Lesson 237 - Junior
Memory Verse
“Ke adañemi Enye oro edidide, kpa Spirit akpanikọ, Enye eyeda mbufo oduk ke ofuri akpanikọ” (John 16:13).Notes
Ntọt
Emi ekedi akpatre ukwọrikọ Jesus ye ekọm emi Enye ọkonọde mbet Esie. Enye ama ọnọ mmọ ntọt abaña ukọbọ emi mmọ edisobode. Man ke ini ufen emi edisimde mmọ, mmọ ekufehe ndik ekunyuñ edu ke mkpa-idem. Ndusuk owo eyenam mbet idiọk-ñkpọ enyuñ ekere ete ke imanam akwa utom inọ Abasi. Mmọ edinam ntre koro mmọ minimke Jesus ke akpanikọ. Mmọ enim Abasi ke akpanikọ, edi inimke Jesus ke akpanikọ.
Saul
Inem mbuk odu ke abaña utọ owo ntre, emi ọkọkọbọde ikọt Christ onyuñ ekerede ete ke inam ñkpọ inọ Abasi. Enyiñ esie ekedi Saul emi okotodeTarsus, emi ke akade iso ekekabarede ekot Paul. Ke ini Saul akasañade aka Damascus ye ñwed ndibọ unyime man esin mbet Jesus ekededi emi enye edikutde ke ufọk ñkpọkọbi, Ọbọñ ama ayarade Idem-Esie ọnọ enye (Utom Mme Apostle 26:15). Akwa uñwana emi okotode Heaven ama ayama tutu anam Saul edi nnan ke usen ita. Uyo Ọbọñ ama okot enye, ndien Saul ọbọrọ ete, “Ọbọñ, oyom ete nnam nso?” (Utom Mme Apostle 9:6). Saul ama anam item Ọbọñ. Enye ama ọbọñ akam, enyuñ enyaña enye. Saul ama akabare edi asaña-utom Abasi onyuñ edi akwa ntiense ke abaña odudu Abasi.
Jesus Ndikpọñ Mmọ
Ke ini Jesus ọkọdọhọde mbet Esie ete ke odot Imọ ndinyọñ, esit mmọ ama ọyọhọ ye mfuhọ. Jesus eketiñ ete, “Ke ekpri ibio ini mbufo idikwe Mi aba, ke ekpri ibio ini ñko mbufo eyekut mi, (koro nnyọñde ntiene Ete).” Mbet ikọfiọkke se Jesus eketiñde abaña. Enye ama anam añwaña mmọ ete ke ini mfuhọ eyedi etiene mmọ, ke ini ererimbot edarade. Edi ke ntuaña mmọ idibighike. Ini akwa idara eyedi. Jesus okoyom ndikpọñ mmọ, ke utọ ini ntem mmọ eyedu ke mfuhọ, edi Jesus ekenyene nditọñọ ntak ndi man ada akwa idara ọsọk mmọ.
Iberedem
Jesus ama ọnọ mbet Esie utibe enwọñọ ye ikọ nsọñ-idem ete ke Iberedem eyedi etiene mmọ ke ini Imọ ima inyọñ. Anie edi Iberedem? Iberedem edi Edisana Spirit (John 14:26), emi edide Kiet ke otu Mbuot-Abasi-Ita –Ke-Kiet. Enye edi kiet ke otu Ita “emi etiede ntiense (Ke heaven, Ete, Ikọ, ye Edisana Spirit): mmọ mbita enyuñ ekem uyo” ( 1 John 5:7, 8). Nso ke Iberedem emi edinam? Enye eyeda mbet oduk ke ofuri akpanikọ, koro Enye edide “Spirit akpanikọ” (John 16:13). Enye eyeti mmọ mme ñkpọ emi Jesus eketiñde ọnọ mmọ ye ñkpọ emi mikañwañake mmọ (John 14:26).
Iberedem Ye Uñwam
Jesus ikoyomke ndikpọñ mbet ntre ndisuan Eti-mbuk emi ikpọñ. Jesus ọkọdọhọ ke iyekpe Ete ubọk man ọnọ Iberedem. Edisana Spirit eyedọñ mmọ esit onyuñ añwam mmọ. Enye eyeñwam mmọ ndifiọk akpanikọ. Eyekpep mbet. “Edisana Spirit eyeteme mbufo se mbufo enyenede nditiñ” (Luke 12:12).
Mme Ntiense
Utom efen emi Edisana Spirit edinamde edidi ndinam mbet etiñ, enyuñ etie ntiense ebaña Jesus. Ke ndinam ntem, Edisana Spirit eyenọ Jesus ubọñ. Ọbọñ ama ebebem iso etiñ ọnọ mbet ete ke mmọ eyenyene ukeme ndinam utom emi edikponde akan se Imọ ikanamde (John 14:12). “Edi mbufo eyebọ odudu, ke Edisana
Spirit ama edi edidoro mbufo ke idem: mbufo eyenyuñ edi mme ntiense Mi” (Utom Mme Apostle 1:8).
Ubiomikpe
Jesus ama etiñ ete ke Edisana Spirit eyemen ifiọk eke abañade idiọk-ñkpọ otuk ererimbot. Nte Spirit akpanikọ, Enye eyewut mme owo nnen-nen idaha ke abaña uwem mmọ. Ke ndifiọk akpanikọ, eyenyene ufañ ndikabade esit man enyaña mmọ. “Akpanikọ eyenyuñ anam mbufo ewọrọ ufin” (John 8:32). Spirit esida ubiomikpe idiọk-ñkpọ otuk owo. Ubiomikpe esida owo osim ñkabare-esit ye erinyaña. Ana owo okut idem esie kaña nte anam-idiọk ñkpọ mbemiso enye aka etiene Abasi oyom edifen.
Uwut-ñkpọ odu ke uwem Peter ete ke Edisana Spirit esituk mme owo ke abaña idiọk-ñkpọ mmọ. Ke Peter ama ọkọbọ Edisana Spirit ke Usen Pentecost, enye ama ọkwọrọ ikọ ọnọ otu owo. Ke adañemi mme owo ekebọde ikọ Peter “esit amia mmọ, mmọ enyuñ edọhọ Peter ye mme Apostle eken ete, Nditọ-ete, inam didie?” Edisana Spirit ama obiom mmọ ke abaña idiọk-ñkpọ mmọ. Peter ama ọdọhọ mmọ ekabade esit. Ediwak ema enim ikọ esie ke akpanikọ, ndien owo 3,000 ema ekabade esit ke usen oro (Utom Mme Apostle 2:37-41).
Usen kiet, Felix, andikara, ama ọdọñ ekekot Paul, “onyuñ okop se Paul enyenede nditiñ mbaña mbuọtidem ye Christ Jesus.” Nte Felix osuk akpañde utọñ okop se Paul eketiñde, Edisana Spirit obiom enye ikpe. “Ke adañemi Paul ebuende ikọ abaña edinen ido, ye mfara idem, ye ikpe eke edidide, Felix edikhe” (Utom Mme Apostle 24:24, 25). Enye ikakabakede esit. Enye ama ebin Paul, edi Spirit akpanikọ ama obiom enye.
Edinen-Ido
Jesus ama afiak etiñ ete ke Edisana Spirit eyetie ntiense abaña edinen-ido. Jesus ekenyene ndinyọñ, ndien mme owo idinyeneke ifet aba ndikut edinen ido ke uwem Esie. Edi owo baba kiet idinyeneke mfaña, koro Spirit akpanikọ eyetie ntiense ke abaña uwem edinen-ido, eyetiñ owut mme owo ete ke ekpenyene ndidu uwem nte enende. Jesus ikọnọhọ uwut-ñkpọ ikpọñ-ikpọñ, edi Enye ñko ama ọnọ owo ukeme ndidu uwem edinen-ido. Oto ke Jesus ye edinen-ido Esie ikpọñ-ikpọñ ke owo ekeme ndidi edinen (2 Ñwed Corinth 5:21). Koro Jesus okosukde ibuot, tutu okosim ke Enye ndiyak uwem Esie nnyuñ mkpa nnọ nnyin, ekeme ndinam nnyin inen oto ke Iyip Esie (Ñwed Mbon Rome 4:25; 5:19).
Ndusuk utom Edisana Spirit edi ndinam mme owo etim efiọk ebaña edinen-ido. Ọfọn nnyin ndidu uwem nte nditọ Abasi, isana, inyuñ idu uwem edinen-ido edieke nnyin iyomde ndiduk Heaven. Jesus, ke nditiñ ikọ nnọ mbet Esie, ama ọdọhọ ete, “Edieke edinen-ido mbufo mikanke eke mme Scribe ye mme Pharisee, mbufo ididukke ke Obio Ubọñ Heaven” (Matthew 5:20). Mme Scribe ye mme Pharisee ekedi mme onim ido Abasi, edi Christ oyom ikọt Esie edu uwem emi okoñde akan ndinenim ido Abasi. Ndidu uwem edinen-ido edi se eyomde eto mme anditiene Jesus. Etiñ ete yak nnyin isine ofuri ñkpọ-ekọñ Abasi, ndusuk emi edide “edinen-ido nte ukwak ikpanesit” (Ñwed Mbon Ephesus 6:14). Eyom nnyin ifehe ikpọñ se idiọkde, edi ibine “edinen-ido, ye uteñe Abasi, ye mbuọtidem, ye ima, ye ime ye nsuhọre-esit. Ñwana eti eñwan mbuọtidem; sọñọ mum nsinsi uwem kama” (1 Timothy 6:11, 12).
Ikpe
Edisana Spirit eyenyuñ ayarade owut ete ke ikpe odu. Ema ekpe ikpe satan, ọbọñ ererimbot emi, edi ke ukem usuñ oro ke owo kiet kiet edida ke iso ebierikpe ererimbot emi. “Koro kpukpru nnyin inyene ndiwọrọ nyarade ke iso itie-ikpe Christ; man owo kiet kiet ọbọ utip eke ekemde ye se enye akanamde ke ikpọhidem, ye ñkpọ oro edide eti, ye onyuñ edide idiọk’ (2 Ñwed Corinth 5:10).
Iberedem
Mbon ererimbot ikemeke ndibọ Edisana Spirit emi edide andidọñ esit ye andiñwam (John 14:17). Jesus ama ọñwọñọ ete ke Abasi eyenọ mbet Esie Iberedem. Mme anie ekedi mbet Jesus? Mmọ ekedi mmọ emi enyañade, emi ekesitienede Jesus. Enye ọkọdọhọ ete “Edieke mbufo esọñọde eda ke ikọ Mi, mbufo edi mbet Mi ke akpanikọ” (John 8:31).
Jesus ama etiñ ọnọ mbet Esie nte mmọ edisañade enyene Iberedem emi. Jesus ọkọdọhọ ete, “Mbufo ema ema Mi, eyenim mbet Mi” (John 14:15). Ndiwut nte ke mmọ etim ema Jesus, mmọ ekenyene ndinim mbet ye ikọ Esie. Enye ikekpepke edinam-asana ikpọñ, edi Jesus ama anam uwut-ñkpọ ọnọ mme anditiene Enye man “ekpeda akpanikọ edianare mmọ ñko enim” (John 17:19).
Edinam-asana, ọyọhọ utom mfọn iba, edi enọ emi enọde mmọ emi ema ekenyaña. Enye eyet nda-mmana idiọk-ñkpọ ke esit onyuñ osio oruñ idiọk-ñkpọ efep. Owo enyene enye ke ini ọbọñde akam onyuñ ayakde idem esie ọyọhọ -ọyọhọ ọnọ Abasi. Edi uduak Abasi nte mme anditiene Jesus ekpenyene edinam-asana. “Koro emi edi uduak Abasi, ete mbufo ekpekabare esana” (1 Ñwed Thessalonica 4:3). Owo enyene ndinam uduak Abasi man enye edi mbet. Enọ mfọn iba, oro edi edinyaña ye edinam-asana, ebem baptism Edisana Spirit iso, mmọ enyuñ enam owo odot ndibọ Iberedem.
Ema etiñ enọ mbet ete ke Iberedem eyedidoduñ. Enye ididuñke-duñ mme ndidi ndisese mmọ ikpọñ-ikpọñ, edi Enye eyenam se ikande oro. Enye eyeduñ ke mmọ (John 14:17). Emi ama osu ke Usen Pentecost ke ubet enyọñ ke Jerusalem emi mbet Jesus ekedude ebọñ akam. “Edisana Spirit ọyọhọ kpukpru mmọ ke idem” (Utom Mme Apostle 2:4). Ikọnọhọ Edisana Spirit esọk mme Jew emi eketienede Jesus ikpọñ-ikpọñ. Ke oro ama ekebe, ema eñwaña “Edisana Spirit enọ mme Gentile ñko” (Utom Mme Apostle 10:45).
Eñwọñọ Eke Mfin
Eñwọñọ Iberedem emi enyene nnyin mfin, emi itienede Jesus inyuñ isukde ibuot inọ Ikọ Esie. “Koro uñwọñọ oro enyene mbufo ye nditọ mbufo ye kpukpru mmọ emi edude nsan-nsan, adaña owo nte Jehovah Abasi nnyin edikotde etiene Enye” (Utom Mme Apostle 2:39). Ke nnyin ikerede ibaña se eñwọñọ Iberedem emi edinamde ọnọ nnyin, nte kpukpru nnyin ikpoyomke Enye oduk ke uwem nnyin? Nte afo ọmọbọ Iberedem emi edide Edisana Spirit?
Ewuhọ Jesus
Kiet ke otu mme akpatre ewuhọ emi Jesus ọkọnọde ekedi, “etie … tutu esine mbufo odudu emi otode ke enyọñ” (Luke 24:49). Jesus ọkọnọ mbet Esie ewuhọ ete, “etie ebet se Ete ọkọñwọñọde ndinọ … koro John akadade mmọñ onim baptism, edi eyenim mbufo uduọk-mmọñ ke Edisana Spirit” (Utom Mme Apostle 1:4, 5). Afo unamke kpukpru ewuhọ Esie edieke afo mubọhọ
Edisana Spirit. Bọñ akam nyuñ yak idem fo nnọ Abasi tutu afo ñko ọbọ enọ emi. Jesus ọkọdọhọ ete, “ñkpọ ekededi eke edibeñede Ete, eyenọ mbufo ke enyiñ Mi” (John 16:23).
Eñwọñọ Oro
Jesus ama ọdọñ mbet Esie esit ke ndinọ eñwọñọ Edisana Spirit ye ke ndiyak emem Esie ọsuhọ ye mmọ. Mbemiso Enye ọkpọñ mmọ, Jesus ama etiñ ete, “Mbufo eyekut ukut ke ererimbot: edi esọñ esit; Ami ñkakan ererimbot” (John 16:33). Koro Jesus akakande ererimbot nnyin ñko imekeme ndidi mme andikan. “Emi edi erikan eke akakande ererimbot, kpa mbuọtidem nnyin. Anie owo edi andikan ererimbot, ke mibọhọke enye emi onimde ke akpanikọ ete, Jesus edi Eyen Abasi?” (1 John 5:4, 5).
Questions
MME MBUME- Ekenọ mme anie eñwọñọ Iberedem?
- Spirit akpanikọ edida mbet oduk ke nso?
- Nso ke Enye editi mmọ?
- Edisana Spirit ekenyene ndiduñ ke mmọñ?
- Anie edinọ mbet odudu man etie ntiense ebaña Jesus?
- Edieke nnyin imade Jesus nso ke nnyin idinim?
- Anie ke ini Ñwed Abasi, ọkọbọ Edisana Spirit?
- Anie ekeme ndibọ Edisana Spirit mfin?
- Didie ke owo ọbọ Iberedem?
- Nso idi ntak eke akpanade nnyin ibọ Edisana Spirit isin ke uwem nnyin?