Lesson 223 - Junior
Memory Verse
“Anie okonim mbuk nnyin ke akpanikọ? ubọñ Jehovah ama onyuñ ayarare ọnọ anie?” (John 12:38).Notes
Ñkukut Isaiah
Isaiah, anditiñ-ntiñ-nnim-ikọ emi okodude ke isua emi awakde ebe 700 mbemiso Jesus amana, ama ama Abasi onyuñ anam utom Esie ke akpanikọ. Usen kiet nte enye osuk okponode Abasi ke Itie-Ukpono Abasi, utibe-ñkpọ emi akananam enye minyeneke ifiọk ibaña ama otibe ọnọ enye. Enye ama okut Ọbọñ ke ñkukut nte Enye etiede ke ebekpo Esie! Enye onyuñ okut mme angel edade ke enyọñ ebekpo enyuñ ekwọ, “Edisana, edisana, edisana, Jehovah mme udim: ubọñ Esie ke ọyọhọ ke ofuri ererimbot”( Isaiah 6:3). (Emi ọnọ nnyin ekikere nditoro Abasi Ete, Abasi Eyen, ye Abasi Edisana Spirit). Uyom ikwọ mbio Heaven enyeñe asaña-udọk, nsuñ-ikan onyuñ ọyọhọ Temple Jehovah.
Nso utọ mfihe ikodu ke esit Isaiah nditiñ nnọ owo se enye okokutde! Enye ama okut ete ke imọ idotke ndida ke iso Edisana Abasi, edi udọñ ama odu ke esit esie ndisọñọ nditọ Israel idem ndikpono Abasi kiet emi edide akpanikọ nnyuñ nnyene ebuana ye Enye. Usen oro enye ama ọfiọk ete ke ñkpọ odu emi ikpanamde.
Edinam Isaiah Asana
Ema enam Isaiah asana ke ufọt ubọñ oro ayamade oto ebekpo Abasi enyuñ enọ enye utom ndika ñkọkwọrọ Ikọ Abasi nnọ nditọ Israel. Abasi ama anam enye ọfiọk ete ke edidi ọkpọsọñ utom koro mme owo idimaha ndikpañ utọñ nnọ enye idinyuñ inimke ikọ esie ke akpanikọ ke abaña Edisana idaha Abasi ye mme utip eke anade onọ mmọ emi enamde akpanikọ. Utọ mmọ emi edi mmọ emi edọñọde inan ye nnan ke spirit.
Ikwe Usuñ Inyuñ Ikopke Ikọ
Ke ini Jesus okodude ke isọñ onyuñ anamde mbon udọñọ ekop nsọñidem, mme akpa-mkpa eset, onyuñ adade emem ọsọk mbon ukut, Enye ama osobo ye utọ mbon emi Isaiah ọkọkwọrọde ikọ ọnọ. Mmọ ema enyene enyin ndikut usuñ edi mmọ ikoyomke ndikut ñkpọ eke odotde; mmọ ema enyene utọñ ndikop ikọ, edi mmọ ikoyomke ndikpañ utọñ nnọ ata akpan ñkpọ ke uwem.
Ke ini ukwọrọ-ikọ Isaiah, enye ama ofiori ete: “Anie onim mbuk nnyin ke akpanikọ? Ubọk Jehovah onyuñ ayarare ọnọ anie?” (Isaiah 53:1). Enye ama aka iso nditiñ mbaña Jesus ye mme ufen eke Enye edibọde ke ndifak ererimbot. Abasi ama ayarare owut Isaiah ukem-ukem mme ñkpọ eke editibede ọnọ Jesus ke isua ikie itiaba ama edibe.
Ke itie edikot ke abaña ukpep-ñkpọ mfin, mme ntiñ-nnim ikọ oro ema ewọrọ esu. Jesus ama ọfọn ido ye mme owo: Enye ama ọdọñ mbon mbuñọesit esit, Enye ama anam mbon udọñọ ekop nsọñidem. Enye ama anam ediwak ñkpọ ke otu mmọ emi baba owo ndomo kiet minamke. Edi kpa ye mme utibe-ñkpọ Esie, “owo ese Enye ke ndek, enyuñ esin Enye; Enye edi owo ukut, onyuñ emehe ke mfuhọ” (Isaiah 53:3), kpa nte Isaiah eketiñde abaña Enye. Ediwak owo emi mikonimke ikọ Jesus ke akpanikọ ekedi nnan ye inan ke spirit.
Ubọk Abasi
Ubọk Jehovah ayarare ọnọ anie? Anie okut odudu Jesus onyuñ adia mme eridiọñ Esie? Edi mmọ emi enimde mbuk Esie ke akpanikọ enyuñ enimde se Jesus ọkwọrọde ke akpanikọ.
Afo emeti mbuk ñwan oro ọkọdọñọde ke isua 12 emi akabiatde kpukpru okuk esie ọnọ mbia-ibọk edi ikokopke nsọñ-idem. Enye ama onim ke akpanikọ ete ke Jesus eyenam udọñọ esie okure edieke enye ekemede ndituk ọfọñ Esie. Koro enye okonimde ke akpanikọ, enye ama okop nsọñidem. Oro ekedi ubọk Abasi emi akayararede ọnọ enye.
Nnyin imekot ibaña akwa owo ekọñ emi eyen esie ekekperede ndikpa. Enye onim ke akpanikọ ete edieke Jesus editiñde suk ikọ, eyen esie eyekop nsọñidem. Mbuọtidem oro ke ikọ Jesus ama ada edikọk edi, ndien akwa–owo-ekọñ okut ubọk Jehovah nte ayararede ọnọ enye.
Ediwak utibe-ñkpọ ema edu ntre, nte emi John ekewetde ke Gospel esie, “ndien edieke ekpewetde mmọ kpukpru, etie mi nte kpa idem ererimbot ikpekemeke ndikọhọ se ewetde” (John 21:25). Ediwak ñkpọ emi Jesus akanamde akpakanam kpukpru owo ebuọt idem ye Enye. Edi John ama ewet ete: “mmọ ibuọtke idem ye Enye.”
Ke ini mme owo mikenimke ke akpanikọ, Jesus ikanamke utom. Ke obio esie ke Nazareth mme owo ikenimke ke akpanikọ. “Enye inyuñ inamke ediwak utom odudu do oto ke ntak unana mbuọtidem mmọ” (Matthew 13:58).
Anie okut ubọk Abasi nte ayararede mfin? Nte idighe mmọ oro ebuọtde idem ke ikọ Jesus? Jesus ọkọdọhọ ete, “Etiene Mi, kpukpru mbufo emi ekpade mba enyuñ ebiomde edidobi mbiomo, ndien Ami nyenọ mbufo nduọk-odudu.” (Matthew 11:28). Owo eke onimde ke akpanikọ ke esit esie, onyuñ akabarede ọkpọñ idiọk-ñkpọ esie okut nduọk-odudu oro. Edi kpasuk ukem-ukem mfin emi nte ekedide ke ini Jesus akasañade ke isọñ. Enye ayarare Idem-esie ọnọ mmọ emi ebuọtde idem ye Enye.
Mbon Udọñọ Ebọ Edikọk
Jesus ama ọkọk mbon udọñọ; ndien ke Ñwed James nnyin ikot ite: “Nte owo okut ukut ke otu mbufo? Yak enye ọbọñ akam ... Nte owo ọdọñọ ke otu mbufo? yak enye okot mbiowo ufọk Abasi; mmọ enyuñ enuhọ efuk enye ebọñ akam, eda aran eyet enye ke enyiñ Ọbọñ; ndien akam mbuọtidem eyenyaña enye emi ọdọñọde; Ọbọñ eyenyuñ anam enye adaha ada” (James 5:13-15). Mmọ emi enimde ke akpanikọ edi mmọ emi ebọde edikọk oto ke ibọrọ akam. Mmọ enim mbuk ke akpanikọ enyuñ ekut ubọk Abasi nte ayararede.
Ke ini Jesus okoyomde ndikpọñ ererimbot, Enye ama ọdọñ mbet Esie ekekwọrọ ikọ ke ofuri ererimbot, ndien Enye ama ọdọhọ ete, “Mme idiọñọ emi eyetiene mmọ emi enimde ke akpanikọ: ke enyiñ Mi ke mmọ eyebin mme demon; eyesem mbufa usem; ... mmọ eyedori mbon udoñọ ubọk, ndien mmọ oro eyekop nsọñidem” (Mark 16:17, 18). Mme idiọñọ emi eyetiene mmọ emi enimde ke akpanikọ.
Mbuọtidem
Edi ke mbuọtidem miduhe, owo ikemeke ndinem Abasi esit (Mme Hebrew 11:6). Jesus edisaña didie anam ñkpọ ọnọ nnyin ke ini nnyin minimke ke akpanikọ nte ke Enye eyenam? Edi ke nnyin inemde Ọbọñ nnyin esit ke ndibuọt idem ke ikọ Esie, Enye eyenam mme utibe-ñkpọ ọnọ nnyin. Anam didie oyom Abasi ọnọ fi se afo ebeñede edieke afo ekerede abaña Abasi onyuñ ọbọñde akam ke ini oyomde uñwam ikpọñ-ikpọñ, onyuñ efre abaña Enye ke kpukpru mme ini eken? Ọbọñ okop inemesit ke akam nnyin ndiwut esit ekọm ye ima eke inyenede inọ Enye. Enye oyom nnyin itiñ inọ Enye nte ke nnyin imama Enye, ndinyuñ ndu uwem ndisọñọ se itiñde. Nnyin inyene ndida utom Esie nte ata akpan ñkpọ ke uwem nnyin.
Ini nnyin mi ke isọñ edi ndida nnam mbeñe-idem ndika Heaven ndinyuñ ññwam mmọ efen ndidu ke mbeñe-idem ndisobo ye Jesus. Mkpri ibio isua uwem eke idude mi idighe se edade edomo ye nsinsi ini. Edọhọ ete: “Ini nnyin mi edi ñkukure ini emi nnyin inyenede ndinam ñkpọ ndida Heaven nnyene. Enye edi ata ñkpọ uto emi inyenede ke ererimnbot. Ndien edieke owo enyenede utọ ñkpọ-uto emi, onyuñ edide ata ekpri, nte enye eyeda enye abiat ke ñkpọ mbre?”
Edieke inimde ke akpanikọ se Jesus etiñde ọnọ nnyin abaña Heaven ye ubọñ eke nnyin ididade ye Enye, mme ñkpọ ererimbot emi ididighe ata akpan ñkpọ inọ nnyin. Nnyin iyedi nti isọñ, inam akpanikọ inyuñ ifọn ido ye kiet eken, edi mfihe esit nnyin edidi ndikọ mme ukpọñ nnọ Jesus. Nnyin iyom ndikut nte Jesus edide ndinam ererimbot emi edi edisana ebiet nnyin ndiduñ ke esit.
Itoro Owo
Ndusuk mme andikara synagogue ema ebuọtidem ye Jesus, edi mmọ ema ekop ndik nditiñ nyarare. Mme owo ema edara mme ikpọ itie mmọ ke ufọk Abasi, ndien mmọ ema ema itoro owo. Mmọ ema ekere ete edieke mme imọ iditienede Jesus añwa-añwa, mme owo eyesua mmimọ nte ekesuade Enye. Nnyin imokut mi ite ke mmọ ikadaha nte akpan ñkpọ ndibeñe idem ndika Heaven. Se mme ufan ekekerede ebaña mmọ ama edi akpan ñkpọ ke iso mmọ akan se Abasi ekekerede abaña mmọ. Utu ke ndibọ ekpri ukọbọ ke ekpri ibio ini man enyene mme ubọñ Abasi ke nsinsi, mmọ ekenyime ndiyak ini-iso mmọ nnọ ke ukpono ererimbot emi edide ke ekpri ini.
Utọ mbio efen ema edu emi ekebuọtde idem ye Abasi, edi ikenimke ke akpanikọ nte ke Jesus edi Eyen Abasi. Jesus ama odomo ukeme ndimen ñwut mmọ nte ke kpukpru ikọ eke Enye eketiñde okoto Ete Esie. Enye ikekpepke ukpep-ñkpọ Idemesie. Enye okoyom mmọ efiọk ete ke edieke mmọ enimde ukpep-ñkpọ Esie ke akpanikọ, mmọ enim mbet Abasi, mmọ ekedi ukem, enyuñ eda ke nsinsi. Mme ikọ emi Jesus eketiñde, oro edi Ikọ Abasi, eyenyuñ ebiere ikpe ọnọ kpukpru owo ke akpatre usen.
Ikọ Jesus edi uwem nsinsi ọnọ mmọ emi enimde ke akpanikọ. Nnyin imekeme ndibuọt-idem nte ke mme eñwọñọ Abasi eyesu ke uwem nnyin edieke nnyin inamde udeme nnyin. Enye eyekpeme nditọ Esie onyuñ ada mmọ oduk ke obio ubọñ edieke mmọ enimde ukpep-ñkpọ Esie ke akpanikọ.
Questions
MME MBUME- Nso ke Isaiah okokut ke Temple?
- Nso ke emi ekenyik enye ndinam?
- Didie ke Abasi akanam Isaiah odu ke mbene-idem ndinam utom?
- Nso oruk owo ke Isaiah ye Jesus ekekwọrọ ikọ enọ?
- Mme anie ekebọ mme eridiọñ eto mme utibe utom Jesus
- Nso udori ke nnyin idibọ ke ndinam ikọ Jesus?
- Nso ukpuhọre idu ke anyan ini nnyin ke isọñ ye eke nsinsi ini?
- Didie ke nnyin ikeme ndifiọk nte ke nnyin imodu ke mbeñe-idem ndisobo ye Jesus?