Lesson 225 - Senior

Memory Verse

“Koro eyenọ kpukpru owo eke enyenede, ndien enye eyenyene awak akan: edi ama edi owo eke minyeneke, eyebọ enye kpa se enye enyenede” (Matthew 25:29).

Cross References

I Mme Talent Ye Mme Andibọ

1. Ekenọ mme asañutom emi ekedomode efiọk, mme talent emi nte ukeme mmọ edide, Matthew 25:14, 15; Luke 19:12, 13; Ñwed Mbon Rome 12:6-8; 1 Ñwed Corinth 12:1-31; Ñwed Mbon Ephesus 4:11, 12

2. Mme asañutom akpanikọ enam mme talent mmọ ewak utim ikaba oto ke utom ye se mmọ ekedade talent mmọ enam, Matthew 25:16, 17; Luke 19:16, 18; 1 Ñwed Corinth 12:31; 14:1; 15:10; 2 Ñwed Timothy 2:15

3. Idiọk asañutom ikanamke baba ñkpọ kiet ndiwut esit ekọm mme akpanikọ, Matthew 25:18; Luke 12:47; 19:20, 21; James 2:14; 4:17

II Mme Utip ye Ubiere-Ikpe Ke Edifiak Ndi Ọbọñ

1. Edifiak ndi Ọbọñ, edi ntọñọ ubiere-ikpe ye itoro, Matthew 25:19, 31-46; Luke 12:37; 19:15; Eriyarare 3:11; 16:15

2. Mme anam akpanikọ eyebọ utip ke mme utom efen emi edidiande enọ mmọ, Matthew 25:20-23; Luke 19:16-19; 22:28-30; Eriyarare 5:10; 19:11-16; 20:1-6; 1 Ñwed Corinth 6:2; Jude 14, 15

3. Eyebọ mmọ emi minamke akpanikọ ke idaha utom mmọ kpukpru edidiọñ ye idaresit emi otode utom enyuñ ebin mmọ efep ke nsinsi, Matthew 25:24-30; Luke 19:20-24; Ñwed Mbon Rome 11:29; 2 Ñwed Thessalonica 1:6-10.

Notes

SE EKPEPDE EBAÑA

Mme Item Emi Enọde Owo Kiet-Kiet

Jesus ama otop ediwak ñke emi abañade Obio Ubọñ Heaven. Ke ñke emi, Enye owut Idem Esie nte owo emi akade anyan idut, emi okotde ikọt esie obon onyuñ ayak kpukpru inyene esie ọnọ mmọ, man mmọ etiñ enyin ke mme ñkpọ esie ke ini Enye miduhe. Nnyin imekeme ndikere nte ke owo emi ama otim etiñ ye mme asañutom esie, oruk utom emi akanade nte enam ke ini enye miduhe. Mmọ ekedi mme asañutom esie. Mmọ ema efiọk enye, ye se enye oyomde ye idaha edu uwem esie. Enye ñko ama ọfiọk mmọ. Enye ama ọfiọk ukeme mmọ ye idaha akpanikọ mmọ. Enye ikọdọhọke mmọ enam se owo mikemeke ndinam, edi okoyom mmọ etiñ enyin ke mbubehe esie enyuñ enam utom esie.

Ke edade emi edomo ye nnyin, ye itie nnyin nte mme anam utom ke iñwañ-utom Ọbọñ, nnyin imọfiọk ite enyene ndikwọrọ Ikọ ke odudu, ana ebọñ akam enọ mbon udọñọ man mmọ ekop nsọñidem, ndien enyene ndida mmọ emi esopde mfiak ndi ke otu. Nti nditọ Abasi enyene ndiboho ọtọ kiet man emenere edisana esit mmọ ke nditi ewuhọ ye mme eñwọñọ Abasi. Mmọ emi enyenede enọ ke ikwọ enyene ndida mbufiọk mbre ñkpọ ikwọ ke usuñ emi ọfọnde; iren ye iban emi ekwọde ikwọ enyene ndidu man eda uyo mmọ ekwọ ikwọ enọ ufọk Abasi. Ana odu mmọ emi ekemede ndiyire ke akam mbaña idiọk ererimbot emi etakde, enyene ndidu mmọ emi edikade ke mme efak ye inuk ndinyik mme anam-idiọk eduk edi, inyuñ ifreke item oro Ọbọñ nnyin ọkọnọde nnyin, ete eka, “Ke ofuri ererimbot ekekwọrọ Gospel enọ kpukpru owo” (Mark 16:15).

Ediwak utom edu ndinam, edi Abasi ọnọ nnyin ediwak nti eñwọñọ man ọsọñọ nnyin idem onyuñ eteme nnyin. Enye ọdọhọ ete Imọ idikpọñke nnyin nte nditọ akpa; Enye eyenọ nnyin odudu man ikeme ndinam utom ke eti usuñ ke iñwañ-utom Esie; Enye eyenọ nnyin kpukpru se inanade nnyin, nte inyene Esie edide ke ubọñ; ñko Enye ọñwọñọ ete ke iyetiene Enye inyene udeme ke se enimde enọ nditọ, inyuñ ikara ye Enye ke Obio-Ubọñ Esie.

Edi akpanikọ ete ke ete-ufọk oro ama okotim etiñ ye mme asañutom esie ntem, esit ediwak mmọ ama emenere, mmọ ñko enyuñ eñwọñọ ke esit mmọ ete iyeda kpukpru talent eke enọde mme imọ inam utom ke ofuri ukeme mme imọ. Nnyin imokut ite ke ndusuk mmọ ema enam ntem, edi mmọ eken ema eñwọñọ ete iyenam koro mmọ ekeyomde ufọn eto Ete ufọk mmọ, mmọ ema ekabare etre ndinam eñwọñọ mmọ. Ndusuk ikesinke ifik ke baba usuñ kiet.

Edideme Mme Talent

Ọbọñ nnyin edeme mme talent, mme utom, nte ukeme nnyin kiet kiet edide. Enye okut ukeme nnyin ke kpukpru usuñ. Okposuk edi oro mme enọ edide nsio-nsio, edinam akpanikọ edi se eyomde eto kpukpru owo, ndien eyesaña ye utip. Talent ition ekeme ndiwak ñkaha nnọ ndusuk owo, talent kiet ñko ekeme ndikpri ñkaha nnọ mmọ eken. Enye emi enyenede ekpri inyeneke ndifibe enye emi enyenede ediwak, koro edi Abasi edeme ke anana-utit ifiọk Esie. Enye akananam idọhọke nnyin inam se owo mikemeke ndinam. Enye ọfiọk nnyin onyuñ okut ukeme nnyin. Se ibehede nnyin edi mme nnyin ke ida mme talent emi Enye ọkọnọde nnyin inam ñkpọ, mme nnyin imọbọp enye inim.

Ke ema ekekure kpukpru uduak, enyuñ enọ mme talent emi, ọbọñ emi ama adaha aka anyan idut. Ema eyak utom esin mme asañutom ke ubọk. Mmọ ema enyene unen ndimek ndida mme talent emi ekenọde mmọ nam ñkpọ, mme nditie ifu ntre ndinam ñkpọ. Akpatre utip mmọ, mme ubiom-ikpe, ọkọkọñọ ke usuñ nte mmọ ekedade mme talent emi ekenọde mmọ enam ñkpọ. Nsinsi utip nnyin mme ubiom-ikpe ñko ọkọñọ ke usuñ nte nnyin idade mme talent nnyin inam ñkpọ.

Edinam Mme Talent Etọt

Ke ñke emi Jesus okotopde, owo emi ọkọbọde talent ition ye enye emi ọkọbọde talent iba ema etọñọ ndinam utom ke ndo-ndo oro. Mmọ ema esin ifik ke utom ọbọñ mmọ. Ema esin ifik man enyene ediwak talent. Mmọ ema enam utom mmọ ye ime. Mmọ iketekke ke ifik mmọ, okposuk edi nte enye ekebighide. Ke ntak emi, utom mmọ ama okut unen. Talent mmọ ama ọtọt. Mmọ eken eketie ifu tutu ọbọñ mmọ ọnyọñ edi.

Ke uwem ye eñwan owo Abasi, odu mmọ emi etọñọde nte ọfọnde enyuñ enam akpanikọ nte nti mme asañutom ke ekpri ini, edi isinke ifik isim utit. Apostle Paul ama ewet ọnọ ndusuk mmọ emi ete, “Mbufo ekefefehe mbuba nte eyede ndise: anie ọkọwọrọ ọkọbiọñọ mbufo ke usuñ, ete, ekusuk ibuot enọ akpanikọ?” (Ñwed Mbon Galatia 5:7).

Ifu Asañutom

Asañutom emi ọkọbọde talent kiet ama okotibi isọñ onyuñ odip okuk ete-ufọk esie utu ke ndinam ọtọt ọnọ ete-ufọk esie. Ndusuk owo ete enye ekedi ifu. Edi nte ikadaha odudu nditibe isọñ nnyuñ ndip okuk oro? Edieke enye akpakadade ekpri ibifik oro esin ke ndinam utom ye talent oro, nte ekpri udori ikpoduhe inọ ete-ufọk esie? Jesus ọkọdọhọ nnyin ete “kpukpru ñkọk ... eke miñwumke mfri, Enye osibe efep” (John 15:2).

Edinyọñ Ndi Ọbọñ

Jesus ama etiñ ete ke ete-ufọk oro ama ọnyọñ edi, onyuñ obok mme asañutom esie ndinam ibat ye mmọ. Mmọ emi ekenamde akpanikọ ema edi ye inemesit ndikọm enye. Edi mmem-mem ñkpọ ndikere ubiom-ikpe emi okodude ke edinam mme asañutom emi mikanamke akpanikọ.

Edinam akpanikọ ke utom Christ ọnọ ukpọñ uko. Mmọ emi enamde nti ido ntem inyeneke ndik ke esit, ke ini ekotde mmọ edisobo ye Ete-ufọk mmọ. Nsutọ ini inemesit ke edidi ọnọ nnyin, ke ini ididade ye mme talent nnyin inyuñ idọhọ ite, “Ọbọñ, se ọkọnọde mi edi emi; ndien emi ñko edi se ñkekemede ke mfọn Fo ndida ndian nnọ Fi,” Domo ndikere mbaña mme ukpọñ emi efakde nte edade enyanare ubọk enọ Ọbọñ ye Andinyaña mmọ mme talent mmọ. Se imam ke iso Ọbọñ nte Enye otorode mmọ ete, “Omotim anam, afo eti asañutom ye owo akpanikọ.” Nte oro idikemke ke kpukpru utom nnyin, nsin ifik, ukut ye unana emi nnyin ikasañade ibe?

Iwakke mmọ emi efiọkde ete ke utom spirit edi ata akamba ñkpọ emi mikpanaha eda ke mfefere. Se mme ufañ Ñwed Abasi emi: “Ndien owo ekededi eke edidade cup mbit-mbit mmọñ ọnọ kiet ke otu ñkpri owo emi ọñwọñ ke enyiñ mbet Mi, ke akpanikọ ke ndọhọ mbufo, enye iditreke tre ndibọ utip esie,” ndien ñko “owo eke anamde akpanikọ ke ata ekpri ñkpọ onyuñ anam akpanikọ, ke akamba ñkpọ.” Nso utọ utibe ñkpọ ke edidi ke ini itoro Ọbọñ ọyọhọde, ke ini Enye edidọhọde ete, “duk ke idara Ọbọñ fo.” Ukpeñe ebe! Utom etre! Idara ke nsinsi. Nso utọ utip!

Talent Kiet

Owo emi ekenyenede talent kiet oro ikanamke nte mme asañutom eken. Enye ama ebiere nditre ndida talent emi ekenọde enye nnam ñkpọ. Enye ikenyeneke ifet inọ utọ edinam oro. Enye ama ọfiọk ete-ufọk esie. Enye ikesitreke ndibọ se ikenyenede enye. Enye akada ke idaha emi akanamde ete-ufọk esie enyene idorienyin ke enye. Edi enye ikanamke baba ñkpọ kiet ke utọ ini emi, akpakadade talent efen odori, man enye ayak ọnọ Ọbọñ esie. Ke ntre, ke ini edinam ibat ekemde, enye ikenyeneke ñkpọ ndinọ ete-ufọk esie. Ñko, ndidip ye nsọñibuot emi ekedude ke esit esie, enye obiom Ọbọñ esie ikpe nte ete-ufọk emi ọsọñde ido. Otut-utọñ asañutom emi mikamaha ndinam utom, ama otim etiñ ntak ke ini enye ọdọhọde ete, “ndik anam mi”.

Ke ini idiọk-ñkpọ odude ke esit, ndik odu ñko; uko ikemeke ndidu ye Abasi. Adam ama okop ndik ke ini enye ama akanam idiọk-ñkpọ ye ke ini emi Abasi okokotde enye. Tọsin owo edip ye iba ema ekpọñ Gideon oto ke ndik. Edi idiọk-ñkpọ anam owo okop ndik.

Mbon esit ndik ye mbon emi minimke ke akpanikọ eyenyene udeme mmọ ke ñkpọdiọhọ emi asakde ikañ ye brimstone, oto ke idiọk-ñkpọ mmọ ye unana edinim ke akpanikọ emi akadade ndik ọsọk mmọ. Nso ñkpọ inam esit okpu mme owo mfin ke ini mmọ ekerede ebaña se idiwọrọde ererimbot? Edi ndik; ndien idiọk-ñkpọ ke esit mmọ ada ndik edi.

Utip idiọk-ñkpọ

“Afo idiọk asañutom ifu,” ekedi mme ikọ ubiom-ikpe emi eketienede owo emi okodipde talent esie. “Mbufo ebọ enye talent oro ndien, emen enọ owo emi enyenede talent duop. Koro eyenọ kpukpru owo eke enyenede, ndien enye enyene awak akan: edi ama edi owo eke minyeneke, eyebọ enye kpa se enye enyenede.” Ifu asañutom emi ebiet mmọ emi emade ererimbot emi ekan nsinsi uwem. Ke ini mmọ emi ekebiatde ifet mmọ mi edidade ke iso Ọbọñ mmọ, mmọ idinyeneke aba ifet ndinam utom nnọ Enye ke nsinsi ndien eyeda do ke but.

Edi oro ikedighe ñkukure ubiere-ikpe emi ifu asañutom emi ọkọbọde. Enye ñko ama okop mme ikọ emi: “eduọk asañutom emi midorike mi udori ke ekim ke esien: do ke eritua eyet ye erita edet eyedu.” Nso utọ ndot-ndot utit ebet idiọk-owo, okop ndik, ye ukpọñ ifu! Ke nsinsi enye eyesuk ekere “se ikedide ntak.” Ke ini owo okoidekoi oduk mme afañ idiọk, usio isop idiọk-ñkpọ iduhe aba. Ke ini ebede adaña, mbọm iduhe aba ke nsinsi.

Mmọñ-eyet ñkabaresit ye edisin ifik nyom edidahado Abasi ke idiọk-ñkpọ, eyeberede usuñ Heaven, onyuñ anyaña ukpọñ osio ke eritua eyet ye mfiori ke nsinsi ini. Eyak nnyin ibup idem nnyin mbume emi, “Nte imada kpukpru talent nnyin inam ñkpọ inọ Ete-ufọk nnyin?”

Questions

MME MBUME

1. Mmọ emi ekebọde mme talent ye enye emi ọkọnọde mmọ ekenyene nso utọ ebuana mbemiso edeme mme talent oro?
2. Mme talent oro eda enọ nso ke uwem nnyin nte Nditọ Abasi?
3. Nso ikedi ntak emi ekenọde ndusuk owo awak akan mmọ eken?
4. Eda nso efiọk ibat talent emi anade enọ nnyin kiet-kiet?
5. Nso ikedi utip mbon akpanikọ?
6. Fiak tiñ ikọ itoro emi eketienede mmọ emi ekenamde talent mmọ etọt.
7. Fiak tiñ ikọ ubiere-ikpe emi eketienede enye emi okodipde talent esie.
8. Nso ikotibe inọ asañutom emi mikodorike ete-ufọk esie udori?
9. Bat mme akpanikọ ke Ikọ Abasi ye mme ukpep-ñkpọ emi ediye mbuk emi ekpepde.