Lesson 231 - Senior

Memory Verse

"Wawara wọrọ ka ke mme efak, ye ñkpri efak obio, nyuñ da mme ubuene, ye mmọ emi edade unan ye nnan ye mbuñọ. Duk di” (Luke 14:21).

Cross References

I Mephibosheth Mbiet Owo Emi Ọduọde

1. Mephiboshieth, owo ufọk Saul, ekedi se Abasi ekesinde ke ndidi edidem, 2 Samuel 9 :1, 2; 1 Samuel 15 :28 ; 13 :13, 14 ; 2 :30

2. Mephibosheth ekedi owo emi ekebinde esio ekpọñ udeme esie, 2 Samuel 9 :7 ; Genesis 3 :22-24

3. Nte adia-akpa edidem emi ekesinde, Mephibosheth ekedi se ekpekewotde, 2 Samuel 3 :1 ; Isaiah 43 :27 ; Ñwed Mbon Rome 5 :12; 1 Ñwed Corinth 15 :21

4. Mephibosheth akakabade edi mbuñọ oto ke iduọ, 2 Samuel 9 :3; 4 :4 ; Ñwed Mbon Rome 5 :6

II Ediomi David

1. Mephibosheth ama adia ufọn ke ediomi David ye Jonathan, 2 Samuel 9:1; 1 Samuel 20:15, 16; Exodus 2:24; Genesis 26:3

2. David ama oyom nsuhọ owo ufọk Saul man ọfọn ido ye enye, 2 Samuel 9:2-5; Luke 19:10; John 10:10; Ñwed Galatia 4:4, 5

III Efiak Eyak Udeme Enọ

1. Mephibosheth ama owut ata nsuhọridem ke iso David, ukem nte anam idiọk-ñkpọ enyenede ndinam ke iso Abasi, 2 Samuel 9:6; Luke 18:13; James 4:8-10; 1 Peter 5:5

2. Ema ekpọñ udeme Mephibosheth emi ekebọde enọ enye, 2 Samuel 9 :7-9; 1 Peter 1 :3, 4 ; Ñwed Mbon Ephesus 1 :5-7

3. Mephibosheth nditie ke okpokoro edidem edi mbiet anam idiọk-ñkpọ emi efakde, 2 Samuel 9:10; Luke 22:29, 30; Eriyarare 19:9

4. David ama emek mme owo ndinam ñkpọ nnọ Mephibosheth, 2 Samuel 9:9-13.

Notes

SE EKPEPDE EBAÑA

Mbọm Abasi

Mbuk mfọnido ye mbọm emi David ekenyenede ọnọ Mephibosheth, owo ufọk Saul, (Saul emi ekedide ata asua David) edi se iyararede iwut se mfọn Abasi ekemede ndinam ke esit owo.

David ama ọbọ ufen eti-eti ke ntak Edidem Saul; edi ke emi Saul ama akpa, ndien ọkọsuhọ ekpri ibat-ibat owo ndibiọñọ David ke nditie ke ebekpo Israel. Ke ini Saul ama akakpa, mme owo emi ekekerede ete ke inam se ifọnde inọ David ema ewot ndusuk mbio ufọk Saul. Utọ edinam oro akanam Mephibosheth odu ke ndik abaña uwem esie ete, ke ekeme ndiwot imọ ñko. Ke mfọniso Mephibosheth, David ekedi isuñ-utom Abasi, ndien spirit odu uwem Abasi ekedi se idade David usuñ ke uwem esie. Sia David ekenyenede udọñ ndikpono Abasi ke uwem esie, Abasi ama anam enye edi edidem man etim ekara Israel. (Se Ke Psalm 78:70-72.)

Abasi etiñ abaña Idem Esie ete, “ Ikọhọkede iyaresit esie ke nsinsi: koro enye adatde esit ndifọn ido” (Micah 7 :18). Abasi ama okut emi ke David, koro ekedide odudu Abasi ke uwem David akanam enye atua Mephibosheth mbọm. David ama eneñede ọnọ Abasi ubọñ ke editua mbọm nnyuñ nnọ Mephibosheth uñwam, onyuñ eneñede owut oruk ye idaha edu uwem esie. (Se Ke 2 Samuel 4 :10-12.)

Udeme Emi Okosopde

Mephibosheth, owo mbuñọ edi uwut-ñkpọ owo emi ọduọde ye editọñọ ntak nyak udeme nnọ enye oto ke mbọm ye unen owo efen. Jonathan (ete Mephibosheth ) ye David ema enam ediomi ete ke ini David edidide edidem enye okufre ndiwut ufọk Saul mbọm. David ama ọñwọñọ ndinam emi, ama onyuñ onim eñwọñọ esie. (Se Ke 1 Samuel 20:15-17.)

Mephibosheth ikedighe ntak idiọk-ñkpọ Saul edi enye ama ọbọ ufen ke ntak oro. Kpa ntre ñko ke edi ye ubon owo emi mmikedighe ntak idiọk-ñkpọ ete mmọ Adam, edi ebọ ufen ke ntak oro. Ema esibe Mehpibosheth efep ke udeme esie, onyuñ akabade nyoñ, onyuñ odu ke ndik kpukpru ini abaña usiene mme asua Saul, kpukpru emi ekedi koro Saul ọkọsọñde ibuot ye Abasi.

Enyiñ Mephibosheth ọwọrọ “but” ama enyene enyiñ efen ñko emi ekesikotde enye, Merib-baal, emi ọwọrọde ete “nsọñibuot” (1 Chronicles 8:34). Etie nte Mephibosheth ekedi eyen isuñi tutu osim enyiñ esie. Ukem-ukem nte akpa owo Adam!

Adam ama anam idiọk-ñkpọ onyuñ ọduọk udeme esie ndien enye ye kpukpru mbio ufọk esie ema eduọk itie eyen-isọñ mmọ. Idiọk-ñkpọ ama oduk esit owo, ndien ukpọñ owo onyuñ akabade ọbọbọ onyuñ obuñọ oto idiọk-ñkpọ oro. Mme owo edu ke idak ikpe mkpa ke ntak akpa edidue ibet oro, okposuk edi nte mmọ mikenyeneke ebuana ke esit. (Kot 1 Ñwed Corinth 15:21, 22.)

Edinam Emem

Nnyin imọfiọk ite ke edi ewuhọ ye uduak Abasi ete mme anam idiọk-ñkpọ ekabade etie ke emem ye Enye. (Se Ke 2 Corinth 5:20.) Nte David ikpakakamake emi ke ekikere, ọkọrọ ye eñwọñọ esie ye Jonathan, ke ini emi enye owutde Mephibosheth mbọm ke idaha esie nte edidem? Utọ akamba ye eti edinam emi okpoto anie ke mibọhọke Enye emi ọnọde kpukpru nti erinọ ye kpukpru enọ eke ọfọnde ama? Ididuot uruk akwa uduak edinyaña Abasi ekebe oto uwem Jonathan onyuñ otuk esit David emi ekedide ata akpan ufan esie. Kpa ididuot uruk oro ekebe ke kpukpru uwem David, ndien nnyin ikut nte David anyanarade ndida uruk ima oro nduri owo kiet efen.

Edidem okoyom Mephibosheth emi ikpe okobiomde ekenyuñ ebinde esio ke otu, edi, edinam emem. Emi edi ata ukem-ukem ye idiọk owo oro mme isuñ-utom Edidem eyomde enyuñ ekutde emi uduak mmọ edide nditiñ nnọ enye etop inemesit edikabade ntie ke emem. Ke mme ikọ Ñwed Abasi enam emi añwaña: “Ke Christ Abasi ke ananam ererimbot etie ke emem ye Enye, ke mibatke ndudue owo inọ mmọ; okonyuñ emen ikọ erikabare ntie ke emem ye Enye esin nnyin ke ubọk ete ikwọrọ” (2 Ñwed Corinth 5:19). Mi ke ayarade owut utibe ima Abasi ye owo, man okposuk nte mmọ ekesọñde ibuot, ebin mmọ efep enyuñ esio mmọ ke otu, mmọ ekeme ndifiak nditie ke emem ye Ọbọñ ye Edidem mmọ oto ke utibe mfọn Abasi.

Okpokoro Edidem

David ama ọnọ uyo ete ke Mephibosheth enyene nditie ke okpokoro edidem onyuñ adia-udia edidem. Emi ekedi ñkpon-ñkan ke ofuri ukpono emi David ekekemede ndinọ enye, enyuñ etiñ enọ kpukpru owo ete ke Mephibosheth okodu ke idak ukpeme edidem, ndien owo ekededi eke edinamde enye idiọk, owo oro omiom ubọñ edidem ke idem eise.

Ukem ñkpọ emi ọtọñọ ntak owut idem ke uwem mmọ emi ebọde ikọ editie ke emem eto mme isuñ-utom Abasi ndien enyuñ eda mmọ esin ke Obio Ubọñ Abasi. Abasi etiñ asian ete ke nnyin inyene nditie ke okpokoro ye enye inyuñ ibuana ke eduek ubọñ Esie. Jesus ọsọñọ owut akpanikọ emi ke ñke Usọrọ ndọ emi Enye okotopde ye mme itie Ñwed Abasi efen. Jesus ama etiñ ete ke mme ubuene ye mmọ emi edade unan, ye mbuñọ ke ekenọ ikot akwa usọrọ Abasi. Mme nsio-nsio owo emi ekeda enọ mme anam-idiọk emi ekpebọde ikot Eti-mbuk. (Se Ke Luke 14 :16-24). Ukem oro, Jesus ama etiñ ete ke edinam eyedu emi Ọbọñ edinamde ñkpọ ọnọ mme isuñ-utom esie : “ Ọfọfọn ọnọ mme asaña-utom emi ete mmọ edidide okut mmọ etiede ekpeme; ke akpanikọ ke ndọhọ mbufo nte, enye ke idem esie eyefak ọfọñ, anam mmọ etetie ke okpokoro udia, onyuñ ada mbet ọnọ mmọ” (Luke 12 :37).

Nte ekenọde Mephibosheth ikot nditie ke okpokoro edidem, mfọn emi ikotoho ke se enye ekanamde, edi okoto mbọm ye edinen ido owo efen, onyuñ edi ntre ye anam idiọk-ñkpọ. Ñkpọ ndomo kiet iduhe ke idem anam idiọk-ñkpọ emi akpanamde ikot ndibuana ke uwak edidiọñ Abasi ke mfọn osim enye. Oto ke edinen ido owo efen ke Abasi oyom anam idiọk-ñkpọ okut, owo efen oro idighe efen ke ebede Jesus Christ, ikpọñ-ikpọñ Eyen Abasi. Oto ke mbọm Esie akanam Abasi ọnọ akwa ikot esọk mme ubuene ye mme mmọ emi edade unan ye mme mbuñọ ye nnan ete edi man edibuana ke akwa usọrọ Esie.

Efiak Enọ Udeme Esie

David ama afiak ayak kpukpru se ikenyenede Saul ye ufọk esie ọnọ Mephibosheth. Enye ama ọtọñọ ntak ada udeme esie enyene ; enye ama okut mfọn oto edidem ; ndien enye akabade etie nte kiet ke otu nditọ edidem. Edi ntre ye mmọ emi ebọde mfọn Abasi. Efiak eyak kpukpru se ekebọde enọ mmọ ke uyo Edidem. Enọ mmọ mfọn ye mbọm nte ekemde ye unana mmọ, ndien mmọ ekabare etie nte nditọ Edidem.

Ikọ Abasi ọsọñọ emi : “Edi kpukpru owo eke edarade Enye, Enye ọnọ mmọ unen ndikabare ndi nditọ Abasi, kpa mmọ emi ebuọtde idem ke enyiñ Esie” (John 1 :12). Nnyin itọñọ ntak ikot ñko : “Mbufo ekọbọ spirit eke enyenede mmọ emi edade esin ke ubon Abasi, emi anamde nnyin ikot Abasi, ite, Abba, Ete. Spirit ke Idem Esie etiene spirit nnyin edi ntiense ete, nnyin idi nditọ Abasi. Edi edieke nnyin idide nditọ, imonyuñ inyene udeme ke se enimde enọ nditọ ; imenyene udeme ke se Abasi onimde ; imasaña ye Christ inyene udeme” (Ñwed Mbon Rome 8 :14-17).

Ke mme itie ñwed Abasi emi nnyin imokut utibe ima emi Abasi enyenede abaña owo, ekeme ndiñwaña nnyin ñkan se ikonukde David edidem ndiwut mbuñọ, emi akananade uñwam, mfọn esie.

Uwut-Ñkpọ Owo Abasi

Jesus ama ọnọ mbuk mbio emi ekenọde mbon ọbiọñ udia, esine mbon iferi ọfọñ, ekenyuñ enọde mbon ñkpọkọbi uñwam, Enye onyuñ otoro mmọ ke mbọm emi mmọ ekewutde Enye. Ke ini mmọ ekebupde Enye utọ ini emi mmọ ekenyenede oruk ifet oro ndinam ntre ye Enye, Jesus ama ọbọrọ mmọ ete, “Adaña nte mbufo ekenamde ñkpọ emi enọ kiet ke otu nditọ-ete Mi, kpa ata ñkpri emi, mbufo ekenam enọ Mi” (Matthew 25:40). Ibọrọ emi ọdọñọ kpukpru utom emi ata eyen Abasi enyenede ndinam nnọ nditọ-ete ye mme mbọhiduñ esie emi mminyeneke ñkpọ nte enye.

David ama owut idaha eyen-isọñ esie ke Abasi ke enye ndinọ enye emi okokopde biọñ udia, enye ama eti eñwọñọ esie onyuñ anam, enye ama ayak ñkpọ ubiọñ emi okosopde, onyuñ ekpeme owo emi ubọk ememde, edọñ onyuñ ofumde. Edi ntre ye Abasi: Enye ọnọ nnyin udia eke idiade, ọnọ ukpọñ nnyin idaresit, onyuñ ọnọ nnyin nsinsi uwem.

Questions

MME MBUME

1. Nso idi ntak emi Mephibosheth ekenyenede ndifehe edisio usiene mme asua ete esie?
2. Nso idi ntak emi Mephibosheth ọkọduọkde udeme esie?
3. Didie ke Mekpibosheth ebiet owo emi ọduọde?
4. Nso idi ntak emi David ekenyenede ima ọnọ Mephibosheth?
5. Nso idi ntak emi Abasi amade idiọk owo?
6. Anie ke enọ ikot nditie ke okpokoro Edidem?
7. Nte ekeme ndinọ nnyin ikot ndidia udia ke okpokoro Edidem?