Lesson 231 - Junior
Memory Verse
“Edieke utom eke owo ọkọbọpde odori ke esit osuk edidu, owo oro eyebọ utip” (1 Ñwed Corinth 3:14).Notes
Ekpri Mbuñọ Eyeneren Edidem
Ke ukpep-ñkpọ nnyin mfin emi iyekpep mbuk ke abaña ekpri mbuñọ eyenren edidem, emi akamanade ke ufọk edidem ke isọñ Israel ke ediwak isua emi ekebede. Enyiñ esie ekedi Mephibosheth.
Ke ini Mephibosheth ekedide eyen isua ition, ekọñ ama odu ke Israel, ndien kiet ke otu mme enyene ndik ekọñ oro ema ewot ete ye ete-ete esie. Edep Mephibosheth ama efehe ndik ke ini enye okutde nte mbon ekọñ Israel efehede ke iso mbon Philistine, onyuñ odu ke mkpa-idem mme mme asua eyebumede eduk ufọk edidem enyuñ emum ekpri eyen-eren edidem enyọñ nte mbuot ekọñ. Enye ama ama ekpri eyeneren oro, ke ntre enye emen enye onyuñ ọtọñọ ndifehe nyom itie udibe, edi, ke nyekidem ye usọp edinam ntre eyen oro ọbọhọ enye ọduọ ke isọñ. Mephibosheth ama ada ata idiọk unan ke ntak iduọ oro tutu enye akabade edi mbuñọ ke ofuri eyo uwem esie.
Ke ofuri ediwak isua emi Mephibosheth akadade ọkọri enye okoduñ nsan-nsan ọkpọñ ufọk edidem, ke ntre owo ikikemeke ndimum enye. Ema enyuñ ewot nditọ ete esie iren ñko ke ekọñ, ntre enye okoduñ ikpọñ anyan usuñ ọkpọñ ufọk.
Ke Oruk Saul
Ete mbuñọ eyeneren edidem ekedi Jonathan, ndien ete-ete esie ekedi Edidem Saul, akpa edidem ke Israel. Ke ini Jonathan okosuk edide eyen-ọñwọñ, ete esie ama okot David ete edibre harp ke okure edidem, ndien ke ediwak isua David okoduñ ke ufọk edidem. Jonathan ye David ema esidu ọtọ-kiet ebre enyuñ ekabare edi nti ufan. Ke akpanikọ, Jonathan ama ama David tutu enye onyime ndiyak itie ubọñ esie nnọ ufan esie. Ke ini Edidem Saul okokopde oro, enye ama ayat esit onyuñ odomo ndiwot David. Jonathan ama okop abaña idiọk uduak ete esie, onyuñ ọnọ David ntọt ete ọkpọñ okure edidem.
Abasi ama ọdọhọ ete ke David edidi udiana edidem koro Saul mikanamke akpanikọ inọ Abasi, inyuñ ikopke uyo Esie ke kpukpru ñkpọ. Edi David ama ọfiọk ete ke ikedighe ini Abasi kaña enye ndida ebekpo ubọñ, ke ntre enye ikeñwanake ye Saul, edi ama oduñ anyan ebiet ọkpọñ iyat-esit edidem.
Ediomi David Ye Jonathan
Ke usen oro, ke ini David ye Jonathan ekekọmde kiet eken unyọñ, mmọ ema ekere ete ke ekeme ndidi ke mme imọ idisoboke aba. Mmọ ema enam ediomi ke iso Abasi ete ke mme imọ iyema kiet eken kpukpru ini inyuñ ifọn ido ye ufọk kiet eken ke mme isua eke edide ke iso.
Ke ediwak isua David ekedi owo nduyo ke wilderness man ọbọhọ udim ekọñ Saul. David ama obon udim ekọñ esie, ke ini, ke ini, udim ekọñ mmọ ema etuaha, edi David kpukpru ini osuk owut mfọn-ido ye Saul.
Ndinyene Ima Nnọ Mme Asua
Jesus ekekpep ete: “Ema mme asua mbufo, enyuñ ebọñ akam eyom ufọn mmọ eke enamde mbufo isin-enyin” (Matthew 5:44). David ama enyene ima Abasi ke esit esie, ndien ke ini esie, enye ama anam ukem ukem nte Jesus ekedikpepde owo Abasi se ekpenyenede ndinam. Saul ama odomo ndiwot enye, onyuñ ayat esit eti-eti ke ini Abasi ọkọdọhọde ete ke David edida ebekpo ubọñ inyene. Edi David ikasuaha Saul, ama onyuñ otim ekpeme man ekunọ enye unan ke añwa ekọñ.
Edieke Jonathan ekpe efibede ufup, enye akpakada David nte owo usua esie ñko, ke ntak emi ekemekde enye nte andikara Israel ke itie Jonathan. Edi enye ama enyene ima Abasi ke esit esie, onyuñ ama David ke ini akpadade enye nte owo usua.
Ema Eti Ediomi
Ke ini Saul ama akakpa, ye Jonathan ye nditọ ete esie, owo ikekopke ñkpọ ndomo-kiet ibaña ubon ubọñ oro. Edi ke ini Israel ema eketọñọ ndiduñ ke emem, David ama eti ediomi esie ye Jonathan onyuñ ekere mme owo ufọk esie ekededi ọsuhọ ke uwem. Ama odu akamba eren kiet emi okoduñde ke okure edidem emi ekedide asaña-utom Saul ke ini oro, emi okonyuñ ọfiọkde ebiet emi Mephibosheth okoduñde ikpọñ ke ediwak isua. David ama ọdọñ ekeda mbuñọ eyeneren edidem esọk imọ.
Mephibosheth okoduk edi ye ndik, onyuñ ọtọñọ edọñ ke iso edidem. Enye ikọfiọkke mme eyeda imọ nte ufan mme nte owo ñkpọkọbi ekọñ. Ndien David ọdọhọ enye ete, “kufehe ndik; koro ndinamde mfọn-ido ye afo mbaña Jonathan usọ, nyenyuñ nyak kpukpru iñwañ Saul usọ nnọ fi; afo eyenyuñ adia ñkpọ ke okpokoro mi kpukpru ini” (2 Samuel 9:7). Adaña didie ke idem akakpa Mephibosheth! Enye ekedi ye ndik, edi idaha emi eyeda enye nte eyen. Idighe enye ndiduñ ke okure edidem nnyuñ ndia ñkpọ ke okpokoro edidem kpukpru ini ikpọñ-ikpọñ edi eyeyak kpukpru inwañ emi ekeneyenede ete ete esie enọ enye ñko.
Mephibosheth ekedi mbuñọ inyuñ ikemeke ndikpeme iñwañ esie; edi akani eyen-ufọk, Ziba ama enyene ediwak nditọ ye ikọt esie emi ekenyimede ndinam utom nnọ eyen eyen akani ete ufọk mmọ, enyuñ ese ñkpọ ebaña ofuri iñwañ Mephibosheth.
Ekpe Utip Mfọn-Ido
Ntre ke ekekpe utip mfọn-ido emi Jonathan ekenyenede ọnọ David. David ikanamke ye Mephibosheth nte owo mkpọkọbi ekọñ, mme ndida isọñ emi enye akañwanade ekọñ ọbọ nte unen esie ke erikan. Enye akanam ye Mephibosheth ukem-ukem nte enye akpamade enam ye nditọ esie.
Mfọn-ido David ye Mephibosheth ama ebin ndik ye usua emi enye ekpenyenede abaña edidem ke ndibọ ufọk esie itie ubọñ mfep. Enye ama odu ke okure edidem, enyene emem ye uforo.
Ini ama odu emi akani asaña-utom, Ziba, okodukde odu ndibọ udeme Mephibosheth. David akaka ekọñ, ndien ke ini enye ọnyọñde edikop ete ke ema ebiaña imọ ndisana inyene Mephibosheth nyak nnọ asaña utom, enye ama ọdọhọ ete yak ebahare inyene oro ke ufọt owo iba. Edi Mephibosheth ama okop inemesit eti-eti ye David ke ndinim enye uwem nnyuñ nnọ enye ebiet iduñ (“Koro ofuri ufọk ete mi mikedighe baba ñkpọ kiet ke mibọhọke mbon mkpa ke iso ọbọñ mi edidem ndien afo ekesin owo fo ke otu mme andidia ñkpọ ke okpokoro fo”) koro enye mikekereke ndinyene ediwak isọñ (2 Samuel 19:28). David ndikọñyọñ ekọñ ye uwem ekedi ñkpọ inemesit ọnọ owo mbuñọ. Enye ama okop uyuhọ ndibiat nsuhọ uwem esie ye David, owo Abasi, inyuñ iyomke ukpono efen inọ idem esie.
Questions
MME MBUME- Nso ikedi enyiñ mbuñọ ekpri eyen eren edidem?
- Anie ekedi ete esie?
- Ini ewe ke nnyin ikekpep ñkpọ ibaña ete esie?
- Nso ikedi ediomi emi ekenamde ke ufọt David ye Jonathan?
- Nso ikedi ntak emi David mikoduñke ke okure Edidem Saul?
- Nso ikotibe inọ Saul ye Jonathan?
- Nso ikedi ntak emi David ekekerede ñkpọ abaña ufọk Saul?
- Anie ekedi ñkukure eyen Saul emi ọkọsuhọde ke uwem?
- Mbuk emi etre didie?