2 Samuel 24:1-25

Lesson 247 - Senior

Memory Verse
“Idige akwa odudu añyaña edidem; owo uko ibọhọke ke akwa nsọñidem” (Psalm 33:16).
Cross References

I Mme Ntak Edinam David Ke Ndibat Israel

1. Iyaresit Abasi ama obumede ke abaña Israel, ekeme ndidi ke mmọ nditọñọ ntak ñkokpono ndem, 2 Samuel 24:1; Judges 2:14, 20; 3:8; 10:7

2. Abasi akada David nte ñkpọ-utom man ọnọ Israel ufen, ke adañemi Abasi ọkọnọde David ufen ñko, 2 Samuel 24:1, 2; 1 Chronicles 21:1-3; Matthew 18:7; Deuteronomy 28:50; Judges 3:12; Jeremiah 5:15

3. Abasi ama ọnọ David ntọt emi enye okofumide, ke ntre enye ikenyeneke ntak ndinyaña idem, 2 Samuel 24:3, 4; 1 Chronicles 21:3, 4; Mme Ñke 12:15; 15:22; 29:1

4. Ubat-owo emi ekenamde ekedi ke otu mbon ekọñ idut Israel, ndiwut ntak emi akanade nte enam, 2 Samuel 24:5-9; 1 Chronicles 21:5-7; Psalm 20:7; Matthew 7:26, 27; Psalm 33:15, 16; Hosea 1:7; Haggai 2:22

II Ufen Abasi Ke Abaña Idiọk-Ñkpọ

1. David ama atua ñkpọfiọk abaña idiọk-ñkpọ esie, ke ndiyarade enye ọyọhọ-ọyọhọ, nnyuñ mbeñe Abasi edifen, 2 Samuel 24:10, 17; 1 Chronicles 21:8, 16, 17; Psalm 34:18; 51:17; 2 Ñwed Corinth 7:10

2. Abasi ama ọnọ David ifet ndiwut ntak idori-enyin esie ke edifak, 2 Samuel 24:11-13; 1 Chronicles 21:9-12

3. David ama anam owut ete ke Abasi ekedi idori-enyin ye ebiet ubọhọ esie, 2 Samuel 24:14; 1 Chronicles 21:13; Psalm 46:1; 118:8, 9; Mme Ñke 3:5; Isaiah 2:22; Habakkuk 2:4; Mme Hebrew 10:38

4. Mme ufen usobo emi ema ebiat ata nnen-nnen ibọrọ ubat owo emi, 2 Samuel 24:15; 2 Chronicles 21:14

5. Abasi ama etre ufen emi ke Jerusalem, 2 Samuel 24:16, 17; I Chronicles 21:15, 20

III Uwa Ke Ọtọ Ubek Ibokpot

1. Abasi okoyom David anam uwa ọnọ Imọ, 2 Samuel 24:18; 1 Chronicles 21:18, 19; Ñwed Mbon Rome 12:1, 2; Exodus 32:29

2. Ediyire David ke ndikpe ekọm-urua ñkpọ-uwa ye itie-uwa, owut ntọtuñọ ediyak idem nnọ Abasi, 2 Samuel 24:19-25; 1 Chronicles 21:21-27; Ñwed Mbon Philippi 3:7, 8; Matthew 16:24

3. Itie-uwa David oro ke akpatre ama akabade edi itie emi ekebọpde Itie-ukpono Abasi, 1 Chronicles 21:28-30; 22:1-5; 2 Chronicles 3:1

Notes
SE EKPEPDE EBAÑA

Owo Oro, David

Edidem David, ama akabade edi akani owo. Uwem esie ọkọyọhọ ye utom, ediñwana ekọñ ama ada akamba ubak ini ye ekikere esie. Edi okoto ke uñwam Abasi ke enye akada ediwak idut esin ke idak ukara esie. Israel ema eda isọñ emi Abasi ọkọñwọñọde ọnọ mmọ enyene ke ini ukara esie ye Solomon.

Ke ini edem, David ama anam idiọk-ñkpọ. Enye ama anam mme ndudue. Edi enye ama akabare esit ofuri-ofuri onyuñ ọbọ edifen. Kiet ke otu akam emi enye ekesiwakde ndibọñ ekedi, yak Abasi osio imọ efep ke ñkoi-nnam idiọk-ñkpọ emi enye akabatde nte Akwa idiọk-ñkpọ, man ikutaba mfọn Abasi. Ke ntak emi enye ekebierede ntem ke esit esie, Abasi ama ada enye anam ikpọ ñkpọ ke eyo uwem esie.

Nnyin imọbọ ekese eriyarare uduak Abasi ibe ke owo Abasi emi, nte owutde ke mme usuñ emi Abasi akanamde ye enye. Oruk akpanikọ oro ke enyuñ ekpep nnyin eto ekese Psalm emi David akadade ubọk esie ewet. Enye ama enyene akwa uteñe ọnọ Abasi ye mmọ eke Enye eyetde aran onim. Ama onyuñ esibet ini Abasi ke ekese ñkpọ emi enye ekerede ete edi uduak Abasi ọnọ enye, ndien ke edinam ntre, osio idem esie ke ọkpọsọñ oyomo nsia ye ndutuhọ efep. Enye ekedi anam-utom akpanikọ ọnọ Abasi onyuñ ekpere Abasi ke uwem esie.

Nnyin imekeme ndikere, ndien, ite ke ọkpọkọfọn akan edieke ñkpọ-ntibe emi mmikpakadaha itie ke uwem esie. Edi ñkpọ-ntibe emi akada mfuhọ ye editua mkpọfiọk edi. Edi sia mkpe-mbeiere okodude ke esit David, ñkpọ-ntibe emi kọsuñọ ke erikan; ndien ke ido editua ñkpọfiọk esie, idighe David ikpọñ, edi kpukpru nnyin imọbọ ukpep-ñkpọ ye ufọn ke spirit.

Owo itiñke inọ nnyin kpukpru se ibañade mbuk emi ọyọhọ-ọyọhọ. Owo itiñke inọ nnyin ntak emi kpukpru ñkpọ emi okotibede, mme se iketienede edinam oro ke edem. Edi etiñ enọ nnyin se ikemde ndiyarade ukpep-ñkpọ spirit ọyọhọ-ọyọhọ nte Abasi oyomde nnyin ibọ. Edi mme ñkpọ emi ke idikere ibaña ke ini ikpepde ukpep-ñkpọ emi.

Ubiom Ikpe Idiọk-Ñkpọ

Ikọ Abasi etiñ esisit ọnọ nnyin abaña nte Abasi akasuade edibat emi ekebatde Israel. Edinam David ikowutke ifiọk. Ediwak itie ke mbuk ayarade emi ọnọ nnyin. Ke akpa ifet, ewuhọ emi ama ọdiọk owo nte Joab, etubom ekọñ esie emi ekesitiede nte ikesidaha ini ikere ibaña eti ye idiọk ama asua ọnọ edidem ke ewuhọ emi ke ini enye ọkọbiọñọde ekikere emi. Joab ikonyimeke inọ David ndien se iketienede ke edem ayarade ete ke David ama anam ndudue ke enye ndikesin ekikere etubom ekọñ esie.

Ọyọhọ ñkpọ iba emi eneñerede osio ndudue David owut odu ke mme ikọ Abasi, emi okotode Prophet Esie, ye ufen emi eketienede ñkoi-nnam David.

Nte nnyin ifiọkde ito mbuk Ikọ Abasi, edi ikaba kpọt efen ke eketọñọ ntak ebat mme añwana ekọñ Israel ke mbuk eset mmọ. Edi ke ikaba efen oro, ekedi ke uyo ye ewuhọ Abasi. Ñkpọ ntibe enye emi ekedi ekikere David nte satan akadade enye usuñ, ama onyuñ ekeme ndidi ekikere esie ke ñkañ eken ke abaña mme ekọñ ini iso. Edinam David emi edi se Abasi akadade nte ntak ke ndida ubierikpe ntiene Israel. Ntak ubiere-ikpe emi, owo inyuñ isianke nnyin; edi ekeme ndidi ke okoto ke mmọ ndifiak nduọ nduk ke ukpono ndem, emi ekesidide saña-saña mmem-idem Nditọ Israel.

Ufọn ubat-owo emi ama abiara oto ke ubiere-ikpe Abasi, koro idiọk udọñọ eketienede kpa ke ukem usuñ oro mme abat-owo oro ekesañade onyuñ owot ediwak. Edieke idiọk-ñkpọ David ekedide idorenyin ye iberedem ke odudu ikọt esie, ke obukidem, enye ikenyeneke ibat owo emi enye okpokohode idem abaña sia ubọk ubiere-ikpe Abasi ama okosim mmọ. Ke esisit ini, ñkpọ emi ama ada ata ọkpọsọñ mmemidem ọsọk ofuri idut oro.

Ke ñkañ eken, edieke idiọk-ñkpọ David ekedide ndikokoi nduak ndinam ñkpọ emi mmikedighe uduak Abasi, ubọk Abasi ama ọbiọñọ enye ndisime edinam emi. Ke utit idiọk udọñọ emi, David ikenyeneke ñkpọ efen emi enye akpadade nte ukpeme. Mbọm Abasi ama onuk enye ndidori enyin ke akwa Abasi. Ufọn ndisaña ke mbuọtidem ye ñkop uyo nnọ Abasi ikpọñ edi se ekemende enim enye ke iso ebe ke mme enyene ndik ñkpọ ntibe emi mminyeneke udomo ke usuñ Abasi mme ke mbuk ñkpọ-ntibe ererimbot.

Edieke idiọk-ñkpọ David ekedide ntañidem, enye ekpekenyene ndikọm Abasi emi anamde idiọk-ñkpọ oro ayarade man enye ọkpọñ mbemiso ini ebe. Ke ediwak idaha, satan ada ntañidem man atab owo. Edi Abasi asua idiọk-ñkpọ onyuñ eneñere ọnọ ufen. Ana nnyin ikpeme usuñ ekededi ke esit ye ke uwem nnyin emi idiọk-ñkpọ nsobo ukpọñ ebede oduk.

Mbufiọk David Ke Ini Afanikọñ

Nnyin imekeme ndikut ke ñkpọ-ntibe emi nte ke Abasi ekebem iso etiñ ikọ ọnọ David ke ekikere esit esie. Abasi ama emen ifiọk idiọk-ñkpọ emi enye akanamde esin ke esit esie; ndien David eseme ọnọ Abasi oyom Ubọhọ. Nnyin imokot ite ke Abasi mbọm ama efen ọnọ enye.

Ama enyene mme ñkpọ emi akanade nte David anam mbemiso edifen ọyọhọ. Ye ata ediwak owo, mme ñkpọ emi eyedi ndineñere ukwañ-usuñ, oro edi ndidiọñ se ikabiarade ke ini mmọ ema ekedue owo efen ke usuñ ekededi. Abasi ifenke ofuri-ofuri ke idiọk-ñkpọ emi nnyin ikemede ndineñere ke idem nnyin. Ibet ye Eti-mbuk ekpep ntak emi anade nte eneñere Ukwañ-usuñ edieke Abasi enyenede ndifen nnọ nnyin. Edi odu ndusuk idiọk-ñkpọ emi enamde ye owo emi owo mmikemeke ndineñede. Owo emi ebiatde ke ikọ inua mme enọde unan ke usuñ efen, ekeme ndikpa mbem iso andidue ediyom edifen oto Abasi. Edifen ikemeke ndito mmọ oro aba, ndien ke edide ntre Abasi eyefen ọnọ andidue oro.

Odu saña-saña utip emi anade etiene ndusuk idiọk-ñkpọ okposuk edi nte ema ekemen ubiom-ikpe idiọk-ñkpọ oro efep, enye ama onyuñ ọbọ utebe-ikpe ọyọhọ-ọyọhọ ke iso Abasi. Ndusuk ini eyak ekpri ñkpọ ọsuhọ nditi enye emi ekefende enọ mbaña ukpe emi ekesiode enye. Ndusuk ini mme utip eke etienede uwem idiọk-ñkpọ edi udọñọ ke obukidem mme edibiomo ndo eke otode uwem idiọk-ñkpọ. Ndien ndusuk ini mme utip emi edi ntunọ ubiere-ikpe emi Abasi onyimede mme ọnọde ndisioño ñkpri ndek eken mme se misanake ke ñkañ spirit, ke uwem owo emi amanade obufa. David ama okut ete ke ndiyom edifen nto Abasi ke utọ ini emi idighe ñkukure se anade nte enye anam. Ema enọ enye ndimek kiet ke otu ubiere-ikpe ita nnọ idemesie ye idut esie.

Ke edimek esie emi, nnyin imekeme ndikut nte David akanamde ata ọniọñ-ọniọñ nte eren-owo akpanamde. Enye ama emek ndiduọ nsine ke ubọk Abasi, koro enye ọkodọhọde ete, “koro enye okponde mbọm.” Enye ikebeñeke ndifehe mbọhọ nnen-nen ufen ekededi emi ekedide esie. Enye ikemekke mmem-mem usuñ inọ idem esie. Ñkukure se enye okoyomde ekedi ufen esie ndito ubọk Abasi nnen-nen idighe ndito owo. David ama ọfiọk ima ye mbọm Abasi, enye onyuñ ofiọk ñko anana ntak esit ufup ye usua owo. Enye ama ọfiọk ñkpọ akaha ke ndimek ntunọ Ọbọñ.

Edieke David ekpekemekde ekọñ, enye ke idem esie ọkpọkọbọhọ, sia mbio obio ema ekenim ewuhọ ndikpan enye okuka ekọñ aba. Edieke enye ekpekemekde akañ, enye ikpọkọbọhọ ufen, koro ediwak ndima ikọt esie ekpenyime ndibọ ufen utu ke edidem mmọ anam ntre. Akan oro, enye ekedi imọ owo; ndien edieke owo mmikpọnọhọ enye udia, enye ekpekeme ndidep. Edi enye ama owut idaha esit esie ye ekikere ke ndimek ndiduọ nsine ke ubọk Abasi nnyuñ mbọ ufen idiọk udọñọ oro.

David ama ọfiọk ete ke Abasi iteñeke owo enyin ke mme ikpe Esie eyenyuñ ọnọ ufen aka ke ọtọ emi akpakade. Enye ama ọfiọk ete ke ubọk owo ndomo kiet mme ibibene okure ikemeke nditre ubọk ufen Abasi, ndikpeme enye mme ufọk esie. David ke edinyime esit okonim idem esie ukem-ukem nte nsuhọde ñkaha ke ofuri ofin esie adaña nte ikpe Abasi asañade. Edi akpanikọ nte ke Abasi ama okut onyuñ ọfiọk edinam owo Esie emi akatuade mkpọfiọk.

Mbuọtidem Ke Abasi Mme Ke Owo

Ntak emi David ekemekde ndiduọ nsine ke ubọk Abasi ekedi koro enye ekeberide edem onyuñ ọbuọtde idem ke odu uwem Abasi. Odu ediwak owo emi ekpeduọde esine ke ubọk owo, utu ke ndibuọtidem ke Abasi ke ini afanikọñ edide ke uwem mmọ. Mmọ ikwe anana-ibat tọsin owo emi Abasi ọdọñde esit, ọkọkde udọñọ, anyañade, onyuñ afakde. Se mmọ ekutde ikpọñ edi mbio emi mikemeke ndibọ ndusuk mfọn emi nto Abasi. Mbio emi ebuọtde idem mmọ ye owo ikwe owo emi ekedide mbuñọ nte ọfrọde onyuñ otorode Abasi. Mmọ esuk ekut mbio emi esinede ke ñkpọ umen okpo mme mbio emi ekutde ukut emi mmikọbọhọ se Abasi akamade ndinọ mmọ. Mmọ ñko enyuñ etre ndise ñkañ edem ndise eken, ndikut udim mbon ñkpọ-nnam emi etode ndudue uduot owo ye unana edida ñkut ñkpọ anyan usuñ, ekpaña oto ke edidomo nse mme ndikokoi nnam.

Ekikere ye mbọm uduot owo emi otode enye emi enyenede ukpono onyuñ okponde akan ke otu owo idighe se emende edomo ye unana utit mbọm ye ima Abasi nnyin. Ererimbot inyeneke mfuhọ eke Heaven mmikemeke ndikọk; edi ererimbot enyene mme mfuhọ emi ema ekededu, ndien mme ọwọrọ-iso owo edediọñ enam enye okpon akan. Eyak nnyin itie nte David, emi ekemekde ndiduọ nsine ke ubọk Abasi akan ubọk owo, ndinyuñ mbuọtidem ke edinyaña eke otode Abasi akan ke mbufiọk ye ọniọñ esie.

Ido David Ke Abaña Uduak Abasi

David okowuk esit esie ke Abasi, kpa ke emi enye odude ke akwa mfuhọ ye afanikọñ nte ke idahemi. Emi ekedi akwa ukpuhọde emi okodude ke ufọt esie ye Saul emi ekebemde enye iso akara. Mbọm Abasi ọkọkpọñ Saul koro enye ekefrede Abasi ofuri-ofuri onyuñ ọwọñọrede ọkpọñ Enye. Ke ini nnan-enyin esie, emi ekekperede utit uwem esie, Saul ama oyom Abasi edi okoyom ke ñkpọk-inua onyuñ akpa mkpa ata owo mfiak-edem.

Ke ñkañ eken, ke ini David okodude ke afanikọñ enye ikefreke Abasi esie, edi, utu ke oro, ekefehe ebine Enye. Abasi ekedi ebiet udibe esie ke ini nnan-enyin. Abasi ekedi akpa emi David ekebinede ndiyarade mme idiọk-ñkpọ esie nnọ, ye akpa emi enye ekebinede oyom uñwam ye ubọhọ. David ama afiak edem, edi ema emenere enye koro enye akatuade mkpọfiọk onyuñ otop idem esie odori ke mbọm Abasi. Saul ama akañ mbuọtidem onyuñ atak ke nsinsi koro enye ọkọkpọñde Abasi onyuñ esin nditua mkpọfiọk mbaña idiọk-ñkpọ ye nsọñ-ibuọt esie.

David ikesinke Abasi nte mme Jew ekenamde ke ini Christ. Enye ikoyomke ndinam ñkpọ eke ọkpọbiọñọde mme akpabiatde uduak Abasi. “Yak inam uduak fo” ekedi akam emi odude David ke esit edieke mikosiohosio itiñ. Ndien ini enye emi ñko owo ikosioho ifep. Enye ama okut ndik idiọk ñkpọ esie onyuñ ọdọhọ Abasi ete yak ubọk esie odoro imọ ye ufọk ete imọ ke idem. Oro ọkọwọrọ ete ke nditọ eka esie iban ye iren ekenyene ndibuana ye enye ke ufen Abasi.

Se oruk esen ebeñe emi! Mme Jew ke mme usen Christ ekebọñ ata ukpuhọre akam. Mmọ ekebeñe ete “Iyip Esie akpakam ọkọbọ nnyin ye nditọ nnyin.” Mmọ ikenyeneke inem ke uduak Abasi ke abaña mmọ nte idut. Mmọ ikoyomke udeme ke uduak Abasi ke abaña mmọ. Mmọ ikekereke mme nditọ mmọ edu ke idak isuñi emi anamde mmọ idotke ndinam uduak Abasi. Mmọ ema emek ubiom-ikpe akwa idiọk-ñkpọ emi enọ idem ye nditọ mmọ, oro edi idiọk-ñkpọ emi minyeneke adaña sia ekedide edisin ye edibiere ikpe mkpa nnọ Eyen Abasi. Isuñi emi ye ubiom-ikpe ama ada edisuan ye ọyọhọ edikan etiene idut mmọ.

Edi nnyin imekeme ndikut mi ite ke David ama ekpeme ekikere ye uduak Abasi eti-eti. Abasi ama etiñ ete ke nsinsi ubọñ eyedaha ada ke ufọk David. Ke enye ndikpọdọhọ nte, “Yak ubọk fo odoro mi, ye ufọk mi” oro edi akam emi owo okpoyomde ndikop ñkan enye oro David ọkọbọñde ke akpa emi okpowutde ete ke enye ọwọrọ ke ediomi emi Abasi akanamde ye enye ke abaña ufọk esie. Emi ọkpọkọwọrọ ete ke ekpebiọñọ uduak Abasi, midighe Abasi ọwọñọre ọnọ owo efen, ke mibiatke-biat ifep. Nnen-nnen edinam esie ayarare owut ke Abasi ndibọrọ akam esie nnyuñ nnim ediomi emi enye ọkọdọhọde ete ke Obio Ubọñ David edidi Obio Ubọñ emi edidude ke nsinsi.

Owo Abasi Jebusite Ye Uwa Emi David Ọnọde Abasi

Nnyin imekeme ndikut mme utibe edinam owo efen emi ekenyenede inem mme edinam emi. Edi akpanikọ, Araunah ama enyene ediwak ntak ke enọ emi enye ọkọnọde David: Enye ama-abak Edidem David; enye ama enyene mbọm abaña mbio obio; otim ekere abaña uwem esie; ndien enye ñko owut udọñ esie ke ndikpono Abasi. Araunah ama ebeñe idem ndinam akamba uwa emi akakpade enye ñkpọ. Enye ama ebeñe idem ndinam udeme esie nnyuñ nnam ñkan udeme esie. Enye ama ebeñe idem ndiyak kpukpru nnọ man anyaña uwem esie ye uwem mbon Israel eken.

Mme edinam emi ema eyarare ewut se ikodude ke esit David. Enye ikamaha ndiwa uwa nnọ Abasi ke se mmikpaha enye ñkpọ. Edieke enye ọkpọkọbọde enọ Araunah, uwa oro ekpekedi eke Araunah ikpekedighe eke esie. Abasi ọkodọhọ David akanam uwa, David ikenyeneke inem ndiyom usuñ efen ekededi ke ebede usuñ Abasi ke ñkpọ emi. Enye ama ebeñe idem ndikpe kpukpru ekọmurua.

Baba usuñ kiet efen ikpekenemke Abasi esit, emi oyomde ofuri ñkop-uyo ke kpukpru ewuhọ Esie. Nte ekedide, okposuk edi nte David ekekpede ọyọhọ ekọmurua ke isọñ ye ke uwa, ama osuk odu uwa emi Araunah akanamde. Ema ebọ enye itie iduñ ye ufene emi enye ekenyenede onyuñ adade odu uwem. Enye ekenyene ndikọtọñọ uwem esie obufa ke ebiet efen. Edi enye okpokokut uwa esie nte otim ofọnde akan edieke enye okpokodude uwem ndikut usen emi uduak Abasi ke abaña isọñ oro ọkowọrọde ada.

Ema edọhọ ete, “Ebiet emi eyakde idem enọ Abasi ofuri ofuri eyekabade edi ufọk odu uwem Abasi.” Emi edi akpanikọ ke ñkañ spirit ukem nte edide eke obukidem. Ebiet emi ekenamde uwa emi ekedi Obot Moriah, emi Solomon ọkọbọpde Itie-ukpono Abasi. Ke akpatre itie uwa emi ama akabade edi ebiet emi ata ediwak tọsin owo ekebọñde akam enyuñ ebọde ibọrọ akam mmọ.

Kere baña mme tọsin uwa emi ekedade eka do, ndien Abasi onyuñ ọbọ do! Kere baña anana ibat tọsin owo emi ekebode edifen ke mme idiọk-ñkpọ do! Kere baña ediwak emi ekeyetde esit asaña! Kere baña ediwak emi ekebọde edidiọñ! Akamba ekọm-urua, ke akpanikọ, ke uwa Araunah ye David man enyene itie emi edikponode Abasi.

Ikañ Abasi ama oto ke Heaven edita uwa emi David akanamde do. Ema ebọ uwa oro. Edifen nnọ ama ada itie, do ke idiọk udọñọ eketre ke idut Israel. Emem ye edinyime Abasi ama afiak etiene idut oro, Israel ye edidem David. Se utibe edifen ye mbọm Abasi nnyin!

Questions
MME MBUME
  1. Nso idiọk-ñkpọ ke David akanam ke ini ñkpọ-ntibe emi?
  2. Ekere ete nso ikanam enam idiọk-ñkpọ oro?
  3. Ikafañ ke ñwed Abasi etiñ nte ekenamde oruk ubat owo oro ke Israel?
  4. Didie ke ubọk Abasi ọkọkpuhọre onyuñ anam nsu-nsu idori-enyin emi ekpekedide eke David okpu?
  5. Nso oruk ufen ke ekenọ ke ntak idiọk-ñkpọ emi?
  6. Nso utibe ñkpọ ikada itie ke abaña ufen emi?
  7. Nso edu uwem David ewọrọ ewut idem ke ido nte enye ekemekde ufen?
  8. Wut ukpuhọre ke edu uwem David ye Saul ke ini mmọ kiet kiet ekedude ke afanikọñ.
  9. Nso eti edu uwem odu ke ido ye edinam Araunah?
  10. Siak ñkpọ iba efen emi akadade itie ke Obot Moriah, nyuñ tiñ se mbita edade enọ ke ñkañ spirit.