Lesson 233 - Senior
Memory Verse
“Ọfọfọn ọnọ mmọ eke esit mmọ asanade: koro mmọ eyekut Abasi” (Matthew 5:8).Cross References
I Oruk Mme Anam-Idiọk Ita Ke Ererimbot
1. Mme idiọk owo esio Abasi efep ke uwem ye uduak mmọ, Psalm 1:1; Ñwed Mbon Epesus 2:12
2. Mme anam idiọk ebiat ibet Abasi añwa-añwa, Psalm 1:1; Genesis 13:13
3. Mbon nsahi esin edinen ido ke ndek, Psalm 1:1; Mme Ñke 22:10
II Owo Emi Enyenede Inemesit
1. Enye asasua usuñ mme anam idiọk, Psalm 1:1
2. Mbet Jehovah adat enye esit, Psalm 1:2; Ñwed Mbon Philippi 4;8
3. Edikan esie ibietke nsobo idiọk owo, Psalm 1:3-6; James 1:25; Matthew 3:12
III Owo Emi Akanamde Heaven Ebiet-iduñ Esie
1. Enye asaña ke item Jehovah, Psalm 15:1, 2; 1 John 5;3
2. Enye ama mbọhọiduñ esie onyuñ okpono mmọ eke ebakde Jehovah, Psalm 15: 3, 4; 1 Peter 4:8
3. Eyet esit esie esio kpukpru isin-enyin efep, Psalm 15:5; Luke 12:15
4. Ubọk esie edi edisana ñko esit esie inyuñ ideheke, Psalm 24:1-10.
Notes
SE EKPEPDE EBAÑAEdiyom Inemesit
Ikọ emi “ọfọfọn” nte ewetde ke Psalm emi ọwọrọ “inemesit”. Ntre, imokut ke mme ufañ ñwed emi item ọnọde owo ata inemesit. Ediyom inemesit ada owo asaña ebe ufiop utatan Sahara ye akwa obot Alaska emi snow ofukde. Ndusuk owo eyom inemesit ke otu owo emi esañade ntre-ntre ke mme ikpọ obio, ndusuk eyom ke saña-saña ebiet ukpep Ikọ Abasi. Ukpep-ifiọk ye ebiọ eto udọñ emi odude owo ke esit, kpa ediyom inemesit. Edi inemesit itoho ke inyene mme ubuene, inyuñ itoho ke ndidu ke otu mbon ifiọk mme ndisime. Akpa ntọñọ ndinyene inemesit edi ndisin item mme idiọk owo, ñwọñọre ñkpọñ usuñ mme anam-idiọk nnyuñ ntọñọ ndiyom Abasi.
Nte Idiọk-Ñkpọ Adade Owo Ọsuhọre
Akpa ufañ Psalm emi asiak oruk owo ita, mme idiọk owo, mme anam-idiọk ye mbon nsahi. Esiak idaha ita emi ekemde ye oruk owo ita emi, oro edi edisaña, edituak nda ye editetie. Se etiñde mi ayarade owut ndise owo emi asañade ke usuñ emi adade enye Ọsuhọre. Ke akpa, enye asaña ye mme idiọk owo, otu owo emi mineñekere iduọ iduk ke ndinam ñwọrọ-nda idiọk-ñkpọ, edi esaña ntre, inyeneke Abasi. Mmọ ekeme ndidi mme owo emi enye osobode ke itie utom emi ekotde enye ete edi ika ukọ-iyak ke Sunday ke ini enye okpodude ke ufọk Abasi. Udiana, nnyin ikut enye nte adade ke usuñ mme anam-idiọk. Mi owo emi etre ndisasaña, atuak ada ke otu mmọ oro enamde mme ñwọrọ-nda idiọk-ñkpọ. Oro ifinake enye, tutu enye okut idem esie nte asañade ke usuñ mmọ, tutu enye etie ke itie mbon nsahi, asak añwa-añwa kpukpru se idide edisana ye edinen, asua kpukpru ukpep-ñkpọ emi edude ke Ñwed Abasi. “Idiọk nsaña ababiat eti ido” (1 Ñwed Corinth 15:33).
Se Idade Inemesit Idi
Owo inemesit edi owo emi esinde kpukpru ñkpọ emi enyenede mbiet idiọk-ñkpọ onyuñ adiañarede idem esie ọkpọñ item mme idiọk owo “Kuduk ke usuñ oburobut owo, kunyuñ usaña ke usuñ mme anam idiọk; kpọñ enye, kusaña ke esit ube, wọñọre kpọñ enye, ndien be nyọñ” (Mme Ñke 4:14, 15). Edi inemesit okpon akan ndidomo nditre ndisaña ke usuñ mme anam-idiọk. Eti ñkpọ ndise odu mi. “Edi mbet Jehovah adat enye esit; enye onyuñ osuk ekere mbet esie ke uwemeyo ye ke okoneyo.” Edieke Mbet Jehovah adatde owo esit, oro owut ete ke enye eyesuk ibuot ọnọ Mbet oro. Edieke enye osuk ekerede Mbet oro ke uwemeyo ye okoneyo, Mbet oro eyekabare edi mbak idem esie. Edikere mbaña Mbet Abasi idighe erinyaña ukpọñ; edikpep Mbet Abasi ayarade Christ ye se eyomde eto owo ye edidiọñ emi odude ke akwa uduak erinyaña ukpọñ. Edinyime nte ke imedue, ye edikabare esit ofuri-ofuri ñkpọñ idiọk-ñkpọ eyeda owo okosim akwa uduak erinyaña ukpọñ emi edide se idade inemesit idi ke uwem owo.
Se utọ ukpuhọre emi odude ke otu mmọ oro enamde emem ye Abasi ye mme idiọk owo emi ke usuñ mmọ eyomde inemesit ke ererimbot. Edinen owo etie nte “eto eke etọde ke mben akpa mmọñ, eke osioñode mfri esie ke ekem ini,” edi mme idiọk owo “ebiet mbio eke ofum asuande.” Me idiọk owo eyeyom ndisọñọ itie mmọ ke ererimbot emi, mmọ eyeda akamba okuk eda uwem mmọ ekesin ke mme ikpọ usiak ifia mbak usen ñkpọ-ntibe, edi ke ini ofum ofumede emen mmọ efep nte mbio. Edinen owo ekeme ndinyene esisit ebuana ke ererimbot, edi oruñ mmọ ọsọñọ omum nsinsi ini akama. Eyekpuhọre mmọ ke ediyip enyin kiet, ndien mmọ eyeyama nte ntantafiọñ ke nsinsi-nsinsi.
“Enyene usuñ eke enende ke iso owo: ndien utit esie edi usuñ mkpa.” (Mme Ñke 14:12). Owo kiet-kiet esinyene uduak eke enye anamde ke abaña ini uwem esie, oro edi ndimek se enye edinamde ke ofuri uwem esie, edi osio Abasi efep; edi nsinsi ini eyeyarare ebiọ emi odude ke usuñ esie. “Koro Jehovah ọfiọkde usuñ nti owo edi usuñ mme idiọk owo eyebiara.”
Ubọk Emi Asanade Ye Esit Emi Minyuñ Ideheke
“Anie edidọk obot Jehovah? Anie edinyuñ ada ke edisana ebiet esie?” (Psalm 24:3). Mbume emi ọwọrọ “Anie edida Heaven nte ebiet iduñ esie?” Ebọrọ ete, “Enye emi ubọk asanade, esit minyuñ ideheke ...” Ke ini owo amanade obufa, Spirit etie ntiense ete ke owo oro akabare edi eyen Abasi; mfaña ndomokiet inyuñ iduhe ke abaña emi. Uwem esie inyeneke se etiñde ebiat, enye enyene ubọk eke asanade. Efen ke mme idiọk-ñkpọ esie, enam enye ọbọhọ, edi uduot idiọk-ñkpọ emi enye akadade amana osuk ododu ke esit esie. Ekenyene uduot emi oto ke iduọ Adam. Ndusuk ini ekot enye uduot Adam. Ke ini owo amanade obufa, esuhọde uduot oro enim oto ke odudu Abasi emi ebede oduk owo esit, edi uduot Adam oro osuk ọsọsuhọ ke esit, okposuk owowut idem ke mikpedighe emi odudu obufa emana efikde enye onim. Ke ini ebọde edinam asana, Iyip Jesus owubede uduot oro osio ofuri-ofuri ke esit, onyuñ abiat enye. Edisobo idiọk-ñkpọ emi nsio ofuri-ofuri ke esit anam owo enen onyuñ asana. Edi ke utọ ini emi ke nduọk-odudu emi mme andibọ ikpọñ-ikpọñ efiọkde ekeme ndiduk owo ke esit.
Edikañ Idem
Okposuk edi ema ekenam owo asana ọbọhọ idiọk-ñkpọ, ana nte owo osuk añwana ekọñ ye edu uwem emi ama ekemehe owo. Paul Apostle ọkọdọhọ ete “mkpa kpukpru usen.” Ekedi uduak idem esie ke ekewot. Ndusuk ini utu ke ndikpa kpukpru usen ñkpọñ akani uwem nnyin ye kpukpru ñkpọ emi añwanade ye uduak Abasi, edide ekpri mme akamba, eyeto ke ntak ufik, ndusuk owo ebin Ikọ Abasi eduọk ke esit mmọ. Ke utọ ini mfiak-edem emi, akani uduot oro eyetọñọ ntak owut idem. Enọ nnyin item ete yak nnyin iduñọre idem nnyin ise mme nnyin idu ke mbuọtidem. Psalm efut edi eti nda usuñ ke ediduñọre idem.
Ediduñọre Idem
Owo eke ... ọdọhọde akpanikọ ke esit esie.” Odu ediwak owo emi ọkpọ iso mmọ ayararede owut ete ke mmọ inyeneke akpanikọ ke esit. Ọwọrọ akamba ñkpọ owo ndidọhọ akpanikọ ke esit, idighe ndinyurọde, ndikanare mme ndikpuhọre, mme ndidomo ndidiañare idem ñkpọñ akpanikọ kiet mme eken, edi onyime ndinam akpanikọ ke ofuri esit ke idaha ekededi. Owo eke ọdọhọde akpanikọ ke esit esie enyene iñwan-iñwañ ye ifure-ifure uwem, enye ibeñeke idem ndifuk baba ñkpọ kiet.
“Owo eke midọkke edidọk ke edeme esie, ...” Editiñ ikọ edem mme idiọk ikọ iduhe, editiñ mbiat se ekenamde, mme nsuk uyo, mme ndiyom ndudue iduhe ke esit owo emi ediduñde ke ufọk Jehovah mme Edisana Obot Esie. Ọfọn nnyin nditim ñkere mbaña akpanikọ oro mfin, akan nditaba Ntañ-Ndọk Ufọk Abasi. Ndusuk owo edomo ndisuhọre owo kiet nnim emenere owo efen ke ekikere mmọ. Inaha nte ekut utọ oro ke esit ata eyen Abasi. Odu ñkpọ ke esit esie emi añwanade ye enye. Enye ekeme ndikut nnyuñ mfiọk nte ke enam ndudue, edi imenke itiñ- isaña. Edieke enye mikemeke ndikure utọk ke ufọt eyen ete ye enye, enye eyebine ibuot ufọk Abasi, emi edide nnen-nnen itie ndiyọ utọ mfina oro. Ikureke ke owo Abasi nditre nditñ mbọhiduñ esie nsaña, inaha nte enye akpañ utọñ ọnọ mmọ eke enamde ntre. Inaha nte enye anam mbọhiduñ esie ñkpọ but. Nsio-nsio owo eyak akpanikọ ọwọrọ ke esit mmọ oto ke ndikpañ utọñ nnọ edeme eke etiñde ikọ edem abaña owo.
“Enye ọñwọñọ se itukde idem esie ndien ikpuhọkere.” Ana nte ini odu ke uwem owo Abasi kiet kiet emi enye ediñwọñọde se itukde enye idem ndien ikpuhọkede. Emi ọwọrọ ete ke enye idiyakke idaha esie ke iso Abasi iduọk man oto do enye ọbọhọ ufen emi enye ọkpọbọde. Nte uwut-ñkpọ, ekeme ndidi enye anam ofuri ukeme esie, ekeme ndidi enye asaña nte ọfọnde onyuñ anam se inende, edi ukọbọ osim enye. Enye ekeme nditie ñkere nte: “Ndusuk mmanam ñkpọ emi esisit mbe adaña,” ke utọ ntak oro asana idaha esie ayak. Ke ukem idaha oro enye “ọñwọñọde se itukde idem esie” iyomke ndikpọnọre ndudue ndori owo eñwen mme ndimen owo eñwen nsin ke mfina. Okposuk edi nte enye mikemeke ndifiọk, enye eyenyime ndibọ ufen akan ndinam owo efen ọbọ.
“Enye ibuọtke inyene esie idia udori ikaha, inyuñ ibọhọ enọ ituk owo eke miduehe isop.” Esit eke asanade edi udoribuot emi ememde akan emi owo ekemede ndidori ibuot esie. Owo eke anamde edinen ido ikemeke ndinam ukwañ ñkpọ kpa ke ini oro. Abasi okop eseme mmọ emi efikde onyuñ anam ubiere-ikpe osim mmọ emi efikde ubuene sia mmọ minyeneke ukeme. “Usuñ mme idiọk owo eyebiara.” Okuk emi ebọde nte ubọk edem mme edidia udori ñkaha eyedi se esọpde ekpa ekpọñ, ndien idiọk owo eyetak ke nsinsi.
Se utọ ukpuhọre eke odude ke abaña edinen owo! “Owo eke anamde ñkpọ emi idisehekede ke nsinsi.” Enye ọsọñ ada ke uwem esie, ọñwọñọ se itukde idem esie ndien ikpuhọkere, enye eyeduñ ke Edisana Obot ke nsinsi, kpa ebiet emi Abasi otimde ebeñe “ọnọ mmọ emi emade Enye.”
Questions
MME MBUME- Ubọk eke asanade ọwọrọ didie?
- Edisana esit ọwọrọ didie? Nso enọ mfọn ke owo ọbọ man enyene edisana esit?
- Eda mme idiọk owo edomo ke nso? Edomo edinen owo ke nso?
- Nọ uwut-ñkpọ ke abaña ndiñwọñọ se itukde fi idem.
- Nditiñ akpanikọ ke esit fo ọwọrọ didie?
- Nọ mbet iba emi adade inemesit edi.
- Nso idi Mbet Ọbọñ?
- Nso enyiñ ke afo ọkpọnọ eridọk “edidọk ke edeme” ye editibe “ikọ but ndian mbọhiduñ esie”?