Lesson 232 - Senior

Memory Verse

“Edi edieke nnyin isañade ke unwana, kpa nte Enye odude ke unwana, nnyin imoduk nduk ye kiet eken, ndien iyip Jesus Eyen Esie eyet nnyin isana ke kpukpru mme idiọk-ñkpọ’’ (1 John 1 :7).

Cross References

I Akam David Ke Abaña Utebeikpe

1. Enye ama anam ebeñe nte idiọk-owo ke mbuñọ esit oyom mbọm Abasi, Psalm 51:1; Luke 15:11-24; 23:42; Micah 7:18, 19; Isaiah 43:25; 44:22

2. Ediyarare mme idiọk-ñkpọ ye mkpe-ubọk esie man ekwọhọre mmọ esio, ekedi ke ofuri esit ye akpanikọ, Psalm 51:2, 3; 32:5; 1 John 1:9

3. Enye ama ọfiọk udobi idiọk-ñkpọ esie, Psalm 51:3, 4; Ezra 9:5, 6; Ñwed Mbon Rome 7:12, 13, 2 Samuel 12:13

II Akam David Ke Abaña Edinam Asana Ofuri Ofuri

1. Enye ama otim ọfiọk abaña uwem esit idem esie, Psalm 51:5; Genesis 5:3; 6:5; Matthew 15:19; Mark 7:21; Jeremiah 17:9, 10

2. Enye ama ọfiọk ete ke Abasi ama oyom ikọt Esie esana, Psalm 51:6; 24:3, 4; Matthew 5:8, 48; 1 Ñwed Thessalonica 4:3; Mme Hebrew 12:14; 2 Ñwed Corinth 13:11; James 1:4; Ñwed Mbon Galatia 6:15

3. Enye ama ọbọñ akam abaña ediwubere nda mmana idiọk-ñkpọ nsio ye ndinyuñ mbot edisana esit, Psalm 51:7-10; Ñwed Mbon Ephesus 4:17-24; 5:25-27; Ñwed Mbon Colossae 3:10

III Idorenyin David Ke Utom Idara

1. Enye ikoyomke ndidi enye emi etopde eduọk, nte enye ọkọfiọkde ete Saul ekedi ntre, Psalm 51:11; 2 Samuel 8:15; John 15:6; 1 Ñwed Corinth 9:26, 27; Matthew 8:12; 25:30

2. Enye okoyom ndinam ñkpọ nnọ Abasi nyuñ ndi ọkọ ukpọñ, Psalm 51:12, 13; Daniel 12:3

3. Enye ama ọñwọñọ ete ke imọ iyenọ Abasi ekọm ke ini ema ekesio enye efep ke kpukpru mme ukwañ ñkpọ esie, Psalm 51:14, 15; 2 Chronicles 5:11-14

4. Enye ama anam añwaña mme edu uwem se mbuñọ esit akpanikọ akamade, Psalm 51:16, 17; Isaiah 1:2-20; Luke 18:9-14

5. Se ibehede enye ikenyeneke enye ikpọñ, edi okosuk enyenyene mmọ emi ekedude ke idak ukara esie emi ñko ekpekekutde ukut ke ntak idiọk-ñkpọ esie, Psalm 51:18, 19; Ñwed Mbon Galatia 5:9.

Notes

SE EKPEPDE EBAÑA

Nte nnyin ikpepde ñkpọ ibaña uwem David, nnyin imosio ediwak nti ukpep-ñkpọ ke esit. Kiet ke otu emi ọwọrọ oto nte nnyin isuk ikpepde Psalm emi ye mme idaha emi eyiride ke enye.

David ama ọfiọk mbọm Abasi, ñko enye okonyuñ edi asaña utom Abasi ke mbuọtidem ke ediwak isua, edi ke ndiọkiso enye ama ọduọ onyuñ ebe oduk ke idiọk-ñkpọ emi ọdiọkde akan. Edieke enye mikpedighe oruk owo emi enye ekedide, enye ekpenyene ndidu ke itie iduọ esie, ndien enye ikpanamke ñkpọ ekededi ndiwọrọ ke esit. Nnyin ikpenyene didie esit ekọm koro Abasi nnyin ama ọnọ nnyin ukpep-ñkpọ ke abaña edikabare esit David ọkọrọ ye idiọk-ñkpọ esie ye nte etiñde nte ekefende ke idiọk-ñkpọ David!

Ke ini owo kiet ekedide otude utọñ ye Abasi ndien ọduọ ọkpọñ mbọm Esie, enye oduk ke ata idiọk itie emi ọduọkde kpukpru mfọn akan idaha itie emi enye akamanade, koro ke ini edidehe spirit ọnyọñde aka ufọk emi ema ekekpọri enyuñ ebana enye, “enye aka akada spirit itiaba efen eke ediọkde ekan idem esie, ... ndien ukperedem itie owo oro akabare ọdiọk akan mbemiso” (Matthew 12:45). Ke akpa ifet, David ama ọfiọk abaña mbọm Abasi. Enye ama ebem iso enyene ebuana ye Abasi, emi, ke idaha udomo, ekedi ebuana emi ọkọfọnde onyuñ ọyọhọde nte kiet ke otu mme ikpọ owo eken ke Akani Ediomi. Edi se ikemede ndiwaña owo nte akam emi enye ọkọbọñde ndifiak nnyene mme mfọn esie, ekenyene ndidi enye emi emenerede enye okoñ idaha okosim eti ido ye edisana uwem emi enye ekenyenede ke mbemiso. Koro enye akanamde emi, oro ikowutke ite ke mme utibe enọ mfọn iba emi, utebe-ikpe ye edinam asana ofuri ofuri ekedi enọ mfọn kiet . Ke Psalm emi, nnyin imenyene ata nwọrọnda edu uwem emi owo ekemede ndida mbọ mme enọ mfọn iba emi, nte esit etiede mbemiso ebọ mme enọ emi, ye mfri emi ediwọrọde owut idem ke ini ebọde mmọ.

Utebe-Ikpe Ke Mbuọtidem

Nnyin imọfiọk ite ke David ini kiet ko ama enyene ifiọk utebe-ikpe koro enye ama oyom ndifiak nyene enye. Nnyin imọfiọk ñko ite ke enye ama ọbọ enye, koro Nathan ọkọdọhọde ete “Jehovah ọmọnyuñ adahado ke idiọk ido oro ọnọ fi” (2 Samuel 12:13). David ekedi ye ọyọhọ ñkabare esit, ikonyuñ inamke ñkpọ ndisuhọre idaha idiọk-ñkpọ esie ke enyin Abasi mme ke enyin mme owo. Enye ekekpe ubọk ikpọñ oyom mbọm Abasi, adaña nte enye mikenyeneke ñkpọ eke ọfọnde ndimenere enye nim ke iso Abasi onyuñ okutde ete ke imọ ikedi ọbọñ ke otu mme idiọk owo.

David ama edue ke otu mme idiọk-ñkpọ iba emi mme owo ebatde ete ke mmọ ediọk ekan, edi kpa ye oro, idiọk-ñkpọ emi ekpekotde ekpri idiọk-ñkpọ edi se idiọkde ke enyin Abasi, onyuñ ekem nte akpadade edidianare mkpọñ Abasi edi, ye ọyọhọ-ọyọhọ editre ndibọ mfọn Esie. David ama edue mbọhọiduñ esie ke ata enyene ndik usuñ; edi ekedi mbet Abasi ke enye ekedue ñko, enye ekenyene nditiñ ikọ nnọ Abasi . Enyene ndik ye ibak ibak idiọk-ñkpọ esie emi enye ekeduede edisana ibet Abasi akpanikọ emi enende, ọyọhọde ye mbọm, ye ima ama ọdiọk, okpon ke iso esie onyuñ akabare ofuk edi ikabiatke ndudue emi enye ekeduede mbọhọiduñ esie. Enye ekenyene ndinam nsana-nyak ke kpukpru usuñ nte enye ekekeme, edieke anade nte mfọn Abasi ọsuhọ ye enye. Ke mfina esie, ekpri ñkpọ akana ọnọ enye ndinam, nte enye mikekemeke ndifiak nnọ ebe ñwan emi enye okowotde uwem nyuñ ntọñọ ntak mbok ufọk emi enye akanamde asuana.

Edieke owo otukde owo efen, enye anam owo oro ibak. Ñko enye ọtọñọ ntak abiat mbet obio, ndien enyene ndimum enye ete ekpe utip mbet oro. Edieke mmọ emi etuahade eyomde ete ekpe isop enọ mmimọ ana nte enye okot ikpe. Emi emenere owut ke idaha utom emi nnyin inyenede inọ owo efen ye mkpon ñkan utom emi nnyin inyenede inọ Abasi ke Heaven.

Ifiọk utebe-ikpe, mme edifen ke mme idiọk-ñkpọ owo ekededi, enọ eto ibọrọ edikabare esit akpanikọ, oruk emi nnyin ikutde nte ọkọwọrọde owut idem ke uwem David. Ediọñọ ifiọk emi etiene mme nsio nsio enyiñ, enyiñ kiet kiet onyuñ etiñ ñkpọ abaña idaha utom emi enye enyenede ndinam ke esit nnọ anditua ñkpọfiọk.

Akamba ifiọk ukpe-emem emi ke esikot kpukpru ini edifen (Isaiah 55:7). Ada ukara edi enye emi esifende, edi ke idaha enye emi, edi Abasi ke idem Esie edi andifen nnọ anam idiọk emi akabarede esit. Anam idiọk emi efende enọ inyeneke aba ndibọ ubierikpe ke mme idiọk-ñkpọ esie emi ekebede. Christ ama akabare ọbọ ufen ke ntak esie.

Utebe-ikpe edi enyiñ efen emi ekotde enọ mfọn emi (Ñwed Mbon Rome 5:1). Ebierikpe anam ikpe etebe owo. Ndinam ikpe etebe owo edi ndibat owo ke edinen mme ndida owo oro nte akananam enye inamke idiọk-ñkpọ. Ekeme ndifen nnọ owo kiet ekededi edi owo idinimke enye aba ke akpanikọ. Edi edieke owo kiet ekededi enyenede utebe-ikpe, ndudue emi enye akanamde idinyeneke aba ndibiat idaha esie ke ini iso. Kpa ñtre ñko ke enam enọ idiọk owo.

Nnyin ke ediwak idaha isitiñ ibaña ifiọk emi nte edikabare esit mme edimana obufa (Utom Apostle 3:19). Ndikabare esit edi nditọñọ ntak mmana nto Abasi. Emi ọwọrọ ete ke enam andikabare esit etiene abuana ke edisana idaha, oduk ke obufa uwem, ndien ema enam enye akabare edi obufa. Enam utom emi ke idem idiọk-owo emi akabarede esit.

Idaha efen ke obufa ebuana emi edi se ewetde ke ikọ emi edide edikabare ndi eyen (Ñwed Mbon Galatia 4:4, 5). Ntem ke eda owo emi amanade obufa mi esin ke ubon Abasi. Mbem iso enye ekedi eyen –hell ye eyen satan, edi idaha emi enọ enye obufa Ete emi edide Abasi, ñko enye akabare edi adia akpa Heaven ye eke udeme inyene eke ndisana ikọt Abasi.

Idaha Idiọk-ñkpọ Iba Ye Nte Ekọkde

Edi akam emi David ọkọbọñde ọnọ Abasi owut ete ke enye ama ọfiọk ete ke ntọtuñọ utom mfọn efen ekenyene ndida itie akan nte ekpefukde mme idiọk-ñkpọ ke edifen. Enye okut idem esie ini kiet efen ke itie idiọk-ñkpọ ke esit idem, emi ebietde eke owo emi akananam mikeyetke enye asana oto ke iyip. Kpukpru owo, ibọhọke Christ, emana ye uduot idiọk-ñkpọ, ke esiode Christ efep, kpukpru owo emana ke uduot ete mmọ. Adam. Christ ama enyene uduot edisana uwem koro Enye ekedide Eyen Abasi. Christ akamana oto Mary nte “Edisana” ndien ema ewet ñko ete ke Enye ekedi “Edisana Owo Fo Jesus,” emi edide “Edisana Eyen Abasi” emi minyeneke idiọk-ñkpọ.” Enyuñ ewet ñko ete Enye “ikọfiọkke idiọk-ñkpọ,” ndien ñko Enye “ikanamke idiọk-ñkpọ.” Ke utọ usuñ emi Enye ama ọkpuhọre ye kpukpru mbio efen emi emanade eduk ke ererimbot emi. Kpukpru mbio eken ekemana eduk ke idiọk-ñkpọ, ye idiọk-ñkpọ ke uduot mmọ; ndien ana nte eyom Iyip ufak ndida nyet.

Ke usem Hebrew mme ikọ iba edu etim enamde nsio nsio ediyet otim añwaña, ndien ekesida mmọ ye ñtin-enyin enam ñkpọ. Kiet emenere owut oruk ediyet emi nte abiatde ñkpọ emi ekeyetde enyuñ enamde asaña ediye ediye. Enye eken emenere owut oruk ediyet emi eyetde enyọñ enyọñ ikpọñ. Nte edade edomo ke ediye ye ọkpọsọñ usuñ, David ama ada akpa usuñ ke Ñwed Psalm emi anam ñkpọ emen owut nte ke usuñ ama odu ke ndinyene nnenen ediyet ke enyọñ ye ke esit idem emi ebede oto ke Iyip Ufak. Jeremiah ada ukem ikọ emi anam ñkpọ ke ini enye ọdọhọre ete “Yet esit fo idiọk-ñkpọ fep, man enyaña fi” (Jeremiah 4:14).

Kpukpru ñkpọ ke Ataya, ñko ye kpukpru esop Israel ekedi se enamde esana ke ini oku emi odude ke utom ekesimede iyip uwa, ke utọ usuñ emi, enye akada hyssop anam. Eyet David ke esit ekedi “Afo eyeda hyssop osio idiọk ido mi efep,” emi anyan ubọk saña saña owut ediyet emi enamde eto Iyip Ufak. Enye okoyom ata eti utom, utom emi enamde okure, ndien enye ama enyene udọñ ndinam ñkpọ kiet ekededi emi odotde nte enam man otodo enam emi ke uwem esie.

Ndiwut nte ke David ama aka anyan osim erinyaña idighe edifen ke mme idiọk-ñkpọ oro enye akanamde ikpọñ, nnyin imokop eyet esie, “Bot edisana esit nọ mi”. Ikọ emi enye eketiñde mi ekedi ukem ikọ emi eketiñde ke ini emi ekebotde ofuri ererimbot, emi okowutde ndinam ñkpọ ọwọrọ oto ke ñkpọ emi mikoduhe. David ikọbọñke akam emi iyom Abasi ọsọñọ odudu eke esie, mme ndiwana ndinwam mmemidem esie, ke ndineñere mme ndinam ido uwem esie otim ọfọn ke ukeme ye odudu Abasi. Enye ekebeñe obufa obot.

Nte edide nnyin kpukpru iyọhọ ye idiọk inyuñ ibiara, ima ikakpaña ke mme ndudue ye mme idiọk-ñkpọ. Ñkpọ emi ama akakpa ikemeke ndifiak ndu uwem, ibọhọke etọñọ ntak esine enye uwem oto ke odudu efen emi mitoho enye. Ñkpọ emi ama okokut mbiara ikemeke ndifiak mfọn ibọhọke efiak esin enye obufa uduot efen. Akani owo ikemeke ndikpuhọre nkabare ndi obufa owo. Enyene “ndisio” akani owo. Owo ikemeke ndida akani owo ntọñọ obufa uwem. Emi ke nditim ntiñ edi ubiọñọ ọnọ obufa uwem. Utu ke oro, nnyin inyene ndisine obufa owo, emi ebotde “mbiet Christ Jesus,” edieke nnyin iyomde nditie nte Jesus.

Ñwed Abasi, ke mme ufañ ikọ efen, ayarare oruk idiọk-ñkpọ iba ke nnyin, ye ufak iba emi enimde ke abaña mmọ mbiba. Mme edinam emi ediọkde mme nnam ndue nnyin-ema efen; edi akpan uduot unana edisana uwem emi edide obukidem, nda mmana uduot-edi se eyetde. Idiọk-ñkpọ emi owo anamdenam ediwak ini, etiñ ebaña nte ediwak, edi idiọk-ñkpọ emi edade emana etiñ ebaña nte kiet. “Edieke nnyin iyararede mme idiọk-ñkpọ nnyin, Enye edi anam akpanikọ onyñ enen, ete ifen mme idiọk-ñkpọ nnyin (akpa edifak), inyuñ iyet nnyin isana ke kpukpru mme ukwañ-ñkpọ (udiana edifak)” ( 1 John 1:9). “Edieke nnyin idọhọde ite akanam nnyin inamke idiọk-ñkpọ,” ke nnyin miyomke akpa edifak, nnyin inamke Abasi edi osu nsu ikpọñ edi imanam idem nnyin akabare edi mme ntiense nsu, koro ndammana idiọk-ñkpọ adada ndiwut idem (1 John 1:10; Ñwed Mbon Galatia 3:22).

Ndibiat oruk idiọk-ñkpọ mbiba emi edi se ekutde ke mme itie ñwed efen. Kpukpru mme edu idiọk-ñkpọ emi ewutde idem anwa anwa, enyene ndifen (Isaiah 55:7), ndifen (Mark 11:25; Ñwed Mbon Ephesus 4:32), esio efep (Psalm 103:12), ekwọhọre esio (Isaiah 44:22), etop eduọk ke edem (Isaiah 38:17), owo inyuñ itighi mmọ aba (Mme Hebrew 8:12). Edi ọyọhọ utom mfọn iba ada akamba ukpuhọre efen edi, oto ke enye ema ebiat uduot esit idem (Ñwed Mbon Rome 6:6), ema ewot (Ñwed Mbon Rome 6:11), enam asana (Ezekiel 37:23; Ñwed Mbon Ephesus 5:26, 27), enam asana (Utom Mme Apostle 15:9); ndien mme mmọemi enamde ñkpọ emi enọ edu ke esit kiet (John 17:17, 21, 23; Mme Hebrew 2:11; Utom Mme Apostle 2:1) enyuñ enyene edisana esit (Psalm 24:4; Matthew 5:8).

Mfọnmma Ye Ñkọri Ke Uwem Owo Abasi

Edinen ido edi edikabare ntiene Christ emi edide ndibiet Christ. Ke ini nnyin ikọride ke mfọn ye ke ifiọk Ọbọñ Jesus Christ, ke ndisaña ke uñwana nte eyararede enọ nnyin, nnyin ikọri ke edisana ido. Ñkọri emi ọtọñọ ye nnyin ke ini edade nnyin esin ke ubon Abasi, edi emi itrede ye edinam asana, koro nnyin isuk ikaka iso ndinyene uñwana, kpukpru emi eto enọ mfọn Abasi nnyin. Edi ñkọri emi idighe edinam asana koro ebọde enọ emi ke idaha kiet. Edinam asana oro edi se inamde utom ọyọhọ, koro ke ini ema ekenam ñkpọ asana, ñkpọ oro asana. Ke usuñ efen, ekere ete ke nnyin imọfọn ima edieke nnyin isañade man ekekem nte eyomde eto nnyin. Eyenọwọñ emi odude ke akpa ikpehe ufọk ñwed ọfọn ama edieke enye anamde ñkpọ emi ekeyomde eto mmọ emi odude ke otu akpa ikpehe, okposuk enye mifọnke ima nte enye emi odude ke ọyọhọ ikpehe itiaita ekpedide. Enọ edinam asana ofuri ofuri, emi edide ediyet nda mmana idiọk-ñkpọ, edi saña saña ye utom mfọn emi enamde ke idaha kiet Edi utom mfọn-mma osuk akaka iso.

Utom edinam asana emi enamde ke idaha kiet edi se emende ewut oto mme ikọ emi edade etiñ ñkpọ ebaña enye ke Ñwed Abasi. Eda enye nte edina mbobi ke spirit (Deuteronomy 30:6; Ñwed Mbon Colossae 2:11). Edi utom ediyet, nte Abasi okonimde man abiat uduot obukidem osio ke owo (Psalm 51:7; John 15:2). Edi edu ediyet, emi Abasi edikpọride se idehede osio ke uwem (Psalm 51:7; Ezekiet 36:26; 1 John 1:9). Emenere emi ewut nte utom obot, emi odukde edu uwem nte obufa ñkpọ (Psalm 51:10; Ñwed Mbon Ephesus 4:24; Psalm 33:9). Ndien ekot enye edibiat (Ñwed Mbon Rome 1:6).

Mme usem emi ekedade ewet Ñwed Abasi ke akpa eyarade ewut emi. Ñwọrọ nda ewet usem Greek ke Obufa Ediomi ewet ete; “Ke ini nnyin ikade iso ndiduñọre utom edinam asana ke uwem owo emi onimde ke akpanikọ ... emi mmọ ke edimana obufa ye edinam asana ofuri ofuri, nnyin ikut ite ikọ emi “aorist” (edi ikọ emi enyenede mbon Greek emi minyuñ iduhe ke ikọ mbakara) eda emi enam ñkpọ ukem ukem. Usem emi, nte nta mme andisem usem ke Obufa Ediomi etiñde iwutke edinam nsit-nsit ñka iso, mme nte esinamde ofuri ini, mme ndinam mfiak nam, edi enye emi enamde ke idaha kiet enam ema.” Dictionary kiet ekededi eyetiñ ete ke ikọ oro aorist ada ọnọ usem Greek emi owutde ete edinam oro akada itie ini emi ekebede emi owo mikemeke nditim mfiọk, onyuñ etre ndika iso ntibe. Ke otu itie nduñọre 88 emi etiñde ñkpọ ebaña utom edinam asana ke Obufa Ediomi, emi mme ikọ emi “nam asana,” “edinam asana,” ye “ediyet,” itie 44 edi se edade ikọ aorist ewet emi nte nnyin ikutde, edi ñkpọ emi akadade itie ke ini emi ekebede ke idaha kiet. Mme itie ñwed eken edi ke usem emi ediwutde edinam idaha kiet mme nka iso edinam, iduhe ufañ ñwed emi owutde ñka iso edinam ikpọñ.

Iduhe ini ndomo kiet emi ewetde ke Ikọ Abasi emi enyenede ndibe ke ini edikabaresit ama akada itie mbem iso ukpọñ ekeme ndinyene edinam asana ofuri ofuri. Ñkukure ñkpọ emi anamde owo odot ke ndiyom edisana uwem edi utebe-ikpe mme edimana obufa. Kpa nte “ñkpri nditọ ke Christ” emi enọde item ete “isin idem ibine ifiọk eke ọfọnde ama;” ñko kpukpru mme andinim ke akpanikọ enyene ebuana ke ewuhọ emi, “Mbufo edisana koro Ami ndide edisana.” Ndinam ikọ emi añwaña, “Koro emi edi uduak Abasi ete mbufo ekpekabare esana,” emi enyene owo kiet ekededi emi onimde ke akpanikọ, sia ke akpa ifet ekewetde emi enọ mmọ emi ema ekekebare esit emi ekedide nsek nditọ ke Christ. Edi utom ye ifet kpukpru mme andinim ke akpanikọ ndinyene mme esit emi ema ekeyet esioño ndammana idiọk-ñkpọ enyuñ eyọhọ ye ima ke ndo ndo oro mmọ ema ekebọ utebe ikpe.

Mme Mfri Edinen Ido

Edimana obufa ọyọhọ ke ini ema ekefen ke mme idiọk-ñkpọ, ndien owo mbuñesit enyene emem ye Abasi. Kpukpru mmọ emi Abasi obonde enyene odudu ndidu uwem emi okoñde akan idiọk-ñkpọ, esaña ke uñwana Abasi, ekan kpukpru mme idomo emi etode ererimbot, obukidem, ye satan, ndien enyuñ odu suñ-suñ edisana uwem.

Edinam asana ofuri ofuri edi ima eke ọfọnde ama emi ọwọrọde oto esit. Enye eyet esit osioño nda mmana idiọk ñkpọ, ndien anam esit ọyọhọ ye edisana uwem emi otode Abasi. Etọñọ ntak esine mbiet Abasi emi okosopde. Enam enye enyene mfọn Abasi emi idaha kiet, oto ke mbuọtidem, se ibemde emi iso edi ediyak idem nnọ ofuri-ofuri, uduot emi eyen Abasi ikpọñ ekemede ndinyene. Enye ada idaha ediyak idem ofuri nnọ Abasi edi onyuñ ọbọ ndutime esit obukidem “emi añwanade ye Spirit Abasi” efep. Ekikere obukidem emi “misukke ibuot inọ ibet Abasi minyuñ ikemeke ndisuk ibuot.” Edinam asana ofuri ofuri anam ofuri esit adiana kiet ye Abasi ye uduak Esie.

Questions

MME MBUME

1. Nso idi ntak emi David okokutde ete ke imọ ima inam idiọk-ñkpọ idue Abasi ikpọñ?
2. Nso edu uwem ke David okowut ke ini ekewutde enye idiọk-ñkpọ esie?
3. Nte ema efen enọ David enyuñ etọñọ ntak esine enye mfọn Abasi ke idem?
4. Siak mme nsio nsio enyiñ emi enọde akpa mfọn Abasi nte ewetde ke Ñwed Abasi.
5. Nso idi ñkpọ emi enamde ke esit owo ke ini enamde enye asana?
6. Tiñ wut mme nsio nsio usuñ emi Ọbọñ esinamde utom ye nnyin, ke ndinam nnyin ifọn ima nyuñ nam nnyin idu ke mbeñe idem ndisobo ye Enye.
7. Nso idi mfọn mma owo Abasi?
8. Nso ñkpọ ke nnyin inyene emi ekemede ndida ñwut nnyin ete ke edinam asana edi mfọn emi ebọde idaha kiet?
9. Kpep nyuñ tiñ ndusuk ñwọrọ-nda mme itie ke Psalm emi.
10. Nso ikedi akpatre edu uwem David nte ewutde ke akpatre mme itie Psalm emi?