Lesson 228 - Senior
Memory Verse
“Mfọnidem edi nsu, uyai onyuñ edi ikpikpu edi eyetoro ñwan eke abakde Jehovah” (Mme Ñke 31:30).Cross References
I Edu-Uwem Ye Ido Añwan-Ndọ Christ
1. Anana-mbiet uyai edu uwem emi, iwakke, Mme Ñke 31:10; Isaiah 62:3; Deuteronomy 32:10; Luke 12:32; 18:8
2. Odot nte enimde ke akpanikọ, Mme Ñke 31:11; 2 Ndidem 12:15; 2 Chronicles 34:11, 12; Nehemiah 7:2; Daniel 6:4; 1 Ñwed Corinth 4:2; Eriyarare 17:14
3. Anam akpanikọ ke se idide eti, Mme Ñke 31:12; Luke 19:17; Mme Hebrew 3:5; Eriyarare 2:10
4. Esin ifik, onyuñ ada edinyime esit anam utom, Mme Ñke 31:13, 24; Ñwed Mbon Rome 12:11; 1 Ñwed Corinth 4:10-12
5. Odudu esie oto Abasi, Mme Ñke 31:14; Exodus 15:2;
6. Psalm 46:1; 73:26; 84:5; 89:21
7. Etiñ-enyin ke utom anamde ọnọ Abasi ye owo, Mme Ñke 31:15; 22:29; Ñwed Mbon Rome 12:6-8; Mme Hebrew 6:10-12
8. Okut ñkpọ ini iso, Mme Ñke 31:16; Mme Hebrew 11:8-16
9. Esine ñkpọ-ekọñ eke spirit; Mme Ñke 31:17; 2 Ñwed Corinth 6:7; 10:4; Eriyarare 19:7; Ñwed Mbon Ephesus 6:13-17; 1 Ñwed Thessalonica 5:8
10. Enyene eti ifiọk abaña Ikọ Abasi, Mme Ñke 31:18; 1 Ñwed Corinth 2:9-16; James 1:22-25
11. Ebeñe idem onyuñ ekpeme eridi Ọbọñ esie, Mme Ñke 31:18 1 Ñwed Thessalonica 5:8; Matthew 25:1, 4-7, 9, 10
12. Ọyọhọ ye mfọnido onyuñ ekere abaña mbon efen, Mme Ñke 31:19, 20; 1 John 3:16, 17; 2 Peter 1:7; James 1:27; Isaiah 58:6, 7; Utom Mme Apostle 20:35; Ñwed Mbon Rome 15:1; Ñwed Mbon Galatia 6:2; 1 Peter 3:8
13. Enyene idori-enyin ke Abasi, Mme Ñke 31:21; Psalm 3:6; 20:7; 23:4
14. Esine mme edisine ñkpọ edinen-ido, Mme Ñke 31:22; Job 29:14; Eriyarare 3:5; 7:14; 19:8; 21:2; Luke 15:22; Isaiah 61:10; Zechariah 3:4
15. Ọsuhọ ọnọ Ebe-ndọ esie; udọñ esie onyuñ odu ke enye, Mme Ñke 31:23; Ñwed Mbon Rome 7:4; 2 Ñwed Corinth 11:2; Eriyarare 19:7; Luke 14:33
16. Nti ido owo Abasi edi inyene esie, Mme Ñke 31:25; Ñwed Mbon Ephesus 5:23-27
17. Enyene nsi-nsi idori-enyin, Mme Ñke 31:25; 1 Ñwed Corinth 15:19, 49-54; 1 Ñwed Thessalonica 4:13-18
18. Ọyọhọ ye mme mfri Spirit, Mme Ñke 31:26; 2 Peter 1:5-8; Ñwed Mbon Galatia 5:22, 23
19. Anam utom ndikọ ukpọñ mmọ emi edude ke añwa, inyuñ ifreke mbon ufọk esie, Mme Ñke 31:27; Eriyarare 22:17; 2 Ñwed Timothy 4:1-5; 1 Peter 5:2-4
20. Enyene itoro emi otode Abasi ye owo, Mme Ñke 31:28; Ñwed Mbon Rome 8:16; Ñwed Mbon Galatia 4:6, 7; Isaiah 62:5
21. Enyene uwem emi ọfọnde, Mme Ñke 31:29; 2 Peter 3:14; 2 Ñwed Corinth 6:3; 1 Ñwed Timothy 4:12; Titus 2:7, 8
22. Enye idorike enyin ndinyene edinyaña nto utom ubọk esie, Mme Ñke 31:30; Ñwed Mbon Rome 3:20; 11:6; Ñwed Mbon Galatia 2:16; Ñwed Mbon Ephesus 2:8, 9; Titus 3:4, 5
23. Enyene kpukpru se edade ediọñọ enye nte Anditiene Christ, Mme Ñke 31:31; John 15:1-16; Ñwed Mbon Colossae 1:10; Ñwed Mbon Philippi 1:11.
Notes
SE EKPEPDE EBAÑAKe abaña ukpep-ñkpọ Usen mme Eka ke isua emi, Mme Ñke ibuot edip ye duopekiet edi itie ñwed emi emekde. Ema ebup mbume ete, “Anie edikut enyene-ido añwan?” Nti ido enyene-ido añwan edu ke mme ufañ-ñwed emi. Mmọ ewut edu uwem eyen-añwan emi odotde itoro ye ukpono. Nso utibe ererimbot ke ikpenyene ndiduñ ke esit edieke kpukpru eka ekpenamde edu-uwem mmọ esaña ke idaha eke mme ufañ-ñwed emi owutde!
Ọwọrọ iso ewet-ñwed ke mme usen edem etiñ ete ke eka John ye Charles Wesley ama esin Ikọ Abasi emi ke edinam. Enye ama ọduñọre uwem añwan oro ọtọñọde ke emana tutu osim mkpa esie ndien akanam ikwe mbiet esie ke otu nditọ-iban.
Ke emana emi, nnyin ima idiọñọ ñwan kiet emi edu-uwem esie okokoñde akan eke me eka eyo nnyin emi. Enye ekedi Florence L. Crawford, anditọñọ Utom Apostolic Faith. Uwem esie nte eka ye nte ada-usuñ, ama onim ñkoñ-ñkoñ idaha ye uwut-ñkpọ onọ mme eka eyo mfin. Mme Ñke ibuot edip ye duopekiet emi, ekedi ibuot-ñwed emi enye akamade eti-eti. Enye ama awak ndida ibuot-ñwed emi nsin ke ukwọrọ-ikọ ye ukpep-ñkpọ emi abañade Ñwan-ndọ Christ.
Mme idaha edu-uwem emi edude ke ibuot-ñwed emi ebaña eyen-añwan kiet; nnyin inim ke akpanikọ ite ke se emi ọwọrọde ke nkañ spirit, abaña Ñwan-ndọ Christ, emi iban ye iren edude ke esit.
Obufa Emana
Akpa ñkpọ emi anamde enye odot ndikere enyene-ido añwan onyuñ akabare edi kiet ke otu Añwan-ndọ Christ, edi obufa emana, ini emi edade Iyip Jesus ekwọhọre idiọk-ñkpọ esio ke esit esie. Edisana Spirit edemere ukpọñ onyuñ anam enye odu uwem. Emi okpon akan ndinyene ikpikpu ñkpe-mbiere ndinam ñkpọ nnọ Christ. Okpon akan “Edikpuhọre edu-uwem.” Enye edi ifiọk-inyene ke esit emi otode utom emi edade Iyip Jesus enam. Idiọk-ñkpọ ọwọrọ ndien obufa uwem ọtọñọ. Ke esiode ifiọk obufa emana efep, idiọk-ñkpọ eyekara uwem ndien eyedi ọkpọsọñ ñkpọ ndinyene idaha ñkoñ-ñkoñ uwem nte ewetde ke ibuot-ñwed emi. Ke esiode idiọk-ñkpọ enyuñ enamde esit asana, ukpọñ ọtọñọ ndidọk mbine utip akwa ikot Abasi ke Christ Jesus emi ọdọñde enye ndinyene.
Nti Ido Eke Spirit
Peter ọnọ nnyin ndusuk item ndiwut nte ikpasañade inyene ediwak nti ido emi. “Sia odudu Abasi ama ọkọnọ nnyin kpukpru ñkpọ eke esañade ye uwem ye uteñe Abasi, oto edifiọk Enye emi akadade ubọñ ye nti ido Esie okot nnyin; emi Enye okonyuñ adade ọnọ nnyin mme eñwọñọ eke esọñde urua enyuñ ekponde eti-eti; man mbufo eda mmọ ekabare ebuana ke uduot Abasi, ke ema ekebọhọ mbiara emi idiọk itọñ esinde ke ererimbot; ke ntak emi ndien, mbufo ke ñkañ mbufo esin ifik ke ofuri ukeme edian eti ido ke mbuọtidem mbufo, enyuñ edian ifiọk ke eti ido; enyuñ edian erifara ke idem ke ifiọk, ye ime ke erifara ke idem, ye uteñe Abasi ke ime, ye iman ke uteñe Abasi, ye ima ke iman” (2 Peter 1:3-7).
Odot Nte Ebuọtde Idem
“Esit ebe esie ọbuọt idem ye enye.” Edinam akpanikọ edi eti-ido eke ananade eti eti ke eyo emi. Owo ifañ ke otu nnyin emi ekekade ndiñwana ekọñ mfak idut nnyin, ekenyọñ edi, edikut nte ke ima iban mmọ ama ọwọñọre ebine iren-owo efen. Ñwan-ndọ Christ edi enye emi ebuọtde idem ke enye. Okposuk edi nte Jesus ebighide, Ñwan-ndọ Esie eyesuhọ nte anam-akpanikọ. Enye idiyomke se ibiarade.
Utom Edinyime Esit
“Ñwan oro oyom idet erọñ ye flax, onyuñ ada ubọk anam mmọ ke ofuri ima esit.” Ñwan-ndọ Christ inyeneke ufañ inọ ifu. Paul ama anam mme ufọk ọfọñ ndida ñwam idem esie ye mmọ eke enamde utom ye enye. Nte enye anamde utom, enye ñko ke ọkwọrọ Christ ọnọ mme okpono ndem oro.
Ediwak nditọ Abasi enenam utom ọtọñọde ke usenubọk, edi ke mbubreyo, mmọ eyefehe eka ndinim ederi-efak man eda ifet oro etiñ mbuk Jesus enọ mbon isañ ke efak. Ntem ke edi ñko ke nsio-nsio idaha utom nnyin. Mbon-ikwọ nnyin ñko enam utom mmọ ọtọñọde ke usenubọk ndien ke mbubreyo, eda talent mmọ ekwọrọ Gospel ebe ke mme ñkpọ-ubre-ikwọ mmọ ye ikwọ uyo, emi edide uwa edinyime esit eke enọde Abasi. Ke ini ubom isañ ukwọrọ-ikọ nnyin, emi ekotde Lower Light, akade isañ ukwọrọ-ikọ ye mme anam-utom Abasi, mmọ kiet-kiet enyene ndinam utom. “Mbon-ifu” iduhe ke ubom. Ediwak nsio-nsio idaha utom edu, emi mme andinyime ke ofuri esit enamde enọ Christ. Ke ndisiak esisit ke otu mme idaha utom emi edude, edika ñkese mbon udọñọ, editiñ mme ikọ idọñesit, edimiñ ñkpri ye ikpọ ñwed usuan Ikọ Abasi emi enọde mme owo ke ubọk, mme ndinọ ke ufọk-unọ ñwed esọk mme owo ke obio efen, ye ndikpeme nnyuñ nnam ufọk-Abasi asana onyuñ eye owo ke enyin.
“Enye ebiet ubom mbon-urua; ada udia esie ke anyan ebiet edi.” Enye ọbọk idem-esie ke Manna emi otode Heaven. Jesus ama etiñ ọnọ mbet Esie usen kiet ete ke Imọ imenyene udia eke mmọ mifiọkke. Ke ini mbet ekekade ndidep udia-mbubreyo mmọ, Enye eketie ke mben obube-mmọñ Jacob onyuñ etiñ ọnọ ukpọñ nsat-itọñ abaña Mmọñ-Uwem.
Owo eke enyenede udia spirit esie oto Heaven kpukpru ini, odu ke mbeñidem uwemeyo mme okoneyo ndinọ mbon udọñọ, mbon unana uñwam, mme ndinam ñkpọ eke eyomde enam. “Emekut ikọ fo, ndien ndia mmọ” (Jeremiah 15:16).
Iñwañ Eke Onwumde Mfri
Ñwan-ndọ Christ onim enyin kpukpru ini ndikut nte Gospel oñwumde mfri. Ke ini enye okutde isọñ eke edifọnde ye se etọde, enye eyetim ekere abaña onyuñ edep enye. Enye anam ediye linen ayam man enye enyene okuk ndida ndep eti isọñ oro. Ndien enye aka akanam utom man ọtọ iñwañ-vine. Enye idikpaha mba ke utom edibọp ufọk-Abasi onyuñ okut ete ke Gospel enyene nsọñọ-nda ke eti isọñ oro. Enye ọbọbọ odudu ke isin; ndien okposuk edi nte usua odukde edi nte akpa mmọñ, enye eyenyene ukeme ndiñwana ñkan mme odudu hell.
Uwak Afanikọñ
“Enye ifeheke ndik snow ibaña ufọk esie: koro ufọk esie esinede purple.” Mme mfina eyedi, mme afanikọñ ñko ekeme ndidi; edi enye enyene mbeñidem abaña mmọ. Enye ama aka iso ndinam mbuọtidem esie ọkọri man añwam enye ndikan mme mfina uwem. Ndik iduhe ke esit esie. Enye okop inem ndikwọ ikwọ ke okoneyo; koro enye ọfiọkde ete kpukpru ñkpọ esaña ọtọ kiet enam ufọn enọ mmọ eke emade Abasi.
Ifiọk Ye Mfọnido
“Enye ada ifiọk atat inua esie; ewuhọ ima onyuñ odoro enye ke edeme.” Ekeme ndidi emi edi ata ñwọrọ-nda edu-uwem emi ọfọnde eti-eti ke otu kpukpru nti ido eke enye enyenede. Ibat owo emi esimde utọ idaha emi ekpri adaña didie. Afo edi erenowo mme ñwan emi ediọñde edieke ekemede nditiñ emi mbaña fi. Emi ekeme ndidi ntre oto ke mfọn Abasi.
“Andiñwam Eke Ekemde”
“Ediọñọ ebe esie ke inua-otop, ke ini enye etiede ye mbiowo obio.” Enye ama okpono onyuñ eteñe ebe esie, anam enye eti ñkpọ, inamke idiọk kpukpru usen uwem esie. Enye anam ọyọhọ-ọyọhọ se ekebotde enye ebaña, oro edi ndidi uñwam nnọ erenowo. “Enyene-ido añwan edi anyanya ebe esie” (Mme Ñke 12:4).
Kpa ntem ke Ñwan-ndọ Christ esin udọñ esie ke Christ. Edisana ido Abasi emi ekutde ke edu-uwem esie, oduri onyuñ anam mme owo eteñe enyuñ ekpono Christ.
Utomo Ima
“Nditọ esie edaha ke enyọñ ekọm enye.” Ke ofuri idut nnyin mfin emi, nditọ ke ekpe utomo ima enọ mme eka mmọ. Edieke mmọ enyenede mme eka emi efiọkde Abasi, mmọ ema ebọ inyene emi ọsọñde urua akan silver mme gold, mme ufọk ye isọñ; mmọ ediọñọ ete ke enọ ndomo kiet iduhe eke okponde akaha ndinọ eka. Ke ndiọk-iso, ediwak nditọ inyeneke inyene eke etiede ntem. Ñkpọ nte isua aba-ye duop emi ebede ọyọhọ ye mme eka emi ewọñọrede ekpọñ edisana, ediye, eti edu-uwem ebine ediñwọñ min, ediñwọñ ikọñ ye mbre. Idiọk-ñkpọ emi odude ke oruk edu-uwem emi edi se ekemede ndikut ke nditọ mmọ ye ke otu ediwak mkparawa mfin. Akani ñke emi ọdọhọde ete, “Ubọk emi ọfiọñọde nsek-nditọ edi ubọk emi akarade ekondo” owut se idade itie ke uwem owo emi idiọk-ñkpọ mme edinen ido akarade.
Ikpikpu Uyai
“Mfọnidem edi nsu, uyai onyuñ edi ikpikpu”. Ediwak iban eda mme ñkpọ mbanidem ererimbot emi ebana idem mmọ man eye owo ke enyin; edi ke esit-esit, esit abiaña akan kpukpru ñkpọ onyuñ abiara fap. Owo ese owo ke iso edi Abasi ese esit. Ñwan emi enyenede eti ukpep-ñkpọ ke Ikọ Abasi enyene mfọn emi adade emem ọsọk ukpọñ esie, ọduhọre onyuñ ọtunọ kpukpru ifiopesit ye udọñ, ndien anam enye enyene ñkpọ mbanidem kpa sun-suñ spirit eke enyenede iso but, koro oro edi se isọñde urua ke enyin Abasi.
Mme Itoro
Ñwan-ndọ Christ odori-enyin ye idaresit ndibọ itoro eke Ọbọñ esie editorode enye ke ini edisobode ye Ọbọñ esie ke ikpa-enyọñ ye esit ekọm. Mfri utom esie, udori mme talent esie, uwem eke enye okodude, “eyetoro enye ke inua-otop.”
“Anie edikut enyene-ido añwan? Ñkọm ekọm-urua esie akan pearl anyan usuñ.”
Questions
MME MBUME- Enyene-ido añwan emi ada ọnọ anie?
- Nso edi ekọm-urua esie?
- Enye ada udia esie oto mmọñ?
- Enye ọtọ iñwañ-vine esie didie?
- Nso edi ntak emi enye mifeheke ndik snow?
- Nso edi edisine-ñkpọ mbana esie?
- Nso ke etiñ ke ukpep-ñkpọ emi ebaña uyai?
- Anie otoro enyene-ido añwan emi?