Lesson 225 - Junior
Memory Verse
“Omotim anam, afo eti asañutom ye owo akpanikọ: akanam akpanikọ ke se miwakke; nyenim fi ekpeme ediwak ñkpọ’ (Matthew 25:21).Notes
Edeme Mme Talent
Kiet ke otu mme ñke emi Jesus eketiñde ọnọ mbet Esie ekedi akabaña owo inyene emi okoyomde ndika isañ ke idut efen, onyuñ ọkpọñde ufọk ye mbubehe esie ke ubọk mme asañutom esie. Enye ekekere ke imenyene mbon utom eke ekemede ndinam akpanikọ, ke ntre mbemiso enye ọtọñọ isañ esie ama okot mmọ obon ọtọ kiet onyuñ ayak akamba ibat okuk ọnọ mmọ kiet kiet ndida nnam mbubehe ke ini enye miduhe.
Enye ama ọnọ akpa asañutom talent ition, onyuñ ọdọhọ enye ada okuk oro anam ñkpọ ke usuñ eke edinyenede udori. Enye onyuñ ọnọ ọyọhọ asañutom iba mkpasip talent iba. Asañutom enye emi ikenyeneke ukeme nte akpa asañutom, ke ntre ikpekemeke ndikakama awak akan iba oro. Enye ọnọ ọyọhọ asañutom ita talent kiet kpọt, nte ukeme esie edide.
Edinam Ibat
Ke anyan ini ama ekebe (ekeme ndidi ediwak isua ) ete ufọk ama ọnyọñ edi. Enye ama okot nditọ-ufọk esie onyuñ ọdọhọ mmọ ewut imọ udori eke mmọ enyenede ke mbubehe eke mmọ ekenamde ke ini imọ mikọduhe.
Akpa asañutom ada talent duop edi, awak utim ikaba akan se ekenọde enye. Ete ufọk ama okop inemesit eti eti. Oro edi utọ asañutom eke enye adarade. Enye onyuñ ọdọhọ owo emi akanamde akpanikọ ete: “Akanam akpanikọ ke se miwakke; nyenim fi ekpeme ediwak ñkpọ; duk ke idara Ọbọñ fo.” Enye onyuñ ọnọ asañutom oro awak akan se enye akadade ọsọk enye.
Kere nte esit ekenemde asañutom emi! Enye ama enyene uyuhọ ke ọfiọkde ete ke ima inam utom imọ ọfọn, ndien idaha emi akwa utip etiene! Enye owut idem esie nte eti asañutom, ndien idahemi enọ enye ifet ndikara ye ọbọñ esie.
Ke ini mme asañutom eken ekutde utip emi, mmọ, ndusuk, ema ekere nte mme imọ ikpekenyenede talent ition ndida nnam utom ñko; edi yak nnyin ise se ete ufọk ọkọdọhọde asañutom emi ọkọbọde talent iba kpọt. Talent iba oro ama odori iba efen, oto nte ọyọhọ asañutom iba emi eketiñde enyin. Ete ufọk ama etiñ ukem ikọ emi enye eketiñde ye akpa owo: “Akanam akpanikọ ke se miwakke; nyenim fi ekpeme ediwak ñkpọ; duk ke idara ọbọñ fo.” Enye ama ọfiọk ete ke asañutom enye emi ikenyeneke ukeme nte akpa asañutom, edi ema enọ enye utip ke edinam akpanikọ. Ọyọhọ asañutom iba ekenyene ndidi andikara ñkọ. Ekeme ndidi enye edikara obio ition, ke ini akpa asañutom akarade duop (Luke 19:17-19) edi oro edi nte enye ekemede ndikama, edi enye enem esit ye utip esie.
Ebiom Ikpe
Nso itibe ye owo emi ekenyenede talent kiet kpọt? Ọbọñ esie ikoyomke enye enyene udori talent duop, edi ama ekere ete enye eyenam se enye ọkọbọde utim ikaba. Kpa ye oro, asañutom emi ekedi ifu, ikonyuñ inamke baba mbubehe kiet inọ ete ufọk. Talent emi ama ọbuhọ ke isọñ ke ebiet eke owo mikwe ke ediwak isua eke ekpedade enye enam ñkpọ.
Nnyin ikemeke ndikere nte ke ete-ufọk ekpenem esit ye oruk asañutom oro. asañutom ama ọfiọk ete imọ imanam ọdiọk; edi ke ndo-ndo oro enye ama ọtọñọ ndisua nnọ ọbọñ esie nte ñkpọ eke ekedide ndudue ete-ufọk ndibuk talent ke isọñ. Ediwak ini mme owo esisua enọ mbio eñwen ke mme ndudue idem mmọ! Ekpededi ete-ufọk ekedi “ọkpọsọñ owo,” nte asañutom ọkọdọhọde, oro ikọnọhọ enye isọñ (ifet) nditre ndinam akpanikọ ke utom esie.
Kop se ete-ufọk ọkọdọhọde asañutom enye emi: “Afo idiọk asañutom ifu.” Idiọk-ñkpọ esie ekedi editre ndinam. Idighe mme idiọk edinam akada ubiom ikpe edi, edi editre ndinam mme nti ñkpọ emi akanade enye anam. Ema eduọk idiọk asañutom emi ke ekim ke esien, ebiet emi eritua eyet ye erita edet” odude.
Jesus ke ini efen ama ọdọhọ ete ke mme owo eyedi etiene imọ ke ini ikpe enyuñ efiori, “Ọbọñ, Ọbọñ, nte nnyin iketiñke nte prophet ke enyiñ Fo? inyuñ idaha enyiñ Fo iduọñọ mme demon, inyuñ idaha enyiñ Fo inam ediwak ñkpọ odudu?” Ndien Enye eyebọrọ mmọ, “Akananam ndiọñọke mbufo: edianare Mi, mbufo mme anam ukwañkpọ” (Matthew 7:22, 23). Utọ mbio oro eyekere ete ke eyedara mmọ ke Heaven koro mmọ ekenamde nti utom; edi Jesus ọdọhọ mmọ ebem iso ebọ erifen ke mme idiọk-ñkpọ mmọ mbemiso utom mmọ ọnọ mmọ utip heaven.
Edieke mmọ eke ekenamde nti utom ke enyiñ Jesus edinyenede ubiom ikpe, koro mmọ inyeneke erinyaña ukpọñ, nso utọ ifet ke owo nte asaña utom emi ekenyenede talent kiet edinyene ke ini ikpe? Enye ikenyeneke baba utom kiet ndinọ ọbọñ esie.
Ndinọ Jesus
Esitiñ ete ke nnyin imekeme ndinọ enọ ke ima miduhe, edi ikemeke ndima ke nnyin minọhọ enọ. Ke ikọ eñwen, afo ke ndusuk ini nte asañade ye itie utom fo emekeme ndinọ owo eke afo mutimke ukere ñkpọ ubaña enọ. Edi ke afo enehere ama owo, eyeyom ndinọ enye uwak nte afo ekemede. Edieke imade Jesus ke ofuri esit nnyin, nnyin iyeyak se inyenede eke ọfọnde akan inọ Enye.
Nso ke nnyin ikeme ndinọ Jesus? Ke akpa, nnyin inọ Enye ima nnyin. Ekem nnyin inọ Enye utom. Utom kiet edi akam. Nnyin inyene ndikpeme nditọñọ kpukpru usen ke akam. Nnyin ibọñ akam iyom erinyaña ukpọñ mmọ eke etakde ye erikọk mbon udọñọ. Nnyin ibọñ akam ibeñe edidiọñ ke mme mboho nnyin. Ke utit usen nnyin ibọñ akam ekọm ke nda-usuñ ye ukpeme Abasi ke ofuri usen oro.
Utom efen edi ikọ ntiense. Nnyin idikopke but ndinam mme owo efiọk ete nnyin idi mme Anditiene Christ. Nnyin iyom mmọ efiọk ebaña ima Jesus ke idem nnyin, ye nte esit enemde nnyin ndidi nditọ Esie. Ndusuk nditọwọñ eke afo ebrede mbre ye mmọ ikenyeneke ifet ndikop ñkpọ mbaña Jesus. Utom fo edi ndikot mmọ edi ke Sunday School, onyuñ ọdọhọ mmọ ke Jesus ama mmọ, onyuñ oyom ndinam mmọ efọn man mmọ ekeme ndiduñ ye Enye ke Heaven ke nsinsi.
Mme Utom Eke Enamde Ke Esit idem
Kpukpru mme utom oro edi se ekutde. Nnyin imenyene mme utom esit idem ndinam. Man mme utom nnyin emi ekutde ke enyin eye ke enyin Abasi, nnyin inyene ndidian mme mfọn owo Abasi: “Edian eti ido ke mbuọtidem mbufo, enyuñ edian ifiọk ke eti ido, enyuñ edian erifara ke idem ke ifiọk, ye ime ke erifara ke idem, ye uteñe Abasi ke ime, ye iman ke uteñe Abasi, ye ima ke iman. Koro edieke mme ñkpọ emi edude ke esit mbufo ọyọhọ-ọyọhọ, mmọ eyenam mbufo ekutie ifu, ekunyuñ enana mfri ke erifiọk Ọbọñ nnyin Jesus Christ. Koro owo eke minyeneke mme ñkpọ emi edi nnan, itimke ikut usuñ, onyuñ efre ete, ema eyet imọ ñkani mme idiọk-ñkpọ efep, enyuñ enam imọ isana” (2 Peter 1:5-9).
Mme Talent Nnyin
Ekenọ akpa asañutom talent ition. Eyak nnyin ida emi idomo ye uwem owo Abasi. Owo kiet ekeme ndinyene talent ition emi adade anam ñkpọ ọnọ Ọbọñ. Yak nnyin idọhọ ite enye edi ọkwọrọ-ikọ emi ọkwọrọde ikọ eti-eti. Oro edi talent kiet. Enye ekeme ndikwọ ikwọ; enye enyene ediye ido eke anamde ediwak owo edu ke inemesit; enye edi eti anam mbubehe; onyuñ okop idem ọkpọsọñ ndiñwam mmọ emi eyomde uñwam esie. Ke ini enye adade mme talent emi anam akpanikọ ọnọ Jesus, mmọ ekọri enyuñ ekpon. Edi ana enye akama mmọ nte ọfọnde man enye ekeme ndikop nte Ọbọñ ọdọhọde, “omotim anam, afo eti asañutom ye owo akpanikọ: akanam akpanikọ ke se miwakke nyenim fi ekpeme ediwak ñkpọ.” Enye enyene ndisin ifik nnam utom man ọbọ utip esie.
Owo eñwen ekeme ndinyene talent iba kpọt. Eyak nnyin idọhọ ite enye ama ndika ñkese mbon udọñọ ye mbon unana, ndien mmọ enyuñ ekop inem ke mme ikọ nsọñọ-idem esie. Enye onyuñ ekeme ndikwọ ikwọ nte ọfọnde, enye onyuñ ada mme talent iba emi anam ñkpọ ini kiet. Ediwak mbon unana ye mbon ukut edu, ke ntre enye enyene ediwak utom ndinam; edi ana enye anam akpanikọ ke se enye anamde edieke oyomde ndikop: “omotim anam, afo eti asañutom ye anam akpanikọ: ... nyenim fi ekpeme ediwak ñkpọ.”
Nnyin imekeme ndikere ke nnyin imesin ifik eti-eti ndinam utom Ọbọñ, ndien ke Enye ama edi utom nnyin eyetre. Edi ñke emi owut nte utom nnyin mi ke isọñ otimde nnyin idem ebeñe mme utom eke okponde ke edem oko. Eyak nnyin isin ifik ndinam utom man Ọbọñ ekpekeme ndida nnyin nnam ñkpọ ke nsinsi ke isọñ emi Enye ebeñede ọnọ mmọ eke emade Enye!
Utom Nnyin
Abasi ọnọ kpukpru nnyin talent emi Enye oyomde nnyin ida inam ñkpọ. Nnyin iyenọ ibat idighe ke se nnyin inyenede ikpọñ edi ke se inade nte inyene. Edieke idade se Abasi ọnọde nnyin inam ñkpọ iyebọ ediwak, ndien Abasi eyeyom utom eke okponde oto nnyin. Nnyin ikemeke ndiwañ ubọk nnyin ndinyuñ ndọhọ ke nnyin imọyuhọ ke se inyenede, ke ntre nnyin iyomke akamba utip; mme ndifaña nte nnyin idotke ndinam mme ikpọ ñkpọ nnọ Ọbọñ. Edieke Enye ọkọnọde nnyin mme talent eke nnyin midaha inam ñkpọ inọ Ọbọñ, nnyin iyekut idem nnyin nte mme asañutom ifu ke ini Enye okotde nnyin ndinam ibat.
Kpukpru mme asañutom emi ema etie ebet Ọbọñ mmọ ndinyọñ ndi. Mmọ ema efiọk ke enye eyebup abaña mme talent emi mmọ ekebọde eto enye. Edi, kpa ye oro asañutom ifu osuk obuk talent esie ke isọñ inyuñ idaha inam ñkpọ.
Ediwak owo mfin emi eyom Ọbọñ ọtọñọ ntak edi, mmọ enyuñ ekere ete mme imọ imebeñe idem. Ekeme ndidi mmọ ema ebọ erinyaña ukpọñ, edi mmọ ikadianke eti ido ke mbuọtidem mmọ, ye ifiọk ke eti ido ye mme mfọn owo Abasi eken; ke ntre uñwana eke mmọ ekenyenede akabare ekim. Apostle emi ama ewet “Edieke nnyin isañade ke uñwana, kpa nte Enye odude ke uñwana, nnyin imoduk nduk ye kiet eken, ndien iyip Jesus Eyen Esie eyet nnyin isana ke kpukpru mme idiọk-ñkpọ” (1 John 1:7). Edi ana nnyin isaña ke uñwana midighe ntre eyekabare ekim ndien nnyin iyetọñọ ntak ikut idem nnyin ke idiọk-ñkpọ.
Ke ntre nnyin ikpep ite mbemiso nnyin ikeme ndibọ ikọ itoro emi, “Omotim anam, afo eti asañutom ye owo akpanikọ,” nnyin inyene ndinam akpanikọ ke kpukpru ñkpọ emi Ọbọñ owutde nnyin ndinam; ndinyuñ nnam se enọde nnyin ndinam ke erinyime esit.
Questions
MME MBUME- Ekenọ mme asañutom oro talent ifañ?
- Nso ke mmọ ekenyene ndida mme talent emi nnam?
- Nso ikedi utip akpa asañutom? Ye ọyọhọ asañutom iba?
- Nso ke ọyọhọ asañutom ita akanam ye talent esie?
- Nso ikedi utip esie?
- Nso ke nnyin ikpokot mme talent ke uwem nnyin?
- Mmọñ ke nnyin ida mme talent nnyin?
- Didie ke nnyin ikeme ndinyene ediwak talent?
- Nso ke utom nnyin mi ebeñe nnyin idem abaña?
- Didie ke edikpe ikpe ye utom nnyin?