Lesson 241 - Junior
Memory Verse
“Ami ñkọsuhọre nna, nnyuñ nde idap; ndemere; koro Jehovah omumde mi akama”(Psalm 3:5).Notes
Ediye Eyen-Eren Edidem
David ama akara obio-ubọñ Israel ke ediwak isua onyuñ okut unen, edi ama odu mme ini mfuhọ ke ukara esie. Akamba ñkpọ mmọñ-eyet kiet ke uwem esie okotibe ke ini eyen esie, Absalom akadahadeda añwana ye enye, onyuñ odomo ndibọ enye itie ubọñ.
Ediye eyen edidem emi edi owo emi ofuri nditọ Israel ekemade, ke ntre ikedighe ọkpọsọñ ñkpọ enye ndida esit mmọ nnyene. Enye eyewat ebe ke efak Jerusalem ye mme anditiene enye ke mme ukpat-ñkpọ emi mme ndiye enañ mbakara eduride, ndien ediwak mme asaña utom eyefehe ebem enye iso ndidiọñ usuñ nnyuñ nnọ uyo nte ke enye ke edi ndibe. Ndien ediwak owo eyeboho ndise nte enye ebede, efuñ ubọk enyuñ efiori: ete “Itọñ uwem ọsọñ eyen-edidem.”
Edi idaha ukpono oro ikọyuhọke Absalom. Enye okoyom ndidi edidem man enọ enye ọyọhọ ukpono emi idaha edidem enyenede. Enye ekedi akpan ọnọ kpukpru nditọ David emi ekedude uwem, onyuñ edi enye akpada ubọñ ke ete esie adahade, edi etie nte ke enye ama ekere ete Abasi eyemek owo efen ndida itie edidem, midighe, enye ikenyeneke ime ndibet tutu ete esie akpa. Ke ntre Absalom ama ọtọñọ ndinam ekikere ndibọ Edidem David ebekpo.
Idiọk Ediomi
Ke ini oro ekedi ido mme ebierikpe ye ,bopwp Israel nditie ke mme inua-otop obio mmọ ndikop mme mfina ye ndutime emi mbon obio edade edi. Ke usuñ emi ke mmọ edimehe ye mmọ emi mmọ ekarade, enyuñ ekpe mme utọk emi odude ke ufọt mmọ man emem odu. Edi utọ itie emi ke Absalom akada ọnọ idem esie. Ini ekededi mme owo edide obio ndikut edidem, Absalom eyesobo ye mmọ ke inua-otop obio onyuñ ọdọhọ mmọ etiñ mfina mmọ enọ enye. Enye eyeseme ye owo oro onyuñ onyime ete ke andida ikọ ndi enyene unen.
Absalom ekedi ata owo mbre-ukara, ama onyuñ ọfiọk usuñ nte edepde ekikere mme owo. Enye ama anam nditọ Israel ekere ete ke edidem ikesehe ñkpọ ibaña mmọ, onyuñ ekpere nditua eyet ke ini enye ọkọdọhọde ete: “Akpakam enim mi ke ebierikpe ke idut emi, man kpukpru owo eke enyenede ikọ, mme ikpe eda etiene mi, ndien ñkpekpe ikọ esie nte enende.” Ke ini mme owo enuhọde ekọm enye, enye otim inua. Mme owo ema nte ekutde enyuñ ekpañde utọñ enọ mmọ, ndien ke usuñ emi ke Absalom ọkọwọñọre esit mme owo ọkpọñ ete esie ọnọ idem esie.
Ñsọñ-ibuot
Nte mme isua ebede Absalom ama okut ete ke imọ imọsọñ ubọk ikem ndinyaña mbọ itie ukara ete esie. Mmọdo usen kiet, enye ama etiene David ọkọdọhọ enye ete ke imọ iyom ndika Hebron ñkosio akaña imọ. Ete esie ikekereke ete ke enye akababiaña, edi ọdọhọ enye ete asaña suñ.
Ke ini Absalom ọkpọñde Jerusalem, enye ama ada iren-owo 200 ye enye, onyuñ ọdọñ mbon uyep ke ofuri adaña Israel nditiñ ete ke ini ekem ndidaha-nda ññwana. Ke ini mmọ edikopde uyo ukorowo, yak mmọ efiọk ete ke Absalom ada ubọñ ke Israel. Ke nditim nnam ndutim ọfọn, Absalom ama ada Ahithophel, etubom mme andinọ Edidem David item adian idem. Ahithophel ekedi owo Abasi, ndien mme ikọ esie esito nda-usuñ Abasi. Okposuk edi nte esit Absalom ọkọdiọkde, enye okosuk oyoyom uñwam Abasi ke edinam nsọñ-ibuot esie.
Eketie nte uduak Absalom eyewọrọ osu ọnọ enye, koro akwa udim mbon ekọñ ema esop idem ke Hebron ye enye, enyuñ ebeñe idem ndiñwana ekọñ ye David ke Jerusalem.
Itọk David
Esit David ama ọbuñọ ke ini okopde se edima eyen esie akanamde. Owo ufọk esie kiet ama abiaña enye onyuñ adaha ada ndiñwana ye enye!
David ama ọfiọk ete ke imọ idinyeneke ubọhọ ke Jerusalem, ntre enye okot ediwak ikọt esie onyuñ ọdọhọ mmọ ebeñe idem ndiwọrọ. Afo ekere ete anie akasaña ye enye? Idighe nditọ Israel emi enye akanamde ñkpọ ọnọ, edi mme Pelethite ye Cherethite, mbon Philistine; ye mme Gittite emi mibighike ekedi Jerusalem. David onyuñ ọdọhọ etubom mmọ, Ittai, ete ke ifọnke enye ye ikọt esie ndiduọk uwem mmọ man eñwam imọ, edi Ittai ọbọrọ ete; “Ma uwem Jehovah, ye uwem ọbọñ mi edidem, ke ebiet eke ọbọñ mi edidem edidude, edide ke mkpa, onyuñ edide ke uwem, ke owo fo edidu ñko.” Mme ikọ esie eti nnyin se Ruth, eyen-añwan Moab, ọkọdọhọ eka-ebe esie: “Nyeka ke ebiet eke afo akade; nyenyuñ nduñ ke ebiet eke afo oduñde: oruk fo eyedi oruk mi, Abasi fo eyenyuñ edi Abasi mi” (Ruth 1:16).
Mme Jew Esin
Abasi ama okot idut Israel ete ekpedi akpan inyene enọ Imọ. Edi mmọ esin ndinam ñkpọ Esie, ndien mme Gentile ekut ete ke erinyaña onyuñ odu ọnọ mme imọ ñko. Ediwak mmọ ema edaresit enyuñ etiene Ọbọñ. Ruth ekedi owo Gentile, kpa ntre ye mme Philistine emi ekedade ye David. Mmọ ema ebọ edidiọñ Abasi koro mmọ ekedade ye ikọt Esie.
Ke ini mme Jew ekesinde Christ, Enye ama atua eyet abaña Jerusalem. Ntak emi mmọ mikọbọhọ etop erinyaña emi Enye akadade edi? Edieke mmọ ekpefiọkde ubierikpe emi ekebetde mmọ, ke akpanikọ mmọ ekpeketua ekot Enye anyaña mmọ! Edi utu ke mmọ enam oro, mmọ ekekọñ Enye ke krọs.
Ekedi ke mben obot oro, emi David akasañade ke emi, ke Jesus ke okoneyo oro akañwaña ukpọñ Esie ke ndutuhọ abaña mme anana mbuọtidem ikọt Esie. David ye mme mmọ emi eketienede enye ekesaña ikpikpu ikpat, enuk ibuot mmọ ke isọñ, enyuñ etua eyet nte mmọ esañade eka. Mme oruk mmọ ema esin mmọ!
Ufan David
Edi nte mmọ emi ekebinde mi esañade, ebe ke wilderness, mmọ ema ekut mi ye ko ibat-ibat owo emi mikadaha ye Absalom. Ke otu mmọ oro ekedi Hushai, emi ekedide ufan ye ọnọ item David. David ama ọdọñ Hushai etiene otu Absalom nte uyep, onyuñ ọnọ Absalom item abiaña. Akana nte eda mbuk esọk David ebe ke mme oku emi ekesuhọde ke Jerusalem.
Mme Levi ema eyom ndimen Ekebe Ediomi Abasi ntiene David ññwọrọ ke obio. Edi David ama ọdọhọ mmọ ete efiak ekesuhọ ke Ataya, koro Abasi eyekpeme Ekebe Esie. Ñko edieke ndutime emi mitoho ndudue David, Abasi eyeda enye ọnyọñ edi ke ifure. Edi edieke David akanamde idiọk-ñkpọ, ndien ndutime emi edi nte ufen, enye ikoyomke Ekebe Ediomi Abasi etiene enye ọbọ ufen.
Mbuọtidem David
Ke ofuri ini idomo emi, David omum mbuọtidem esie ke Abasi akama. Edi ke utọ ini emi ke enye ekewet Psalm ibuot 3. Enye ikefeheke ndik ibaña mme tosin owo emi ekeyomde ndiñwana ekọñ ye enye; ndien ke ufọt oyobio, abiaña ye odu emi ekedukde ebaña enye, enye ama ekeme ndidọhọ ete, “Ami ñkọsuhọre nna, nnyuñ nde idap; ndemere; koro Jehovah omumde mi akama” (Psalm 3:5).
Absalom Ke Jerusalem
Ndo-ndo oro Absalom okokopde ete ke David ama ọkpọñ obio, enye ye mbon ekọñ esie ema eduk ke Jerusalem. Do ke enye okotim idem ndida ekọñ mbine ete esie. Ahithophel ama eteme ete ke David ye ikọt esie eyesọp ndikop mmem-idem oto isañ, ndien ke eti ini edi oro ndiñwana nnyuñ ñkan mmọ usọp-usọp.
Absalom ama onyuñ oyom item oto Hushai. Emi ekedi ifet ọnọ Hushai ndiñwam ufan esie David. Enye ama ọnọ ekikere ete ke David ye ikọt esie edu ke ọkpọsọñ iyaresit oto ke idiọk-ñkpọ emi enamde mmọ, ndien ke mmọ eyebumere nte I,am el[eemi emende eyen esie ekpọñ enye. Ñko Absalom ekpenyene ndifiọk ete ke ete esie osuk edi akwa owo ekọñ, ndien idighe mmem-mmem ndikan enye ke ekọñ. Do Hushai ama eteme Absalom ete ebet tutu iyaresit ete esie ọsuhọre, ndien ada ifet oro obon akwa udim ekọñ emi etode ofuri esien Israel ndiñwana nnyuñ ñkan. Abasi ọkọnọ item emi man ekan udim ekọñ Absalom, edi Absalom ama onyime item oro, inyuñ isọpke idaha ika ekọñ ye David.
Ahithophel ama ayat esit eti-eti, koro owo mikadaha item esie, oro esin enye ọnyọñ okotim ufọk esie onim, onyuñ owot idem esie. Enye ekedi owo emi ini kiet akakpañde utọñ ọnọ ifiọk Abasi, edi ke ini ọwọñọrede ọkpọñ edinen-ido onyuñ anyamde idem esie ọnọ idiọk-ñkpọ, enye ikenyeneke idori-enyin, ndien akada ubọk esie owot idem esie. Nso ukpep-ñkpọ ke nnyin isio do inọ idem nnyin: nte ke ifọnke ndikpọñ Abasi mfiak edem. Koro ekeme ndidi ifet edikabade esit ididuhe aba inọ nnyin. Nso ñkpọ mmọñ-eyet ke edidi ọnọ owo emi ọkọfiọkde ima Abasi ini kiet nditak ke nsinsi!
Ntuaha
David okosuk edi owo emi enyenede mbufiọk ekọñ, ndien ama ọsọsọp otim mbon ekọñ esie esin ke udim ita ndien mmọ ema ebeñe idem ebet Absalom ke ini enye edide. Añwa ekọñ ekedi akai emi eto ewakde eti-eti, isọñ onyuñ etiede ñkputuk-ñkputuk. Ke akpa usen eñwan, owo 20,000 ekekpaña, “Akai onyuñ adia ediwak owo akan se ofut adade ke usen oro.” Nte ekọñ osuk akade iso Absalom ama adiañade ye udim ekọñ esie, ndien nte odorode ke enañ mbiomo esie awat ebe, idet esie ama awaña ke ñkọk eto. Enañ mbiomo oro enye odorode ama ebe ọkpọñ enye.
Mbọm Absalom, se nte ọkọñọde ke eto, ndien kiet ke otu mbon ekọñ David edikut enye. Enye emen etop eketiñ ọnọ Joab ada ibuot ekọñ esie, ndien Joab obup enye ntak emi enye mikowotke Absalom. Owo ekọñ etiñ ke imọ ima ikop David ekpede ye ikọt esie ete yak mmọ efọn ido ye Absalom, ke ntre imọ ikpekemeke ndinam enye idiọk-ñkpọ.
Nte ededi Joab ikotimke ikere. Enye akada Absalom nte enye emi añwanade ye nnen-nnen ukara, ke ntre mme enye edi eyen-ọbọñ midighe,ana esobo enye. Enye emen eduat ita okim Absalom ke esit, ndien enye ye akparawa esie esibe enye eduọk ke isọñ enyuñ ebuk enye ke obube. Eda ebok itiat ekubi enye ke idem.
Ke ntem ke nsọñ-ibuot emi akadahade-ada ke ukara David eketre. ndien mbon ekọñ enyọñọ ufọk mmọ.
Mfuhọ David
Mbon itọk iba ekeda mbuk edikan esọk David. Akpa ñkpọ emi okobupde ekedi mme Absalom ọbọhọ. Akpa owo itọk ama ọbọrọ ete: “Yak mme asua ọbọñ mi edidem, ye kpukpru owo eke edahade ke enyọñ ete inam fi idiọk, etie nte eyen oro.” David ọfiọk ete ke eyen imọ ama akpa, ndien enye oduk ke ubet esie ikpọñ akatua enye: “Eyen mi Absalom! Eyen mi, eyen mi, Absalom! Ami ñkpakam ñkpa ke ibuot fo, o Absalom eyen mi, eyen mi!”
Ndien kpukpru mbon Israel emi esañade ye David efuhọ eti-eti. Mmọ ekekere ete ke mme imọ inam ñkpọ inọ David ke akpanikọ ke ndifak enye nsio mme asua ke ubọk, edi ke emi eketie nte ke mmọ ekenam se minenke. Edi Joab etiene David uko-uko ọkọdọhọ ete yak enye owut esit ekọm ọnọ nditọ Israel emi ekedade ye enye, midighe ke mmọ eyekabare eñwana ye enye. David ama okut utom emi enye ekenyenede ndinam nnọ ikọt esie, ndien ọkpọnọre mfina esie onim onyuñ aka eketie ke inua-otop ndidọñ mme owo esit.
Absalom ekedi eyen edidem, ama onyuñ enyene ifet ke kpukpru nti ñkpọ uwem. Enye ekedi owo inyene ye ediye owo. Enye ama enyene ifiọk Abasi, mme owo ema enyuñ ema enye. Ndien utu ke enye akpada mme ufọn oro añwam mbon efen, enye ekekere abaña idem esie ikpọñ. Enye ikokponoke ete esie ikonyuñ iteñeke Abasi, ndien nte utip, enye ama akpa mkpa but onyuñ atak ke nsinsi. “Ñkpọ-eyen-utom idiọk-ñkpọ edi mkpa” (Ñwed Mbon Rome 6:23).
Questions
MME MBUME- Absalom ekedi anie?
- Tiñ ñkpọ baña nte enye eketiede ye edinam esie, emi ekesinde mme owo ema enye.
- Nso ikedi udọñ Absalom?
- Didie ke enye okotibi ñkari esie?
- Nso ke David akanam ke ini okopde abaña ndutime emi?
- Didie ke ekemum Absalom enyuñ ewot enye?
- Nso idi utip idiọk-ñkpọ?