Lesson 235 - Junior
Memory Verse
“Ekuyak esit etimere mbufo, ekunyuñ eyak esit mbufo ekop ndik” (John 14:27).Notes
Ke Usọrọ Passover Ama Ekebe
Jesus ye mbet Esie ema enim Passover ọtọ kiet. Ke udia mbubreyo ama ekebe, Jesus ama etiñ ọnọ mmọ abaña mme ñkpọ-ntibe emi edidade itie. Ini editap Jesus ye mkpa Esie ama ekpere, mi ke Jesus ọkọnọ mme anditiene Enye ikọ nsọñ-idem.
Jesus ọkọnọ mbet item ete ekutimere esit mmọ. Edi akpanikọ, ediwak ñkpọ mfuhọ ema etibe enọ mmọ, ndidomo mbuọtidem ye nsọñọ-nda mmọ. Ke akpanikọ, mmọ ema ekere ebaña Judas Iscariot emi ọkọkpọñde otu ke ema ekekure udia mbubreyo ọwọrọ oduk ke ekim. Nte Jesus iketiñke ite ke owo mmọ kiet eyetap Imọ? Nte Jesus ikedebike uyo inyuñ iyak inọ Judas Iscariot? Kpukpru emi ọkọwọrọ nso? Nte kiet ke otu duopeba eyetap Christ esie?
Ndusuk ini mmọ ema edu ke mkpaidem ke abaña ikọ oro Peter eketiñde ete ke imọ iyenyime ndiyak uwem imọ ke ntak Christ. Peter eketiñ ete ke imọ ididuọhọ ke ntak Christ, okposuk edi nte kpukpru mmọ eken ekpeduọñọde (Matthew 26:33). Jesus ikotoroke Peter ke abaña utọ ikọ mbuọtidem oro, ikonyuñ isuaha inọ enye ke ndinyene iwuk ke idem esie. Jesus ọkọdọhọ Peter ete “Okoneyo emi, ke ekikọ mikpọkke kaña afo eyekañ Mi utim ikata” (Matthew 26:34).
Ntọt Emi Ekebemde Iso Enọ
Jesus ama ebem iso ọnọ mmọ ntọt ke abaña mkpa Esie, ete, “Ke ema emen Mi ekpọñ isọñ, … Enye etiñ ntre ndiwut oruk mkpa eke Enye edikpade” (John 12:32, 33). Nte Andida mmọ usuñ eyekpọñ mmọ? Nte eyekpọñ mmọ etie ikpọñ enyuñ enana idorenyin?
Ke akande oro; akana etiñ enọ mbet ebaña ndutuhọ emi editienede mmọ ke Christ ama ọkpọñ mmọ (John 16:2). Akana mmọ ekop ebaña esuene emi edidide, ete ke ererimbot eyesua mmọ koro enye akasuade Christ (John 15:18).
Mme Ikọ Ndọñ-Esit
Ukpep-ñkpọ nnyin edi ubak ke akpatre nneme emi Jesus ekenyenede ye mbet, emi Enye akamade ke ofuri esit Esie, mbemiso ekpe ikpe Esie. Ke ndinam mfina esit mmọ efere, Jesus ama etiñ mme ikọ ndọñ-esit emi: “Ekuyak esit otimere mbufo, ebuọt idem ye Abasi, enyuñ ebuọt idem ye Ami.” Mme ikọ emi ikedighe ndidọñ mbet esit ke ini oro ikpọñ, edi osuk enyenyene ndọñ-esit ọnọ mme anditiene Christ tutu osim mfin emi. Mme ikọ Christ ema eñwam mmọ ndimum mbuọtidem ye idorenyin ke Enye ñkama.
“Ekuyak esit otimere mbufo.” Ekeme nditimere mmọ efen abaña se mmọ ekpenimde ke akpanikọ, ye ke owo emi mmọ ekpebuọtde idem. Edi mbet Christ akpan-akpan ikpanaha etimerede esit mmọ ntre ebaña ini iso. Ke mbuọtidem mmọ ke Ọbọñ, mme anditiene Christ ekeme ndisọñọ nda ke ini eñwan ye idomo ekededi.
Ke Esit
Jesus iketiñke ite ke ikpanaha ekikere mmọ otimere. Enye eketiñ ete esit mmọ okutimere! Nnyin ibuọt idem ye Abasi ke esit nnyin, idighe ke ekikere nnyin. Erinyaña-ukpọñ idighe ke ekikere; enye edi ifiọk emi inyenede ke ini esit nnyin enende ye Abasi. “Koro owo ada esit onim ke akpanikọ enyene edinen ido; onyuñ ada inua onyime enyene erinyaña” (Ñwed Mbon Rome 10:10). Ke ini esit owo eyirede ye Ọbọñ, ke usuñ kiet ekededi, ekikere esie itimekere. Paul ekewet ñwed ọnọ mbon Philippi, “Ndien emem Abasi, emi ayañade ifiọk owo, eyekpeme mbufo esit ye ekikere ke Christ Jesus” (Ñwed Mbon Philippi 4:7).
Mfin emi, nnyin ifiọkke se inade ibet nnyin ke iso, edi inaha ete mbuọtidem nnyin enyek. Nnyin ibuọt idem nnyin ke Abasi. Nnyin imọfiọk ite ke “Kpukpru ñkpọ esaña ọtọ kiet enam ufọn enọ mmọ eke emade Abasi” (Ñwed Mbon Rome 8:28). Andiwet Psalm etiñ abaña owo emi abakde Abasi onyuñ onimde mbet Esie: “Idiọk etop idinamke enye ndik: esit esie ọmọwuhọ, ọbọt idem ye Jehovah” (Psalm 112:7). Ke Ñwed Mme Ñke nnyin imokot ite, “Tim kpeme esit fo kan kpukpru se ekpemede; koro uwem otode enye” (Mme Ñke 4:23).
Mbuọtidem
Ndinim Abasi ke akpanikọ eyeñwam owo editre nditimere esit esie. David eketiñ ete ke imọ ikpatak mikpedighe inimde ke akpanikọ (Psalm 27:13). Owo ekeme ndidu ke idak ọkpọsọñ ekikere, mbiomo, ye idomo, edi akananam esit mbuọtidem isimke ebiet emi idorenyin miduhe aba. Andiwet Psalm etiñ ete: “Ukpọñ mi, nsinam afo ọfuhọde, onyuñ otimerede mi ke idem? Dori enyin ye Abasi” (Psalm 42:5).
Iwuk
Jesus okoyom mbet Esie enyene ukem iwuk oro ke Imọ, nte mmọ enyenede ke Abasi. Enye okoyom mmọ enim Imọ ke akpanikọ. Edi ata akpan ñkpọ mfin emi ñko, ete nnyin inim Jesus ke akpanikọ. Ediwak owo enyene ifiọk ukem nte mme Jew ke ini Obufa Testament ekenyenede ebaña Abasi, edi owo enyene ndinim Jesus ñko ke akpanikọ man oto do enyene nsinsi uwem (John 3:16). Ebọ erinyaña oto ke ndinim Ọbọñ Jesus Christ ke akpanikọ (Utom Mme Apostle 16:31). Nnyin inyene ndinim ke akpanikọ ite ke Jesus edi Eyen Abasi.
Nditim Itie
Jesus ama etiñ ọnọ mbet ete ke Imọ imọñ inyọñ. Edinyọñ Esie ama enyene ntak. Enye ama enyene utom ndinam. Enye eketiñ ete ke Imọ iyetim itie inọ mmọ. Ke Heaven, ebiet eke Abasi Ete odude, do ke ufọk odu ọnọ ediwak owo. Jesus odu do idahemi ke otim itie onim ọnọ ikọt Esie. Edieke enyañade ukpọñ fo, Jesus ke otim itie do onim ọnọ fi.
Etiñ ete ke mme ñkpọ emi edade ebọp akwa ufọk nnyin oro ọkọñọ ke utọ uwem emi nnyin idude mi. Nso utọ ñkpọ-ubọp-ufọk ke afo ọnọ eka ndida mbọp akwa ediye ufọk oro, ndi “gold, mme silver mme ọsọñ-urua itiat, mme obukpọk mme nyanyaña mme mbio”? (Kot 1 Ñwed Corinth 3:11-15). Ke abaña mme ñkpọ emi afo anamde, nte afo emekere ete ke imọ imodot ndinyene akwa ufọk oro okponde onyuñ eyede ntre? Ndusuk emekeme ndinyene enye emi ọfọnde akan, oto ke edinam se ikponde ikan nnọ Jesus ye mmọ efen.
Edifiak Ndi Esie
Jesus ama ọdọñ mbet Esie esit ke ndidọhọ ete, ke Imọ ima ika, iyetọñọ ntak idi. Enye eyedi etiene ikọt Esie man mmọ ekedu ye Enye. Nnyin imọfiọk ite ke Jesus ama ọnyọñ. Nnyin imokot ke Utom Mme Apostle ibaña edidọk ke enyọñ Esie “Ndien ke Enye ama eketiñ ikọ oro ama, nte mmọ esuk esede, emen Enye edọk ke enyọñ; ndien ikpa-enyọñ ofuk Enye, mmọ inyuñ ikwe Enye aba” (Utom Mme Apostle 1:9). Ke akpanikọ Jesus eyetọñọ ntak edi. Jesus eketiñ ete “nyefiak ndi.” Ke Jesus ama ọkọdọk ke enyọñ, owo iba emi esinede mfia ọfọñidem etiñ enọ mme owo oro ete, “Jesus emi, emi emende Enye ekpọñ mbufo eduk ke Heaven, eyedi kpa ido emi mbufo ekutde Enye ọnyọñde oduk ke Heaven” (Utom Mme Apostle 1:11).
Ntak Eridi Esie
Nso idi ntak emi Jesus edifiakde edi? Enye edidi etiene ikọt Esie, mmọ oro ebeñede idem enyuñ etiede ekpeme. Enye eyefiak edi etiene mmọ oro ekebeñede idem mmọ ndiduñ ke ebiet emi ema eketim ema enim ke Heaven.
Editọñọ ntak ndi Jesus otim ekpere. Nnyin inyene ndibeñe idem, koro ifet ididuhe ndibeñe idem ke ema efri ukorowo. Ñwed emi James ewetde oduri nnyin utọñ “Mbufo eme anyan ime ntre ñko; esọñọ mbufo esit, koro eridi Ọbọñ ke kpere” (James 5:8).
Ke eridi Esie eyetañ ikọt Jesus “Ke ikpehe ofim mbinañ ebon ọtọ kiet, ọtọñọde ke utit heaven kiet tutu osim eken” (Matthew 24:31) ndien “ntem ke nnyin ididu ye Ọbọñ ke nsinsi-nsinsi” (1 Thessalonica 4:17).
Mme Mbume
Ndusuk mbet Esie ema enyene mbume. Thomas okobup abaña usuñ. Edi akpanikọ enye ekekere ete ke Jesus akaka ediye ufọk emi odude ke ererimbot, koro mbet Esie ekedori enyin ete ke Jesus eyenim obio ubọñ eke midibigheke kaña ke ererimbot ke ini oro. Emi ekedi ibọrọ eke Jesus ọkọnọde enye; “Ami ndi usuñ ye akpanikọ ye uwem: owo baba kiet itieneke Ete, ibọhọke ebe ke Ami.”
Usuñ, Akpanikọ, Ye Uwem
Jesus edi Usuñ emi isañade isim Heaven ye Andida nnyin nsim nsinsi uwem. “Koro enyiñ baba kiet efen inyuñ iduhe eke enọde ke otu owo ke idak ikpa-enyọñ, eke enyenede ndida nyaña nnyin” (Utom Mme Apostle 4:12). Ke nditiene uwut-ñkpọ ye ukpep-ñkpọ Jesus ke nnyin ikut usuñ isaña isim Heaven, iyenyuñ inyene nsinsi uwem. Iyip Jesus ikpọñ ekeme ndiyet mme idiọk-ñkpọ nnyin mfep onyuñ ebeñe nnyin idem ọnọ Heaven. Jesus edi akpanikọ ye odu-uwem Usuñ, “usuñ edinen owo; baba edidehe ñkpọ kiet idinyuñ isañake ke esit ibe; … edi mmọ eke efakde mmọ eyesaña do” (Isaiah 35:8, 9).
Ebeñe Philip
Philip ekebeñe ete yak owut mme imọ Ete. Philip ama okut Jesus ediwak ini. Enye ama onyuñ etiñ ikọ ọnọ Enye. Jesus edi “mbiet Abasi” (2 Ñwed Corinth 4:4) “ye ata mbiet Idem Esie” (Mme Hebrew 1:3). Ke ama okokut Jesus, akpana Philip ọfiọk Ete oto ke uwem Jesus. Philip ama okut Jesus ke obuk-idem, edi nnyin ikut Enye idahemi ke mbuọtidem. Jesus ama etiñ ete ke akpana nnyin inim mme ikọ oro Imọ iketiñde, koro mme ikọ ye mme utom Esie ema eyarade ewut ete ke Abasi anam utom ebe ke imọ.
Ke akande oro, Jesus ama etiñ ete, mme mmọ emi enimde ke akpanikọ eyenyene odudu ndinam ikpọ utom nnọ Abasi ke Jesus ama ọkọnyọñ. Jesus ama etiñ ete ke mmọ eyenyene odudu ndinam ikpọ utom ñkan nte Imọ ikanamde. Mbemiso utọ ini emi, Jesus ama ọnọnọ mmọ ndusuk odudu ndinam mme utibe-ñkpọ. Enye ama ọnọ mbet duopeba eka ekekwọrọ ikọ Abasi, edọhọ ete “Ubọñ Heaven ke ekpere.” Jesus akafiak etiñ ọnọ mmọ ete “Enam mbon udọñọ ekop nsọñ idem, enam mme akpa-mkpa eset, enam mme ọdọñọ akpa-mfia esana, enyuñ ebin mme demon eduọk” (Matthew 10:7, 8). Mmọ ema “ebin ediwak demon eduọk, enyuñ eyet ediwak mbon udọñọ aran, enyuñ enam udọñọ okure mmọ” (Mark 6:13).
Mfọn Abasi
Ke Jesus ama eketiene Ete Esie, mbet ema eka iso ndisuan Eti-mbuk. Abasi ama aduak ete ke Jesus ama ọkpọñ mmọ, Imọ iyenọ mmọ “Iberedem efen” (John 14:16) emi ediduñde ye mmọ onyuñ ọnọ mmọ odudu (John 14:17). Mbet eyenam mme utibe ñkpọ enyuñ esuan etop Eti-mbuk. Akana nte mbet enyene ebuana ye Jesus ke akam. Mmọ eyenam mme utibe ñkpọ oto ke akam ye mbuọtidem ke odudu Abasi. Jesus ama ekpep mbet Esie ete ke odudu mmọdo ke akam. Ñkpọ ekededi eke mmọ ebeñede ke enyiñ Jesus, Imọ iyenam.
Ke Jesus ama ọkọkpọñ mbet, mmọ ema enam ediwak utibe-ñkpọ ke odudu Abasi. Nnyin imeti eyen añwan kiet oro ọkọbọde edikọk ke ndituk mben ọfọñ idem Jesus (Matthew 9:20-22). Mmọ ekenyene ndinam mme ikpọ utibe-ñkpọ ke mmọ ema ekebọ eñwọñọ Ete (Utom Mme Apostle 1:4; John 14:12), emi mmọ ekebọde ke usen Pentecost (Utom Mme Apostle 2:1-4). “Abasi ada ubọk Paul anam mme utibe-ñkpọ akwa odudu: tutu mme owo eda ukwọhọre-inua ye mbọbọ emi etode enye ke idem esọk mbon udọñọ, ndien mme udọñọ ekpọñ mmọ, mme idiọk spirit enyuñ ewọñọ mmọ ke idem” (Utom Mme Apostle 19:11, 12). Mme mmọ efen emi ekedọñọde ekena ke mben usuñ eyom edikọk man oto do mbukpọñ Peter emi edibede okpofuk mmọ (Utom Mme Apostle 5:15). Ke ukwọrọ-ikọ Peter kiet ama okokure, akwa otu owo ema ekabare esit. “Ntre ke mmọ emi enyimede ikọ esie ena baptism: ndien usen oro adaña nte thousand owo ita ediana ye mmọ” (Utom Mme Apostle 2:41).
Utọ odudu oro ekedi mfọn emi Abasi akanamde ọnọ ikọt Esie ke ererimbot emi. Ke Heaven, Jesus ke otim ediye ufọk onim ọnọ mmọ. Abasi anam ñkpọ ọnọ ikọt Esie, ke ererimbot emi ye ke Heaven. Enye ọnọ odudu ke usen ke usen, ye idorenyin nsinsi uwem ke ini iso.
Questions
MME MBUME- Siak ndusuk ñkpọ emi ekpekefinade mme mbet.
- Nso idi ntak emi owo ekpenimde Jesus ye Abasi ñko ke akpanikọ?
- Nso idi ntak emi Jesus ọkọkpọñde mbet Esie?
- Enye akaka mmọñ?
- Nnyin isaña didie ifiọk ite ke Jesus ke ọtọñọ ntak edi?
- Enye edidi etiene mme anie?
- Nso eñwọñọ ke Jesus ọkọnọ mbet ke abaña akam?
- Nso ke ekeñwọñọ enọ mbet emi ediñwamde mmọ ndinam Utom eke okponde akan se Jesus akanamde?
- Nso ke Abasi anam ọnọ ikọt Esie ke ererimbot emi?
- Jesus ebeñe nso ñkpọ onim ọnọ ikọt Esie ke Heaven?