Lesson 230 - Senior

Memory Verse

“Ntem ke Jehovah ọdọhọ ete, Enyọñ edi ebekpo mi, isọñ onyuñ edi udorukot mi: nso ufọk ke mbufo edibọp enọ mi? nso ebiet ke mbufo edinim ke nduọk-odudu mi ñko?” (Isaiah 66:1).

Cross References

I Ebeñe David Ye Nte Ekebọrọde

1. Esit David ama otimere, ke Abasi ama ọkọnọ enye emem koro ufọk esie ekeyede akan eke Ekebe Ediomi, 2 Samuel 7:1, 2; 5:11; 6:17; 1 Chronicles 17:1; Psalm 30:1

2. Nathan, nte owo Abasi, ama ọsọñọ David idem ete ọbọp Itie-Ukpono Abasi emi edibighide, 2 Samuel 7:3; 1 Chronicles 17:2

3. Nathan, nte anditiñ-ntiñ-nnim-ikọ Abasi, ama ọbọ ata uduak Abasi ke abaña Itie-ukpono Abasi, 2 Samuel 7:4; 1 Chronicles 17:3

II Etop Emi Abasi Ọkọdọñde Ọnọ David

1. Abasi ikọdọñke ebọp Itie-ukpono 2 Samuel 7:5-7; Isaiah 66:1, 2; John 4:20-24; 1 Chronicles 17:4-6; Utom Mme Apostle 7:48-50

2. Abasi ama otoro udọñ David ndibọp Itie-ukpono Abasi, 1 Ndidem 8:18; 2 Chronicles 6:7, 8

3. Abasi okokot David ndidi owo ekọñ, idighe ndibọp Ufọk Emem, 2 Samuel 7:8, 9; 1 Chronicles 17:7, 8; 22:7-10; Ñwed Mbon Rome 11:29; 1 Ñwed Corinth 7:20; 12:28; Ñwed Mbon Ephesus 4:11

4. Abasi ikonyimeke David ọbọp Itie-ukpono Abasi koro Abasi ama enyene akwa uduak abaña enye ye ofuri Israel, oto ke enye, 2 Samuel 7:10; 1 Ñdidem 8:16-20; 1 Chronicles 17:9, 10; Jeremiah 32:37-42; Isaiah 55:8, 9; 1 Ñwed Corinth 3:16, 17; 6:19

5. Ekenyene ndiyak utom edibọp Itie-ukpono Abasi nnọ Solomon, 2 Samuel 7:12, 13; 1 Ndidem 8:19; 1 Chronicles 17:11-14; 22:9, 10; 2 Chronicles 6:9, 10

6. Mme Eñwọñọ Abasi ke abaña Solomon ọkọkọñọ ke enye ndinam item ọyọhọ-ọyọhọ, 2 Samuel 7:14, 15; 1 Chronicles 22:12, 13; Psalm 89:30-32

7. Ekesọñọ ediomi Abasi ye David ke uñwọñọ, okonyuñ enyene ndisu ke edidi Messiah, 2 Samuel 7:16, 17; 1 Chronicles 17: 14, 15; Psalm 89:1-4, 20-37; Numbers 24:17-19; Isaiah 9:7; Zechariah 14:9, 16, 17; Matthew 21:5-9; 27:37; Luke 1:32, 33; Eriyarare 19:11-16

III Ibọrọ Emi David Ọkọnọde Abasi

1. David ama ọsuhọre idem ọnọ ediwak eñwọñọ emi okodude ke ediomi Abasi ye enye, 2 Samuel 7:18; 1 Chronicles 17:16; Isaiah 51:1

2. Ibọrọ David ayarade ete ke enye ama enyene ekpri ifiọk abaña nsinsi idaha ediomi Abasi, 2 Samuel 7:19; 1 Chronicles 17:17; Matthew 13:17; Mme Hebrew 11:32-35; 1 Peter 1:10-12

3. David otoro Abasi ke mfọn Esie ye enye, ye Israel, 2 Samuel 7:20-29; 1 Chronicles 17:18-27; Deuteronomy 4:7, 8; 33:29; Numbers 23:8-10.

Notes

SE EKPEPDE EBAÑA

Ke ndiduñọre utibe ukpep-ñkpọ emi, nnyin imekeme nditọñọ ye ufañ ñwed emi mitoho ke itie edikot-ñwed emi. Do nnyin imekeme ndikut ndusuk ñkpọ emi ekemede ndida ndian edieke etimde eduñọre ñkpọ ntibe emi ke uwem edidem Israel ọyọhọ iba.

Ndusuk owo ema esọp ebe ekpọñ mbuk emi, enyuñ etre ndikut nte mme eñwọñọ emi ekesiande mi enyenede nsinsi utom ye ukeme. Emi ikedighe enyọñ-enyọñ ñkpọ-ntibe. Se iditode do iwọrọ edidi ke nsinsi, koro emi ekedi ata akpatre ñkpọ-ntibe ke uwem akpa edidem nsinsi Obio Ubọñ. David ekedi “akpan eke Abasi, okoñ akan ndidem isọñ,” edidem emi Abasi ke Idemesie ekeyetde aran onim, enye emi edinimde ubon esie “ke nsinsi, ye ebekpo esie nte mme usen Heaven” (Psalm 89:20, 27, 29).

Mme Usuñ Abasi

“Koro mme ekikere mbufo midighe mme ekikere mi, mme usuñ mbufo minyuñ idighe usuñ mi: emi edi uyo Jehovah.

“Koro kpa nte enyọñ okoñde akan isọñ, kpa ntre ke mme usuñ mi ekoñ ekan mme usuñ mbufo, mme ekikere mi enyuñ ekoñ ekan mme ekikere mbufo” (Isaiah 55:8, 9).

Emi edi uwut-ñkpọ emi enamde otim añwaña ete ke mme usuñ Abasi ekoñ ekan mme usuñ nnyin, ke mme ekikere Esie inyuñ idighe mme ekikere nnyin. David anditiñ-ntiñ-nnim-ikọ ye Nathan anditiñ-ntiñ-nnim-ikọ ema ekut, oto ke ñkpọ-ntibe emi, ubọñ ye uduak Abasi nte ọfọnde ekem onyuñ eyede, ke edade edomo ye unana ukeme mmọ. Mme uduak David ikọdiọkke. Ubiọñọ okoto ke unana ukeme esie nte owo ndida nkut ñkan nte enamde ñkpọ ke ido ererimbot ọkọrọ ye akpanikọ ete ke baba owo kiet ikpekemeke ndidori enyin ke utọ nsinsi idaha nte eke Abasi ekebeñede onim ọnọ owo emi esit esie ọkọfọnde ama ye Enye.

Eti owo Abasi kiet ke eset ama ọdọhọ ete: “Abasi edi anditọñọ kpukpru nti uduak ye nti utom nnyin; enye esibem iso edemere mmọ; ndien edieke nnyin idide mme anam utom ọtọkiet ye Enye, Enye eyenọ mmọ utip ye anyanya nte mmọ ekedi eke nnyin, okposuk edi edide Enye ikpọñ edi anditọñọ.” Owo emi akada usuñ efen nditiñ ete “Kpukpru eti erinọ ye kpukpru enọ eke efọnde ema eto ke enyọñ, eto ke ubọk Ete mme uñwana esuhọre edi; emi mikemeke ndikpuhọre, ukpuhọre itie minyuñ ikemeke ndimen Enye nsin ke mfut” (James 1:17).

Ndusuk owo ekere ete ke ema esua enọ David ke ini ekesinde ebeñe esie, ete yak imọ ibọp ufọk inọ Abasi. Ñwed Abasi etiñ ọnọ nnyin ete ke uduak ye udọñ esie ema efọn enyuñ edot se etorode. Edisin oro ekedi ndiyarade ñwut nte ke mme usuñ Abasi idighe mme usuñ nnyin, mme ekikere Esie inyuñ idighe ekikere nnyin.

Edida Uwa Ndiomi Ediomi

Ọfọn kpukpru ini ndimen Abasi ye utom Esie nnim iso ke ñkan eke nnyin. Ikemekekeme ndidi idiọk “ndibem iso nyom obio ubọñ Abasi” nnyuñ mmenere utom Esie ekpedi oyomde nnyin ndiwa inemesit ye mme ñkpọ eken emi etiede nte owo ikemeke ndinyaña. Abasi esinem esit kpukpru ini ke ini nnyin ikponode Enye ikan idem nnyin, mme ufan nnyin, utom nnyin, ye mbubehe nnyin ke isọñ. Eti-mbuk Obio Ubọñ edi ido ukpono Abasi emi eyomde ñwaidem. Usuñ emi akade Heaven idighe usuñ emi esañade ubọñ-ubọñ. Iduhe usuñ emi ọyọhọde ye inemesit emi adade owo esim ke mme akwa idaha ubọñ Heaven. Ndisana ikọt Abasi emi edinamde mmọ esobo ye Christ edi mmọ emi ekedade uwa ediomi ediomi ye Enye (Psalm 50:1-6).

Abasi edi anditọñọ kpukpru uduak ke esit owo emi asañade aka Heaven, owo emi edinimde kpukpru ñkpọ ñkañ kiet, kpa idem uwem esie, man okut ñkọri Obio Ubọñ ye nte emenere enyiñ Abasi ke enyọñ. Udọñ ye uduak oro itoho isọñ; enye edi kiet ke otu nti nsọñ-urua ñkpọ emi etode ke Heaven esuhọre edi. Akananam iduhe uwa emi eti anditiene Christ awade, emi Abasi mikwe minyuñ inọhọ utip, ọtọñọde ke David, enyene ñkpọ edidem, tutu osim ebekpa ñwan emi mikowutke idem edi asañade suñ-suñ esin ofuri se ekenyenede ọnọ Abasi. Mmọ emi midaha “uwa idiomi ediomi” ifiọkke ibaña idara edidiana ye Abasi emi etode ke ediomi. Ndibat kpukpru ñkpọ nnyin ke ntak-urua ke ntak Obio Ubọñ Christ ayara owut ebiet emi nsukibuot nnyin odude, ye enye emi edide Andikara nnyin ye enye emi nnyin imade.

Iduhe uwa emi okponde akaha owo ndiwa nnọ Abasi, koro Enye ekpede utip utim ikikie. Iduhe ñkpọ emi nnyin ikpenyenede ke ererimbot emi, ndien iyak inọ Enye, emi edide uwa eke ọkpọsọñde urua akaha. Ke ekem ini ererimbot emi eyebe efep; ndien edieke nnyin ikpekpade mbemiso akwa usen Ọbọñ, ini emi kpukpru ñkpọ editarade oto ke ọkpọsọñ ufiop, nnyin imama ye mimaha ma innyene ndikpọñ kpukpru ñkpọ isọñ emi edide udori ọnọ nnyin ndien isaña ikpọñ iduk nsinsi ini inyuñ inyeneke uñwam ito mme ñkpọ emi ikọkọde ibon, mme idaha nnyin ke ererimbot. Edi, uwa emi ewade enọ Abasi eyenọ nsinsi utip. Ekeme ndidi nnyin inyeneke mme gold ye ñkpọ-mbre ererimbot emi, edi utu ke oro, imekeme ndinyene akwa ubet emi ọyọhọde ye nsinsi inyene.

Uwa Christ Awade Ọnọ Nnyin

Akana enọ uwa, kpa idem Eyen Abasi. Abasi ama emenere Enye onim ke itie onyuñ ọnọ Enye Enyiñ eke okoñde akan kpukpru enyiñ koro Enye okonyimede ndiwa uwa oro. Enye akayak uwem Esie ọnọ. Ọkọnọ kpukpru. Enye ikekereke mkpa esuene ke krọs nte uwa emi okponde akaha. Ofuri udọñ Christ ekedi man enọ enyiñ Abasi ubọñ, man uduot owo emi ama okosop ọkpọbọhọ.

Ema eñwọñọ mme obio ubọñ ererimbot emi enọ Christ edieke Enye edisukde ibuot ọnọ abasi ererimbot emi utu ke ndisuk ibuot nnọ ata Abasi. Anana ibat otu owo ke enanam oro: ke eduọ ke isọñ eyak ofuri esit mmọ, ye inyene ye ukeme mmọ enọ enye emi ọnọde mmọ se idide ikpikpu ñkpọ ke usiene. Anana ibat mmọ emi, edu ke otu emi ekotde edisana enyiñ oro ke mkpọk inua ke ido edikpono Abasi emi edide abiaña. Mmọ edọhọ “Ọbọñ Ọbọñ” ke ini esit mmọ oyomde usuñ ọkpọñ Abasi. Nte edide, Jesus ikokopke uyo inọ satan; ke edinam ntre, Enye ñko edi uwut-ñkpọ ọnọ kpukpru nnyin emi isañade ke nde ikpat Esie.

David Awa Udọñ Ye Uduak Esie

Ekeda cedar ebọp ufọk David, edi Ekebe Ediomi akana ke tent. David ama ebeñe ñkpọ emi owo Abasi ekededi ekpebeñede: man Abasi ekpenyene se ifọnde ikan oto enye. Nathan, owo Abasi, ama okut udọñ David, ndien sia ekerede ete ke oto Abasi, ọnọ unyime esie ke uduak oro. Edi edieke edide ke anditiñ-ñntiñ-nnim-ikọ oro ama ede idap ke ufọk esie okoneyo oro, ekedi esesit idap. Nathan ye David, mmọ mbiba ekeyom ñkọri enọ utom Abasi, baba owo mmọ kiet ikọsọñke ibuot ikonyuñ isañake ke uduak idem esie ke se ekenamde. Ke akpanikọ, Nathan ama ọbọñ akam ete yak Abasi abiat ñkpọ ekededi eke misañake ye uduak Esie onyuñ ọnọ se idide uduak Esie unen. Abasi ekeme nditiñ ikọ nnọ owo emi utọñ esie anade iñwañ. Enye ama ekeme nditiñ ikọ nnọ Nathan. Nnyin imekeme ndikut ite ke esit David ñko akana iñwañ ọnọ ọyọhọ uduak Abasi, koro ke akam nyakidem esie ye edinyime uduak Abasi enye ọdọhọ ete: “Owo fo ọsọñọde esit ekpe fi mkpe-ubọk emi” ọnọ Abasi. Owo ekeme ndikut inyene spirit edieke enye oyomde mmọ. Ke ntre, nnyin imọfiọk ite ke David ñko, okoyom uduak Abasi ke ñkpọ emi okposuk edi emi enye ama ọkọbọ unyime oto owo Abasi.

Mme Uduak Abasi Ke Abaña David

Abasi ikọdọhọke ebọp ufọk enọ Imọ. Iduhe ufọk emi ekemede ndiduk Enye emi okponde akan ofuri ererimbot. Enye ikemekke saña-saña obio kiet nte ebiet iduñ Esie. Utu ke oro enye ekemek owo, ndien owo oro ekedi David. Udọñ David ndibọp ufọk nnọ Abasi ama enem Enye esit, ndien ke ekem ini Enye ama ayak enam oro ke usuñ eke Abasi akamade. Edi owo ikọbọpke enye nte ebiet iduñ Abasi. Ekebọp ndinọ enyiñ Abasi ukpono.

Iduhe ebiet emi owo ọbọpde emi ekpekemde ye Abasi. Enye ọkọdọhọ ete: “Ndien nyewuk enyin nse owo emi, kpa eyen ukut, emi esit onyuñ otukde, emi onyuñ enyekde abaña ikọ mi” (Isaiah 66:1, 2). Abasi ama okut ke David, owo emi Enye ekemede ndinam mme eñwọñọ ediomi Esie esu ke abaña mme anam idiọk. David ama ọfiọk ete ke Abasi ama okut ebe udọñ esie ndibọp ufọk Abasi. Abasi okoyom ndibọp ufọk nnọ David; idighe ke akpa ifet ndikpono owo oro, David, edi ndinam mme eñwọñọ ediomi emi Enye akanamde ọnọ Abraham osu.

Ata Itie-Ukpono Abasi

Idem nnyin edi temple ọnọ Edisana Spirit (1 Ñwed Corinth 3:16, 17; 6:19, 20). Ekedep nnyin ke ekọm urua. Nnyin idighe eke idem nnyin. Abasi ekemek David ndida enye nnam mme nsinsi uduak ye udọñ Esie osu, ndien Enye ke okot mfin, ke udomo eke okponde akan, mme owo emi edidade “uwa ediomi ediomi” enyuñ eyak idem mmọ ofuri ofuri enọ Enye emi anamde se idide eti ye edinen.

Abasi ke oyom mme owo emi Enye ekemede ndiyak mme utom ediomi Obio Ubọñ Heaven nnọ, man Eti-mbuk akpaka iso asuana ke ofuri ererimbot, osim mme udim owo emi edude ke edem añwa obio ubọñ emi minyuñ ifiọkke usuñ nte esañade eduk. Utom edisuan Eti-mbuk mfin enyene Edisana Spirit ye ñwan ndọ Christ. Christ odu ke ubọk nasia Abasi Ete, ke anam mkpe ubọk ọnọ uduot owo, ama onyuñ ayak utom edikwọrọ edinam emem ọnọ nnyin. Ke ntak utom emi, Edisana Spirit eyeyọhọ ke nnyin, mme temple Esie, ọnọ nnyin odudu, ada nnyin usuñ onyuñ ọsọñọ nnyin idem. Utom emi otim efikhe kpukpru mmọ emi edude uwem ekpere Abasi, emi enyuñ eyomde ndimenere utom ubọñ Abasi ikpọñ, enyuñ emekde usuñ Esie ekan eke idemmọ. Abasi ekeme ndibe ke mmọ anam eñwọñọ emi Enye akanamde ọnọ mme ete mbuọtidem ke eset osu.

Mme Ediomi

Mi nnyin imada ikut akwa uduak ediomi Abasi efen, Enye ama anam nsinsi ediomi ye Abraham emi ekenyenede ndisu nnyuñ mbe ke idut Israel. Ke ntak oro Enye onyuñ anam saña-saña ediomi ye Israel. Ekesọñọ ediomi emi Abasi akanamde ye Abraham ke unwọñọ, ndien sia Abasi mikekemeke nditomo se ikponde ikan Idem Esie, Enye otomo idem Esie (Mme Hebrew 6:13).

Idut Israel ema ekpu ke saña-saña ediomi emi Abasi akanamde ye mmọ ke Horeb, ye ke mme eñwọñọ akakan ediomi emi Enye akanamde ye Abraham. Edi owo kiet kiet emi ekemekde usuñ nwa-idem akan ndidia “inemesit idiọk-ñkpọ ke ekpri ini” (Mme Hebrew 11:25) ama anam mme enwọñọ emi ekedude ke ediomi mbiba oro osu. Ekọm enyene Abasi koro ama odu mmọ emi ekenyenede mbuọtidem, owo nte Moses, Joshua, Deborah, Barak, Samuel, David, Elijah, Elisha ye John ọduọk-owo-mmọñ, ndinam uduak Abasi osu ke abaña edinyaña ererimbot.

Akpa ediomi ye Abraham ikenyeneke ndibe mfep, ekenyuñ esọñọ enye ke unwọñọ. Ediomi emi ekenamde ye Israel ekenyene mmọ saña-saña ndien Enye emi ekedide ndinam kpukpru edinen ido ekenyene ndinam enye osu. Ediomi emi ye Israel ikedighe ke nsinsi, ke ntre ikọsọñọke enye ke uñwọñọ.

Ndusuk owo ekeme ndiyik emi enyuñ edọhọ ete ke ukpuhọre ikpoduhe sia Ikọ Abasi edide nsinsi ke usuñ eke ededi, ndien ke kpukpru se Enye etiñde enyene ndiwọrọ nsu. Emi, ke idemesie, edi ata akpanikọ. Ndisọñọ kiet ke unwọñọ ekedi ndiwut nte enye edide nsinsi onyuñ ọfọnde akan enye emi mikọsọñọke ntre. Mme Ikọ emi Abasi eketiñde ke Obot Sinai ke abaña Israel ekenyene mmọ, kpa mmọ ikpọñ. Ndien ke ini kpukpru ñkpọ emi eketiñde ke Ibet ema ekesu, Ibet ye ediomi oro ekenamde ye Israel ema ebe efep.

Akpan ñkpọ emi ediyara uduak Abasi ke abaña edinyaña ọkọkọñọde ama ọwọrọ ada ke ini emi David okoyomde eyak imọ ibọp ufọk Abasi. Abasi ama afiak edemere ndusuk ñkpọ emi ekedude ke ediomi emi Enye akanamde ye Abraham, akpan-akpan mmọ oro akabañade David ye itie emi akanade ọnọ enye ke uduak Abasi.

Abasi ọkọdọhọ ete : “Ñkemekke baba obio kiet … nte ebọp ufọk … edi ñkemek David” (1 Ndidem 8 :16). “Ami ñkosio fi (David) ke nna-erọñ … nnyuñ nnam akamba enyiñ nnọ fi” (2 Samuel 7 :8, 9). Ndien Abasi ebe ke Nathan Anditiñ-ñntiñ-nnim-ikọayarade ọnọ David Anditiñ-ñntin-nnim-iko ete ke Imọ iyewuk obio ubọñ emi midinyeneke utit, inyuñ inim nsinsi ebiet inọ nsuhọ Israel, emi, ke ekem ini, edinyenede Imọ nte Edidem mmọ. Abasi ọkọdọhọ ete ke Imọ iyebọp ufọk inọ David ndien ke mbọm Imọ idikpọñke ufọk oro nte ọkọkpọñde ufọk Saul.

David ama ọdiọñọ se utibe enwọñọ ye ediomi emi ọwọrọde, koro Abasi ñko ọkọsọñọde enye ye uñwọñọ. David ọkọbọñ akam ete : “Afo omonyuñ ọdọhọ abaña ufọk owo fo ke anyan ini ke iso.” Ke ikọ emi, enye anam nnyin ifiọk ite ke enye ama ada nsan-nsan okut ọyọhọ edisu uduak emi Abasi enyenede ọnọ ofuri emana. Enye ama ekeme ndikut ete ke ufọk esie eyekeme ndibighi ke nsinsi ke ntak emi edikọride ọkọsuñọ ke Owo emi edidude uwem ke nsinsi. Imọfiọk ite Owo oro edi Jesus, emi edide Christ. David ekedi edidem Israel ọyọhọ iba, edi enye ekedi akpa edidem ke obukidem ke Obio Ubọñ emi midinyeneke utit.

David ama ọdọhọ ñko ete “Ndien emi edi ido owo, O Ọbọñ Jehovah?” Ema emen ewut ete ke nnen-nnen edikabare ikọ emi nte ewetde ke usem Hebrew idighe nte mbume, edi, edi editiñ ikọ: “Ndien emi, O Ọbọñ Jehovah, edi ibet owo.” (Adam ye owo eto ikọ kiet ke usem Hebrew). Edi akpanikọ ete ke David eketiñ mi abaña akpa eñwọñọ emi ekenọde ke abaña Messiah, ete ke ubon ñwan eyenuak ibuot urukikọt. Ke ikọ efen, enye ọkọdọhọ ntem “Emi edidi uyọhọ mme akwa eñwọñọ ye idorenyin ke abaña Messiah.” Ndien ke esit emi emenerede ye ukpọñ emi ofiopde, David aka ke iso Abasi ndiyak esit esie ke inem akam ye itoro emi edide akpatre itie edikot ke ukpep-ñkpọ emi.

Ediomi Ye Nnyin

Ke isua ikie ita ama ekebe, Abasi ama ọnọ kpukpru owo utibe ikot ete : “edi ke mmọñ ! ye owo eke minyeneke okuk ! mbufo edi edep enwọñ ! mbufo edi edep enyuñ edia ! enyuñ edi edep wine ye mmọñ-eba, idighe ke okuk, inyuñ idighe ke ekọm-urua.” Abasi ama ọñwọñọ ke Imọ iyenam nsinsi ediomi ye mme owo emi eyerede ikot oro. Ndien ke ndudue ididuhe ke abaña se idinamde ediomi oro ọsọñọ ada. Enye adian ete: “Kpa ñkpọ ima David eke edide akpanikọ” (Isaiah 55:1-3).

Ema enam mbọm Abasi ọkpọñ Saul, edi ekeñwọñọ enye ke nsinsi enọ David ye ubon esie koro David akadade “Uwa ediomi ediomi.” Abasi ọmọnọ nnyin Ikọ Esie emi mikpuhọkere man ofuri nsinsi edidiọñ emi ekeñwọñọde enọ David ekpedi eke nnyin, ñko, edieke nnyin iyerede ikot inyuñ idade “uwa ediomi ediomi” nte David akanamde.

Nnyin ima ikut ite ke David ekedi akpa edidem ke obukidem ke nsinsi Obio ubọñ, ndien nnyin imekeme ndikut ite ke nnyin, ñko, imekeme ndidi mme anditiene ñkara ye nsinsi Edidem ke Obio ubọñ oro midinyeneke utit. Abasi ama anam ediomi ye David onyuñ ọsọñọ enye ke uñwọñọ, ke ntre nnyin imekeme ndifiọk nte enye edide ata akpanikọ, onyuñ edide ke nsinsi. Enye idighe ediomi emi edisọhide ifep ke ini uduak esie osude nte ekedide ye ediomi emi ekenamde ye Israel saña-saña ke Horeb. Abasi oyom ndinam ukem ediomi oro ye nnyin nte Enye akanamde ye David. “Ñkpọ ima David eke edide akpanikọ” omum ediomi emi akama. Emi edi ediomi oro eketomode edisana Abasi, akakan uduot Abasi emi anade otomo Idem Esie sia miduhe se ikponde ikan Enye (Mme Hebrew 6:13; Psalm 89:3, 35). Ke ntre, ini iso nnyin ada ọfọn edieke nnyin ikade iso inam mme enwọñọ emi nnyin ikemende ibiom ke idem nnyin, edieke nnyin inamde inyuñ inimde se ikedade “uwa ediomi ediomi.”

Questions

MME MBUME

1. Nso ikedi idaha Israel nte idut ke ini ukpep-ñkpọ emi?
2. Nso utọ idaha iba ke Nathan ekenyene ke ukpep-ñkpọ emi?
3. Nte ema esua enọ David ke ini ekesinde ebeñe esie?
4. Nso ikodu ke esit David emi ekenyikde enye ndinam ebeñe?
5. Nso ke Abasi ekenyene nditiñ ke abaña ebeñe David?
6. Nso uduak ke Abasi ekenyene ọnọ David onyuñ enyene ọnọ Israel ebe ke David?
7. Anie ke ekem ini ekenyene ndinam ñkpọ emi David okoyomde ndinam?
8. Nso ke afo okut emi ebietde kiet eken ke mme ediomi emi Abasi akanamde ye Abraham ye eke David?
9. Didie ke akamba eñwọñọ emi ekenamde enọ David ekeme ndisu?
10. Tiñ ido David ye ibọrọ emi enye ọkọnọde Abasi ke Abasi ama akanam ofuri uduak Esie ke abaña David ye Israel añwaña.