Lesson 238 - Senior

Memory Verse

“Mbeñeke mbaña mmọ emi ikpọñ, edi mbeñe mbaña mmọ nde eke ebuọtde idem ye Ami oto ke ikọ mmọ, man mmọ kpukpru ekpakam edi kiet, nte Afo, Ete, odude Mi ke idem, Ami nnyuñ ndude ke Afo; man mmọ enyuñ edu ke nnyin: man ererimbot enim ke akpanikọ ete, edi Afo ọkọdọñ Mi” (John 17:20, 21).

Cross References

I Jesus, Eyen Abasi

1. Ini edinọ Christ ubọñ nte asañade ye odudu Abasi Ete ama ekem, John 17:1; 1 Peter 1:18-21

2. Edinọ Enye ubọñ eyeda nsinsi uwem ọnọ kpukpru mmọ emi edinimde Ete ye Eyen ke akpanikọ, John 17:2, 3; 3:14-16

3. Jesus ama ọbọñ akam ndifiak mbọ akpa ubọñ Esie, John 17:4, 5; Ñwed Mbon Philippi 2:6-9; Mme Hebrew 1:3

4. Mbet ema ebọ mme ikọ Christ, ke ntre ebọ ediyarade idaha Messiah Esie, John 17:6-8; Matthew 16:13-17

II Akam Jesus Ke Abaña Ufọk Abasi

1. Andinyaña ama ekpe Ete ubọk ete anam mbet ediana kiet onyuñ adiañade mmọ ọkpọñ ererimbot, John 17:9-11; 10:28, 29; Ñwed Mbon Philippi 4:7

2. Jesus akada enyiñ Ete ye Ikọ Esie akama mbet Esie, John 17:12-14

3. Mbet ema enyene utom ndinam; mmọdo ikanaha esio mmọ ke ererimbot efep ke utọ ini ntem, John 17:15, 16; Ñwed Mbon Philippi 1:23-25

III Edinam Asana Ye Akpan Utom Esie

1. Ekenyene ndinam utom Edinam Asana oto ke akpanikọ Abasi, John 17:17; 1 Ñwed Corinth 1:30; Mme Hebrew 10:10; 13:12, 13

2. Jesus akanam Idem Esie asana man mbet Esie ekpesana, John 17:18, 19; Ñwed Mbon Ephesus 5:25-27

3. Mme andinim ke akpanikọ ke ofuri emana ema ebuana ke akam mkpe-ubọk edinam asana ye edidiana kiet oro, John 17:20; Utom Mme Apostle 10:15, 34, 35; Mme Hebrew 2:9-13

4. Edidiana kiet Ufọk Abasi eyeyarade ọnọ ererimbot akpanikọ emi odude ke Christ, John 17:21-23; Utom Mme Apostle 2:1; 4:13, 14; Ñwed Mbon Rome 12:5

5. Jesus ọkọbọñ akam man ata Ufọk Abasi akpanikọ emi enamde asana ekpedu ye Enye ke ubọñ ke akpatre, John 17:24-26

Notes

SE EKPEPDE EBAÑA

Akwa Oku Nnyin

Nnyin imokut nte emende nsio-nsio idaha utom eke prophet, oku ye edidem emi ekedude ke idak ibet edian ọtọ kiet ke Jesus Christ. Mme utom emi kiet kiet ekemen owut idaha utom eke Jesus edinamde nte uduak Abasi asañade. Prophet edi owo emi etiñde etop Abasi ọnọ mme owo, oro edi utom emi Jesus akanamde ke isua ita ye ubak ke adañemi Enye okodude ke isọñ. Oku edi enye emi Abasi emekde ndida ke ibuot mme owo ke iso Abasi. Ke akakan akam mkpe-ubọk emi edima Apostle ewetde onim ọnọ nnyin, ebemiso ewut udiana idaha akwa utom Jesus nte Akwa Oku Abasi ye akwa Andikpe-ubọk nnọ mme ukpọñ owo. Ebiet utom ye utom emi edu ke Heaven ke ubọk nnasia Abasi “Ndi Christ Jesus emi akakpade, ñkpakam ndọhọ nte, Jesus emi ekesetde ke mkpa, emi odude ke ubọk nnasia Abasi, emi onyuñ anamde mkpe-ubọk ọnọ nnyin” (Ñwed Mbon Rom 8:34). Akpatre idaha utom Jesus, edi eke Edidem, emi ediyarade ke ini utom mkpe-ubọk okurede. Do ndien ke ediyara Jesus anyanya nte Edidem mme ndidem ye Ọbọñmme mbọñ, emi edidade ọyọhọ inemesit ọnọ ata ediwak ndisana ikọt Abasi ye mme udim enyọñ, edi akwa ñkpeñeyeñ eyemum kpukpru mmọ emi ekesinde Jesus ye ikot Spirit. Nnyin imotim inim ke akpanikọ ite ke akpatre idaha utom Jesus emi eyesọp ndida itie.

Akam Ke Abaña Idem Esie

Nte mme akwa oku ke mbuk Israel ekesibemde iso kpukpru ini ewa uwa enọ idem mmọ ndien ediwa enọ mbio obio, kpasuk ntre ke Jesus eti andinam Ibet ọsọñọ ada akanam ke ndiberede akwa akam mkpe-ubọk Esie ye ebeñe ke abaña Idem Esie. Jesus ama ọfiọk ete ke ini emi ekenimde ama ekem eke Enye ediyakde edisana uwem Esie ọnọ ke abaña mme idiọk-ñkpọ ubon owo ke ererimbot. Enye ama etiñ ete ke ini ekem, Enye ekekeme ndinam emi sia Enye ama ekebem iso ekpe ekọm urua uwem Esie ke esit Esie. Ema enenim ini ndutuhọ Jesus ke ñkanika Abasi tọñọ ke ata editoñọ ini, ndien iduhe akpan ini eke ekpetiede ntre ọnọ ubon owo. Emana Jesus ekedi ntak akwa idaresit ke otu udim mme angel ye nditọ owo, edi ini mkpa Esie ama ada uwọrọ-ufin idiọk-ñkpọ ọsọk kpukpru mme ata andinim ke akpanikọ. Ini emi ekekutde akakan esuene Christ nte ọkowọrọde ada ekedi ini emi ekanamde eñwọñọ Abasi ke abaña edifak owo ọwọrọ osu, (Se ke Genesis 3:15). Ema ebiat odudu satan oto ke edikan emi Christ akande mkpa ke krọs. Akam emi Enye ọkọbọñde ọnọ Idem Esie ikebañake ndutuhọ, esuene ye isuñi idiọk-ñkpọ emi edisimde Enye nte ekọm urua erifak; edi ñkukure se ikebehede Enye ikan ekedi man oto ke edikpe ekọm urua emi ekpenọ Abasi Ete ubọñ.

Usuñ Erifak

Idiọk-ñkpọ akada akamba edidianade edi ke ufọt Abasi ye owo, ndien akana eyom usuñ emi owo edikemede ndifiak nyene emem ye ebuana ye Abasi. Ñkukure uwa emi okodotde ke abaña idiọk-ñkpọ, kpa Iyip Edisana Eyen Abasi edi se ekenyenede ndiduọk. Jesus ama ọbọñ akam man Ete akpada ubọñ oto ke ediwa uwem Esie, ndien ke akpatre, Ete ñko akpada ubọñ ebe ke ediwak owo emi edade esin ke erifak ye edinen ido. Ke ntak uwa emi, nditọ owo ekeme ndida ke iso Abasi, koro ema eyet ukpọñ mmọ ke Iyip Eyen Erọñ. Jesus edi andiyarade Abasi Ete nnọ ererimbot, “uyama ubọñ Abasi, ye ata mbiet Idem Esie.” Oto ke mbuọtidem ke Eyen Abasi ye ediduọk Iyip Esie emi odotde, ekeme ndida owo ini kiet efen nduk ke ifiọk ye ubon Abasi. “Edieke Spirit Abasi emi akanamde Jesus eset ke mkpa oduñde ke esit mbufo, Enye emi akanamde Christ Jesus eset ke mkpa eyenyuñ anam ikpọhidem mbufo emi enyenede ndikpa edu uwem, oto ke Spirit Esie emi oduñde ke esit mbufo.” “Koro mbufo mikọbọhọ spirit ufin eke esinde mbufo etọñọ ntak enyene ndik; edi mbufo ekebọ Spirit eke enyenede mmọ emi edade esin ke ubon Abasi, emi anamde nnyin ikot Abasi, ite, Abba, Ete. Spirit ke Idem Esie etiene spirit nnyin edi ntiense ete, nnyin idi nditọ Abasi” (Ñwed Mbon Rome 8:11, 15, 16). Ifiọk Abasi emi ayarade ke Christ, ye ebuana kiet ye Enye, edep nsinsi uwem ọnọ kpukpru ata mme andinim ke akpanikọ.

Jesus eketre akam emi akabañade Idem Esie ye Ete ke ndikpe ubọk mbaña edifiak nnyene ubọñ Esie. Akayak ini esisit utom emi eti Jesus ekedide ke isọñ ndinam okure. Enye ama eti ebekpo ubọñ, mme mfia ndiye ufọk, ebuana kpukpru ini ye Ete Esie, emi Enye ọkọkpọñde ke Heaven man edinam utom emi okure, ndien Spirit Esie ama enyene udọñ ndikpọñ ebiet ukut ye mmọñ-eyet emi mfiak ñkodu ye Ete.

Akam Ke Abaña Mme Apostle

Jesus ekedi ndinyaña mme owo ke ererimbot nsio ke mme idiọk-ñkpọ mmọ, edi akam Esie ke utọ ini emi ekeneñede abaña mbet. Utom edikwọrọ Gospel eyedoro mmọ ke afara ke ini Jesus edinyọñde okodu ye Ete, ata akpan-ñkpọ ekedi mbet ndikem ke idaha utom emi ekekotde mmọ ebaña. Jesus eketiñ akpan akpan ọnọ mbet, emi ke akpatre ekediọñọde nte mme Apostle, koro ekedide utom mmọ ndikpeme nnyuñ nsuan Ikọ ye Gospel emi Jesus akadade edi mi ke isọñ nnọ ererimbot.

Jesus ama etiñ iñwañ-iñwañ ete ke Imọ ima itim iyarade Ete Imọ inọ mme owo emi ekewọñọde ke ererimbot etiene Imọ. Jesus ama akama mbet Esie ke enyiñ Ete; edi ke ini unyọñ Esie, Enye ama ọbọñ akam ete yak Ete ọsọñọ mmọ idem onyuñ omum mmọ akama ke Gospel ke emi Christ mididuhe aba ye mmọ ke obukidem. Nditọ ukpep-ñkpọ Christ ke emi, ekeyom ndikabare ndi mme andikpep ukpep-ñkpọ Christ nnọ Christ, ndien Jesus ama ebeñe ete Abasi ọkpọnọ mmọ mfọn ndisobo nnyuñ ñkan kpukpru ubiọñọ emi okpoyomde ndibiat obufa mbuọtidem mmọ.

Ukpeme Mme Mbet

Editim nduñọre akam emi otim owut ete ke owo ekeme nditak ke nsinsi okposuk edi nte enye ama ọkọbọ ata erinyaña ini kiet ke uwem emi. Anie ekeme ndineni ete ke Judas ama eneñede ikabaresit ke ini Jesus eketiñde abaña mbet Esie ete, “Mmọ emi afo ọkọnọde Mi; mma nnyuñ ñkpeme mmọ, ndien baba owo mmọ kiet ikatakke, ke mibọhọke eyen nsobo.” Ñkukure nsinsi ubọhọ emi owo ekededi ekemede nditim mfiọk edi ata edikabade mkpọñ mme idiọk-ñkpọ emi enye akanamde nnyuñ ñka iso nsaña ke esit uduak Abasi. Oro ekedi ndibe usuñ emi mbet ekedade enyene edikan, “mmọ ema enyuñ enim mme ikọ Fo” Jesus ọkọdọhọ ete “Ekpeme mmọ ke idiọk esie,” ye “mmọ midighe eke ererimbot kpa nte Ami mmendighe eke ererimbot,” emi owutde ete ke mmọ edu uwem eke okoñde akan idiọk-ñkpọ ererimbot. Edi Ete ọkọnọ Jesus kpukpru mbet, ndien Enye ama ekpeme mmọ. Duopekiet ema esọñọ eda koro mmọ ekenyimede ekpeme mmọ, ke ini Judas akatakde ke ntak idiọk mbumek esie ye idiọk-ñkpọ. Odudu mmum-ñkama Jesus edi ata utibe ñkpọ. Idighe uruk mfara ke idem ke eda ebọp owo Abasi edian ye Christ, inyuñ isioho enye ifep ke otu owo ke ererimbot, edi uruk ima ọbọp enye. Owo Abasi ekeme ndikpọñ Christ edieke enye amade, midighe enye osuk aka iso ye Christ koro enyenede ata ntọtuñọ ima. Ata owo Abasi ekere ukem nte mbet ke ini Jesus ọkọdọhọde ete, “Nte ke ọdọñ mbufo ñko ndidianare nnyọñ?” (John 6:67). Ibọrọ mmọ ekedi, “Ọbọñ, nnyin iditiene anie? Afo enyene ikọ uwem nsinsi” (John 6:68). Satan ododomo kpukpru Nditọ Abasi ndifiak ñkop mba nnyuñ ñkabare ntie nte ubuene ke ererimbot, edi mme andikan esọñọ eda ke Gospel man enam ikot ye edimek mmọ ọsọñọ ada koro mmọ ekut uyai Gospel, “koro uñwọñọ uwem emi odude ke emi ye eke uwem emi edidide asañade ye enye” (1 Timothy 4:8).

Baba owo kiet ikemeke ndineñere ntiñ nte ke mbet emi Jesus ọkọbọñde akam ọnọ ikenyeneke ata erikabare esit. Mmọ ema ebọ enyuñ enim Ikọ Abasi emi Jesus akadade edi ke isọñ, mmọ ema enim Jesus ke akpanikọ nte ñkukure edibon Eyen Abasi. Mmọ ikedighe aba eke ererimbot; mmọdo ererimbot ekesuade mmọ. Nte esuk eyom mme ediyarade efen ndiwut ete ke ema efak mme owo emi esio ke idiọk-ñkpọ? Edinyaña ukpọñ ikpọñ ọnọ mme owo odudu ndidu uwem eke okoñde akan idiọk-ñkpọ; edi Jesus ama ọfiọk ete ke mbet Esie ema eyom mfọn ndika iso ndu uwem owo Abasi ke edidiana kiet ye eken, ndien ke akpatre uwem mmọ, ekpebeñidem ndikut Abasi ke Heaven. Enye ọkọbọñ akam ete ekpenam mmọ esana oto ke akpanikọ Abasi. Jesus, ke mbiet owo emi Enye ekedide, ke uwem, mkpa, ediset ke mkpa, ye edinyene ubọñ, edi ediyarade ñwut ofuri akpanikọ Abasi.

Edinam Asana

Edinam asana edi ediyet kpukpru nda-mmana idiọk-ñkpọ mfep; enye osio oruñ idiọk-ñkpọ ye kpukpru obukidem efep, onyuñ owot uduot Adam ofuri-ofuri. Jesus ọkọdọhọ ete, “Ọfọfọn ọnọ mmọ eke esit mmọ asanade: koro mmọ eyekut Abasi” (Matthew 5:8). Edinam asana ọnọ owo edisana-uduot ye edisana uwem ke esit emi edide ata akpan-ñkpọ ke uwem erikan.

Mbemiso edi etiene Abasi, ukpọñ kiet kiet enyene uduot idiọk-ñkpọ iba, oro edi idiọk-ñkpọ emi owo adada ubọk esie anam, ye nda-mmana idiọk-ñkpọ. Odu akpan utom-mfọn emi adade itie ke ini owo ọbọde utebe-ikpe emi otode do esọhi kpukpru mme ukwañ-ñkpọ efep, ndien owo oro akabare edi obufa ke Christ Jesus. Odu ñko, ọyọhọ utom mfọn iba oro edi edinam-asana, emi edide edisio mfep nnyuñ ñwot nda-mmana idiọk-ñkpọ emi ekedade eto akpa ete ye eka. Owo enyene ndimana ke Abasi nnyuñ mbọhọ ibet idiọk-ñkpọ mbemiso enye odot ke akwa utom edinam-asana emi, ukem nte ekedide ye mbet emi Jesus ọkọbọñde akam abaña.

Ke abaña nda mmana uwem idiọk-ñkpọ, idighe owo edi ntak. Idighe enye akanam, inyuñ ikemeke nditua ñkpọfiọk ke ndimana ntre. Usuñ ubọhọ emi Abasi enyenede edi ediyet, emi ekotde edinam-asana, edisana uwem, mme ima emi ọfọnde ama. Ke ini anam-idiọk amanade obufa, esibe mme mfri idiọk-ñkpọ efep ke enye, ndien mfri Spirit ọwọrọ ada ini kiet; edi oruñ nda-mmana idiọk-ñkpọ ke osuk ododu ndien eyenọ mfina. Enyene ndisio enye mfep nnyuñ ñwot enye oto ke edinam-asana.

Ikọ emi, nam-asana, ọwọrọ ñkpọ iba, ndidianare nnim ke abaña saña-saña ye akpan utom, ye ndiyet nnyuñ nnam asana. Utom odu emi owo enyenede ndinam, nte Jesus akanamde Idem Esie asana; mme ke ikọ efen, Enye ama afiak edemere ntọtuñọ ediyak Idem-Esie nnọ ke abaña utom emi Abasi ekenimde ọnọ Enye. Abasi ñko enyene utom emi anamde ndifiak nda Iyip Christ nyet ke esit owo man okpowot nda-mmana uduot idiọk-ñkpọ. Ke ini owo ayakde idem esie ọyọhọ-ọyọhọ, ke ini enyenede ọyọhọ udọñ ndidianade ñkpọñ nda-mmana idiọk-ñkpọ nnyuñ nnyak idem nnọ Abasi, ke ini enyenede mbuọtidem ke Iyip Jesus, ini oro ndien ke ekop akam esie ke Heaven, Abasi onyuñ anam ọyọhọ utom edinam-asana ofuri-ofuri ke esit oro. Owo emi eyetde asana ntem, onyuñ ayakde idem ọnọ, enyene ukem esit oro okodude ke Christ Jesus. Eyen ufọk-ñwed kiet eketiñ abaña edinam asana ntem “Ekeme ndidọhọ ete ke owo ọfọn ama, edieke enye eyerede ikot emi Abasi okokotde osim utit; ye nte Abasi oyomde kpukpru owo ema Enye ke ofuri esit, ukpọñ, ekikere, ye odudu, ye mbọhiduñ nte idem esie, mọdọ enye edi edinen owo ke anamde ntre, oro edi enye eyere ikot osim utit anam se Abasi okobotde enye abaña.” Ekeme ndinyene Edisana uwem emi nto ke ifiọk edinam asana emi otode ke nsọñ-urua Iyip Jesus ikpọñ-ikpọñ.

Ntak Emi Edinam Asana Edide Akpan Ñkpọ

Nte akwa utom edinam asana edi ikpikpu? Nte eyak ifet enọ owo Abasi ndiyom mme nditre ndiyom ọyọhọ utom mfọn iba emi? Idighe ntre! Abasi ama etiñ ọnọ kpukpru owo ke ofuri Edisana Ñwed Abasi ndiyom utibe mfọn emi. Enye ama owuk Abraham ete, “Saña ke iso mi, nyuñ fọn ma” (Genesis 17:1); ndien Enye onyuñ owuk Nditọ Israel ete “Koro Ami ndide Jehovah Abasi mbufo; enam idem mbufo esana ndien, enyuñ edi edisana: koro ami nsanade” (Leviticus 11:44). Ewuhọ emi enọde mmọ eke enyañade inyeneke ukpuhọre mfin emi. “Koro emi edi uduak Abasi, ete mbufo ekpekabare esana” (1 Thessalonica 4:3). Owo ekpekeme didie ndidọhọ ete imama Abasi ke ofuri esit, ukpọñ, ekikere, ye odudu, edi enye inyimeke ndinam uduak Abasi?

Ediwak itie edu ke Ikọ Abasi emi Bible etiñde abaña ukpep-ñkpọ edinam-asana ye edisana uwem eke owo Abasi. Ererimbot ye satan eñwana ye enye, koro edisana uwem okoñ akan nte enenide mme se etiñde idiọk edian. Ikemeke ndidi mbiet mme abiaña edinam asana, enyene ndidi ata nnen-nen onyuñ oto ke Ọbọñ. Utom mfọn emi eyeberede inua-otop Heaven ọnọ andinyene enye. “Etiñ enyin esaña ke emem ye kpukpru owo; enyuñ esaña ke edisana ido; koro esiode oro efep, baba owo kiet idikwe Ọbọñ” (Mme Hebrew 12:14). Edinam asana eyenam uwem Owo Abasi ye utom Abasi esie ke isọñ eneñere okut unen. Edi ata mem-mem ọnọ enye emi eyetde asana ndikan ererimbot, ndien mfọn oro eyeda edidiana kiet esin ke Ufọk Abasi emi baba ñkpọ efen mikemeke ndinam ntre. Ererimbot iditreke ndikut edidiana kiet emi odude ke ata edisana Ufọk Abasi akpanikọ, mmọ eyenyuñ efiọk ọfọn, ete Christ, idorenyin ubọñ, odu ke ufọt mmọ.

Questions

MME MBUME

1. Nso ikoyom nditibe nnọ Jesus, Eyen Abasi ke ini emi?
2. Nso idi udori nditọ owo ke ndinim Jesus Christ ke akpanikọ?
3. Akam mkpe-ubọk ke John 17 akabaña mme anie?
4. Ewe usuñ ke ekeda ekpeme mbet ke ini Jesus okodude ke isọñ ye mmọ?
5. Ewe usuñ ke edikpeme mmọ ke adaña ini emi Jesus edinyọñde etiene Ete?
6. Nso idi ntak emi mbet ekesuhọde ke ererimbot, okposuk edi nte Jesus ọkọkpọñde mmọ?
7. Tiñ se edinam asana ọwọrọde.
8. Siak mme mfọn emi enyenede eto edinam asana, nyuñ tiñ ntak emi ọfọnde ndinyene enye.
9. Nso idi ntak emi ererimbot ye satan esuade enyuñ eñwanade ye edinam asana?