Matthew 25:1-13; Psalm 45:1-17.

Lesson 224 - Senior

Memory Verse
“Edi eyenyaña owo eke edimede ime tutu osim akpatre” (Matthew 24:13).
Cross References

I Se Christ Etiñde Ke Ñke Abaña Ufọk Abasi Emi Odude Ke Isọñ

1. Mbon ñka oro ema etie ekpeme, ke ndusuk idaha, ebet edidi Ọbọñ, Matthew 25:1; 2 Ñwed Corinth 11:2

2. Eti edu uwem mmọ ama owut nte mmọ ekebeñede idem, Matthew 25:2-4; Psalm 119:105

II Ntọt Ke Abaña Edidi Ọdọ-Ndọ

1. Mmọ emi ekebeñede idem ye mmọ emi mikebeñeke idem ekebet ọtọ kiet, Matthew 25:5; 13:30; Ikwọ Solomon 5:2; Luke 19:13

2. Uyo andidu-uwem ofiori ete “Sese ọdọ-ndọ,” Matthew 25:6, 7; 1 Ñwed Thessalonica 4:16

3. Ndik ke esit mmọ emi mikebeñeke idem, ye uko ke esit mmọ emi ekebeñede owut ke ebeñe ye ke ibọrọ mmọ, Matthew 25:8, 9; John 11:10

4. Ndiñwana ke akpatre ini ndinyene mme mfọn emi ọkọsuhọde idikemeke ndiñwam, Matthew 25:9, 10; 24:27

III Ndisana Iban Ition Emi Ekedide Asian Ebe Eduk Ke Ufọk Ndọ

1. “Mmọ emi ebeñede idem etiene enye eduk ... ndien eberi usuñ,” Matthew 25:10; 24:44; Eriyarare 19:7-9; Mme Hebrew 2:1-3; Psalm 45:1-17

2. Owo ikayakke ndisime iban emi mikebeñeke idem eduk, Matthew 25:11, 12; Luke 13:23-30

3. Akpatre ntọt emi owut se ñke emi ọwọrọde, Matthew 25:13; Mark 13:32-37; Luke 12:35-40; Eriyarare 3:11.

Notes
SE EKPEPDE EBAÑA

Mme Ñke

Owo kiet etiñ ete ke ñke edi “mbuk ererimbot emi edade eyarade ñkpọ Heaven.” Odu ata akpan ñkpọ emi odude ke Ikọ Abasi man nnyin ibọ nnen-nnen etop emi Abasi oyomde nnyin ibọ oto ke ñke oro. (2 Ñwed Timothy 2:15).

Nnyin imekeme ndikut ndien nte ke ñke, ke ndusuk idaha, ikemeke nditiñ ñkpọ añwaña ọyọhọ-ọyọhọ. Nnyin kpukpru ini isidori enyin ite ke ñke eke Ñwed Abasi esiyarade mme ñkpọ Spirit ọyọhọ-ọyọhọ. Ndien nte edade mme ñke emi kiet kiet etiñ ikọ, nnyin inyene ndikut nte ke Ñwed Abasi ke idem esie ọsọñọ, sia “baba ikọ anditiñ-ntiñ-nnim-ikọ kiet ke Ñwed Abasi idighe se owo ekemede ndisiak ke usuñ esie mmọ” (2 Peter 1:20). Edi kpa nte ima iketiñ, nnyin ikpedorike enyin ndikut se ikande akamba ukpep-ñkpọ kiet ke ñke kiet. Okposuk edi ndusuk ini imekeme ndinyene ediwak ukpep-ñkpọ ke ñke oro. Ñkpọ kiet emi ke inyene nditi kpukpru ini, mme edide ndedibe isọñ ukpep-ñkpọ, mme itie edikot ke Ikọ Abasi, mme ñke, mme se ibietde ñke, ekpedi ndikut nte se inọde nte erikabare ikọ ke abaña ñkpọ ekededi eke itiñde ibaña otim ekem ye ofuri Ikọ Abasi onyuñ asaña ekem ye ukpep-ñkpọ Ñwed Abasi. Ke utọ usuñ emi nnyin iyemum akpanikọ emi odude ke Ikọ Abasi ikama kpukpru ini.

Unana Ntiñ Enyin

Ñke emi emen ata akpanikọ owut emi minaha efumi, mme ndida nte ata ekpri ñkpọ oro edi akamba ndik ye idiọk-ñkpọ eke odude ke owo ndisin ndinyene ọyọhọ edinyaña. Mme ñkpọ efen edu eke ekpekpepde eto ñke emi. Eyarare ediwak akpanikọ emi odude ke enye. Edi ñkpọ kiet emi inyenede ndisin ke esit nnyin kpukpru ini edi akamba ntọt ye item emi ọbiọñọde idiọk-ñkpọ emi odude ke unana ntiñ-enyin.

Mme idiọk-ñkpọ edu emi mme owo esede enyuñ efumide inyuñ inamke ñkpọ ibaña, edi ke akpatre eyeda nsobo ọnọ owo ukem nte ñkoi nnam idiọk-ñkpọ. Unana ntiñ enyin edi kiet ke otu idiọk-ñkpọ emi. Nnyin imekeme ndikut ke ñke emi, idiọk emi oruk idiọk-ñkpọ emi akamade. Ini ndutuhọ ke hell idimuhọke koro idiọk-ñkpọ emi obiomde owo ikpe ekedide ekpri. Nsinsi edidiañade ñkpọñ mfọn Abasi emi ini kiet ekemade, enyuñ enamde ñkpọ enọ ke akpanikọ, idikamake mfefere ubiak mme mfuhọ koro mikedighe edikokoi nsọñ ibuot mme nditut utọñ ke mbet Abasi.

Enyene ediwak usuñ emi unana ntiñ enyin ekemede ndida itie ke uwem nnyin. Nnyin imekeme nditre ndibọ koro nnyin miyomke mme ñkpọ eke Abasi enyenede ndinọ nnyin. Ndien nnyin imekeme ndibọ mme mfọn ye edidiọñ emi Enye ọñwọñọde ọnọ nnyin edi itre ndimum mmọ ñkama. Kiet ke otu usuñ iba emi eyenam nnyin ida ke iso Abasi ye ubiom ikpe. Mme ndisime nditọ iban emi ema enyene ubiom ikpe ke ñkañ mbiba ke idiọk-ñkpọ emi odude ke unana ntiñ enyin. Mmọ ema etre ndisaña nsim ọyọhọ edidiọñ emi Abasi ekenyenede ọnọ mmọ, enyuñ etre ñko ndimum ñkama se mmọ ekebọde; ndien nte utip, mmọ ema eduọk kpukpru se Abasi ọkọnọde mmọ. Ubierikpe mmọ ama enen, ndien oro ekedi akpatre. Kpukpru ñkpọ atak mmọ koro mmọ ema etre ndisaña ke kpukpru uñwana Eti-mbuk emi ekeyararede enọ mmọ.

Eti Ibuot Eke Mme Asian Ndisana Iban

Nnyin ikot ite ke mme asian nditọ iban ikadaha aran ke utuenikañ mmọ ikpọñ-ikpọñ, edi ema ekama ke ekpeme ñko. Emi ayarade owut ete ke ema eda kpukpru mfọn, kpukpru ifet ye kpukpru ukpep-ñkpọ emi ekenamde añwaña mmọ. Mmọ ema emum se mmọ ekebọde ekama ndien iyakke ọbọhọ mmọ.

Mme asian ndisana iban ebiet mmọ oro miyomke ndinana baba mfọn kiet eke Abasi, enyenede ọnọ mmọ, ke ema ekebọ ọyọhọ eridiọñ Abasi, eyeñwana ndibọ nnyuñ mmum ñkama odudu emi Ikọ Abasi ọdọhọde iyebọ “ke Edisana Spirit ama edi edidoro mbufo ke idem” (Utom Mme Apostle 1:8). Mbon Abasi efiọk ete okposuk edi nte owo ama ọkọbọ utebe ikpe, edinam asana ofuri ofuri ye uduọk mmọñ Edisana Spirit, enye ididighe ọyọhọ andikan tutu enye omum mme mfọn emi akama ke ndisaña ke mbuọtidem, oro edi ndisaña ke uñwana nte eyararede enọ enye. Okposuk edi nte owo ama ọkọbọ mme ikpọ utibe mfọn ita emi enyene, enye ekeme nditak ke nsinsi oto ke unana ntiñ enyin ke ọyọhọ erinyaña esie. Idiọk ñkpọ unana ntiñ enyin ekeme ndinam owo ataba nsinsi uwem ye nsinsi ubọñ.

Sia kpukpru ñke emi, nte itimde ifiọk, etiñde abaña mmọ emi etiede ebet eridi Ọbọñ, nnyin imekeme ndidọhọ ete ke mme asian ndisana iban emi eda enọ mmọ emi edide ata mbio ufọk Abasi Christ. Mmọ ikebietke akpa mbuaha udim Israel, mme otu oro eketrede ndisaña nsim Isọñ Eñwọñọ. Mmọ ekedu uwem ke kpukpru mfọn emi mmọ ekebọde eto Chirst, ndien kpukpru ini ke uwem mmọ ekeyom uñwam emi otode Abasi. Mmọ iketreke nditiñ enyin ke erinyaña mmọ, mme ndida ifet oro mmọ ekenyenede ndibọ mme mfọn eke awakde akan se mmọ ekebọde ke mbemiso. Mmọ ekesaña ke uñwana Eti-mbuk emi ekeyararede enọ mmọ.

Ke ikpepde ñkpọ ibaña ndibe otu owo emi, emi ke mme itie efen ke Ikọ Abasi ekotde Ñwan Ndọ Christ, nnyin ikut nte ke mmọ edi ata mme andikan koro edude ke mbeñe-idem (Eriyarare 12:11; 19:7). Andiwet Psalm ama etiñ abaña Ubọñ Ebe Ndọ ye nsinsi unen eke Ñwan Ndọ ke ini enye ekewetde ete: “O Abasi, ebekpo fo odu ke nsinsi: mmọnyọ edinen ido edi mọnyọ ubọñ fo. Afo ama se inende, onyuñ asua se ikwañade; oro esin Abasi, kpa Abasi fo, ada aran idara eyet fi, akan mme ufan fo ... ọbọñ-añwan esine gold ophir ada fi ke ubọk nnasia.” Ndien enye aka iso ndinọ ikot emi osimde kpukpru owo man mmọ ekpesio idem efep ke ñkpọ eke ọkpọbiọñọde owo, mme asabare owo, ke ndidọhọ ete “O eyen añwan, kop, nyuñ se, nyuñ kpañ utọñ fo; nyuñ fre oruk fo ye ufọk usọ; ndien yak edidem oyom uyai fo eti eti: koro enye edide Ọbọñ fo: tuak ibuot nọ enye ndien” (Psalm 45:6, 7, 9-11).

Unana Ifiọk Eke Mme Ndisime Ndisana Iban

Sia akamba ukpep-ñkpọ emi nnyin inyenede ndibọ ke ñke emi edide ñkpọ ndik emi odude ke unana ntiñ enyin ke erinyaña nnyin, kpa idiọk-ñkpọ emi mme ndisime nditọ iban ekenamde, ebiet emi ke nnyin ikpeneñere ida ini ikpep ke ukpep-ñkpọ emi.

Emi ekedi otu owo emi ekenyenede ukem ifet emi mme asian ye enyene ibuot nditọ iban ekenyenede. Nte ima iketiñ mmọ ema ebọ eridiọñ ke udomo idaha emi Abasi ekenyenede ọnọ mmọ. Mmọ kpukpru ema ebọ mme ndusuk ikpọ ñwọrọ nda mfọn Abasi emi odude ke uduak Abasi ndinyaña owo. Edi Ọbọñ ama ọsọñọ ete ke Imọ idiọñọke mmọ! Mmọ ikedighe aba Esie! Enyiñ mmọ ikoduhe aba ke Ñwed Uwem Eyen Erọñ!

Sia mmọ ekedide ndisana nditọ iban, oro ama owut ete ke mmọ ema enyene udomo erinyaña emi Abasi ọnọde. Ke ifiọkde ite mmọ ema ekama aran ke utuenikañ ndinọ mmọ uñwana, owut ete ke mmọ ema enyene edisana Spirit ke udomo idaha. Edi mmọ ema etre ndisaña nsim idaha mfọn mma, etre ndibọ kpukpru mfọn emi akanade ọnọ mmọ, enyuñ etre ndisaña ke kpukpru uñwana emi ekeyararede enọ mmọ. Ndusuk mmọ ema ekere ete ke mmọ ema ebọ kpukpru, sia ema ekenyene Edisana Spirit ke udomo idaha ke uwem mmọ. Edi se inyenede ndik ikan edi, oto ke unana ntiñ enyin, mmọ ema eduọk se mmọ ekebọde eto Spirit Abasi.

Nnyin imọfiọk ite ke aran emi etiñde ebaña mi ada ọnọ Spirit Abasi. Aran emi ọnọ nnyin uñwana ke Spirit. Jesus ama ọdọhọ ete mme scribe ye Pharisee ekesaña ke ekim koro mmọ mikenyeneke uñwana, oro esin mmọ etuak ukot enyuñ eduọñọ. Ikọ edi utuen-ikañ ukot nnyin, ye uñwana usuñ nnyin (Psalm 119:105); edi okpon ñkpọ akan edikot Ñwed Abasi man ọnọ nnyin uñwana eke Spirit. Ana nte Spirit Abasi odu ndinọ nnyin uñwana, ndinyuñ nda nnyin nduk ke ofuri Akpanikọ; do ndien Spirit ye Ikọ esaña ọtọ kiet enyuñ ekem uyo (John 16:13; 1 John 5:7).

Edisana Spirit ọtọñọ utom ke idem nnyin ke ini okotde nnyin ete ikabare esit, ndien asua ọnọ nnyin ke mme idiọk-ñkpọ nnyin (John 6:44; 16:7-11). Enye etiene nnyin onyuñ odu ye nnyin ke ini nnyin ibọde utebe ikpe; Enye odu ñko ke udomo idaha eke okponde akan ke ini enamde nnyin isana. Edi Enye edi edidu ye nnyin ọyọhọ ọyọhọ ke ini nnyin ibọde uduọk mmọñ Edisana Spirit (John 14:17, 18). Owo emi enamde asana enyene uñwana emi okponde akan enye emi ọbọde utebe ikpe ikpọñ; ndien enye emi ọbọde uduọk mmọñ Edisana Spirit ọfiọk abaña ọyọhọ eridiọñ emi enye emi enamde asana ikpọñ mifiọkke.

Ikpanaha inam ndudue ndikere nte ke Edisana Spirit odu ke idaha ke idaha. Edi Enye oduk owo ke idem nsit-nsit, edi Enye iduhe ke idaha ke idaha ke Idem Esie. Owo emi ọbọde utebe ikpe ọbọ udomo idaha Spirit Abasi, edi ididighe ukem idaha nte owo emi ama okoduk ke ọyọhọ mfọn emi Abasi ọnọde enye, emi ọbọde edinam asana ye uduọk mmọñ Edisana Spirit.

Mme ndisime nditọ iban ema ebọ udomo idaha Edisana Spirit, edi etre nditiñ enyin, ndien eyak aran oro odut ọwọrọ. Utuenikañ mmọ ama onime, mme ikpọdọhọ ite ama ọtọñọ ndinime, ndiwut nte ke mmọ ema enyene ndusuk aran ke esit ke mbemiso. Enọ nnyin ntọt ete: “Mmọdo ikpotim ikpañ utọñ ikan inọ mme ñkpọ emi ikokopde, mbak nnyin idifiọnọre ikpọñ mmọ” (Mme Hebrew 2:1). Mmọ emi ekpepde ñkpọ ebaña usem emi ekedade ewet Ñwed Abasi ke eritọñọ, etiñ enọ nnyin ete ke ọyọhọ erikabare ufañ ñwed emi edi nnyin “ikpotim ikpañ utọñ inọ mme ñkpọ emi ikokopde, mbak ke ini ekededi nnyin idiyak mmọ ewọñọ nte abañ eke odutde.” Ndien Apostle ọdọhọ ke ebiet efen ete: “Edieke owo minyeneke Spirit Christ, enye idighe owo Christ” (Ñwed Mbon Rome 8:9). Ntem mme ndisime nditọ iban ema eduọk mfọn Abasi mmọ oto ke unana ntiñ enyin ke ndiyak se mmọ ekebọde odut ọwọrọ. Mmọ ikedighe eke Christ koro Spirit Esie ama ọkpọñ mmọ. Edi akpanikọ nte ke se ikedade unana ntiñ enyin mmọ idi ekedi kpa unana ntiñ enyin ndiyom nnyuñ nyene aran ke ekpeme ye ke utueneikañ. Mmọ ema etre ndisaña ke uñwana emi ekeyararede enọ mmọ, enyuñ etre ndimum ñkama uñwana emi mmọ ekebọde. Ñkpọ efen ikoduhe ye mmọ ke mibọhọke ekim.

Mfiori Ufọt Okoneyo

Ema edọhọ mme ndisime eka ekedep aran. Emi owut ete ke nnyin imenyene ekọm urua ndikpe ke mme ñkpọ oro Abasi ọnọde nnyin ke mfọn. Nnyin ikemeke ndidep mfọn Abasi mme ndibọ eridiọñ Esie ke ukeme nnyin. Kpa ye oro ekọm urua odu ndikpe: edimen ndisana uduak nnyin, idem nnyin ye mme ekikere nnyin nyak nnọ Abasi oro edi ọyọhọ ediyak idem nnọ Abasi edieke nnyin idisañade ke ofuri uñwana Eti-mbuk emi eyararede enọ nnyin.

Nditọ iban duop ema ede idap, edi idap mmọ ikenyeneke ntuaha ke ñkañ Spirit. Mmọ ekeyọhọ ye utom ye mme ñkpọ uwem emi. Ition ke otu mmọ ema esaña esim ọyọhọ mfọn Abasi edi mmọ eken ema etre ndisim oruk idaha oro. Kpukpru mmọ eketie ebet eridi Ọbọñ mmọ. Edi otim ayarade owut nte ke mme ndisime ikanamke akpanikọ ke edibet usen akwa ñkpọ ntibe oro. Ekeme ndidi mmọ ema esitiñ ediwak ikọ ebaña edidi Ọbọñ mmọ, enyuñ enam enyọñ-enyọñ mbeñe-idem koro ikañ mmọ ama asak ke mbemiso. Edi mmọ iketiñke enyin ke erinyaña mmọ, ke nditre ndisaña nsim idaha ndibọ kpukpru mfọn emi Abasi ekenyenede ọnọ mmọ, edi ke akpanikọ ntak urua mmọ ekedi ke nsi nsi.

Editie mbet eridi Ọbọñ eyeda ndik ke ndusuk ini esin ke esit nnyin. Nnyin idifeheke ndik ke abaña eridi Esie, edi idifehe ndik ke editre ndinyene kpukpru eti idaha eke anamde nnyin idu ke ọyọhọ mbeñe-idem ndibet usen oro. Nnyin idifehe ndik mbak idiọk-ñkpọ unana ntiñ enyin ke edinyaña nnyin edinam itak ke nsi nsi. Ke akpan iyema ediyarare Esie ndien iyenam kpukpru mbeñe-idem.

Spirit Abasi edi andiyire nnọ etop ke abaña edidi Christ. Ekedi Spirit ekebem iso okot nditọ iban duop emi ndinam mbeñe-idem ndien ke akpatre okot mmọ ndidemere man esobo ye Ọbọñ mmọ. Jesus eyedi nte emireñ-mireñ, ndien mkpo ye ukorowo Abasi eyedu ke ini oro; edi oro edidi ke ukem ini emi Enye edibiọñọrede ndien imekeme ndida oro ñkodomo ye mfiori Spirit emi okosimde nditọ iban emi ekedede idap.

Nnyin iyesọp ndikop uyo archangel ye uyo ukorowo Abasi. Nnyin iyesọp ndikut Andinyaña nnyin nte Enye edide ndida Ñwan Ndọ Esie emi etiede ebet Enye, emi edide Ufọk Abasi Christ. Emi edi ini mbeñe idem Esie, ndien nnyin imokop ikot ntọt emi otode Spirit Abasi. Edisana Spirit, anam akpanikọ kpukpru ini, ke anam utom Esie ke ererimbot ndibeñe ufọk Abasi idem mbet akwa ñkpọ ntibe oro. Eyak nnyin “itaba idap ikpeme, imum idem ikama ... isine mbuọtidem ye ima nte ñkpọ ikpanesit, inyuñ iyara idorenyin erinyaña nte ndun ibuot” (1 Ñwed Thessalonica 5:6, 8). Eyak nnyin itim ikpeme ndikut nte ke nnyin imenyene aran oro ke utuenikañ ye ke ekpeme ndien ñko nnyin iyakke enye odut oto ke unana ntiñ enyin, mbak ke akpatre, nnyin iditak ke nsi-nsi.

Questions
MME MBUME
  1. Nso edi ñke?
  2. Didie ke nnyin inyene ndikabare Ikọ Abasi?
  3. Anie edida nnyin oduk ke ofuri Akpanikọ?
  4. Nso ekedi se enọde nte itoro ke ido mme asian ye ndisime nditọ iban?
  5. Ke nso oruk usuñ ndien ke mme ndisime nditọ iban eketre ndikut unen?
  6. Nso uwut-ñkpọ ke enọ nnyin ke abaña ido ye edu uwem mme asian nditọ iban?
  7. Bat mme nsio-nsio idaha utom emi Edisana Spirit anamde mfin?
  8. Nso edi “ekọm-urua Eti-mbuk” ke ini nnyin ifiọkde ite ke nnyin ikemeke ndidep Erinyaña mme mfọn Abasi kiet ekededi?
  9. Didie ke nnyin ifiọk ite ke ndisime nditọ iban ikekwe unen ke edika ñkedep aran?
  10. Tiñ ke ibuot, akpatre ufañ emi odude ke isọñ ukpep-ñkpọ emi.