Lesson 230 - Junior
Memory Verse
“Anie ekeme ndibọp ufọk nnọ enye, sia enyọñ ye ata enyọñ mikemeke ndida enye? ndien ami ndi anie, eke ndibọpde ufọk nnọ enye, ke mibọhọke ndifọp uwa ke iso esie?” (2 Chronicle 2:6).Notes
Emem Ye Nduọk-Odudu
Abasi ama ọnọ David emem ye nduọk-odudu ọbọhọ kpukpru mme asua esie. David ama añwana ediwak ekọñ edi Abasi ama odu ye enye ndifak enye. Ini ama ekem emi kpukpru ñkpọ ekedude ke emem. David ama ọsuhọre etie ke inemesit ye emem ke ufọk emi ekedade cedar ebọp. Edi akpanikọ ete ke enye ama ekere abaña mfọnido Abasi ye enye. David ekedi edidem, obio esie ama onyuñ odu ke emem. Edieke enye akpakamade, enye okpokodu ñkoñ-ñkoñ uwem ke ifure.
Uwem David ikedighe ntre kpukpru ini. Ke ini uyen eise nte ekpemerọñ, enye ama añwana ye ndiọi unam ndinyaña mme erọñ esie. Ke enye ama okokpon, Saul ama oyom ndida uwem David. Ekedi akpan ñkpọ ọnọ David ndidu ke ukpeme kpukpru ini. Ndusuk ini enye odibe ke mme aba itiat ọwọrọ ọkpọñ oruk esie, ke ini emi enye ekenyenede ediwak ekọñ ndiñwana. Abasi ama ekpeme David, emenere enye onim nte edidem, onyuñ ọnọ enye emem ye nduọk-odudu. David ikpekekemeke ndidi edidem edieke mikpedighe Abasi akanam oro ọnọ enye. David ama ọnọ Abasi ubọñ ke abaña unen ye idaha esie. David ọkọdọhọ ete, “Koro Afo emenerede mi onim ke enyọñ; ndien muyakke mme asua emi edat esit ebaña mi.”
Ñkpọ Ndinọ Abasi
David ama enyene esit ekọm ọnọ Abasi. David okoyom ndinam ñkpọ nnọ Abasi ndiwut esit ekọm. David ekekere abaña eti ye ediye ufọk emi enye okoduñde. Ke ekikere esie, ufọk esie ama eye onyuñ ọfọn akan ebiet ukpono Abasi, oro edi ataya emi Ekebe ediomi okodude. Oto ke akwa udọñ David ndinam ñkpọ nnọ Abasi, enye aduak ndibọp ufọk nnọ enyiñ Abasi.
Ke isede se Abasi anamde ọnọ nnyin, nte nnyin ikpekereke nte David ekekerede, ete ke nnyin ikpama ndinam ñkpọ nnọ Abasi? Nte nnyin imekere mme ikọ andiwet Psalm: “Ndinam didie nnọ Jehovah usiene kpukpru mfọnido emi enye ọfọnde ye ami? Nyemen cup erinyaña ... Nyesio mme akaña mi nnọ Jehovah ... Nyewa uwa ekọm nnọ fi, nnyuñ nseme ñkot enyiñ Jehovah” (Psalm 116:12-17). Nso ke eyenọwọñ ekeme ndinam nnọ Abasi? Eyenọwọñ ekeme ndibọ erinyaña onyuñ odu uwem ọnọ Abasi. Eyenọwọñ ekeme ndinọ Abasi ubọñ ke ediyak idem nnọ Abasi. Eyenọwọñ ekeme nditoro nnyuñ ñkọm Abasi. Eyenọwọñ ekeme ndibọñ akam. Eyak nnyin ida ebeñe nnyin ke akam inim Abasi ke iso. Enye eyewut nnyin mme ñkpọ efen eke ikemede ndinam nnọ Enye. Enye ekeme ndinọ nnyin awak akan nte ibeñede mme idoride enyin, nte Enye akanamde ọnọ David.
Nathan, Anditiñ-ntiñ-nnim-ikọ
David ama eneme-nneme ye Nathan emi ekidide Anditiñ-ntiñ-nnim-ikọ ke ini oro. David ekekere ete ke ufọk obukpọk imọ eye akan ufọk ọfọñ emi akakanarede Ekebe Abasi okuk. Efiọk ete ke ufọk David ke ini oro ama eye eti-eti sia ekedade nsọñ-urua obukpọk emi akananade ke ini oro ebọp enye. Edi ufọk-ọfọñ emi akakanarede Ekebe ediomi Abasi okuk ikedighe se idibighide.
Nathan ama okut ete ke uduak David ndinam ñkpọ nnọ Abasi ama asana onyuñ enen. Nte idade ise, emi ekebiet eti ñkpọ. Ke ọkpọsọñ udọñ ye ifiopesit mmọ, mmọ ema etre ndiyom unyime Abasi ke abaña akwa utom emi. Nathan ama ọsọsọp ọnọ unyime ye ikọ nsọñ-idem. Enye ọkọdọhọ David anam se ededi emi odude enye ke esit.
Uduak Abasi
Abasi ama ọfiọk ete ke uduak David ikedighe eke ibuk, edi ekedi man ọnọ Abasi ubọñ. Abasi ikayatke esit, ikonyuñ inọhọ David ufen okposuk edi nte mikedighe uduak Abasi ete ebọp ufọk Abasi ke ini oro. Abasi ikonyuñ iyakke David odu ebighi ke ndudue oro. Abasi ama ọdọñ Nathan, owo oro ọkọnọde David ikọ nsọñ-idem, utom ọnọ David.
Abasi ikọdọñke owo efen, ikonyuñ itiñke ye David mbak ndutime edidu. Enam utom Abasi ke nde ke nde. Abasi itiñke ñkpọ kiet inọ owo kiet ndien ọkpuhọre ekikere oro ye owo efen ke abaña uduak Esie.
Etop emi Abasi ọkọdọñde ọnọ David eti enye ete ke akanam Abasi “iduñke ke ufọk” edi “ñkasaña ke tent nte ebiet iduñ” Akanam Abasi ibeñeke Nditọ Israel ufọk, ikonyuñ iyomke ufọk. Abasi otim ese owo emi ọsuhọrede idem onyuñ enyenede ndik Abasi ke esit esie (Isaiah 66:2).
Spirit Ukpono Abasi Ke Akpanikọ
Abasi omokpon ke utọ usuñ eke baba ufọk kiet miduhe emi ekemede ndiduk Spirit Esie ofuri-ofuri. Isọñ edi udorukot Abasi; Enyọñ onyuñ edi ebekpo Esie (Isaiah 66:1). Enyọñ ye ata enyọñ ikemeke ndida akwa Abasi Israel (2 Ñwed Chroinicle 2:6). “Jehovah ọdọhọ, ete, Nte ami nyọhọke ke ofuri enyọñ ye isọñ? (Jeremiah 23:24). Uduak David ekedi ndibọp eti ebiet emi ikọt Abasi ekemede ndituak ibuot. David ikekereke ite ke Abasi eyeduñ ke ufọk emi ibibene akande okuk nte emi owo oduñde ke ufọk. David ama ọfiọk ete ke baba ufọk iduhe, okpon nte okpokpon onyuñ ọsọñde urua, emi eyede ekem ye ubọñ Abasi.
Mfin emi Anditiene Christ ama ndikut nte etimde enim ufọk Abasi ọfọn, enyuñ ebonde ñkpọ kiet-kiet ke itie esie ye ke edisana usuñ. Anditiene Christ okut ete ke ñkpọ utom emi ọfọnde akan ifọnke ikaha ndida nnam utom Abasi. Mme ñkpọ emi enọ eti uñwam ke ndisuan Gospel, mmọ enyuñ etiñ enọ mbon efen ebaña ima ye uteñe emi nditọ Abasi enyenede ke esit mmọ.
David ikọnọhọ ewuhọ ke abaña akpan ebiet eke Nditọ Israel ekpewade uwa. Edi Abasi ọkọnọ ewuhọ oro. Ebiet iduñ emi Abasi ọkọnọde Nditọ Israel uyo ete ebọp ekedi se ekemede ndimen nsaña. Mmọ ekesimemen enye nte mmọ eyode ke wilderness. Abasi ama ọnọ mmọ isọñ Cannan, emi mmọ mikenyeneke ndikpọñ aba. Nte mmọ etọñọde ndibọp mme ufọk iduñ mmọ, David ama oyom ndibọp ufọk Abasi emi mmọ ekemede ndinọ enọ nnyuñ mfọp edifọp uwa nnọ Abasi, ebiet eke mmọ ekpebonode ekpono Abasi.
Edi ñkpọ inemesit ọnọ Abasi mfin nte nnyin ikemede ndibono ọtọ kiet mkpono Abasi. Etim eti nnyin ete yak ikunyuñ isin “ndisop idem ọtọ kiet” (Mme Hebrew 10:25). Nte ededi, ndika ufọk Abasi edi kiet ke utom emi nnyin inamde inọ Abasi. Usuñ nte nnyin ikponode Abasi edi efen. Jesus eketiñ ọnọ ñwan Samaria ete ke ata mme anditiene Abasi enyene ndikpono Enye ke spirit ye ke akpanikọ. “Abasi edi Spirit: ndien mme andituak ibuot nnọ Enye enyene ndituak ibuot ke spirit ye ke akpanikọ” (John 4:24). Kpa nte David mikaduakke ndibọp ufọk Abasi ke ntak efen “ke mibọhọke ndifọp uwa ke iso esie” (2 Ñwed Chronicle 2:6), ntre nnyin inyene ndikpono Abasi ke esit, ke akpanikọ ye ke akam, idighe ndituak ibuot ke ediye ufọk emi etimde ebana mme ke enyọñ-enyọñ ido.
Utom David
Abasi ama emenere David onim nte andikara ikọt Esie. David ama enyene utom efen ndinam akan ndibọp ufọk nnọ enyiñ Abasi. Nte Andiwet Ikwọ, David ama ewet ediwak itie ñwed ye mme ikwọ ndida nnọ nditọ Israel ye ikọt Abasi ke ediwak emana nsọñọ-idem, ye ke ufọn nnyin ñko. David ekedi owo ekọñ. Mmọ ema ekan ediwak idut edian ke obio mmọ enam okpon. Ke mme ini ekọñ emi, David ama anam eduọk ediwak iyip. Koro David ọkọduọkde ediwak iyip ke isọñ ke enyin Abasi, ikayakke enye ọbọp ufọk oro okodude enye ke udọñ (1 Ñwed Chronicle 22:8). Edi Abasi ama ọdọhọ David ete: “Koro odude fi ke esit ndibọp ufọk nnọ enyiñ mi, ọfọn nte okodude fi ke esit” (1 Ndidem 8:18).
Ema enọ David unen ndiwet ñwut nte enyenede ndibọp ufọk Abasi oro. Enye ọnọ Solomon eyen esie, ñwed idomo ufọk emi Spirit Abasi akadade David usuñ ndimiñ (1 Ñwed Chronicle 28:11, 12). David ñko ama obon ediwak ñkpọ ubọp-ufọk, onyuñ ọnọ inyene esie, man eda ebọp ufọk Abasi. Dian ke ñwed idomo ufọk, David ama ọnọ Solomon mme ikọ item emi: “Ndien afo Solomon eyen mi, fiọk Abasi usọ, nyuñ nam ñkpọ esie ke ofuri esit, ye ke ima ukpọñ” (1 Ñwed Chronicle 28:9).
Eñwọñọ Abasi
Abasi ọkọñwọñọ ete ke eyen David edibọp ufọk emi David okoyomde ndibọp. Abasi eyenọ David utip ke abaña uduak oro enye ekenyenede ke esit. Nte ete, Abasi eyesua ọnọ onyuñ ọtunọ eyen David edieke enye edinamde idiọk-ñkpọ, edi Abasi idisinke enye. Mbọm Abasi idikpọñke eyen David adaña ini nte enye okopde uyo Abasi.
Akande oro, Abasi eyebọp ufọk ọnọ David, onyuñ anam obio ubọñ David ọsọñọ ada ke nsinsi. Ubọñ David eyesuk aka iso odu ke ebekpo ikọt Abasi. Mfọn emi ama okpon akan eke ada-usuñ Nditọ Israel eñwen, kpa Moses, Joshua, mme kiet ke otu mme ebiere-ikpe.
Saul ekedi akpa edidem Nditọ Israel. Saul ama afiak edem ọkpọñ Abasi. Enye okotut utọñ, ndien ebọ enye ye nditọ esie ebekpo ubọñ. Ke Saul ama akakpa, David ekedi edidem ke itie eyen Saul kiet. Edi uduak Abasi okonim emi; ndien enọ David eñwọñọ ete ke ubon esie edinyene ọyọhọ unen ndidu ke ebekpo.
Nsinsi Obio Ubọñ
Ke etop emi Abasi ọkọdọñde ọnọ David eñwọñọ nsinsi obio ubọñ ama odu ke esit, kpa enye emi edibighide ke nsinsi. Ke ñkañ kiet, eñwọñọ emi ekenyene Solomon emi ke edikem ini ekedide edidem ke David ete esie ama akakpa. Ke ọyọhọ idaha, eñwọñọ emi akabaña edidi Messiah, Jesus Christ, emi edide oruk David, edi Enye “eyenyaña ikọt Esie osio ke mme idiọk-ñkpọ mmọ” (Matthew 1:21), ukara Esie idinyeneke utit (Isaiah 9:7), ndien ubọñ Esie edi nsinsi ubọñ eke midibiarake (Daniel 7:14). Mbemiso emana Jesus, angel ama etiñ ọnọ eka Esie ete ke Jehovah eyenọ eyen esie “ebekpo ete Esie David.” Enye eyeda ubọñ ufọk Jacob ke nsinsi; ubọñ Esie idinyuñ ikureke” (Luke 1:32, 33). Ema enọ Apostle John ke isuo Patmos ñkukut ke abaña ini iso. Enye okokut angel onyuñ okop ntọt emi: “Obio ubọñ ererimbot emi amakabare edi obio ubọñ Ọbọñ nnyin ye Christ Esie. Enye eyenyuñ ada ubọñ ke nsinsi-nsinsi” (Eriyarare 11:15).
Akam David
Nathan, Anditiñ-ntiñ-nnim-ikọ, ama ayak etop emi okotode Abasi ọnọ David ete ke Abasi emesin ndiyak enye ọbọp ufọk ọnọ enyiñ Abasi. David ama onyime uyo Abasi nte akpatre. David ikenenike ye Nathan ikonyuñ iñwanake ndikpe ye Abasi. Enye ikesemeke, inyuñ idọhọ ite ke ekpan imọ. Enye ikakaha iso ke uduak esie. David ama okop uyo Abasi. Ke nsuhọre-idem ye ukpono, David ama aka ke iso Abasi ke akam.
Ke ndibọrọ etop Abasi, David ọnọ ekọm ke akam. David ọnọ Abasi itoro onyuñ etiñ ikọ nsuhọre-idem abaña idem esie ye nti utom esie. David ọdọhọ ete, “Ami ndi anie ... emi afo adade mi edi ken?” David ekedi owo ukpono; enye ama okut unen, Abasi onyuñ ada enye anam ñkpọ. Edi enye ama ọsuhọre idem ke iso Jehovah, koro David ọkofiọkde ete ke imọ ikpekemeke ndisim utọ idaha oro ke esiode Abasi efep. David ama ọdọhọ, “ufọk mi onyuñ edi nso?” “Afo omonyuñ ọdọhọ abaña ufọk owo fo ke anyan ini ke iso.” Ufọk David ekedi nso? Ufọk emi Abasi ekemekde ete edi mme andikara. David ekekere ete ke Abasi ama okpono imọ ye mme edidiọñ ke edem, ye ñko ke se Abasi ọñwọñọde ndinam ke ini iso. Abasi ama ọnọ David akan se enye ekebeñede onyuñ odotde enyin.
David ama onyime ndiyak Abasi ọbọp ubon esie ke nsinsi. Ndusuk owo iyomke ndidi se Abasi oyomde mmọ edi. Ndusuk owo eyom ndinam nte mmọ emade, ke enemde Abasi esit ye ke minemke. Edi akpan uduak David ekedi ndinọ Abasi ubọñ nnyuñ nnam enyiñ Abasi okoñ.
David ama onim Abasi ke akpanikọ. Iduhe ini kiet ke se itukde eñwọñọ emi, emi David ekeyikde. Mbuọtidem ye idorenyin esie ekedoro ke mme eñwọñọ Abasi. Mme eñwọñọ emi Abasi ọkọñwọñọde ọnọ David ikokpuhu. Iduhe kiet ke otu mme eñwọñọ Abasi emi akanam okpude.
Questions
MME MBUME- .Tiñ nte ufọk David eketiede.
- Nso idi ntak emi David okoyomde ndibọp ufọk nnọ Abasi?
- Nso etop ke Abasi ọkọdọñ ọnọ David?
- Anie akada etop Abasi ọsọk David?
- Nso idi ntak emi ekesinde David unen ndibọp ufọk Abasi?
- Anie ọkọbọp ufọk ọnọ Abasi?
- Didie ke David ekenyene ubọk ke nditim ñkpọ mbeñe ufọk oro?
- Nso ke Abasi ọkọñwọñọ ọnọ David?
- Ebekpo anie ke eketiñ ñntiñ-nnim-ikọ ebaña ke ini emi?
- Nso ikedi ibọrọ David ke abaña etop Abasi?