Lesson 238 - Junior
Memory Verse
“Nte Afo ọkọdọñde Mi ndi ke ererimbot, kpasuk ntre ke Ami ndọñ mmọ eka ke ererimbot” (John 17:18).Notes
Ufọn Edibọñ Akam
Jesus eketre nneme Esie ye mbet Esie ke akam. Nte omokut adaña ediwak ini emi Jesus esibọñde akam? Enye ekedi Eyen Abasi, ọyọhọ owo iba ke Mbuot Abasi Ita Ke Kiet; Enye enyene odudu ndinọ nsi-nsi uwem, ndikọk udọñọ, ndinam akpa-mkpa eset, nnyuñ mfen ke mme idiọk-ñkpọ. Enye ekekeme ndinam kpukpru ñkpọ emi sia Enye ekedide kiet ye Abasi. Okposuk edi Enye edide Abasi, Enye okonyuñ edi owo; ndien Enye akada ukeme ye odudu Esie oto ke Heaven ebe ke akam. Enye ama ọfiọk ufọn akam akan nte nnyin ifiọkde unana nnyin.
Jesus ama abiat ediwak okoneyo ikpọñ ke obot ndibọñ akam, ofuri okoneyo. Ediwak ini Enye abak adaha ke usen-ubọk ọwọrọ aka ndibọñ akam ikpọñ. Akpatre okoneyọ oro Enye ọkọbọnde ọkpọsọñ akam ke Gethsemene ikedighe akpa ini emi Enye akakade do. Ikọ Abasi anam nnyin idiọñọ ite ke Judas ama ọfiọk ebiet eke edikutde Enye, koro “Jesus awakde ndika do ye mbet Esie” (John 18:2).
Edieke Jesus Eyen Abasi, okokutde ufọn ndinyene ebuana ye Abasi, onyuñ ọbọñ akam oyom uñwam Abasi, nnyin ikpoyom enye adaña didie! Jesus oyom isian Enye ebeñe nnyin ke akam, okposuk edi nte Enye ọfiọkde se nnyin inanade. Edi ke akam ñko ke nnyin iwut esit ekọm ke se Abasi akanamde ọnọ nnyin. Akpana nte akam itoro ye ekọm ọwọrọ ke esit nnyin kpukpru ini ọdọk ebine Enye emi ekedepde nnyin ke nsọñ-urua Iyip Esie.
Ema Enọ Eyen Ubọñ
Jesus ọkọtọñọ akam Esie ye mme ikọ emi: “Ete, ini emedi; nọ Eyen Fo ubọñ, man Eyen Fo ọnọ Fi ubọñ.” Jesus ekedi ke ererimbot ndinam akamba utom. Enye ama enyene akpan utom ndinam. Ke eyo uwem Esie Enye ama anam ediwak utibe ñkpọ, onyuñ okot mme owo ete etiene Imọ. Edi ini akakan utom Esie, ndikpa ke krọs ke ntak idiọk-ñkpọ nnyin, ama edikem. Emi ekedi utom emi Abasi ọkọnọde Enye ndinam; ndien ke emi Enye ọdọhọ ete ke okure. Enye ikakpaha kaña, edi Enye ama enyene iwuk ke usuñ Esie; Enye ama otim ọfiọk ete iyekeme ndibe ke esit, ntre Enye ama ekeme nditiñ mbaña nte ima inanam ima.
Ke ini Jesus ọkọduñde ke Heaven mbemiso Enye edi ke ererimbot, mme angel esituak ibuot enyuñ ekpono Enye koro Enye edide Eyen Abasi. Enye ekedi kiet ye Abasi ke edibot ererimbot, “ndien mitoho ke Enye, inamke ñkpọ baba kiet eke ekenamde” (John 1:3). Edi Enye ama ayak ubọñ oro onim ñkañ-kiet man edi ke isọñ nte owo, edikpep mme owo nte anade edu uwem, man abuana ke mme ukut nnyin ndien ke akpatre ọnọ uwem Esie ndida mfak nnyin.
Ke emi ini ama ekpere ndifiak nnọ Enye ubọñ, ọdọdiọñ okpon akan eke akpa, koro Enye akadade Idem – Esie anam akakan uwa ke abaña idiọk-ñkpọ ererimbot. “Enye ọsuhọre idem, akabare osuk ibuot tutu ọsuñọ ke mkpa, kpa mkpa krọs. Ke ntak oro Abasi ekemenere Enye onim ke enyọñ, onyuñ ọnọ Enye enyiñ emi okoñde akan kpukpru enyin; man ke enyin Jesus kpukpru edọñ ekpetọñọ enọ Abasi, ye eke mme andiduñ ke heaven, ye eke mme andidu ke isọñ, ye eke mme andidu ke idak isọñ; kpukpru edeme ekponyuñ enyime ete Jesus Christ edi Ọbọñ, enọ Abasi Ete ubọñ” (Ñwed Mbon Philippi 2:8-11).
Jesus ama afiak ọdọk ke Heaven ke Enye ama ekeset ke mkpa, onyuñ etie ke ebekpo akwa odudu Esie, ke ubọk nnasia Abasi, ndinam mkpe-ubọk nnọ nnyin. Ini eyedi emi ofuri owo ye ofuri ñkpọ ke ererimbot edidude ke idak ukara Esie. Kpukpru owo eyesuk ibuot enọ Enye. Oro edidi ke ini edinen-ido ediyọhọde ke isọñ, ndien ikọt Abasi eyekara ye Enye ke ukara emem.
Akam Ke Abaña Ikọt Esie
Jesus ọkọbọñ akam emi ọnọ ikọt Esie. Enye ama ọfiọk ete mme usen ukut eyesim mmọ. Mmọ ikọdiọñọke ite ke Enye ekenyene ndikpa ke ini uyen, mkpasip isua 33. Mmọ ema ema Enye, ndien idori-enyin mmọ eyekpu eti eti ke ini mmọ midikwe Enye aba. Akan oro, mmọ eyekut ukut ke ntak mbuọtidem mmọ ke Enye. Edi Jesus ama ọfiọk ete ke mmọ eyenam akpanikọ ke akpatre. Enye ọkọbọñ akam ọnọ Ete man Enye ọnọ mmọ ukeme ndinam akpanikọ, mmọ ekpekut ukut nte ekekut; ndien Enye ama ofiọk ete ke Abasi esibọrọ akam imọ kpukpru ini.
Ediwak mbet ekenyene ndikpa ke ntak ikọ Abasi. Akana ekọñ Peter ke krọs; ebighi James ibuot; ekenyene ndibin John ñkesin ke Isuo Patmos; Paul eyebọ ediwak ubọk-ikpa, ubom esie onyuñ osip ndien ke akpatre eyebighi Enye ibuot. Ndusuk eyeduñ ke aba itiat ekpono Abasi man edibe ebọhọ mbon ukara Rome. Edi nnyin imenyene ikọ nsọñ-idem ito Apostle Paul: “Edieke imede ime, iyeda ubọñ ye Enye” (2 Timothy 2:12). Mme owo emi ema ewuk esit mmọ ke ubọñ emi Jesus eketiñde ọnọ mmọ, ndien ufen emi mmọ edikutde mi ikedihe ñkpọ ndomo kiet inọ mmọ. Peter ọkọdọhọ ete ke imọ ima idi ntiense ke ndutuhọ Jesus (emi ọkọnọde Enye ubọñ), ndien ke imọ ke idem-imọ ñko iyedi “abuana ke ubọñ emi ediyarade” (1 Peter 5:1). Enye ikọdọhọke ite ke imọ ñko imokut ukut. Oro ikedighe akpan ñkpọ. Kpukpru se ikebehede enye ekedi ke imọ iyenyene ubọñ ye Jesus.
Paul Apostle etiñ abaña ukem ñkpọ emi ke ini enye etiñde ke Mme Hebrew 11, abaña mme mbon uko ke mbuọtidem. Abraham ama oduyo ke akpa ntatan, oduñ ke ufọk-ọfọñ, ifinake koro enye mikenyeneke ufọk ndiduñ. Ofuri se enye ekekerede abaña ekedi obio heaven emi enye ediduñde okop inemesit ke enye ama ọkpọñ isọñ. “Mmọ efen ekut idomo oto nsahi ye ufen ye ñkpọkọbi ye ufọk-ñkpọkọbi ñko; etọñọ mmọ ke itiat, eyọk mmọ esibe mbio iba, edomo mmọ, ewot mmọ ke ofut: mmọ oro esine ikpa-erọñ ye ikpa-ebot eduyo; mmọ enana ñkpọ, ekut ukut, ebọ ndutuhọ” (Mme Hebrew 11:36, 37). Nte ama afina mmọ? Mmọ ekenim ete ke mme ikpọ ufọk ke ebet mmọ ke Heaven, emi mmọ ediduñde ke nsinsi. Uwem nnyin mi edi ata ibio ke edade edomo ye nsinsi ini; ndien ñkpọ emi ọfọnde akan ke ererimbot emi edi nnyin ndibeñe-idem ndidara ke mme ubọñ emi Jesus otimde onim ọnọ nnyin.
Ndidu Ye Jesus
Ke ini Jesus ọkọbọñde akam, Enye ọdọhọ ete: “Ete, mmoyom nte mmọ emi Afo ọkọnọde Mi edidu ye Ami ke ebiet eke ndude; man mmọ ekut ubọñ Mi emi Afo ọkọnọde Mi.” Jesus ototim oyom nnyin idu ye Enye! Ndusuk ini ekeme nditie nte esesin nnyin mi, inyuñ ikere ite ke owo ndomo kiet iyomke nnyin; edi Jesus oyom nnyin. Enye oyom nnyin. Enye oyom nnyin do ke enyọñ ke ebiet mme angel ekponode enye, ebiet emi Enye etiede ke ebekpo ye Abasi Ete, kpa ebiet emi ofuri udim heaven etuakde ibuot ke iso Esie. Enye oyom nnyin idu do ye Enye ke nsinsi ini.
Jesus ekemek mme ñkpọ eke edide mmeme ke ererimbot man Enye esuene mbon eti ibuot. Enye ọkọdọhọ ete ke idighe ndiwak mkpọsọñ owo ke ererimbot ediyom ndidi mbet Imọ, edi mme ubuene eyekop uyo Imọ ye idaresit. Ke ini Isaiah ọkọnọde ikot Eti-mbuk, enye ọkọdọhọ ete: “Ho, mbufo kpukpru emi itọñ asatde, edi ke mmọñ! ye owo eke minyeneke okuk! mbufo edi edep enyuñ edia!’ (Isaiah 55:1). Okposuk edi nnyin idide ubuene, ererimbot mminyuñ ifiọkke nnyin, oro iwutke ite ke Jesus emefre nnyin. Enye kokot kpukpru owo ete etiene Imọ, man ebuana ke mme anana-adaña edidiọñ Esie, emi edide emem ke esit ke emi, ye nsinsi idara ke ini eke edidide.
Ndikpeme Ke Ererimbot
Ke ini Jesus eketiñde abaña ubọñ emi edidude ke Heaven, ke akpanikọ mme mbet Esie ekpekema ndika ye Enye ndo-ndo oro. Ndusuk ini Heaven esidọñ nnyin ke adaña emi ikutde afanikọñ ke ererimbot ndien nnyin inyene udọñ ke abaña ubọñ emi ebetde nnyin. Edi Jesus ama ọbọñ akam ọnọ Ete: “Mbeñeke nte Afo osio mmọ ke ererimbot efep, edi mbeñe nte ekpeme mmọ ke idiọk esie.” Mmọ ema enyene utom ndinam. Jesus ọkọdọñ mmọ eka ekedi mme asaña-utom ndinam ererimbot efiọk ete ke Jesus eyenyaña mmọ osio ke mme idiọk-ñkpọ. Edi ama odu ñkpọ emi mmọ ekpenyenede man anam mmọ edi mme nti ntiense. Kiet ekedi edinam-asana.
Enam Asana Oto Ke Akpanikọ
Mme owo emi Jesus ọkọbọñde akam abaña ema enim ete Jesus edi Eyen Abasi, mmọdo nsinsi uwem ama ọtọñọ ke esit mmọ. “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọñde.” Idighe ndifiọk mbaña mmọ ikpọñ, edi ndifiọk mmọ nte Spirit ayararede. Ke emi akana enam mmọ esana. Mmọdo Jesus ọkọbọñde akam, “Da akpanikọ Fo dianare mmọ nim nnọ Idem Fo: ikọ Fo edi akpanikọ.” Ekenyene ndinam esit mmọ esana, ndien emi oto ke edinam asana.
Jesus ama ọbọñ akam abaña nnyin emi enyañade ñko. Enye ọkọdọhọ ete: “Mbeñeke mbaña mmọ emi ikpọñ, edi mbeñe mbaña mmọ nde eke ebuọtde idem ye Ami oto ke ikọ mmọ.” Nnyin emi inimde se mmọ ekwọrọde oro edi mme ñkpọ eke ewetde ke obufa Ediomi, ekeme ndinam nnyin isana ñko, edieke iyakde uwem nnyin ofuri-ofuri inọ Jesus inyuñ inimde eñwọñọ emi Enye ọnọde nnyin. Edinam asana eyesọñọ mme anditiene Enye idem. Ntak efen ama odu emi ekpenyenede ndinam mmọ esana. Oro eyenam mmọ edi kiet ye Jesus. Edinam asana eyeda edidiana kiet ke mbuọtidem edi. Jesus oyom ikọt Esie enim kpukpru Ikọ Esie; ndien edieke mmọ enamde oro, mmọ edi kiet ye mme andinim ke akpanikọ, enyuñ edi kiet ye Enye.
Ntak efen osuk odu emi mbet ekpenyenede edinam asana. Jesus okoyom ererimbot efiọk ete ke mmọ edi mme anditiene Imọ. Enye okoyom ikọt Esie eneñede ebiet Enye man ererimbot efiọk ete ke mmọ edi Nditọ Abasi. Enam nnyin isana ke ibọde edinam asana, ndien efiak enọ nnyin uduot Abasi oro Adam ye Eve ekeduọkde ke adañemi mmọ ekenamde idiọk-ñkpọ ke Iñwañ. Nnyin ikabade ibiet Abasi ke edinen ido ye edisana uwem. Yak nnyin iti ite ke nnyin inyene ndinyene mbiet Abasi, inyuñ idu uwem man oto do ererimbot ekeme ndikut Jesus ke uwem nnyin.
Edieke idude uwem nnyin inọ Jesus, ndien edu uwem nnyin asana, nnyin iyarade iwut ite Abasi ọkọdọñ Eyen Esie edikpa ọnọ nnyin. Nnyin ikpekemeke ndidu edisana uwem kpukpru ini edieke mikpokosioho uduot idiọk-ñkpọ ifep ke esit nnyin oto ke Iyip Jesus. Edi akpan ñkpọ uwem nnyin ndiyarade nwut ete nnyin idi nditọ Abasi. Nnyin iyom ndidi uñwana man ida mbon efen usuñ isim obio uboñ Abasi ikunyuñ idi ñkpọ iduọ emi isiride usuñ.
Questions
MME MBUME- Didie ke Jesus eketre akpatre ikọ Esie ye mme mbet mbemiso Enye akpa?
- Siak ndusuk ini emi Jesus ọkọbọñde akam.
- Anie ke Jesus ọkọbọñ akam abaña ke ini emi?
- Jesus ọkọbọñ akam abaña nso?
- Nso idi ntak emi Jesus ekedide ke ererimbot?
- Jesus ọñwọñọ nso ñkpọ ọnọ mmọ emi etienede Enye ke mbuọtidem?
- Nọ ntak emi nditọ Abasi ekpenyenede edinam asana.
- Nso mbiet ke Nditọ Abasi ekpenyene?
- Jesus oyom nditọ Esie edu ke mmọñ?