Lesson 236 - Junior
Memory Verse
“Ibet Mi edi ntem, ete, mbufo ema kiet eken, kpa nte ñkamade mbufo” (John 15:12).Notes
Ndidiana Ọtọkiet
Jesus ama ọfiọk ete ke Imọ iyesọp ndikpọñ mbet Imọ nnyuñ ntọñọ ntak ñka ke Heaven. Enye ikoyomke mmọ etie ikpọñ-ikpọñ ke idem mmọ, ke ini mmọ midikwe Enye, ntre Enye ama otop ñke ọnọ mmọ ndiwut nte ke Imọ iyeka iso idu ikpere mmọ, nte emi vine odude ekpere mme ñkọk esie, oro edi, ndidiana ọtọ kiet. Ndien Enye okowut ete ke Abasi ñko ikaha anyan ikpọñ mmọ. Abasi edi anam akpanikọ emi esede ñkpọ abaña inwañ vine, otim ada ini ekpeme vine ye ñkpri ñkọk esie. Ima Abasi adian kpukpru nnyin ọtọkiet, ye Abasi Ete (Ọdiọñ-iñwañ-vine), Jesus (Ata-Vine) ye ata mme anditiene Enye (mme ñkọk).
Mme Apostle ema efiọk ete ke Abasi ama ama Jesus. Ndusuk mmọ ema ekop uyo Esie otode Heaven, onyuñ ọdọhọde ete, “Emi edi edima Eyen Mi, emi mmenemesit ye Enye” (Matthew 17:5). Mmọ ema enyuñ ekop nte Jesus ọbọñde akam ete, “Ete mmọkọm fi koro Afo okokopde uyo Mi. Ami nnyuñ mfiọk nte okop uyo Mi kpukpru ini” (John 11:41, 42). Ke akpanikọ akamba ima odu ke ufọt Ete ye Eyen ndidemere utọ mbuọtidem oro!
Idahemi Jesus onyuñ etiñ ọnọ mme apostle, ete, “Kpa nte Ete akamade Mi, Ami ñkọnyuñ mma mbufo.” Nso utọ utibe ima ke Enye enyene ọnọ owo! Nte afo emekeme ndikere ete Jesus ama nnyin nte nditọ Esie emi enamde akpanikọ, ke ukem usuñ nte Ete Esie amade Enye?
Osukibuot Tutu Ọsuñọ Ke Mkpa
Ntak kiet emi Abasi amade Jesus edi koro Enye ebiere ndikpa ke ibuot mme idiọk owo. Ke ini Abasi ekesede ererimbot ye idiọk-ñkpọ emi ọyọhọde ke esit, onyuñ okut ete ke esit mme owo esuk eyọhọ ye idiọk-ñkpọ kpukpru ini, Abasi ama ọnọ uyo ke Heaven ete ke kpukpru mmọ enyene ndikpa, enyuñ enyene ndibọ ọkpọsọñ ufen, ibọhọke owo emi minamke idiọk-ñkpọ onyime ndikpa ke ibuot mmọ. Jesus ama okop ke ini Ete Esie eketiñde emi, ndien Enye ama ọborọ, ete ke Imọ iyeka, kpa nte ekenimde toto ke eritọñọ ererimbot (Eriyarare 13:8). Enye ama onyime ndikpọñ Heaven, ebiet emi kpukpru owo emade enyuñ ekponode Enye, man ediduñ ke isọñ emi Enye ọkọfiọkde ete ke eyesua enyuñ ekọñ Imọ ke krọs, man otodo afo ye ami ikpọbọ erinyaña. Enye ama ebiere ndibọ ufen ke ntak nnyin, onyuñ emen idiọk-ñkpọ nnyin obiom ke Idem Esie. “Enye ọsuhọre Idem, akabare osuk ibuot tutu ọsuñọ ke mkpa, kpa mkpa krọs. Ke ntak oro Abasi ekemenere Enye onim ke enyọñ, onyuñ ọnọ Enye enyiñ emi okoñde akan kpukpru enyiñ” (Ñwed Mbon Philippi 2:8, 9). Jesus akakpa ke ntak ubọñ Abasi, ye koro Enye akamade mme idiọk-owo, akpan-akpan man edep mmọ ọnọ Idem Esie oto ke Iyip Esie.
Ndima Kiet Eken
Idighe Abasi Ete ye Eyen ikpọñ edi mmọ emi enyenede ima. Idahemi Jesus ọnọ ewuhọ ete, “Ema kiet eken, kpa nte ñkamade mbufo.” Enye ọkọdọhọ ete, “Baba owo kiet inyeneke ima eke okponde akan enye emi, owo ndikpayak uwem esie nduọk kabaña mme ufan esie.” Enye oyom nnyin ñko, inyene utọ ima oro.
Ke ini Apostle Paul ekewetde ọnọ mbon Philippi, enye ọkọdọhọ ete, “Yak mbufo enyene oruk esit emi okodude ke Christ Jesus.” Edieke Jesus okonyimede ndiyak uwem Esie man enyaña ukpọñ nnyin, nnyin inyene ndinyime ndiyak uwem nnyin man iñwam Jesus anyaña mme ukpọñ efen.
Baba owo kiet ikemeke ndibọ edinyaña ke esiode Iyip Jesus efep, ke ntre nnyin ikemeke ndinyaña baba owo kiet ke idem nnyin, kpa ye oro nnyin ikpakpade inọ mmọ. Edi Jesus oyom nnyin iyak uwem nnyin ntọtuñọ-ntọtuñọ man iñwam Enye ndisuan etop edinyaña ke ofuri ererimbot. Nnyin imekeme ndinam ediwak ñkpọ nnọ Enye ke ndidu uwem nnọ Enye, akan nte ikpakpadekpa. Edi nsin-ifik ke ndikpono Abasi ye utom eke nnyin inamde inọ Enye enyene ndidi ata akpan ñkpọ ke uwem nyin. Nnyin idaha ebiet eke iduñde, se idiade, mme se isinede nte akpan ñkpọ, nte emi nnyin idade edikọ mme ukpọñ emi esopde usuñ nnọ Jesus. Nnyin imama kpukpru owo eti-eti, ndien nnyin iyom ndikut mmọ nte ekade Heaven enyuñ eduñde ye Jesus ke nsinsi; nnyin ñko imebiere ndisin ifik nnam ñkpọ man iñwam mmọ.
Ikọ Ndiduñ Ke Nnyin
Jesus ọkọdọhọ ete, “Mbufo edi mme ufan Mi edieke mbufo enamde ñkpọ eke ntemede mbufo.” Nte afo ọmọfiọk se mbet Esie edide? Afo ọmọfiọk ndusuk mmọ. Edi didie ke afo ekpekpeme ndikpep Ñwed Abasi man afo ọkpọfiọk kpukpru ikọ Jesus? Ke isede ke mme Ñwed emi Matthew, Mark, Luke ye John, ewetde nnyin imenyene mme ikọ emi Jesus eketiñde ke ini Enye okodude ke isọñ. Ikafañ ke etie onyuñ ekere se mmọ edade enọ? Ekeme ndidi afo ama okot mmọ ke ndusuk ini, edi afo ukemeke nditi mmọ kpukpru. Nnyin inyene ndise Ikọ oro kpukpru usen man itim ifiọk ite ke nnyin imanam se Jesus eketiñde ete inam. Mme Ikọ Esie enyene ndiduñ ke esit nnyin.
Jesus ama etiñ ọnọ mme Scribe ye mme Pharisee ete, “Mbufo eduñọre ñwed Abasi, koro mbufo esede ete mme imọ imenyene nsinsi uwem ke esit.” Nte afo ọmọyuhọ ke ndikere ete imenyene nsinsi uwem koro ini kiet ema enyaña fi, eyet fi asana, ndien ama onyuñ ọbọ Uduọk-mmọñ Edisana Spirit? Mme nte afo ke ọduñọde Ikọ Esie kpukpru usen man otim ọfiọk ete ke afo omodu ke mbeñidem ndisobo ye Jesus?
Enam Asana Oto Ke Ikọ
Jesus ọkọdọhọ ete, “Mbufo emesasana oto ke ikọ eke mma ñketiñ nnọ mbufo.” Edi akpanikọ nnyin inyene ndisana man idu ke mbeñidem ndisobo ye Jesus; ndien nnyin ika iso ndidu edisana uwem okposuk edi nte ema ekenam nnyin isana oto ke “mmọñ ọkọrọ ye ikọ Abasi.” Nte nnyin ikade iso ndikot mme ikọ Jesus, nnyin iyesobo ye mbufa ñkpọ emi Enye oyomde nnyin inam, enyuñ eti nnyin ebaña mme ñkpọ efen emi nnyin ikọfiọkde edi ima itre ndinam mmọ. Edieke nnyin iyomde ndiduñ ke Ata-Vine, nnyin inyene ndimum Ikọ Abasi ñkama ke esit nyin.
“Edieke mbufo eduñde Mi ke idem, Ikọ Mi onyuñ oduñde mbufo ke esit, ebeñe se eyomde, ndien eyenam enọ mbufo.” Edieke nnyin mibọhọ ibọrọ ke akam eke nnyin ibọñde, edi eti ñkpọ ndiduñọre esit nnyin man ifiọk mme ikọ Jesus osuk “oduñ” ke nnyin. Mme eñwọñọ emi Enye ọkọnọde ikemeke ndikpu. Enye eketiñ akpanikọ ke ini Enye ọkọdọhọde ete ke Imọ iyebọrọ akam nnyin. Ndien edieke Enye mikopke ke ini ibọñde akam, nnyin ikpenyene nditọñọ ntak nduñọre Ikọ man ifiọk mme odu ndusuk mbet emi nnyin mikanamke mme ikesinde ndinam. Idiọk-ñkpọ emekeme ndinyọni nduk ke esit owo emi ini kiet ekedide owo Abasi, ndien oto ke unana ntiñ-enyin, enye ikekemeke ndifiọk emi tutu enye okoduñọde ikọ Abasi onyuñ okut ibet emi enye akabiatde. Edieke enye mikọduñọkere enye ikpọkọfiọkke ndudue esie.
Ebiere Ikpe Oto Ke Ikọ
Nte nnyin imọfiọk akpan ñkpọ emi odude ke Ikọ Abasi? Eyeda Ikọ ebiere ikpe enọ owo ke akwa usen ubierikpe. Jesus ọkọdọhọ ete, “ikọ eke ñketiñde, kpa ikọ oro edibiere ikpe ọnọ enye ke akpatre usen.” Idahemi edieke edibierede ikpe nnyin oto ke Ñwed Abasi, nte afo ukereke ete edi akpan ñkpọ ndikpep nnyuñ ntiñ enyin nse, man ọfiọk se enye etiñde? Nnyin imekpep mme ukpep-ñkpọ ke ufọk-ñwed, nte akpanade nte ikpep, edi ọfọn ndifiọk Ikọ Abasi ñkan ndifiọk enye emi ekedide akpa ada-ukara ke idut nnyin mme ebaharede idut nnyin esin ke “state” ifañ, mme iso eñwan ifañ ke obio nnyin eñwana, mme ewe edi mme idut eke esọñde odudu ekan ke ererimbot. Ke imende idomo ye ini eke nnyin isibiatde ke ufọk ndinam utom ufọk-ñwed, nnyin isibiat ini didie ke ndida ñkpep Ikọ Abasi?
Ediwak Mfri
Nnyin, nte nditọ Abasi, idi mme ñkọk inọ Jesus emi edide ata vine ndien inyene ndiñwum ediwak mfri nnọ Enye. Enye iyuhọke ke esisit mfri, nnyin inyene ndiñwum ediwak mfri. Nnyin imekeme ndiñwum mfri, inyuñ ikere ite ke imenem Abasi esit, ndien mme idomo eyedi, nnyin iyekere se idide ntak? Jesus ọkọdọhọ ete, “Kpukpru ñkọk eke oñwumde mfri, Enye ọdiọñ, man oñwum mfri awak akan.” Oto ke edidiọñ ñkọk (mme idomo) nnyin ikut ite ke ediwak ñkpọ efen edu, nte ime, ifure-ifure ido, ye mfọn ido, emi nnyin ikemede ndikpep, emi edinamde nnyin idi nti nditọ Abasi.
Eyak nnyin ikere ibaña ukọbọ. Ndusuk, akpa edinam nnyin edi ndisua nnọ owo emi etiñde idiọk ikọ adian nnyin. Ekeme ndidi ntak emi akanam Ọbọñ ayak ukọbọ edi, man owut nnyin ete ke nnyin ikenyeneke ata ima inọ kiet eken nte nnyin ikekerede ite imenyene. Ima edi kiet ke otu mme mfri emi Jesus oyomde nnyin inyene, ndien ikemke ke nnyin ndima mme ufan nnyin ikpọñ. “Ema mme asua mbufo, enyuñ ebọñ akam eyom ufọn mmọ eke enamde mbufo isin-enyin (Matthew 5:44). Ndima mme ufan fo edi ekpri mfri, edi ndima mme asua fo edi ata ediwak mfri.
Nnyin imekeme ndikere ite ke edi utom emi nnyin inamde inọ Jesus ikpọñ edi mfri. Imekeme ndikere ite ke nnyin imọñwum ediwak mfri oto ke nnyin ndikwọ ikwọ ye nditiñ ikọ ntiense nnọ Jesus, ndika ñkese mmọ emi edide ikpọñ, ye mbio udọñọ, ndiñwam mmọ eke edude ke mfina mme ndinọ uñwam ekededi emi otode edinyime esit. Edi Ñwed Abasi etiñ ọnọ nnyin ete ke mme mfri eke spirit edi emi: “Ima, ye idaresit ye emem ye ime, ye mfọn-ido, ye eti ido, ye erinam akpanikọ,ye ifure-ifure ido, ye mfara ke idem” (Ñwed Mbon Galatia 5:22, 23). Apostle Peter etiñ ọnọ nnyin abaña mme mfri efen: “Mbufo kpukpru enyene esit kiet, ekop mbọm ye kiet eken, etie ima-ima nte nditọ-ete, enyene mfefere esit, enyuñ esuhọre idem” (1 Peter 3:8). Idem ndinyene eti-edu uwem, edieke enamde nte enam enọ Ọbọñ, edi mfri. Emi edi mme mfri emi anade nte nnyin inyene ata ediwak inyuñ idian efen do.
Man otodo nnyin idọdiọñ inyene anyan ime, mfọn-ido, ye eti-ido, nnyin inyene ndibọ ufen, ifọn ima; edi edieke nnyin idinyimede ndiyọ nte oto Abasi onyuñ edi ke ufọn nnyin, nnyin iyedara ke utip ke ndinyene “mfri ekese.” Idahemi kaña kpukpru ntunọ itiehe inem-inem, edi ababiak; edi ke ukperedem, enye oñwum mfri emem ọnọ mmọ emi ekebede ke nsiñere esie, kpa mfri edisana ido” (Mme Hebrew 12:11). Mme utom eke nnyin inamde inọ mmọ efen eyetiene edem edieke nnyin inyenede eti mfri emi ke esit nnyin.
Iberedem
Ama odu ukpep-ñkpọ efen emi Jesus okoyomde mbet Esie eti. Enye ama ada ini ndisọñọ ntiñ mbaña akpan-ñkpọ ke Ikọ Esie, edi man oto do mmọ ekufre ke ini Enye edikpọñde mmọ, Enye ama ọñwọñọ ndinọ Iberedem, oro edi Edisana Spirit, nditi mmọ kpukpru Ikọ Esie. “Enye eyedi ntiense ọnọ Mi.” Ini efen Enye ọkọdọhọ ete, “Ke adaña emi Enye oro edidide, kpa spirit akpanikọ, Enye eyeda mbufo oduk ke ofuri akpanikọ: koro Enye iditiñke ikọ Esiemọ; … Enye eyenam nnyene ubọñ” (John 16:13, 14).
Ke ini nnyin ibọde baptism eke Edisana Spirit, Spirit oduñ ke nnyin onyuñ ekpep nnyin akpanikọ; ndien Enye etie ntiense abaña Jesus. Nte nnyin imayak Enye etiñ ikọ ebe ke nnyin? Nte nnyin imanam ererimbot efiọk nnyin nte nditọ Abasi? Nte nnyin imada mbio efen isọk Jesus? Oro edi Utom Spirit; ndien edieke Enye oduñde ke nnyin, emi edi se nnyin inamde, oro edi, nditie ntiense nnọ Jesus.
Mme akpatre ikọ emi Jesus eketiñde ọnọ mbet Esie ke isọñ ekedi emi: “Mbufo eyebọ odudu, ke Edisana Spirit ama edi edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judaea ye Samaria, tutu osim utit ererimbot” (Utom Mme Apostle 1:8). Mme owo emi enamde akpanikọ ke nditie ntiense nnọ Jesus edi mme nti ñkọk emi eduñde ke ata vine.
Eyesibe Mme Ñkọk Emi Miñwumke Mfri Efep
Nnyin imabiat akpan ini nditiñ ñkpọ mbaña mme ñkọk emi eñwumde mfri. Nso ke etiñ ebaña mmọ oro miñwumke mfri? Jesus ete eyesibe mmọ efep. Mmọ ididighe aba mbak ke ata vine; mmọ idinyeneke baba ebuana ye Jesus. Akande oro, eyemia mmọ ufen, mmọ eyenyuñ etak ke nsinsi edieke mmọ mituaha mkpọfiọk inyuñ ifiak itiene Jesus, oro edi, nditọñọ ntak nda mmọ ndian ke ata Vine.
Questions
MME MBUME- Anie edi Ata-Vine?
- Mme anie edi mme ñkọk?
- Nso utọ ebuana ke Abasi enyene ye Vine ye mme ñkọk?
- Siak ndusuk nti mfri?
- Nso ñkpọ ke Abasi anam ye mme ñkọk emi oñwumde mfri?
- Mfri ifañ ke nnyin inyene ndiñwum?
- Ke Ñwed ewe ke nnyin ibọ ata akpan item emi abañade uwem?
- Ke ntak ewe ke ekenọ Iberedem, Edisana Spirit, edi ke ererimbot emi?
- Nso ñkpọ ke nnyin ikpanam inọ Ọbọñ?
- Nso ñkpọ itibe inọ mme ñkọk emi miñwumke mfri?