Lesson 240 - Senior
Memory Verse
“O Jehovah, afo omokop se mbon ukut eyomde: eyesọñ mmọ esit, eyekpañ utọñ fo” (Psalm 10:17).Cross References
I Edinam Abasi Ye Mbon Iseri
1. Uduak Abasi ke nditunọ nditọ Esie isiñwañake owo ini oro, Psalm 10:1; Job 23:10; Isaiah 48:10; 2 Ñwed Corinth 12:7; 1 Peter 1:6, 7; 4:12, 13
2. Iseri ye abiaña edu ke esit idiọk owo, nte ọwọrọde owut idem ke edu uwem esie, Psalm 10:2-6; 49:18; Mme Ñke 3:7; 13:15; 21:4; Ñwed Mbon Rome 8:5-8; 12:16; 1 John 2:16; 1 Ñwed Corinth 8:2; Ñwed Mbon Galatia 6:3
3. Uwem emi idiọk owo odude oyom usuñ eti-eti ọkpọñ edinen-ido, Psalm 10:7-11; 37:1, 2, 9, 12-15, 17, 21, 32, 35, 36; Ñwed Mbon Rome 1:18-32; Mme Ñke 6:12-19
4. Edinam Abasi ke abaña mbon nsọñibuot ayarade ke akam David, Psalm 10:12-18; Eriyarare 6:10; Job 10:14; Ecclesiastes 8:11; Jeremiah 2:22; 17:9, 10; Amos 5:12; Ñwed Mbon Rome 6:23; 2 Peter 3:9
II Mbiara Uduot Owo Ye Idori-Enyin Israel Ke Abaña Obio-Ubọñ
1. Ukpep-ñkpọ nte ke Abasi iduhe, ye mmọ emi ekerede ete Abasi iduhe, edi se Abasi asuade, Psalm 14:1; 10:4; 36:1; Jeremiah 5:12-14
2. Abasi mbọm emi oyomde kpukpru owo ebọ erinyaña, okut ete ke mmọ ekekoi eduk ukwañ usuñ, Psalm 14:1-3; Ñwed Mbon Rome 1:21-32; 3:10-12, 23; Genesis 6:5; 18:23-26; 2 Chronicles 16:9; Isaiah 1:6; 59:1-8; 64:6
3. Esua enọ ndusuk owo, enyuñ ekot mmọ mme anam ukwañ-ñkpọ, Psalm 14:4-6; 119:86; 143:3; Matthew 10:17; Luke 21:12-18; John 16:2
4. Mi ke eyarade ewut mfọn ye mbọm nsinsi Abasi emi miteñeke owo enyin, Psalm 14:4-6; Utom Mme Apostle 10:34, 35
5. Etiñ utibe ikọ ebaña erikpu Israel ke abaña ediomi mmọ ye Abasi, ye idara emi edidude ke ini ukara ke tọsin isua, Psalm 14:7; Exodus 19:5, 6; Deuteronomy 4:7-13, 23; 5:2, 3; Mme Hebrew 8:6-13; Jeremiah 31:31-34; 32:37-42; Ñwed Mbon Rome 4:9-16; 11:1-15
III Unana Idori-Enyin Idiọk-Owo Ke Abasi
1. Ido ye edu uwem mme anam-idiọk eyarade unana idori-enyin mmọ ke Abasi, Psalm 36:1-4; Mme Ñke 12:15; 20:6; 30:12; 2 Ñwed Corinth 10:12
2. Mmọ emi edoride enyin ke Abasi eyekut mbọm Esie, ye akpanikọ, edinen-ido, ubierikpe, ye mfọn-ido, Psalm 36:5-9; 63:3; 103:17; 108:4; Ñwed Eseme 3:22, 23; Isaiah 63:7
3. Akam edinen owo ọsọñọ etiñ abaña uduak Abasi ke abaña ndinen-owo, Psalm 36:10-12; Ñwed Mbon Rome 4:21; 2 Peter 1:4
Notes
SE EKPEPDE EBAÑAIkọ Abasi Ye Idaha Esie Kabaña Idiọk-Ñkpọ
Efiọk David, Edidem Israel, ke Ñwed Abasi nte Prophet.. Nnyin ñko imọfiọk emi ite edi akpanikọ koro ediwak se enye ewetde ewut ediwak akpanikọ ke Gospel, ye mme etop emi Abasi ke Heaven ọnọde ke abaña uduak Esie ye uduot owo. Ke mme Psalm ita emi nnyin ikpepde mi, nnyin imekeme ndikut ata utom emi Edisana Spirit anamde ke ndida owo Abasi emi usuñ ndiwet nsinsi akpanikọ emi Abasi oyomde nnyin ida inyene. Ke mme etop emi, nnyin imokut mbọm, akpanikọ, mfọn-ido ye edinen ubiere-ikpe emi etode nsinsi Abasi, emi “idiyakke mme edue-isop ebọhọ” (Nahum 1:3).
Ke mme Psalm emi, nnyin imokut edinam Abasi ke abaña idiọk-ñkpọ ye anam-idiọk. Imokut mi ite ke ebuana iduhe ke ufọt edinen ido ye ukwañ-ido. Imonyuñ ikut mi ite ke usuñ iba kpọt edu, usuñ uwem ye usuñ mkpa. Mme owo ekeme ndinam mbubru ye idiọk-ñkpọ, edi mme usuñ Abasi enen. Mme owo ekeme ndinọ idiọk-ñkpọ ufañ enyuñ eyom se etiñde enyaña idem ke abaña idiọk-ñkpọ mmọ, edi Abasi okot enye se enye edide onyuñ ọnọ owo emi esinde enye ke esit ufen.
Ke ekikere owo, idiọk-ñkpọ edi nsio-nsio. Ke edu ubiere-ikpe nnyin, nsio-nsio ufen edu enọ nsio-nsio idiọk-ñkpọ ye ubiat-ibet ke ererimbot. Edi ye Abasi, idem idiọk-ñkpọ emi ekpride akan, osuk adada ọyọhọ edidianare ñkpọñ ebuana ye mme eñwoño edidiọñ Esie edi. Ndien ke ini owo ama okoduk usuñ mme anam-idiọk, ñkpọ efen iduhe inọ enye, akan ndinyime ufen emi asañade ye usuñ oro, ibọhọke enye efehe ebine Iyip Mbọm oro, onyuñ oyom edifen ke mme idiọk-ñkpọ esie. Ke ntre, Abasi ibahakede idiọk-ñkpo nte owo anamde, man enọ ndusuk akamba idiọk-ñkpọ nsinsi ufen edi enọ ndusuk ñkpri idiọk-ñkpọ ufen eke midighe ke nsinsi. Abasi ese idiọk-ñkpọ ke esit owo, onyuñ otim ọfiọk se enye edide, ndien Enye ọnọ ubiere-ikpe emi odotde.
Akpan Idiọk-Ñkpọ Uduot Owo
Etiñ enọ nnyin ete ke satan ama ọduọ ọkpọñ Heaven ke ini enye ekemenerede idem esie onyuñ odomode ndida itie Ata Edikoñ. Satan ama ada ñkohoridem odomo owo, ndien owo ama ọduọ. Ñkohoridem ndien ekedi ntak iduọ owo. Enye edi akpan idiọk-ñkpọ eke onukde owo ndinam mme idiọk-ñkpọ eken. Idiọk-ñkpọ emi inyeneke satan ikpọñ, koro nnyin iyekut ite ke enye odu ke idem kpukpru owo emi mimanake obufa. Enye akam añwañwana ye ndisana owo, onyuñ edi usuñ idomo eke ọsọñde ediwak ndikan. Sia edide idiọk-ñkpọ, Abasi asasua enye! (Mme Ñke 6:16-19).
Nnyin imekeme ndikut ke mme ñwed David emi, mme enyene-ndik idiọk-ñkpọ emi ekemede ndida itie ke esit iseri emi minyeneke mfaridem. Owo ñkohoridem efefik ubuene onyuñ obure mbure abaña udọñ esit esie. Enye ọdọdiọñ owo utuk onyuñ ọdọhọ ke esit esie ete ke imọ imenyene kpukpru ñkpọ baba ñkpọ kiet ikemeke ndibiọñọ imọ. Edieke enye osuk ayakde ekikere esie ndisaña ntem, enye eyekañ Abasi Heaven, ndien ke iseri ye ntañidem esie, eyedọhọ ete ke imọ, ikpikpu owo, idisehekede ke nsinsi, idinyuñ iduọhọ. Ke akade iso, edieke enye ayakde idem esie ndinyime nte ke Abasi mmọdo, enye eyedọhọ ete ke Abasi oro inyeneke ima ibaña ubon owo, mme Abasi ekeme ndinam se Enye ọñwọñọde edieke Enye amade. Oro edi mme enyene ndik utip ñkohoridem unana ntunọ.
Edi Prophet Abasi ewet aka anyan ke ñkpọ emi onyuñ owut ete ke mkpasip idiọk-ñkpọ odu ke esit kpukpru owo eke mimanake obufa, koro kpukpru owo eke misineke ke otu erọñ Abasi edi ata mbiara enyuñ esaña ke usuñ idiọk-ñkpọ ye ukwañ. Enye etiñ ete ke Abasi mbọm etie ke Heaven Esie ese ererimbot mme anam-idiọk. Enye onyuñ okut ete ke kpukpru mme anam-idiọk ema ekpọñ eti usuñ enyuñ ewaha usuñ idem mmọ. Enye etiñ ete ke mmọ ema ekabare edehe. Enye ọsọñọ etiñ ete ke baba mmọ kiet inamke eti ibọhọke mmọ ewọñọde ekpọñ ukwañ usuñ mmọ, ebọ edifen, etebe mmọ ikpe, emana obufa enyuñ eda mmọ esin ke ubon Abasi.
Mme Psalm emi ewut nnyin ete ke anam-idiọk emi Edisana Spirit mitukke, ke ini Enye edide ndiwut mme owo ufọn ndinyene Abasi, inyeneke mbak Abasi. Utu ke oro, idiọk owo emi ababiaña idem-esie. Baba eti ñkpọ kiet iduhe ke uduot owo oro. Enye ọyọhọ ye ukwañ-ñkpọ ye abiaña, ama onyuñ ọwọñọre ọkpọñ ndinam se ifọnde. Enye odọhọ ete “Abasi iduhe.” Enye okokoi aduak mme idiọk-ñkpọ esie onyuñ anam mmọ nte uduak esie edide . Enye ekere ete ke Abasi idimiaha imọ ufen ke abaña idiọk-ñkpọ imọ onyuñ ọdọhọ ete ke Abasi efre ndise imọ, ndien ke Enye idikwe udop idiọk-ñkpo imọ, idinyuñ inọhọ imọ ufen eke odotde.
Emi edi ndise owo emi ama ọkọduọ, emi idiọk-ñkpọ ama akabiat, emi etienede udọñ ye uduak esit esie. Enye eneñede asua onyuñ ọsọñ ibuot ye kpukpru se ifọnde onyuñ ọsọñ ibuot ye Anditọñọ kpukpru nti ñkpọ. Ke akpanikọ, iduhe nnen-nen mfaña ke esit owo ekededi, nte ke ọyọhọ ye unen ubiere-ikpe Abasi edi utip kpukpru owo eke esọñde ibuot ye Enye, emi enyuñ etienede usuñ esit mmọ.
Akwa Abasi Mbọm eke Heaven
Edi nnyin imokot ite ke Abasi okut idiọk-ñkpọ emi. Nnyin imenyene ndọñ-esit ke akpanikọ nte ke Abasi eyeñwam kpukpru mmọ eke ebuọtde idem ye Enye, nte ke eyenọ idiọk owo ufen, ndien Enye eyesuk ada odudu ye ukara ọnọ Idem Esie nte Enye emi odotde. Edisana Spirit anam nnyin itim ifiọk ke mme Psalm ita emi, nte ke Abasi okut udọñ ikọt Esie, nte ke Enye eyebeñe esit mmọ onyuñ atat kpukpru mmọ eke efikde ke ufin ye odudu ubiọñọ ayak.
Isọñ ufak emi oto ntak emi Ọbọñ edide Edidem emi akarade kpukpru ñkpọ, ndien usen kiet Enye eyediwuk Obio Ubọñ Esie onyuñ akara kpukpru mme andikara ererimbot. Enọ nnyin mi mbukpọñ ndise efen ke abaña ubọñ Obio-ubọñ oro, ebiet emi edidade edinen ido ye unen ekara, emi ñko ikọt Abasi edikarade ye Christ ye Ọbọñ mmọ.
Israel eyefiak eda itie mmọ ke ini oro, Edisana Spirit ọsọñọ ọnọ nnyin, ndien ñko uyọhọ uduak-ediomi Abasi eyewut idem ke isọñ. Akwa idara ye inemesit eyedu ke isọñ ke mme usen edinen ukara oro. Ọyọhọ edidiọñ Abasi eyewọrọ owut idem ke ini oro ke udomo emi owo mifiọkke mfin emi. Idem edikekere mbaña mme ubọñ emi esin andiwet Psalm ye nnyin ñko ifiori ekọm emi odotde inọ Abasi Heaven emi Enye ikpọñ-ikpọñ enyenede odudu ye mfọn eke ekemde ndinam mme utọ utibe-ñkpọ oro.
Akamba ukpuhọre odu ke ini edade ekikere ibak ye mbubiam uduak mme idiọk owo ye satan, idiọk ete ufọk mmọ, edomo ye edinen ido ye anana utit mfọnido Abasi ofuri ererimbot! Mbọm Abasi ebe adaña! Akpanikọ Esie okoñ osim ke ikpa enyọñ! Edinen ido Abasi ebiet mme ikpọ obot! Mme ikpe Esie etuñọ! Mi ke Edisana Spirit ada mme ñkpọ eke ekponde, ekoñde, etuñọde enyuñ enyenede nnyọ ekan, emi owo ọfiokde man ekpep nnyin ntọtuñọ akpanikọ ke abaña anana utit odudu ye uyọhọ Abasi. Ntak emi esin Enye ọdọhọ ete ke nnyin imekeme ndifiọk mme ndibe ñkpọ Abasi, kpa ye nsinsi odudu ye mbuot Abasi oto ke mme ñkpọ emi nnyin ikutde kpa mme utom ubọk Esie (Ñwed Mbon Rome 1:20).
“Oh mbufo ekọm Jehovah; koro Enye ọfọnde: koro ima Esie odude ke nsinsi”
“Emi eketide nnyin ke itie ukut nnyin: koro ima Esie odude ke nsinsi”
“Onyuñ afabarede nnyin osio mme asua nnyin ke ubọk: koro ima Esie odude ke nsinsi”
“Oh mbufo ekọm Abasi enyọñ: koro ima Esie odude ke nsinsi” (Psalm 136:1, 23, 24, 26).
Questions
MME MBUME- Ke ama ekekpep mme ufañ ñwed ke itie edikpep nnyin, emi abañade ntunọ emi Abasi ọtunọde nnyin, nso ke afo ọkọdọhọ edi ntak ntunọ oro?
- Nte ọyọhọ ntak ntunọ emi Abasi esitunọde nnyin ye ediyet, esiwọrọ owut idem ke ini idomo oro? Midighe ntre, nso idi ntak?
- Nso idi akpan idiọk-ñkpọ uduot owo?
- Nso idi akpan mfaña owo emi minimke ete Abasi odu ke abaña Abasi nnyin?
- Nso ke Abasi okot owo emi ọdọhọde ete ke Abasi iduhe?
- Da se etiñde ebaña edinen owo nte ewutde ke ukpep-ñkpọ enyọñ obot (Matthew 5:3-12), domo ye se etiñde ebaña anam-idiọk ke ukpep-ñkpọ nnyin.
- Nte Abasi efre ererimbot? Nte Enye ikwe akpakip idiọk-ñkpọ ubon owo? Da ufañ ñwed sọñọ ibọrọ fo.
- Nso idi idori-enyin edinen owo nte ewutde ke itie edikot ñwed nnyin?
- Idori-enyin emi ọkọñọ ke nso?
- Nso akamba ntiñ-nim ikọ emi abañade Israel ke emen ewut ke ukpep-ñkpọ nnyin?