Lesson 212 - Junior
Memory Verse
“Mbufo ema ema kiet eken, kpukpru owo eyeda oro efiọk ete mbufo edi mbet Mi” (John 13:35).Notes
Edifiak Nnyọñ David Ke Okure Edidem
David ama afiak ọnyọñ ke okure edidem Saul, ye ibuot anyan owo emi enye adade utop-itiat owot. Jonathan, eyen Saul, enye emi enyenede ndida itie ubọñ ke ete esie ama akpa, osobo ye David onyuñ ama enye. Ema ebiere ete David okunyọñ ufọk aba edi aka iso ndiduñ ye Jonathan.
Mme ọfọñ emi eyen edidem ekesinede okowut idaha esie ke uwem, ndien akana nte mmọ emi emanade ke ufọk ndidem ikpọñ esine. Jonathan ama osio mme ọfọñidem ubọñ oro ọnọ David ete esine. Emi okowut nte Jonathan akamade David. Enye ama onyime ndiyak itie esie ke okure edidem nnọ ufan esie.
Nnyin imọfiọk ite Abasi ama eyet David aran onim nte edidem emi edidade itie, ndien akana oro ọwọrọ osu. Edi nnyin ifiọkke mme Saul ye Jonathan ema efiọk ñkpọ emi kaña.
Ima Eke Miyomke Ufọn Esiemọ
Eda ima emi odude ke ufọt Jonathan ye David nte kiet ke otu mme idaha ufan eke okponde akan emi ererimbot ediọñọde ebaña. Idighe ukpono ye odudu ikpọñ ke Jonathan okonyime ndiyak, edi enye ama onyime ndiyak mfọniso emi ekpenyenede oto ete esie, ke ntak David, enye emi Abasi ekeyetde aran onim.
Nte afo emekere ete afo emenyene esit eke mmuyomke ufọn idem fo ikpọñ, mme emekeme ndiyak ata eti ñkpọ fo nnọ kiet ke otu mme ufan fo? Nte afo okposuk edi ufan esie, edieke ekpemende ukpono emi afo esede ete, ekpenyene fi, enọ enye? Nte afo omotim ọbọñ akam osim idaha emi afo ọfiọkde ete edi uduak Abasi edieke owo akade akanam se afo oyomde ndinam? Idighe Jonathan ndinyime ikpọñ nte ebọ enye ukpono esie enọ David, edi enye ke idemesie akayak ke ima esit.
Ima Emi Jonathan Ekenyenede Ọnọ Abasi
Jonathan ama ọdiọñọ Abasi onyuñ adia mme mfọn Esie ke mme usen edem. Ini kiet enye ye akama ñkpọ-ekọñ esie ema eñwana ye ofuri otu mbon-ekọñ Philistine, ndien ema enyene erikan oto uñwam Abasi. Jonathan ikọbuọtke idem ke ukeme ye mbufiọk ekọñ esie. Enye ama ọdọhọ akparawa esie ete: “Di, yak nnyin ibe ika ke itie mbon-ekọñ mme edut emi: ndusuk Jehovah eyenam ñkpọ ọnọ nnyin: koro ñkpọ baba kiet mikpanke Jehovah ndida uwak mme esisit nnyaña” (1 Samuel 14:6). Ekọñ emi enyene Jehovah ndien Enye iyomke uwak mbon-ekọñ ndiñwam Enye. Mkparawa iba emi ekeyakde idem enọ Abasi ema ekan mme odudu idiọk-ñkpọ.
Ekedi ediyak idem nnọ Abasi emi Jonathan akanamde akañwam enye ndima David utọ ima eke miyomke ufọn idem esie. Ima Abasi ke esit esie akanam enye okpono David, okposuk edi ke idaha ererimbot David ekedi ubọk ñka esie.
Usua Emi Saul Akasuade David
Saul ikabuanake ke ima emi eyen esie akamade David ke utọ ini emi. Enye ama okut ete ke edieke David akabarede edi edidem ke ubọñ eyebe efep ke ufọk Saul. Samuel, anditiñ ntiñ-nnim ikọ ama ebebem iso etiñ ete ke emi eyetibe ke ntak ntututọñ Saul, edi Saul okodomo ke odudu esie ndikpuhọre ubierikpe Abasi.
Abasi enyene odudu akan kpukpru owo, onyuñ akan mme odudu Satan. Owo inyeneke baba ukeme kiet ndiñwana ye Enye. Inaha nte nnyin ikop baba ndik kiet nte ke Jehovah eyekpọñ ikọt Esie ke ebiet ekededi eke asua akpadahade ada ndiñwana ye mmọ.
Mme asaña-utom Abasi ke mme idut emi ekponode mme demon ema esima nditiñ nte ndiọi odudu demon ekesifikde mmọ, edi odudu Abasi okosuk okpokpon akan ke kpukpru idaha. Satan ikemeke ndisobo owo Abasi emi osuk odude ke idak Iyip Jesus.
Usua Saul ama akabare edi uwot-owo. Enye ama ọnọ Jonathan ye nditọ-ufọk esie uyo ete ewot David. Ke adañemi David odibede, Jonathan ama añwana ndineme ye ete esie ete ke edima ufan esie inamke baba idiọk kiet ke mibọhọke se ifọnde ye mmọ, ntre ke enye idotke ndikpa. Ama etie nte Saul ama onyime ñkpe-ubọk, ndien David ama afiak ọnyọñ okoduñ ke okure edidem. Edi ikebighike Saul ọtọñọ ntak ayat esit, ndien ofuri iyaresit oro ọduọ David ke idem.
David okodu ke ata ọkpọsọñ ini ke ntak emi ekeyomde ndida uwem esie kpukpru ini; ntre enye ama emen se ikodude enye ke isọñ esit eneme ye Jonathan ke abaña ñkpọ emi. David ama ekere ete ke ọkpọfọn imọ ndikpọñ do ofuri-ofuri.
Jonathan ikpenimke ke akpanikọ ite ke ete esie ekeme ndidiọk ntre. Ke akpanikọ enye ama onim ete ke Saul idiwotke ata eti ufan esie. David ama ekere ete ke imọ inamke baba ñkpọ kiet eke odotde mkpa, edi edieke ekpekutde idiọk ke imọ, enye okpotim oyom Jonathan ebiere ikpe esie, akan ndida enye ndi ke iso Saul.
Udomo
Mme Jew ekesidia usọrọ obufa ọfiọñ ke kpukpru ntọñọ ọfiọñ mmọ. Emi ekedi saña-saña edinam ọnọ mbon ufọk edidem, ndien David ama ọfiọk ete ke akana nte imọ idu ke okpokoro udia mbubreyo oro. Enye ama ada ifet oro ndinam Jonathan ọdiọñọ se edidem ekerede abaña enye. David ama ọdọhọ Jonathan ete ke imọ ididighe usọrọ oro, ndien edieke edidem ediyatde esit ke enye nditre ndidi, Jonathan eyediọñọ ete ke edidem ama aduak ndinam enye idiọk.
David ama ọbọhọ Saul, edi Saul ekekere ete enye ama anam idiọk-ñkpọ emi anamde enye edehe, emi anamde enye mikemeke ndidu ke itie usọrọ oro. Edi ke adañemi David afiakde etre ndidu ke itie esie ke okoneyo edem-usen, Saul ama ekere ete ke Jonathan ọfiọk ntak emi David miduhe, ntre enye ama obup, “Nsinam eyen Jesse midighe ke udia mkpọñ, ye mfin?”
Jonathan ye David ema ediomi se mmọ editiñde edieke edidem edibupde oruk mbume oro. Jonathan ama ọdọhọ enye ete ke David ama ebeñe ndida usen ifañ ñka ke Bethlehem man enye akabuana ye mbon ufọk esie ke usọrọ uwa, ndien Jonathan ama onyime enye aka. Esit ama ayat Saul eti-eti. Enye onyuñ akañ Jonathan nte eyen esie. Tutu enye ọdọhọ Jonathan ete ke enye eke ayak ebekpo ọnọ David. Enye ama ọdọñ ete ekot David edi usọp-usọp man ewot enye.
Jonathan ama añwana ndineme ye ete esie ete ke David iduehe baba ñkpọ kiet, edi emi akananam iyaresit Saul ototim okpon tutu enye otop eduat esie nditọ Jonathan. Ke Jonathan ama okokut ete ke iduhe baba se ikemede ndinam man iyaresit ete esie ọsuhọre, enye ama adaha ọkpọñ okpokoro udia ye akamba mfuhọ ke esit esie ke abaña edisua emi ekesuade eti ufan esie.
Edinam Utop-Idañ
David ye Jonathan ema ediomi ete ke ọyọhọ usen ita, ke David ama ọkọwọrọ ke mmọ eyesobo ke ikọt emi adiañarede ọkpọñ okure edidem. Saul ikọdiọñọke ñkpọ ibaña edinam emi, Jonathan ama ọwọrọ aka ekpri edinam utop-idañ ye utiga esie, onyuñ ada ekpri eyen-eren ndisaña ntañ mme idañ nnọ enye. Jonathan otop mme idañ ke utiga esie esin ke ata esit ikọt, eyenọwọñ oro ama efehe aka nditañ mmọ mfiak ndi. Nte enye efehede, Jonathan afiak otop kiet efen, ebe eyenọwọñ oro anyan usuñ, ndien Jonathan okot: “Nte idañ iduhe ke iso fo?” Oro ekedi idiọñọ emi ema ekebem iso ediomi ndinam David ọfiọk ete ke enye ididuhe uwem ke enye ndika iso ndu ke ufọk edidem. Ke ini eyen-ọwọñ oro ama akafiak edi ye mme idañ oro, Jonathan ama anam enye ọnyọñ ke obio, ndien Jonathan ama ọwọrọ okosobo ye David.
Edidiañare Ñkpọñ
Kere nte eketiede ye owo iba emi! Mmọ ema etim ema kiet eken. Jonathan ama ama David nte ukpọñ esie; ndien David ama etiñ abaña Jonathan ete, “Ima oro afo akamade mi edi utibe, akan ima iban” (2 Samuel 1:26). Kpa ye oro mmọ ekenyene ndidiañare ñkpọñ kiet eken, ndusuk mmọ idifiakke aba isobo mi ke ererimbot; edi mmọ ema enyene idorenyin ndisobo ke Heaven.
Ke iso Abasi, mmọ ema enam ediomi ndima kiet eken kpukpru ini, nnyuñ mfọn ye ufọk kiet eken adaña nte mmọ esuk edude uwem. Mmọ ema efiọk ete ini ekeme ndidi emi David edinyenede ndikpeme Jonathan nsio ke ubọk ete esie, edieke ediyararede ifiọk nte ke Jonathan ama añwam David ndifehe.
Jonathan ama enyene ñkukut spirit ndikut nte ke usen kiet eyesuhọre mme asua David enim, ndien ke ubọñ esie eyenyene odudu. Enye ama ebeñe David ete ke usen oro yak okufre ufọk imọ ekpedi Jonathan ke idemesie akpade. Jonathan ye David ema etuaña nte mmọ etọñọde ntak eduk ke ediomi mmọ; ndien ke mmọ ema eketim kiet eken inua, mmọ ediañare. Jonathan ama afiak ọnyọñ ke ufọk esie, ndien David ọtọñọ uwem udibe emi edidade itie ke isua duop ke iso.
Questions
MME MBUME- Didie ke David akafiak ọnyọñ ke okure Saul?
- Jonathan akama didie David?
- Saul ekekere nso abaña David?
- Nso idi ntak emi Saul akanamde David ntre?
- Jonathan ye David ekenam didie edomo efiọk ekikere Saul?
- Nso ikedi ediomi emi David ye Jonathan ekenamde?
- Didie ke Jonathan akanam David ọfiọk ekikere ete esie?