John 14:1-31

Lesson 235 - Senior

Memory Verse
“Ekuyak esit otimere mbufo, ebuọt idem ye Abasi, enyuñ ebuọt idem ye Ami. Ediwak ufọk edu ke ebiet Ete Mi; edieke mikpedige ntre, ñkpọdọhọ mbufo; koro mmọñ ñka ñkotim itie nnim nnọ mbufo” (John 14:1, 2).
Cross References

I Jesus Ọnọ Mbet Esie Emi Eketimerede Esit Idọñesit

1. Jesus ọñwọñọ nditim itie nnọ mmọ, John 14:1-3

2. Enam Usuñ, Akpanikọ ye Uwem añwaña Thomas emi mike-nimke ke akpanikọ, John 14:4-7

3. Eyarade ndibe ñkkpọ emi odude ke edisana eduana ke ufọt “Ete ye Eyen” enọ Philip emi oko-timerede esit, John 14:8-11

4. Jesus ọñwọñọ ọnọ mbet eke enimde ke akpanikọ ete ke mmọ eyenam utom eke okponde akan, John 14:12-14

II Eñwọñọ Iberedem

1. “Iberedem Efen” eyedi ndiduñ ke nsinsi, John 14:15-17

2. Eyeyarade Jesus enọ mme mbet edi idighe ererimbot, John 14:18-24; Matthew 18:20

3. “Iberedem emi edide Edisana Spirit,” eyedi Andikpep mmọ, John 14:25, 26; 16:12-14

4. Jesus ọnọ mme akpatre ikọ idọñesit, John 14:27-31

Notes
SE EKPEPDE EBAÑA

Mme Esit Eke Etimerede

Ekikere ama otimere mbet nte mmọ eyomde ndidianare ñkpọñ Jesus, koro Enye ọkọdọhọde ete, “Nnyene ndidu ye mbufo kaña ke ekpri ini,” ndien “Mbufo ikemeke ndisim ọtọ nte ñkade” (John 13:33). Edi Christ, ye esit mbọm ye udọñ ndidọñ esit mmọ oro etienede Enye esit, ada ndinem ikọ emi edi: “Ekuyak otimere mbufo: ebuọt idem ye Abasi, enyuñ ebuọt idem ye Ami. Ediwak ufọk edu ke ebiet Ete Mi; edieke mikpedige ntre, ñkpọdọhọ mbufo; koro mmọñ ñka ñkotim itie nnim nnọ mbufo. Ndien edieke ñkade ñkotim itie ntre nnọ mbufo, nyefiak ndi ndida mbufo nnọ Idem Mi; man mbufo enyuñ edu ke ebiet eke Ami ndude” (John 14:1-3).

Ini ama odu emi, “ntantafiọn usenubọk ekwọde uyo kiet, kpukpru nditọ Abasi enyuñ esiode mkpo” (Job 38:7); edi usen ama edi emi idiọk-ñkpọ ekemende utọ ebuana oro efep ke otu ñkpọ emi Abasi okobotde onyuñ ada isuñi edi ke ererimbot. Idiọk-ñkpọ ama abiat ebuana Abasi ye owo onyuñ anam ibak ke ererimbot; edi Abasi ọkọfuhọ abaña se Enye okobotde edi ke ọyọhọ ifiọk Esie Enye anam ekikere nte idiọk-owo ọkpọbọhọde. “Ediwak ufọk edu ke ebiet Ete Mi.” Abasi Ete, ọkọdọñ Christ edi ke ererimbot man ada Enye ọnọ Idem Esie, man owo ekededi eke efakde ke Iyip Jesus oduñ ye Enye ke nsinsi. Kere nte editiede ke ini mme ikọ oro John okokopde oto akwa uyo ke Heaven ediwọrọde osu: “Sese ebiet iduñ Abasi omodu ye owo. Enye eyenyuñ oduñ ye mmọ; ndien mmọ eyedi ikọt Esie, Abasi ke Idem Esie Eyenyuñ odu ye mmọ, onyun edi Abasi mmọ” (Eriyarare 21:3)!

Ufọk Ete

Edisana Obio oro, Obufa Jerusalem emi John okokutde nte ọsuhọrede, edi Ufọk Ete. Ediwak ufọk edu ke esit, eye akan nte ekemede ndibuk; Jesus ama aka nditim mmọ, oro edi ndibeñe ufọk oro nnọ mmọ emi emade Enye. Kere mme nsem-nsem efak usuñ gold ye ndiye ibibene eke edade itiat Jasper enam, mmọñ uwem, mme eto eke mfri adatde kpukpru ọfiọñ, emi enyuñ enyenede ndiye ikọñ, kpukpru edi ufọk Ete nnyin. Enye kokot nnyin ete idi ididuñ ye Imọ ke nsinsi. Edara nnyin mme idiọk udọ ke ntatubọk, efen mme idiọk-ñkpọ nnyin enyuñ ekpe isọn nnyin oto ke Iyip Eyen Esie. Eti ye edisana Owo awa Idem Esie ke krọs man idiọk ye ndedehe owo ọkpọbọhọ. Anie edi oro eke ekpesimede osim idaha eke enye esinde akwa uduak Abasi?. Anie ọfiọk ñkpọ osim idaha eke enye enyenede ebiet mme usuñ inemesit eke ọfọnde akan enye emi Enye ọnọde?

“Mbufo emenyuñ efiọk usuñ ebiet eke Ami ñkade” (John 14:4). Jesus ama anam otim añwaña ete ke Imọ ikoto Abasi idi, ndien ke inyuñ ifiak itiene kpa Abasi. Isua ita emi Enye akanamde utom akanyan ubọk owut usuñ nsinsi Uwem. Enye ekekpep mme owo abaña edikabare esit ye obufa emana. Enye eketiñ ọnọ mmọ abaña uwem eke akande idiọk-ñkpọ ye nte mmọ ekpesanade enyuñ enanade ndo. Enye ọkọdọhọ mmọ ebet ke Jerusalem tutu eyọhọ mmọ ye odudu emi otode Enyọñ. Enye ama etiñ ọnọ mmọ abaña Iberedem emi ediduñde ye mmọ ke nsinsi. Enye ọtọñọ edinam Udia Ọbọñ ye Ediyet Mbet Ukot. Enye okowuk mmọ ete enam edinam baptism enyuñ enim ke “enyiñ Ete ye Eyen ye Edisana Spirit.” Ke akande emi, Enye edi Usuñ. Oto ke uwa Idem Esie ye ediduọk Iyip Esie ke owo enyene utebe-ikpe ke idiọk-ñkpọ esie.

Abasi Ita Ke Kiet

“Enim Mi ke akpanikọ ete, Ami ndu ke Ete, Ete onyuñ odu Mi ke idem; midighe, enim se ntiñde ke akpanikọ ke ntak utom Mi.” Jesus okoyom mbet Esie ediọñọ Enye nte kiet ke otu mbuot Abasi Ita ke Kiet. Ke ini Peter ọbọde eriyarare onyuñ ọfiọkde owo eke Jesus edide, enye ama ọdọhọ ete, “Afo edi Christ, Eyen Abasi uwem.” Jesus ọkọbọrọ ete ke eriyarare oro oto Heaven, ndien ke “nyebọp ufọk Mi ke enyọñ itiat emi” (Matthew 16:16-18). Ufọk Abasi Christ enyene ndidiọñọ Enye nte Andikpep emi Abasi ọkọnọde edi ye nte Abasi nde, ñko ke Enye edi Eyen Erọñ Abasi emi ekewade enọ mme idiọk-ñkpọ ererimbot. “Ebuọt idem ye Abasi, enyuñ ebuọt idem ye Ami.” Emi ke ikọ efen ọwọrọde, “Nim ke akpanikọ ete ke Ami ndi Abasi.” “Owo eke okokutde Mi okokut Ete” Christ ekedi ọyọhọ eriyarare Ete. Nte ñkukure Eyen, Jesus Christ ekedi “ata mbiet Idem Esie” (Mme Hebrew 1:3). Emi iwutke ite ke enye ekedi ata owo oro edi ekedi ata mbiet. Ntime mme utọk iduhe ke edinam mme uduak Mmọ. Kiet otim ayarade uduak Enye eken.

Ñwọrọ nda mbuot Abasi ita ke kiet etim eyarare ke ibuot ñwed emi. Jesus ọkọdọhọ ete, “sia Ami nnyọñde ntiene Ete.” Emi ekpep ete Ete ke Heaven, Jesus ke isọñ, mmọ edi nsio nsio. Enye ñkọ onyuñ ọdọhọ ete, “Edi Iberedem, kpa Edisana Spirit, emi Ete edinọde edi ke enyiñ Mi, Enye eyekpep mbufo kpukpru ñkpọ, onyuñ anam mbufo eti kpukpru se Ami ñketiñde nnọ mbufo” (John 14:26). Mi ke ufañ ñwed Ikọ Abasi kiet nnyin ikut nte eyararede Abasi Ita ke kiet oto ke Ete ndidọñ Edisana Spirit editi mme ñkpọ oro Jesus, Eyen, eketiñde. Etiñ ebaña Edisana Spirit mi nte ọyọhọ ita. Odu ebuana ke Edisana Mbuot Abasi emi nnyin mitimke ifiọk, edi nnyin imokut ite ke odu edisana Abasi Ita ke Kiet: Ete, Eyen ye Edisana Spirit. Imonyuñ ikut nte eyararede Abasi Ita ke Kiet emi ke ini Uduọk-mmọñ Christ, Edisana Spirit ọsuhọre odoro Eyen nte ibiom ndien Ete etiñ ikọ oto ke Heaven.

Ke ini Jesus ọdọhọde Philip, “Owo eke okokutde Mi okokut Ete,” Enye ama etiñ se ikponde ikan Philip ndikut ke enyin ikpọhidem esie. Mbiara ikpọhidem emi idighe ata idem nnyin. Nnyin imekeme ndidiọñọ owo itiene nte ikpọhidem esie etiede; edi ima itim imehe inyuñ idiọñọ mmọ, edi edu ye uwem mmọ anam itim ima mmọ. Ekedi ntre ye Christ, ikedighe ikpọhidem me uduot idet Esie ke ekeda ediọñọ Ete, edi akwa esit mbọm oro, ima emi Enye ekenyenede, edu uwem Esie ye utom emi Enye akanamde akayarare Ete ọnọ mbet.

Uduọk-mmọñ Ẹdisana Spirit

“Ke akpanikọ ke ndọhọ mbufo, owo eke ọbuọtde idem ye Ami eyenyuñ anam utom eke Ami nnamde; enye eyenyuñ anam utom eke okponde akan oro: sia Ami nnyọñde ntiene Ete” (John 14:12). Eñwọñọ emi anam nnyin ifiọk se Baptism Edisana Spirit ọwọrọde. Edi enọ odudu ndida nnam utom. “Edi mbufo eyebọ odudu, ke Edisana Spirit ama edi edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judea ye Samaria tutu osim utit ererimbot” (Utom Mme Apostle 1:8). Enọ odudu emi, Uduọk-mmọñ Edisana Spirit, idighe enọ edinam asana, emi edide ediyet esit asana.

Edinam asana edi edisana uwem, edi Uduọk-mmọñ Edisana Spirit edi enọ odudu. Ema enam David asana ke ini enye ọbọñde akam “Bot edisana esit nnọ mi, O Abasi” (Psalm 51:10). Ema enam Isaiah asana ke ndo ndo oro mbubek ikañ emi otode itie uwa otukde enye mkpọk inua. Uduọk-mmọñ Edisana Spirit ikoduhe ibọhọke tutu osim Usen Pentecost ke ekeñwaña Edisana Spirit eduọk, ndien mme owo ebọ Uduọk-mmọñ Edisana Spirit ye ikañ. Ndisana owo eyo oko eketiñ ikọ nte Edisana Spirit esinde mmọ etiñ; John ọkọyọhọ ye Edisana Spirit toto ke idibi eka esie; edi ke Usen Pentecost owo ikie ye edip ema ebọ Uduọk-mmọñ (edibuk) ke Edisana Spirit. Edisana Spirit ikọyọhọke mmọ ikpọñ edi ama ọyọhọ ofuri ufọk emi mmọ eketiede, ye ntọtuñọ uwem mmọ emi ọyọhọde ye akpa odu-uwem mmọñ.

Uduọk-mmọñ Edisana Spirit iketreke ke Usen Pentecost koro imokot nte ekeñwañade enọ ke ufọk Cornelius ke isua itiaita ama ekebe (Utom Mme Apostle 10:44-46) ye ke Ephesus ke isua edip ye ita ama ekebe (Utom Mme Apostle 19:6). Mmọ ekenyene ndisem ke usem ke mme ini oro ke ini ndiwut idiọñọ Uduọk-mmọñ Edisana Spirit. Utibe idiọñọ emi iketreke ke eyo Ñwed Abasi; edi man ekem ye ikọ Abasi, “koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” (Utom Mme Apostle 2:39). Abasi ke okokot, ke añwañwaña Edisana Spirit ọnọ mmọ oro ebọde ọyọhọ edinam asana. “Nte mbufo ekebọ Edisana Spirit ke ini enimde ke akpanikọ?” (Utom Mme Apostle 19:2).

Questions
MME MBUME
  1. Ke mmọñ ke etiñ ọyọhọ-ọyọhọ ebaña Heaven?
  2. Tiñ nte editọñọ ntak ndi Jesus editiede.
  3. Tiñ ukpuhọre emi odude ke nte Edisana Spirit akanamde utom ke ini eyo Akani Ediomi ye eke eyo emi.
  4. Nso idi ntak emi esit okotimerede mbet ke ini emi?
  5. Nso eñwọñọ ọkọnọ mmọ idọnesit
  6. Mme eñwọñọifañ ke ekeme ndikut ke ibuot ñwed emi?
  7. Nte nnyin imetiene ibuana ke mme eñwọñọ emi mfin?
  8. Siak ndusuk utom emi Edisana Spirit anamde mfin ke ererimbot?
  9. Siak nsio-nsio itie ke Ikọ Abasi emi ayararede Abasi ita ke kiet.
  10. Ke ini ewe ke eñwọñọ Iberedem ọkọwọrọ osu?