Lesson 229 - Senior

Memory Verse

“Koro Jehovah emekde Zion; onyuñ oyom enye ke iduñ ke idem Esie” (Psalm 132:13).

Cross References

I Ediduk David Ke Hebron

1. Ke Saul ama akakpa, David ama obup Abasi mme imọ ifiak inyọñ isọñ Israel, 2 Samuel 2:1-3; 1 Samuel 30:8; 1 Chronicles 14:10, 14-16

2. Ekeyet David aran ke Hebron man ada ubọñ ke Judah, ebiet emi enye akakarade ke isua itiaba ye ubak, 2 Samuel 2:4, 11

3. Ema edọñ etop ndọñesit enọ mbio-obio Jabesh-gilead ke emi mmọ ekefọnde ido ye Saul, 2 Samuel 2:5; 1 Samuel 31:11-13

II Edidem Ofuri Israel

1. Mme esien Israel edọñ mme owo ete ekenam ediomi ye David enyuñ eyet enye aran enim nte edidem kpukpru owo, 2 Samuel 5:1-3; 1 Samuel 16:1, 12, 13; 1 Chronicles 12:23-40; Utom Mme Apostle 13:22

2. Ofuri ini emi David akadade ubọñ ekedi isua 40, 2 Samuel 5:4, 5

3. Ema emen akwa itie ukara Israel eka Jerusalem, 2 Samuel 5:5-9

III Ndikere Mbaña Ekebe-Ediomi Abasi

1. Tọsin owo edip ye duop etiene David eka ndimen Ekebe Ediomi nsio ke ufọk Abinadab, 2 Samuel 6:1-4; 1 Samuel 7:1; 1 Chronicles 13:1-8

2. Abasi ama amia owo kiet owot koro enye okotukde Ekebe-Ediomi, 2 Samuel 6:5-8; Numbers 4:15; 1 Chronicles 13:9, 10

3. David okop ndik ndida Ekebe-Ediomi nduk ke obio esie, 2 Samuel 6:9-11; 1 Chronicles 13:12; Psalm 119:120

4. Edidiọñ ama odu ke ebiet emi Ekebe-Ediomi okodude, ntre David ama enyene ndọñesit ndida Ekebe-Ediomi ndi ke obio David, 2 Samuel 6:12-15

5. Enim Ekebe-Ediomi ke ataya emi David okowukde ọnọ enye, 2 Samuel 6:17; 1 Chronicles 15:1; 16:1.

Notes

SE EKPEPDE EBAÑA

Ndifiọk Uduak Abasi

Ke ini David okokopde ete ke Saul ama akpa ke ekọñ emi ekeñwanade ye mme Philistine, enye ikadarake, edi ama ofuhọ. “Esit okunem fi ke usua fo ọduọde; kunyuñ udara ke ini enye atuahade ukot (Mme Ñke 24:17). Idighe mfuhọ abiaña ke David ekenyene abaña Saul; ukpọñ efen ama ọsuhọre aka nsinsi nsobo. Ata eyen Abasi iyomke owo emi asuade enye akan aka ke utọ itie oro.

David ke mbuọtidem ama ọfiọk ete ke usen kiet, ke usun kiet mme eken, Abasi eyesio Saul ke itie utom oro efep; edi ke ini mbuọtidem oro ayararede, ndik ama anam David ke abaña ubierikpe Abasi. Enye ikọsọpke iwọrọ ika ke odudu ndida ubọñ Israel; okposuk edi nte Abasi akadade Samuel usuñ ndiyet enye aran nnim ke itie oro ke ediwak isua emi ekebede. Kpa ukem mbuọtidem oro okomumde David akama ke ediwak isua emi enye ekebetde, ama etiñ ke esit esie ete ke Abasi emekeme ndinam se Enye ọkọtọñọde mma. Edi David ama obup Abasi se enye akpanamde. Enye ikanamke ñkpọ kiet tutu enye ọfiọk uduak Abasi esie. Ata mbuọtidem iwutke unana ukeme edinam ñkpọ ke ñkañ andinim ke akpanikọ; edi ata mbuọtidem asaña ye ime ndibet mfiọk ọyọhọ uduak Abasi ndien eye anam oto ke ifiọk oro.

Enyene mme ñkpọ emi enade iñwañ-iñwañ ke uduak Abasi ọnọ nditọ Esie, oro edi edifen ke mme idiọk-ñkpọ, edinam asana, Uduọk mmọñ Edisana Spirit ye edisana edikọk ọnọ mbon udọñọ. Mme mfọn ye enọ enyene owo ekededi emi ekotde esin ke Gospel, ndien ana nte etim eyom tutu ebọ enyene; edi enyene mme idaha itie utom ye ikot emi enọde mmọ emi ebetde Abasi ke akam ye ntọtuñọ ediyak idem. Ata edisana ebiet emi odude ọnọ kpukpru ukpọñ ke ererimbot ekpedi ofuri uduak Abasi. Ediwak eyom ndifiọk uduak Esie, edi mmọ iduhe uwem ikpere inyuñ inyeneke ntọtuñọ nneme ye Enye kpukpru ini, ye ntọtuñọ ediyak esit ye uwem emi anade iñwañ ọnọ Abasi man oto do Enye aka iso ayarade uduak Esie ọnọ mmọ. Idara Heaven ke isọñ edi ndifiọk nnyuñ nnam uduak Abasi. David ama ọfiọk ete ke idaha ikot imọ ama okpon akan ikpikpu ikot, ndien enye ama ọfiọk ete ke uduak Abasi ana nte otim añwaña imọ, mbemiso imọ itọñọ ndinam ñkpọ ekededi.

Ndisaña Ke Uñwana

David ye udim ekọñ esie owo 600 ekesuk edu ke idut mme Philistine ke ini mmọ ekekopde ebaña mkpa Saul. Abasi ama anam akpanikọ ọnọ David ke mbume esie, onyuñ ọdọhọ enye ete aka okodu ke Hebron ke isọñ Israel. Ke akani obio emi Abraham okoduñde, kpa ke ebiet emi ekebukde Sarah ñwan esie, do ke mbon esien Judah ekesop idem, eyet David aran enim nte edidem mmọ. Ke nditim ntiñ, ñkukure se mbon esien Judah ekenamde ekedi ndisọñọ ediyet emi Abasi ekeyetde David aran ebe ke ubọk Samuel. Owo ekededi eke asañade ke uñwana edisana Ikọ Abasi eyekut nte mme eñwọñọ Abasi esude ke uwem esie kpukpru ini.

Ekeme ndidọhọ ete ke obio ukara Judah ekedi ubak eñwọñọ emi ekenamde enọ David. Oro edi akpanikọ, edi eñwọñọ Abasi idisuhu ofuri-ofuri ke eritọñọ uwem owo Abasi. Ọbọñ ke ifiọk Esie ekeme ndimum ubak eñwọñọ mme edidiọñ ñkama man Enye ọnọ nti ukpep-ñkpọ onyuñ anam “ñkpọ utom ... emi Ete ufọk ekemede ndida nnam ñkpọ.” David ama enyene ediwak ñkpọ ndikpep mbemiso Abasi ayak enye akara ofuri Israel. Enye ama ekpep mbufiọk ekọñ ye nte edide etubom ekọñ ke mme isua emi enye ekefehede Saul; ndien ke ekpri idaha ukara emi, Abasi ama ekpep David nte edade ukeme ye odudu enam ñkpọ. Ekot kpukpru nditọ Abasi kiet kiet ndibe ke udomo ye mme idomo emi edinamde enye ekem ke uduak Abasi.

Ọkpọsọñ Mbon Ekọñ Abasi

Ekekot David ke itie ukpeme erọñ ete esie ete edidi andikpeme Israel; ema enyuñ ekot mme Apostle esioño ke itie ukọ iyak ete edidi mme ọkọ owo; ntre mfin Abasi ke okot mme owo ke kpukpru ebiet ete edidi “ndidem ye mme oku enọ Abasi.” Usuñ ndinam utom Abasi ye eke Obio Ubọñ kpukpru ini edi ukem, kpa nfafaha ye nsesire usuñ. Edieke David ekekpepde nsuk-ibuot oto ke ndiyọ ukut; edieke mme Apostle ye mbon uko ke mbuọtidem eken ekewọñọde ekpọñ mmemidem ekabare ekop idem oto ke ukọbọ ye isin-enyin (Mme Hebrew 11:34); didie ke anditiene Christ ekededi ekere ete iyebe inua-otop pearl iduk Heaven itre nditabi ubak mme mfiomo emi? Abasi ke adada ukem usuñ emi mfin ndinam mbon-ekọñ edi mkpọsọñ ke abaña ekọñ mme Anditiene Christ.

“Edieke imede ime, iyeda ubọñ ye Enye” (2 Timothy 2:12). Edi uwem owo Abasi idighe eke ukut kpukpru ini. Utip edinam akpanikọ ọnọ owo ekọñ Christ uko kpukpru ini ndika iso. Mme andikan eyedu uwem enyuñ ekara ye Christ ke ererimbot emi ke tọsin isua. (Se eriyarare 20:4). Ndusuk, eyeda ime ndikut nte mme nti eñwọñọ Abasi esude ke uwem owo, edi ukpọñ emi ọbuọtde idem ofuri-ofuri ye Abasi ama ọbọbọ akpa ubak udeme esie enyene. “Jehovah ọmọnọ ufọn ye ubọñ: ama edi mmọ eke eneñerede esaña, enye isinke mmọ nti ñkpọ” (Psalm 84:11).

David Nte Edidem

Ke ini eyetde owo aran enim nte edidem ndida itie ubọñ emi ekenyenede ekpuk efen, ediwak ini akpa edinam esie esidi ndisio kpukpru owo emi edidomode ndinyaña ebekpo ye enye mfep. Emi ikedighe ñkukure nnen-nen ñkpọ ndinam, edi ke eyo oro ekekere ete ke odot ndiwot kpukpru owo emi ediyomde itie ubọñ mme emi ediyomde uwem obufa edidem. Nte ededi David ikenyeneke utọ spirit oro, koro enye ikanamke ufọk Saul idiọk ndomo kiet. Abner, etubom ekọñ Saul ama eyet eyen Saul kiet aran onim nte edidem ke itie ete esie; edi “David ọdọdiọñ ọsọñ aka iso, edi ufọk Saul ọdọdiọñ afiak edem” (2 Samuel 3:1). David ama ada ubọñ ke Hebron ke isua itiaba ye ubak, ndien ke utit ini oro Abasi ada ofuri esien Israel adian ọtọ kiet ke idak ukara David, ndinam eñwọñọ emi Abasi akanamde ọnọ David osu.

Man ofuri Israel efiak edu ke idak ukara kiet, Abasi ama onyime Abner ye Ish-bosheth eyen Saul emi Abner akadade odori ke ebekpo Israel ekpa. Ke ini mbon Israel ekekutde ete ke ñkukure se ikomumde ufọk Saul ikama ama ebe efep; mmọ ema editiene David ke Hebron edinam enye edidem. Mmọ ema eti ete ke David ekedi etubom ekọñ mmọ ke mme isua emi ekebede, ñko ke Abasi ama ọñwọñọ ọnọ David ete “Afo eyebọk ikọt mi Israel, afo eyenyuñ edi etubom Israel.” Mbiowo Israel ema enam ediomi ye David ke Hebron ke iso Jehovah, ndien mmọ eyet David aran enim ke edidem Israel; ndien ofuri owo edat esit.

Obio Ubọñ Heaven, emi edide obio ubọñ Eyen David nte ekemde ye oruk esie ke isọñ, enyene ediwak mbiet ñkpọ ye ebekpo David. Ema eyet David aran ke ediwak isua mbemiso eñwọñọ edisu. Eketie nte nditọ Israel ekedọhọ ete, “Nnyin iyomke owo emi akara nnyin” ndien enye ama ekere ete ke odot imọ ndifehe mkpọñ isọñ Israel ke abaña uwem imọ. David okosuk omum mbuọtidem esie ke Abasi akama, oyuñ okut usen eke Abasi okoforide enye eti-eti, tutu ada ofuri Israel edisin ke idak ukara esie. Satan ye mme andikara ekim ererimbot eñwañwana ndibiọñọ ukara Jesus ke kpukpru usuñ. Mme andiduñ ererimbot inyuñ inyimeke ndinọ Jesus ukpono eke Enye odotde nte Eyen Abasi; edi nte isua ebede obio ubọñ Esie ọdọdiọñ ọsọñ ke odudu. Mfin ke esede enyọñ-enyọñ, ekeme nditie nte ke satan akan, edi ini ke ọsọp edi emi ofut emi editode Christ ke inua iwọrọ edinuakde odudu esie. Ke usen oro eyefiọk Jesus nte “EDIDEM NDIDEM YE ỌBỌÑ MBỌÑ” (Eriyarare 19:16), ndien kpukpru mme andiduñ ke Heaven ye ke isọñ ke idaresit eyenyime Enye enyuñ eka eketuak ibuot enọ Enye. Edieke mbio Israel ekedarade edidem mmọ ke isọñ, ndisana ikọt Abasi edidara Edidem heaven mmọ didie.

Ekebe-Ediomi

Nte ikpepde uwem edidem David, iyekut ite akpan ñkpọ emi okodude ke uwem esie ekedi akpanikọ emi ekesinde enye ọfiọk Abasi nte andikara emi okoñde akan, ye idem esie nte owo emi adade ke ibuot ukara Abasi. David ama ọfiọk ete ke akwa obio ukara ke idut Israel ekpedi ebiet eke Abasi oduñde ye akamba itie ukpono Abasi emi nditọ Israel edikopde inem. Owo ikadaha ataya emi ekewukde ke Shiloh inam ñkpọ ke ediwak isua; ema enyuñ efre Ekebe-Ediomi emi ekedade ke isọñ Philistine efiak edi edinim ke ufọk Abinadab. Ke ini ekenamde David Edidem ofuri esien Israel, ama ọsọp oduk enye ke esit ndida Ekebe-Ediomi Abasi ndi ke Jerusalem. Enye ama osio ndimek owo 30,000 ndisaña ye enye ñkada Ekebe-Ediomi Abasi ndi ke obio ye idara.

Ọfọn didie mme owo ndikpeme ndinam kpukpru ñkpọ nte Abasi etemede, edieke mmọ eyomde Abasi enem esit ye mmọ! Edieke nditọ Israel ekpeketimde ekpep Ikọ Abasi ke ini emi, mmọ ekpefiọk ete ke akana nte etim ewañ Ekebe-Ediomi ye ọfọñ, man mme owo edikut enye, mme Levi ñko enyuñ eda eto ebiom enye ke afara mmọ. Ikanaha owo ekededi otuk Ekebe-Ediomi mme edisana ñkpọ Abasi ekededi ke ubọk mbak edikpa, ke mibọhọke mme oku emi enamde utom ke Ataya.

Mbon Philistine ema eyak Ekebe-Ediomi afiak etiene nditọ Israel ke obufa ukpat-ñkpọ. David ye ikọt esie ema eduọk item Abasi enyuñ edomo ndimen Ekebe-Ediomi ke ukem usuñ oro ke ufọk Abinadab nda ndi ke Jerusalem. Nte udim isañ oro ekpọñde obio-iñwañ ekpere obio, Ekebe-Ediomi ama otuhọ ekebere ke ukpat-ñkpọ ke ini mme enañ emi ewatde enye ekefiọnọrede ke idiọk isọñ. Usọp-usọp Uzzah andikpeme Ekebe ama anyan ubọk ndinehere Ekebe nnim, edi edinam emi ama ayat Abasi; koro ekedide edibiat mbet Esie. Abasi amia enye ke ndudue eise ndien enye akpa. Mkpa Uzzah ama ada akamba mfuhọ esin ke esit David, ndien enye okop ndik ndida Ekebe-Ediomi nduk ke obio. Udim oro ema ewọñọre eda enyuñ eyak Ekebe-Ediomi enim ke ufọk Obed-edom.

Ndibọ Edidiọñ

Abasi ama ọdiọñ ufọk Obed-edom ke ofuri ini emi Ekebe-Ediomi okodude do. Ke ini etimde ekama ñkpọ Abasi ye ukpono, edidiọñ Abasi eyetiene. David ama ọtọñọ ntak enyene udọñ ndinyene Ekebe-Ediomi ye enye ke obio; ke ini enye okokutde edidiọñ emi Obed-edom ekenyenede sia Ekebe-Ediomi okodude ye enye, ke ntem David ama ọsọñidem ada Ekebe-Ediomi edi Jerusalem. Mme Levi ekebiom Ekebe-Ediomi ke afara mmọ ke ọyọhọ ikaba emi, ndien edidiọñ Abasi ama odoro kpukpru owo ke idem. Mmọ ema eda Ekebe-Ediomi edi ke Jerusalem ye akwa mkpo-idara ye uyom ukorowo, enyuñ enim enye ke itie esie ke ufọt ataya emi David akanamde.

Ñkpọ-ntibe emi akpana edi ntọt ọnọ kpukpru owo mfin nte ke Abasi emi odude ke Heaven etetiñ enyin ke ñkpri ñkpọ. Onyuñ owut nte edide mmem-mem ndinam ndudue, ñwọrọ ñkpọñ ewuhọ Abasi ye ñkpọ ndik emi ekemede nditiene oruk edinam oro. Edieke eketiñde enyin ke utom emi David akanamde ọnọ Enye, nte Enye iditiñke enyin ke isañ owo Abasi mfin? Emi otim owut ntak emi Abasi akpasañade ye nnyin ofuri ini man ada usuñ ke kpukpru ñkpọ. Edieke mme owo ekpemede ndisaña ke nde ikpat Christ nnyuñ ntiene kpukpru usuñ Esie, mmọ eyenyene edikan ke ọkpọ-usuñ edinen ido ye ke ana iñwañ inua-otop ke ini mmọ edisimde Heaven.

Questions

MME MBUME

1. David okodu ke mmọñ ke ini enye okokopde abaña mkpa Saul?
2. Nso ke David akanam mbemiso enye ọnyọñ? ewe obio ke enye ọkọnyọñ aka?
3. Anie ekedi ke obio oro? Nso edinam ke mmọ ekenam?
4. Isua ifañ ekebe mbemiso ofuri Israel eyet David aran enim nte edidem mmọ?
5. Ewe obio ke David ekemek nte akwa obio ukara esie?
6. Nso ikedi ntak emi David okoyomde Ekebe-Ediomi Abasi edidu ye enye ke obio?
7. Nso ikedi ntak emi Abasi akamiade Uzzah onyuñ owot enye?
8. Didie ke ekeda Ekebe-Ediomi edi ke obio ke akpatre?
9. Nso ukpep-ñkpọ ke nnyin ikeme ndinyene nto uwut-ñkpọ emi?