke afo editua Saul, sia mma nsio enye mfep ke idaha edidem Israel?” Ubiere-ikpe Abasi ama ada itie. Ediwak ifet ema edu ọnọ Saul ndikabare esit, edi enye ama etre ndikabare. Ke emi, idorenyin esie nditọñọ ntak nda ubọñ ke Israel ama okure. Abasi ama ọdọhọ Samuel ete enye okufuhọ aba edi efre se ima ikebe, eyet owo efen aran onim ke obufa edidem. Ekedi ini akwa idaresit ndikop nte ke emọñ ediyet obufa edidem aran. Obufa idorenyin ama amana.

Uwa Ke Bethlehem

Abasi ọkọdọñ Samuel aka ke Bethlehem, ke ufọk Jesse, ekeyet kiet ke otu nditọ Jesse aran man ada itie edidem. Samuel ama okop ndik ete edieke Saul edikopde emi, enye eyeyom ndiwot imọ. Saul okosuk odu nte edidem, ndien edi akpanikọ ete ke enye eyefibe owo ekededi eke edimekde edori ke ebekpo ukara. Edi Abasi ekpekpeme ikọt Esie ke ini Enye ọdọñde mmọ utom.

Abasi ọkọdọhọ Samuel asaña ye abak uman enañ ke ini edikade ke Bethlehem, onyuñ ọfọp mme uwa kpa nte enye akam esinamde ke mme ini efen ke isañ esie. Ke ntre ekeme ndidi Saul idikopke ibaña ediyet aran emi.

Samuel ama aka nte Abasi ọkọdọhọde; ndien ke enye okodukde ke Bethlehem, ndik ama anam mme ikpọ owo obio oro, mmọ enyuñ ekere se mmọ ekpeduede emi anamde Samuel edi ke utọ ini ntem. Samuel anam mmọ efiọk ete ke kpukpru ọfọn. Enye ọdọhọ mmọ enam idem mmọ esana enyuñ edikpono Abasi ye imọ. Enye ọnọ akpan-akpan ikot esọk ufọk Jesse.

Nnyin imekeme ndinam idem asana, mme ndibeñe-idem nnyin mbemiso ekem ini ukpono Abasi ke ediyak kpukpru ekikere, utom nnyin ye mbre ewọrọ ke esit nnyin, inyuñ ikere ibaña mme ñkpọ Abasi. Nnyin ikpenyene ndibemiso mbọñ akam mbemiso mboho ọtọñọ man Abasi añwam nnyin ndinam kpukpru se ikemede ke nditiñ nnọ owo mbaña Jesus ke utọ usuñ eke edinamde andikop onyime ndimana obufa. Ntre ke Abasi edidiọñ nnyin, oro eyenam nnyin ifiọk ite ke mboho usen oro anam ufọn.

Nte Abasi Esede

Ke kpukpru owo ema ekedu ke mbeñe-idem ebet ini ufọp mme uwa, mmọ ema edisobo ye Samuel ke ebiet ufọp-uwa Abasi. Nte Samuel asuande enyin ke otu owo enye ama okut akpan Jesse emi ekekerede Eliab, ediye akparawa, onyuñ ekere ete ke edi enye edida itie edidem Israel. Abasi ñko ama okut enye, edi ama okut enye akan nte Samuel okokutde. Enye ama ọfiọk ete ke Eliab idotke nte edidem. Enye ọkọdọhọ Samuel etre, “Koro owo esede enyin, edi Jehovah ese esit.”

Ekem Abinadab, ye Shammah mme udiana nditọ Jesse esaña ekpere. Edi Abasi ikemekke mmọ. Baba kiet ke otu emi ididighe edidem. Ekem ọyọhọ eyen inañ ye ọyọhọ ition esaña ekpere ñko ye ọyọhọ itiokiet ye ọyọhọ itiaba. Kpukpru mmọ esaña ebe edi Abasi okosuk ọdọhọ “Ih ih.” Nso ikedi ekikere Samuel ke ini ñkpọ etiede ntem? Edi Abasi ọkọdọñ enye ndiyet eyen Jesse aran nnim ke edidem, ndien kpukpru mmọ ema esaña ebe, edi kpa ye oro edidem ikoduhe.

Samuel obup Jesse ete, “Nte mkparawa ekure”? Jesse ọbọrọ ete ke ukperedem eyen-eren esie kiet odu ke ikọt ndikpeme mme erọñ, ndien sia enye ekedide ata ekpri eyen, ufọn ndikot enye ikoduhe. Nditọ ete eken ikoyomke efina mme imọ ke abaña ekpri eyen-eka mmọ. Ekpri eyen-eka oro ekedi David, enye ekedi owo kiet eke Abasi okoyomde edi edidem Israel. Okposuk edi nditọ ete esie mikekereke enye, Abasi ama ekere enye. David ikoduhe ikpọñ ke mben obot ye mme erọñ, Abasi ama odu ye enye onyuñ ekpep enye abaña mme ñkpọ nsinsi uwem.

Mbeñe – Idem

David ikabiatke ini esie ke ikpikpu ke ini enye okodude do ekpeme mme erọñ. Abasi amama ndikut owo etiñde enyin ke se ededi enye anamde; ñko nte David ekpemede mme erọñ enye ama aka iso ke ukpep ikwọ esie. Ndusuk ini enye ọkpọkọdọhọ ete imọ ikpebebre ikwọ emi, iduhe owo eke edikopde nte ibrede, ke ntre ntak ediwa idem ñkpep ikwọ iduhe. Ini ama edi emi ekekotde enye edibre ọnọ edidem ndien enye ama odu ke mbeñe-idem. Ndien nte enye ebrede, enye ọkọkwọ mme ikwọ itoro ọnọ Abasi. David ama ewet ediwak ndinem Psalm ke Ñwed Abasi onyuñ ekeme ndidi enye ekewet ndusuk mmọ ke ini oro enye ekekpemede mme erọñ. Edi akpanikọ, Abasi ama ada enye usuñ ndiwet, “JEHOVAH edi andibọk mi, ndinanake ñkpọ” (Psalm 23:1)

Ke David ama okosim ebiet usọrọ, ọtọ emi efọpde uwa, Abasi ama etiñ ọnọ Samuel ete emi edi obufa edidem. Samuel adaha ke enyọñ onyuñ eyet enye aran onim ke itie edidem, kpa ke iso kpukpru mbon ufọk ete esie emi mikenyeneke ekikere ite ke enye ekeme ndiwọrọ ñkpọ.

Jesus ọkọdọhọ mme mbet Esie: “Edieke owo anamde ñkpọ ọnọ Mi, Ete Mi eyekpono enye” (John 12:26). David akanam ñkpọ ọnọ Abasi ke ofuri esit esie, ndien idahemi Abasi ama ọtọñọ ndikpono enye oto ke edinam akpanikọ esie.

Esit Emi Ekemde Ye Abasi

Tọñọ ke usen oro Spirit Abasi ama odoro David ke idem; ndien ke ofuri ediwak isua emi enye akanamde utom akpanikọ emi, enye okodomo kpukpru ini ndinem Abasi esit. Ke enye anamde idiọk-ñkpọ, enye akatua ñkpọfiọk ye mbuñọ-esit, ndien Abasi ekefen ọnọ enye. Enye ekedi owo emi esit esie ekemde ye Abasi. Ndikpono Abasi nnyuñ nnam utom Esie ekedi udọñ esit esie ke ofuri uwem esie.

David ikesehe ite ke imokpon ikan ndinam utom sia ema ekeyet imọ aran enim ke edidem. Enye ama afiak aka utom ubọk -erọñ ete esie tutu ekekem utọ ini eke Abasi ediyomde enye. Ke ofuri isua edibet esie Abasi okododu ye enye onyuñ ekpeme enye.

Ndutuhọ Saul

Saul okosuk oduñ ke ediye ufọk ubọñ esie, edi Spirit Abasi ama ọkpọñ enye, ndien edidehe spirit ọkọtuhọde enye. Enye okodu uwem ifuresit, owo baba kiet ikekemeke ndinem enye esit. Nditọ ufọk esie ema ekere ete ke ikwọ eyedọñ enye esit, ndien mmọ ekedomo ndiyom eti ebre ikwọ. Ese ete mmọ ekekut anie? Ih, edi David. Owo kiet ama okop nte enye ekebrede onyuñ edi editiñ ọnọ edidem abaña enye. Enye akadian do, ete ke David edi akparawa uko, ye owo emi edidem edimade ndinyene ke ufọk esie.

Saul ọdọñ etop esọk Jesse obup unyime esie ndikpayak ekperedem eyen esie ediduñ ke okure edidem ke mme usen ifañ. Jesse okodu ke inemesit ndifiọk nte ke edidem koyom ndikpono owo emi otode ufọk esie. Enye ọsọp idem ebeñe enọ eke David edikamade, onyuñ ọdọñ enye etiene edidem.

Ke Okure Edidem

Ke ini Saul osobode ye David, “enye (Saul) ama enye eti-eti.” Ema emek David ndidi andibiom ñkpọ-ekọñ edidem, emi akanamde enye edi asaña-utom eke ekperede andikara esie kpukpru ini. Ke oro ebede, ini ekededi eke edidehe spirit odorode Saul, David ebre edinem ikwọ ke harp esie, ndusuk ọkwọ ikwọ ñko, ndien edidehe Spirit adaha ọkpọñ Saul.

Emi ekedi ifet ọnọ David ndikpep mbaña mme utom edidem. Kpukpru ini enye okoduñ ke obio-iñwañ, inyuñ ifiọkke edu unam ñkpọ ke okure edidem. Abasi okosio usuñ emi onim ọnọ David ndikpep se ediyomde enye anam ke adaña emi enye edikabarede edi andikara Israel.

Questions

MME MBUME

1. Mmọñ ke Abasi ọkọdọñ Samuel aka ekeyet owo aran onim ke edidem?
2. Nso ikedi ntak emi Samuel ekefehede Saul?
3. Abasi ekebeñe edinam uyet aran emi didie?
4. Nditọ-iren ifañ ke Jesse ekenyene?
5. Ifañ ekesaña ebe ke iso Samuel emi ekesinde?
6. David okodu ke mmọñ?
7. Nso ke David akanam ke ebede mme akpan iso utom esie?
8. Samuel akasaña didie ọfiọk ete David edidi edidem?
9. Nso ke David akanam ke ema ekeyet enye aran?
10. David akasaña didie okosim okure Saul?