Lesson 242 - Junior
Memory Verse
“Enye ididighe ndinyene mbubehe ye idiọk-ñkpọ, edi edidi ndinyaña mmọ emi etiede ebet Enye.” (Mme Hebrew 9:28).Notes
Nsọñ-Ibuot Absalom
Absalom ama oyip esit ediwak owo ke Israel ọnọ idemesie, onyuñ ada usuñ ke akwa nsọñ-ibuot ye ete esie emi ekedide edidem Israel emi okokponde akan. David ama efehe ọkpọñ Jerusalem onyuñ odibe ke anyan ebiet ke wilderness ke ini eyen esie eren okodomode ndikara Nditọ Israel. Mbon emi mikamaha David ema ekere ete ke kpukpru eyefọn idahemi sia ediye Absalom okodude nte ibuot ukara, koro enye ama ọñwọñọ nditim ñkama mmọ nnyuñ nkut ete ke imekpe ikpe nte mmọ ekeyomde.
Nnam inua Absalom ekedi ikpikpu. Enye ama ọñwọñọ ediwak ñkpọ emi enye mikekemeke ndinam . Ikebigheke ema ewot enye ke ekọñ, Nditọ Israel inyuñ inyeneke edidem aba. Mmọ eketie nte erọñ emi minyeneke andikpeme. Sia owo mikoduhe ndida usuñ, ikebighike ndutime ama odu ke obio.
Ke ukut mmọ, Nditọ Israel ema etọñọ ndifiak ñkere mbaña David. Mmọñ ke enye okodu? Nte enye ikemeke ndinwam mmọ? Mmọ ema eti ete ke ama akara mmọ ke anyan ini ke ima, ama onyuñ osio mmọ ke ubọk mme Philistine ediwak ini. Ntak emi mikpedaha David ifiak ke Jerusalem man edi andikara mmọ?
Mfuhọ David
David ikefeheke inyọñ ika ke Jerusalem ke ndo-ndo oro enye okopde abaña mkpa eyen esie. Enye ama oyom ndifiọk kaña mme eyom imọ. Enye ama otim ama ikọt esie, ndien esit ama oyom ndibuñọ enye ke ini mmọ ekesọñde ibuot. Ke usen mfuhọ emi enye okokopde ke emek Absalom edidem, enye ama asaña ye ikpikpu ikpat, otuk ibuot ke isọñ onyuñ ọdọk obot ọkpọñ obio.
Ebup Judah Mbume
Ini ama ebe, David ama onyuñ oyom ndifiak nnyọñ man akañwam ikọt esie. Enye ama efen ọnọ mmọ ke nsọñ-ibuot mmọ, onyuñ onyime ndifre mbaña unana esit ekọm mmọ ye enye. Ke akpatre,etop ama edisim enye ete ke mme esien Israel ke ekere ndikot enye afiak ọnyọñ ebekpo; edi ke esien esie, kpa esien Judah, oruk ekikere emi ikoduhe.
Usen kiet David ama ọdọhọ mme oku (emi ekedude ye enye) ete eka ebine mbiowo Israel enyuñ ekebup mmọ ete: “Nsinam mbufo edide ekperedem ke ndida edidem mfiak ke ufọk esie? Sia uyo ofuri Israel ama osim edidem, kpa ke ufọk esie? Mbufo edi nditọ-ete mi, mbufo edi ọkpọ mi ye obukidem mi: ke didie ndien ke mbufo edi ekperedem ke ndida edidem mfiak?”
David ikonyimeke ndifen nnọ nsọñ-ibuot Nditọ Israel ikpọñ ikpọñ, edi ama ọñwọñọ ọnọ ndusuk mmọ, ndinọ mmọ akamba itie ke okure esie edieke mmọ edidade enye efiak. Mbon Judah ema etọñọ ndikut ufọn David, enyuñ enọ ọyọhọ ikot: “Fiak di ye kpukpru ikọt fo.” Esit mmọ ama ọtọñọ ntak ama edima edidem mmọ, David.
Edifiak Ññyọñ
Idara ama okpon ke nna David ke ini ikot emi osimde mmọ. Ndo-ndo oro, David ye kpukpru mmọ oro ekedude ye enye ema etọñọ isañ ndika ke inyañ Jordan man ebe esim akwa obio ukara. Mbon Judah ema edi ndisobo ye edidem mmọ ke ido nte odotde, ndien ke edu usọrọ, mmọ ema eda edidem ye ikọt esie ebe inyañ Jordan. Mmọ ema enyime David nte edidem mmọ, enyuñ eñwọñọ ndisuk ibuot nnọ enye.
Udọñ Christ Ke Abaña Ikọt Esie
Imekeme ndida udọñ David ndiyom ndidu ini kiet efen ye ikọt esie, ndomo ye udọñ Christ nte Enye oyomde ndidu ye ata ufọk Abasi Esie, oro edi Ñwan-ndọ Christ. Idahemi Enye odu ke “idut efen” emi Enye eketiñde abaña ke ñke (Matthew 21:33-41); ñko, Enye ebet ikọt Esie ebeñe idem ndidu ye Enye ke Ebiet-iduñ Esie ke enyọñ.
Jesus oyom ndidi ndida ikọt Esie edidu ye Enye, man ekut Enye ke ubọñ Esie, enyuñ ekara ye Enye. Nte nnyin imoyom Enye edi?
Nte nnyin ke inam ñkpọ eke edidade Jesus afiak edi? Enye ididighe tutu ñwan-ndọ ebeñeidem ndisobo ye Enye. Angel ama ọdọhọ John ke Isuo Patmos ete ke mfiori Usọrọ Ndọ eke Eyen-erọñ edidi: “Eyak nnyin idara inyuñ idat esit, inyuñ inọ Enye ubọñ; koro ekem ini ndọ Eyen-erọñ,Ñwan Esie otim idem ebeñe Enye” (Eriyarare 19:7).
Ufọk Abasi akpanikọ edi Ñwan ndọ Christ. Mbubehe nnyin mi nte nditọ-Abasi edi ndibeñe idem nnyin nte ñwan-ndọ ebeñede idem ebet ebe esie. Jesus edi Ebe-ndọ ukpọñ nnyin.
Mbeñe-Idem
Ke mbeñe-Idem, nnyin inyene ndisine ñkpọ mbana idem eke spirit. Enọ enye nsio nsio enyiñ. Ediye Linen, oro edi edinen ido nti ikọt Abasi. “Enyuñ enọ enye ndisine ediye Linen eke asanade onyuñ esemde; koro ediye Linen oro edi edinen ido nti ikọt Abasi” (Eriyarare 19:8).
“Eyesine enye mbuaha ọfọñidem eda esọk edidem” (Psalm 45:14). Mfọn owo Abasi edi mbuaha ọfọñidem emi anamde Ñwan-ndọ eye. Enye odu uwem nte ukpep ñkpọ Ñwed Abasi etemede, onyuñ eye ke enyin Ọbọñ. Ñkpọ mbana esie edi “suñ-suñ spirit eke enyenede iso but ... koro oro edi se isọñde urua ke enyin Abasi” (1 Peter 3:4).
Ndinyene Udọñ Ke Abaña Ọbọñ
Ke ini nnyin ima ikesine kpukpru ñkpọ mbana idem, akwa udọñ eyedu ke esit nnyin ndikut Ebe ndọ, kpa Eyen Abasi. David ama enyene udọñ oro ke ini enye ọkọbọñde akam ete: “Ami nnyene anie ke enyọñ? Baba kiet ke isọñ inyuñ inemke mi nte afo” (Psalm 73:25, 26).
Ke nnyin ima ikọbọ baptism Edisana Spirit, Spirit Abasi eyeduñ ye nnyin, ndien Enye eyetiñ ye nnyin abaña Jesus; ñko, nte nnyin ikpañde utọñ ikop suñ-suñ uyo Esie ke abaña ima Jesus ye nnyin, udọñ nnyin ndikut Jesus eyekpon.
Spirit anam añwaña nnyin se Ikọ Abasi etiñde ọnọ nnyin abaña ediye Ebiet-iduñ emi Jesus akade nditim nnọ Ñwan-ndọ Esie. Enye etiñ ọnọ nnyin abaña ifet eke nnyin idinyenede ke ini nnyin ididude ye Enye: “owo eke akande nyenọ enye nditie ye Ami ke ebekpo Mi, kpa nte Ami ñkakande, nnyuñ nsuhọre ntie ye Ete Mi ke ebekpo Esie” (Eriyarare 3:21). Enye anam añwaña se utom nnyin edidide ke ini ikade ikodu ye ọbọñ nnyin: “Ọfọfọn ọnọ owo emi enyenede udeme ke akpa eriset: enye edi edisana; udiana akpa mkpa inyeneke odudu ke idem mmọ emi: edi mmọ eyedi mme oku Abasi ye Christ, mmọ eyenyuñ eda ubọñ ye Enye ke thousand isua” (Eriyarare 20:6). Oro edidi edinen ukara ke isọñ emi ke ini ukara tọsin isua.
Nte afo omoyom Jesus ọtọñọ ntak edi? mme mbubehe fo inọhọ fi ifet ndikere mbaña emi? Nte idorenyin fo edi, “Jesus ekeme ndidi mfin”? Anie ke afo esibem iso ekere ke ini edemerede ke usen ubọk? Nte idorenyin fo edide Jesus ekeme ndidi mfin”? Anie edi ata akpan owo ke uwem fo? Nte afo amada nte akpan ñkpọ ndinem Jesus, Ebe ndọ ukpọñ fo esit, ñkan ndinem mme ufan ye nsaña fo esit?
Ndidi Esie Oto Ke Ufak
Jesus ama edep nnyin ke nsọñ-urua Iyip Esie. Nnyin idi Esie inyuñ isọñ urua ke Enyin Esie. Enye ama ama nnyin, tutu akpa ọnọ nnyin, enyuñ enyaña nnyin oto ke Iyip Esie. “Kpa nte ọdọ-ñwan adatde esit abaña ñwan ndọ, kpa ntre ke Abasi fo edidat esit abaña fi” (Isaiah 62:5). Ida didie ima eke inyenede inọ Enye idomo ye ima eke Enye enyenede ọnọ nnyin? Nte nnyin imayak uwem nnyin inọ Enye ke ndinam utom Esie? Edieke anade nte ikpa, ndi nnyin ikpenyime ndikpa nnọ Enye?
Ke ini nnyin ibupde idem nnyin oruk mbume emi, nnyin iyefiọk mme nnyin imeneñere iyom Edidem nnyin afiak edi. Ediwak mme anam idiọk-ñkpọ ekere ete Jesus eyesọp ndidi. Ikọt Esie ndien? Nte mmọ eyom Edidem ọnyọñ edi, enyuñ eyom ndisọp ñkut Enye? Ediwak owo eke edọhọde ete idi eke Christ isinke ifik ke ntim idem mmọ ndisobo ye Enye. Mmọ ewut ke edu uwem mmọ ete ke mme imọ iyomke ndisọp ñkut Enye. Mfuhọ okpon didie ke esit Esie ndikut nte mmọ enamde ntem!
Ikot Eti-mbuk
Kiet ke otu mme utom Ñwan-ndọ Christ edi ndikpe ye mme anam idiọk ekabare esit mbemiso ifet ebe mmọ ke nsinsi. Eyak nnyin ibup idem nnyin, “Nte nnyin imenyene mfuhọ ibaña mme ukpọñ?” Nte imoyom Eti-mbuk atara osim ofuri ererimbot, man ediwak owo emi akananam mikopke ibaña Jesus ekeme ndinyene erinyaña?
Angel ama ọdọhọ John ke Isuo Patmos ete, “Spirit ye ñwan-ndọ edọhọ ete, Di” (Eriyarare 22:17). Edieke nnyin idide Ñwan-ndọ Christ, nnyin iyedọhọ ite, “Di.” Oto ke uwem eke idude inọ Jesus, ke eribọñ akam ke ofuri esit, ke editiñ ikọ ntiense nnyin, nnyin ke ikpe ye anam idiọk ite ayak esit esie ọnọ Jesus, man enye ñko ekpedi Ñwan-ndọ Christ.
Edieke nnyin inamde kpukpru se nnyin ikemede inọ Jesus, nnyin imekeme nditiñ nte Apostle John: “Di, Ọbọñ Jesus” (Eriyarare 22:20).
Questions
MME MBUME- Nso ikanam David efehe okodu ke esen idut?
- Ñkpọ eketie didie ke Israel ke ema ekewot Absalom?
- Nso ikanam David ebet mbemiso enye afiak ke Jerusalem?
- Anie ọkọnọ David ikot emi enye okoyomde?
- Anie edi Edidem nnyin?
- Nso idi ntak anditiene Christ oyomde enye afiak edi?
- Didie ke nnyin ikpebeñe idem nnyin ndisobo ye Edidem nnyin?
- Nso idi ndusuk utom Ñwan-ndọ Christ?
- Anie etiñ mme ikọ emi edemerede ukpọñ nnyin abaña Jesus?