Lesson 224 - Junior
Memory Verse
“Ekpeme ndien, koro mbufo mifiọkke usen mme hour” (Matthew 25:13).Notes
Edifiak Ndi Jesus
Jesus eketiñ abaña ini emi Enye editọñọde ntak edi ke isọñ. Enye ama ọsọñọ etiñ ete, “Edieke ñkade ñkotim itie ntre nnọ mbufo, nyefiak ndi” (John 14:3). Enye ama etiñ abaña nte mme ñkpọ edibonode ke ererimbot ke ini Enye edifiakde edi. Jesus ama etiñ ete ke editie nte mme usen Noah, ke ini emi mmọñ ukwọ ọkọtọde ofuk ererimbot. Okposuk edi nte ekenọde mme owo emi ntọt, mmọ ikenamke mbeñe-idem. Jesus ama asian mbet Esie ete ekpeme enyuñ ebọñ akam, man mmọ ekpebeñidem ebet edidi Esie. Jesus ke afiak edi.
Ukpep-ñkpọ nnyin ọtọñọ ye ikọ emi, “Adañoro,” emi Enye eketiñde abaña, oro edi, editọñọ ntak ndi Esie ke isọñ. Ke ini Enye edifiakde edi, edidi ukem nte okotibede ke ñke emi iyomde ndikpep: Ndusuk owo eyedu ke mbeñe-idem, edi ndusuk ididuhe ke mbeñe-idem.
Ini Eke Owo Mifiọkke
Ke ñke emi eda Jesus nte ọdọ-ndọ. Mme owo ke eyom ndikut ediyarade idem Esie, edi owo ifiọkke ata akpan ini. “Koro mbufo mifiọkke usen eke Ọbọñ mbufo edide” (Matthew 24:42). Baba owo kiet ifiọkke usen emi, man ikpetiñ ibaña hour. Jesus ama etiñ ete, “Edi baba owo kiet ifiọkke ibaña usen oro mme hour oro, kpa mme angel ke Heaven, Eyen inyuñ ifiọkke, ke mibọhọke Ete ikpọñ” (Matthew 24:36). Unana edifiọk ini eke Jesus edidide, akpanam nnyin itim ikpeme, man idu ke mbeñe-idem kpukpru ini.
Mmọ oro ekebetde ndisobo ọdọ-ndọ, ema ebahade mmọ esin ke ikpehe iba, mme asian, emi ekebeñede idem ye mme ndisime, emi mikebeñeke idem. Otu owo iba emi eketie ebet ọdọ-ndọ. Mmọ ema enyene utuenikañ, mmọ ema enyuñ ede idap mbemiso ọdọ-ndọ edidi.
Uñwana
Ekeme ndida mme owo emi ndomo ye kpukpru mme anditiene Christ. Jesus ama etiñ ete, “Ami ndi uñwana ererimbot; owo eke etienede Mi idisañake ke ekim, edi eyenyene uñwana uwem” (John 8:12). Eti-mbuk Jesus ọnọ nnyin uñwana. Nnyin inyene ndinyime nnyuñ nsaña ye Enye man inyene mfọn edinyaña ukpọñ. “Edieke nnyin isañade ke uñwana, kpa nte Enye odude ke uñwana, nnyin imoduk nduk ye kiet eken, ndien iyip Jesus Eyen Esie eyet nnyin isana ke kpukpru mme idiọk-ñkpọ” (1 John 1:7).
Andiwet Psalm eketiñ abaña Ñwed Abasi ke ini enye etiñde ete, “Ikọ fo edi utuenikañ ukot mi, ye uñwana usuñ mi” (Psalm 119:105). Utuenikañ odu man ọnọ uñwana. Ke ini nnyin inyenede Jesus ke uwem, nnyin imenyene se inọde nnyin uñwana ke spirit.
Idap
Kpukpru mmọ ema ede idap nte ekade iso ndibet. Ọdọ-ndọ ekedi ke okoneyo, ke ini mme owo ekpenade ede idap. Idap emi iwọrọke mkpa, mme idap mmem-idem ke spirit. Ekedi se idotde nte mmọ eyet idap. Adaña nte Jesus ebihide ndidi ana nte ikọt Esie eka iso edu uwem nte esidide. Mmọ enyene mme ufọk iduñ ye ubọk utom; edi mmọ enyene ndidu kpukpru ini ke mbeñe-idem, koro edifiak ndi Jesus ekedi akpa ke esit mmọ.
Edinam Utom
Ke ñke eñwen, emi abañade okuk, nnyin imọfiọk ite ke Ọbọñ ọnọ owo kiet kiet utom ndinam (Mark 13:34); ndien Enye oyom nnyin “Inyam Urua” tutu Enye edi (Luke 19:13). Ndiyam urua ọwọrọ ndinam utom, ndibeñidem, ndikpeme, ndinyuñ mkpañ-utọñ nnọ edifiak ndi Esie. Nnyin idu uwem ke usen ke usen nte ñkpọ eke usen oro edide usen edifiak ndi Esie. Nnyin inamke mme ekikere aka ata anyan ke abaña ini iso. Ke nditñ mbaña ñkpọñ nnyin itiñ ntem, “Edieke Jesus ebihide ndidi”. Solomon ama etiñ ete, “Ami ñkede idap, edi esit mi edemere” (Ikwọ Solomon 5:2). Ntre owo Abasi ede idap nte ido edide, edi esit esie kpukpru ini ekpeme edifiak ndi Jesus.
Mme Ndisime Ye Mme Asian.
Ndusuk mmọ emi eketiede ebet ọdọ-ndọ ekedi mme ndisime edi ndusuk mmọ ekedi asian. Nso ikada ukpuhọde emi idi? Kpukpru mmọ ema enyene utuenikañ, edi mme mmọ ekedi ndiseme mme ekedi asian ọkọkọñọ ke udomo aran emi mmọ ekenyenede. Mme asian ema eda aran ye utuenikañ mmọ, edi mme ndisime ema eda utuenikañ ye ekpri aran.
Utuenikañ
Ekeme ndidi afo ama okut utuenikañ emi ekesikamade mbemiso edinyene ikañ electric. Ke ñkañ isọñ utuenikañ emi, itie usin aran ama odu. Ke ñkañ enyọñ esin akrasi enyenede itie emi nsuñikañ ọwọrọde, ye ọfọñ utuenikañ emi edebide ke aran man ke ini edomode, enye asak ayama edieke kpukpru ñkpọ ekemede. Kpukpru usen akana nte eyet akrasi emi, midighe ntre, nsuñikañ eyefuk enye onyuñ anam enye akabare okim, ndien idiyakke ikañ ayama. Ke ini ke ini, ekenyene ndisin aran ke abañ aran nte ekemde, midighe ntre itie oro eyena ukpọk ke ini eyomde ndidomo ikañ. Nte ọfọñ ikañ emi asakde, ekenyene ndidiọñ man esibe se ikañ atade efep man oro edinam edemikañ ọtuhọ onyuñ anam akrasi okim. Akana nte ediọñ utuenikañ kpukpru usen.
Ndiyama Nnọ Jesus
Jesus ama etiñ ọnọ mbet Esie ete ke mmọ edi uñwana ererimbot (Matthew 5:14) nte Enye edide. Nte mbet Jesus mfin, eda nnyin edomo ye uñwana. Nnyin inyene ndinim mme ñkpọ spirit ke eti itie, kpa ukem nte inyenede nditim nnim mme ñkpọ ikpọhidem man utuenikañ aka iso asak.
Inyene ndinim uwem nnyin nte asanade ke usen ke usen, ye ke hour, edieke nnyin iyomde uñwana nnyin aka iso ayama. Itie ekededi ikañ atade mme ubiọñọ odude, enyene ndisibe mfep, edieke nnyin iyomde ndidi eti edemikañ, minyuñ idighe emi ọtuhọde ñkañ kiet onyuñ osioñode nsuñikañ.
Aran
Kpukpru ñkpọ emi ekeme ndidu, edi ke aran miduhe ikañ ikemeke ndisak. Edi ntre ñko ke uwem nnyin ke spirit: nnyin inyene ndinyene Aran, emi edi Spirit Abasi. Ke ini owo enyenede edifen ke idiọk-ñkpọ, enye enyene udomo Spirit Abasi. Nte enye akade iso ọbọñ akam ayak uwem esie, onyuñ enyenede enọ edinam asana, owo oro enyene udomo Spirit Abasi eke okponde akan.
Odu ntutuñọ ifiọk spirit eke owo ekemede ndibọ, emi ọnọde Spirit Abasi ke udomo eke okponde akan, oro edi ndiyọhọ ye Spirit, kpa uduọk-mmọñ Edisana Spirit. Ke Jesus ama ọkọdọk aka ke Heaven, nte mbet ebọñde akam, ema enim mmọ uduọk-mmọñ Edisana Spirit (Utom Mme Apostle 1:5). Mmọ ema eyọhọ ye Edisana Spirit (Utom Mme Apostle 2:4). Enọ emi onyuñ enyene nnyin mfin emi ñko. “Koro eñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” (Utom Mme Apostle 2:39). Enye ọnọ nnyin Spirit Abasi emi okponde akan ye Aran emi awakde ndinam utuenikañ aka iso asak.
Mfiori
Ke ufọt ekim okoneyo ema ekop mfiori: “Sese, ọdọ-ndọ! Mbufo ewọñọ eka ekesobo ye enye”. Mme asian ema enyene nsuhọ aran ndien utuenikañ mmọ ema eka iso esak. Mme ndisime iketiñke enyin. Mmọ ikeneyeneke aran nte ekemde, ndien utuenikañ mmọ ema enime.
Mme ndisime ema efiọk se ekeyomde. Mmọ ema ediọñọ se mmọ ekenanade, ye ọtọ ye usuñ nte mmọ ekpenyenede enye. Edi se owo kiet kiet enyenede ndinam; owo kiet kiet ekenyene ndibeñidem esie. Man ekeme ndinyene udomo Spirit Abasi eke ọfọnde ye mme ñkpọ spirit eken; owo enyene ndibọñ akam, onyuñ ayak idem esie ọnọ Abasi ñtutuñọ-ñtutuñọ, onyuñ onim uyo Abasi ke akpanikọ. Edieke Jesus edide ke ufọt okoneyo, afo emebeñidem?
Ebe-Ini
Ke ini mme ndisime ekekade ndidep aran, ọdọ-ndọ edi. Ini mbeñe-idem ikoduhe ke ekpri ini emi ọkọsuhọde. Mmọ oro ekebeñede idem ema eduk ke usọrọ ndọ, ndien eberi usuñ. Mme asian ema ebe eduk, edi ema esio mme ndisime efep.
Ke ini Christ eberide usuñ owo iduhe emi ekemede ndiberede enye (Eriyarare 3:7). Ekem mme ndisime ema eyom ndibe nduk. Mmọ ema ekọñ enyuñ ekot, edi ini ama ebe. Kere nte ekikere mmọ okokpude! Ekeme ndidi mmọ ema ebọñ akam enyuñ etua eyet, edi ufọn ikoduhe. Mmọ ema ebet ebighe akaha. “Mbufo eyom Jehovah, ke ini ekemede ndikut enye, eseme ekot enye, ke ini enye ekperede” (Isaiah 55:6).
Edikpeme
Eteme nnyin ndikpeme nnyuñ ndu ke mbeñe-idem. Yak ñke emi emenede esit nnyin ndiduñọde mfiọk mme nnyin imodu ke mbeñe-idem, mme nnyin imenyene Aran ke ekpeme ye utuenikañ. Tim fiọk ete ke Aran do, ke inyuñ idutke. “Mmọdo ikpotim ikpañ utọñ ikan inọ mme ñkpọ emi ikokopde, mbak nnyin idifiọnọre ikpọñ mmọ” (Mme Hebrew 2:1).
Edisine-ñkpọ
Ke owo ama ọkọbọ mme ntutuñọ enọ ke spirit, enye enyene ndika iso mbọñ akam nnyuñ nnam utom. Edieke nnyin ikpemede inyuñ inamde kpukpru se idotde, nnyin idifeheke ndik ibaña edifiak-ndi Jesus, edi iyema edidi Esie. Owo enyene ndikọri nnyuñ ñkabare mbiet Christ, enyene ndibana idem ke uyai spirit ye nti ñkpọ. Ekot mme ñkpọ emi mme mfọn owo Abasi. Udiana Peter 1:5-7 etiñ ọnọ nnyin ete yak mme ñkpọ emi enyuñ ewak enyuñ ekabade ekpon ekan ke uwem nnyin.
Esiwak ndida mme mfọn emi ke spirit ndomo ye edisine-ñkpọ. Nte uwut-ñkpọ, nnyin ikot ite, “Ediye linen oro edi edinen ido nti ikọt Abasi” (Eriyarare 19:8) ñko, “Edisine-ñkpọ esie edi odudu ye uyai” (Mme Ñke 31:25).
Ke Psalm 45:13, 14, nnyin imokot ibaña Adiaha edidem emi esinede nsọñ-urua edisine-ñkpọ ye ‘mbuaha ọfọñidem.” Eyen Abasi ekededi edi eyen Edidem ndidem emi esinede ediye ọfọñidem ke spirit. Nte owo ọkọride ke mbuọtidem, ye ime, ye mfọnido ye ima, etim enam mbuaha edidọk ọfọñidem esie ke spirit. Nte enye akade iso ndibiet Christ, enye eyenyene ọfọñidem emi eyede onyuñ ọsọñde urua akan ke spirit.
Ke ini Jesus edidide, edisine-ñkpọ Esie “efuọñ myrrh, ye aloes ye cassia, eke etode ke ufọk nduk-enin” (Psalm 45:8). Emi edi mme idiọñọ mfọn ke spirit emi nnyin inyenede ndinyene ñko man ibiet Christ. Jesus eyedi ke ubọñ ye ke uteñe, “baña akpanikọ, ye emem, ye eti ido” emi Enye amade (Psalm 45:4, 7).
Edieke nnyin idoride enyin ndidu ke udia-ndọ Eyen-erọñ ye Jesus, nnyin inyene ndikama Aran ke ekpeme utuenikañ. Nnyin inyene ndinyene udomo Spirit Abasi nte ekemde, inyuñ isine edisine-ñkpọ spirit mfọn Abasi. “Ọfọfọn ọnọ owo eke esinede edisine-ñkpọ etie ekpeme” (Eriyarare 16:15).
Eyak nnyin ke edibọñ akam ye ñkopuyo ibeñidem ibet edisọp mfiak ndi Jesus. Eyak ke edinam utom ye edikpeme, ekut nnyin ke mbeñe-idem ndisobo ye Jesus ke ini Enye edidide.
Questions
MME MBUME- Didie ke nnyin ifiọk ite Jesus ke afiak edi?
- Ini ewe ke Jesus edifiak edi?
- Nso ke owo enyene ndinam ndibeñidem ke abaña edifiak ndi Jesus?
- Ntak emi ndusuk nditọ iban ekedide ndisime?
- Nso ikanam mmọ eken edi mme asian?
- Nso ikotibe ke ini ọdọ-ndọ ekedide?
- Nso ekedi ntak emi mme ndisime ekekade ndidep?
- Nso iditibe ke ini Jesus edidide, edieke nnyin mibeñeke idem?