Lesson 244 - Junior

Memory Verse

“Koro ndade fi mbumere udim owo: nda Abasi mi mfrọ ñkaña ibibene “ (2 Samuel 22:30).

Notes

Mme Ikwọ Ekọm

David ama enyene esit ekọm ọnọ Abasi ke ediwak mfọn Esie. David ama ọfiọk ete ke esiode Abasi efep ke imọ ikemeke ndinyene uñwam. Enye ama añwana mkpọsọñ ekọñ ke idem ini emi udim ekọñ mme asua ekesọñde ekan eke esie; ndien edieke Abasi mikpakadaha ye enye, enye ikpekekemeke ndinyene edikan. Spirit David ama emenede ke abaña odudu emi Abasi ọkọnọde enye tutu enye ofiori ete, “koro ndade fi mbumere udim owo: nda Abasi mi mfrọ ñkaña ibibene”

David ama eti ndinọ Abasi ekọm ke abaña uñwam oro. Ediwak Psalm edi ikwọ ekọm emi David ọkọmde Ata Edikoñ Abasi emi osukde enyin ese owo nsuhọridem onyuñ ọdọñ uñwam esie ọnọ.

David ikekereke ete ke Abasi oyom usuñ akan nte okpokopde akam esie. Do ke Heaven, Abasi ama okop onyuñ ọbọrọ. Edidem Solomon ama enyene ukem mbuọtidem emi ke ini enye ọkọbọñde akam. “Afo nyuñ tie ke ebiet iduñ fo ke enyọñ kop: ndien ke ini afo okopde, dahado” (1 Ndidem 8:30). Apostle John ama etiñ ñko ete, edieke nnyin inimde ke akpanikọ ite ke Jesus ọbiọñ utọñ ọnọ nnyin, ke eyebọrọ kpukpru akam nnyin (1 John 5:15).

Mme Ekọñ Emi Abasi Akañwanade

Didie ke Abasi akañwana mme ekọñ Israel? Ke Egypt Enye ama ọdọñ mme ufen ọnọ nditọ Egypt man enyik mmọ ndiyak nditọ Israel ewọñọ ke obio mmọ. Abasi ama anam mme ñkpọ eke owo mikemeke ndinam. Abasi ama anam mmọñ inyañ Nile akabare edi iyip, man owo okunyene mmọñ ndiñwọñ. Ekem enye ọtọñọ ntak anam enye akabare edi mmọñ. Enye ama ọdọñ idañ ye ikwọt ndifina nditọ Egypt; ndien ke idiọk okoneyo oro, Enye ama owot kpukpru akpan ke ufọk nditọ Egypt.

Ke ini Nditọ Israel ema ekewọrọ ke Egypt, enyuñ edisim ọtọ eke ekekutde idem mmọ ke ufọt obot iba, inyañ onyuñ odu ke iso, ndien ke edem mmọ mme asua edu, Abasi ama abahade mmọñ onyuñ anam Nditọ Israel esaña ke nsat isọñ ebe. Ke nditọ Egypt ekedomode nditiene mmọ ke edem, Abasi ama anam mmọñ afiak edem onyuñ ofuk kpukpru mmọ. Owo ikpekemeke ndifak Nditọ Israel nsio mme asua mmọ ke ubọk edi Abasi ama ekeme.

Ke ini ekekande Canaan, Abasi ama anam ibibene Jericho eduọñọ, man Nditọ Israel ekpebe eduk obio. Ini kiet Enye ama ọdọñ atat etop mmọ man anam mmọ efeñe ke iso nditọ Israel. Ke mme ini efen, emi mme ikpọ udim ekọñ emi ekekponide nte mmọ mikpekemeke ndiñwana ñkan, ekewọrọde edi ndiñwana ye Israel, Abasi ama ọdọñ ikpọ edim itiat, ndien, “Mme ntatafiọñ ke ọkpọ-usuñ mmọ eñwana ye Sisera,” emi ekedide asua Israel.

Ke ini Jonathan ye akama ñkpọ-ekọñ esie akekade nna mbon Philistine, oro edi, owo iba eka eñwan ye udim ekọñ, Abasi ama ọdọñ unyek-isọñ man ọnọ mmọ edikan.

Iyip Jesus Ubọhọ Nnyin

Abasi ama anyaña David osio ke kpukpru afanikọñ esie. Enye ama odu uwem ndinem Abasi esit. Ema efen mme idiọk-ñkpọ esie ndien ntak ikoduhe ndikere mbaña ubiere-ikpe. Nnyin ñko idikereke ubiere-ikpe, edieke ibeñede Jesus efen mme idiọk-ñkpọ onyuñ ada Iyip Esie eyet mmọ efep. Ke edikabare ñkpọñ mme idiọk-ñkpọ nnyin, nnyin imọnọ mmọ eka ikpe ke emi; ndien ke ini Jesus edidide ndikpe ikpe nnọ ererimbot, nnyin iyekeme nditiñ ite, “Ekenyaña oto ke Iyip Enye emi ekekọñde ke eto.”

David ama etiñ ete, “Atara mi idem koro amade mi.” Abasi ikadarake David ke ini David ekedide anam idiọk-ñkpọ, edi, ekedi ke ema ekefen mme idiọk-ñkpọ esie, enye onyuñ ama Abasi ke ofuri esit esie, ini oro ke Abasi akadara ke se enye akanamde.

Nte Abasi adara ke se nnyin inamde? Nte uwem nnyin ọfọn ke enyin Esie? Nte nnyin imọdiọñọ ite ke Abasi ke ese kpupru se inamde? Nte imonyuñ inam man inọ Enye ukpono? Edieke inamde, nnyin imekeme ndidori enyin nte ke Ọbọñ eyekop ke nnyin ibọñde akam, eyenyuñ ọnọ nnyin ediwak nti ñkpọ. John ama ewet ete, “Iyenyuñ ibọ se ededi eke ibeñede ke ubọk Esie, sia nnyin inimde mbet Esie, inyuñ inamde se inemde Enye esit” (1 John 3:22). Edieke mibọrọke akam nnyin, eyak nnyin ise uwem nnyin mme imanam ñkpọ ekededi emi mifọnke ke enyin Abasi.

Ikọ Eke Edipde Ke Esit

David ama ekeme nditiñ nte ke ima isaña ke mme usuñ Abasi inyuñ inim mbet Esie. Ke ini efen enye ama etiñ ete, “Mmama ndinam se Afo amade, O Abasi, mi, mbet fo enyuñ edu mi ke esit” (Psalm 40:8).

Nnyin inyene ndifiọk se idide uduak Abasi, Ikọ Esie, mbemiso nnyin ikeme ndidip enye ke esit nnyin. Nnyin inyene nditim ñkot Ñwed Abasi, ke edinam ntre ke iditi ibaña se Abasi oyomde nnyin inam. Mme scribe ye mme Pharisee ke ini Jesus, ema ekere ete ke imotim ifiọk Ibet, edi Jesus ama ọdọhọ ete yak mmọ eduñọre Ñwed Abasi, mman ekpetim efiọk ete ke iyedu ke mbeñe-idem ndiduk Heaven. Mmọ ke ekikere mmọ ema efiọk se ndinam eti ñkpọ ọwọrọde, edi mmọ ikoyomke ndikpep mbaña mbọm ye ima ke otu mme ubuene ye mmọ emi efikde, nte Jesus ekekpepde.

Mmọ ema ekere ete ke enen ndima mme ufan mmọ nnyuñ nsua mme asua mmọ; edi Jesus ọkọdọhọ ete, “Ema mme asua mbufo, enyuñ ebọñ akam eyom ufọn mmọ eke enamde mbufo isin-enyin” (Matthew 5:44). Oro edi mme ñkpọ eke esọñde ndinam; edi edieke nnyin itimde ima Jesus, Enye eyeñwam nnyin ndinam mmọ.

Mbọm Ye Mmọ Emi Etuade Owo Mbọm

Edieke nnyin ituade mmọ efen mbọm, Abasi eyetua nnyin mbọm. David ama ọfiọk abaña oro, ndien ama ewet ete, “Afo anam ke ima ye mbon-ima, onyuñ ọfọn ama ye owo eke ọfọnde ama.” Jesus ama ọñwọñọ ndidahado nnọ nnyin edieke nnyin ididahadedo inọ mmọ eñwen.

Nnyin iyekut nte idinyenede ediwak ufan edieke ifọnde ido ye mme owo, inyuñ inam iwut nte ke imama mmọ, nte Jesus oyomde nnyin inam. Mme owo eyewak ndinam ye nnyin ukem nte nnyin inamde ye mmọ, ndien edieke nnyin idide mme ama-idem inyuñ iyọhọ ye usua, mmọ efen edinyuñ enam kpa ntre.

Etiñ ke mbuk enọ nnyin ebaña ekpri eyen-eren emi okoduñde ke mben akai, ndien usen kiet enye ama ọwọrọ ada ke añwa ofiori, “Afo do.” Uyo ọbọrọ “Afo do” Enye ama ekere ete ke ekpri eyen-eren eñwen ọkọbọrọ imọ, ke ntre enye ama afiak ofiori ete, “Afo edi idiọk eyen-eren!’ Uyo afiak oyomo ebine enye ete, “Afo edi idiọk eyen-eren!” Enye afiak ofiori ete, “Wọrọ di mi, ndien nyemia fi!” ibọrọ ekedi “wọrọ di mi ndien nyenmia fi “Ami ke ndi.” Uyo onyuñ ọbọrọ Ami ke ndi.”

Ekpri eyen-eren emi ama efehe oduk ufọk onyuñ etiñ ọnọ eka esie ete, “Idiọk eyen-eren odu ke akai emi, ndien enye ke oyom ndimia mi.” Eka esie ama ọbọrọ ete, “Baba, ami ñkereke nte enye edi idiọk eyen-eren. Afo ukutiñke se ifọnde ye enye. Edieke ekpeketiñde se ifọnde, enye okponyuñ etiñ se ifọnde ye afo. Fiak ka kodomo ndinam ntem.” Ntre ke ekpri eyeneren afiak ọwọrọ aka onyuñ ofiori ete, “Afo do.” Enye okop uyo afiakde oyomo ete, “Afo do.” Ke ini emi enye ọdọhọ ete, “Afo edi eti eyen-eren!” ndien ibọrọ afiak edi ete, “Afo edi eti eyen-eren!” “Ami mmama fi,” uyo onyuñ afiak oyomo, “Ami mmama fi.” Enye ama efehe oduk ufọk onyuñ ọdọhọ ete, “Mmama, enye edi ata eti eyen-eren.”

Nnyin iyekut ediwak ufan edieke iyomde ndidi ufan. Ediwak ini, imekeme ndida mfọn ido idep esit mmọ oro ekesinde nnyin ke ndek. Owo okop inemesit akan ke ini enye anamde ufọn ọnọ mmọ efen, akan ndisuk nyire ndinam ke usuñ eke ọfọnde ye enye.

Uko Ke Ekọñ

Ekedi utom David ndisobo mme asua Israel. Utọ mmọ oro ekedi mme asua Abasi, ndien akana nte ekan mmọ. Abasi ama ọnọ David uko ke ekọñ man ekeme ndinim ofuri ibet Abasi.

Ekot Mme Idut Eken

Nditọ Israel ekedi mmọ emi Abasi ekemekde, ndien Enye okosioño mmọ onim saña saña, onyuñ ọnọ mmọ eti ifet ndikpep mbaña Enye. Enye ama ọnọ mmọ sededi mmọ ekpeyomde ke ini mmọ ekenamde ñkpọ enọ Enye ke ofuri esit. Edi mmọ nte idut, ema ewọñọre ekpọñ Abasi enyuñ ekenam ñkpọ mme abasi efen.

Ke ukpep-ñkpọ nnyin, etiñ enọ nnyin ete ke David ama etiñ ntiñ-nim ikọ abaña ini emi mmọ emi midighe nditọ Israel edidide edinam ñkpọ nnọ Abasi; “Mbon emi mmefiọkkeeyedi ikọt mi. Nditọ isen owo eyenem inua enọ mi: adañaemi mmọ ekopde ke utọñ, mmọ eyenam uyo mi.”

Spirit Abasi ama onyuñ ada Isaiah usuñ ndiwet ete: “Sese, afo eyekot idut eke mufiọkke, ndien idut eke mifiọkke fi eyefehe ebine fi” (Isaiah 55:5). Mmọ oro edi mme Gentile, mme idut eken emi midighe mme Jew, emi eyakde esit mmọ enọ Abasi, enyuñ enam ñkpọ Esie. Enem nnyin esit didie koro inyenede ebuana ke ima Abasi.

Ekebot Nditoro Enye

Abasi okobot owo man otoro enye. “Mmanam enye mbaña ubọñ mi” (Isaiah 43:7). Ndien Enye oyom nnyin ibuana ke kpukpru inemesit nsinsi uwem ye Enye. Edi nso utọ edikpu emi owo okpude! Ata ediwak owo imaha Abasi; utu ke oro, mmọ eñwọñọde ekpọñ Enye enyuñ enam idiọk.

Jesus ke ada atat ubọk Esie onyuñ ọdọhọ ete, “Etiene Mi, kpukpru mbufo emi ekpade mba enyuñ ebiomde edidobi mbiomo, ndien Ami nyenọ mbufo nduọk-odudu” (Matthew 11:28). Edi owo ọbọrọ ete, “Baba ndidighe.” Jesus ete yak owo ekededi eke onyimede edi. Enye ke okot kpukpru owo edi enyuñ enyene udeme ye Enye ke “kpukpru ñkpọ” oro edi sededi owo ekpekemede ndikere mbaña, edi ediwak owo edọhọ ete, “Baba, nyom ndidu uwem nte mmade.”

Eyak nnyin emi ifiọkde Enye itim ima Enye ke ofuri esit nnyin. Eyak inyuñ itiñ ntre inọ Enye. Eyak nnyin idomo ukeme man idi uñwam inọ mmọ emi mikpañke utọñ inọ Enye. Yak isuk ika iso ndikwọ ke esit nnyin, edieke mikemeke ndisioro uyo ñkwọ nte David akanamde. “Mmọdo ndikwọde fi ke otu mme idut, O Jehovah, nyenyuñ ñkwọ ikwọ nnọ enyiñ fo.” Kukop but ubaña Jesus, edi, di ntiense nnọ Enye ke kpukpru ebiet eke Enye ọnọde fi ifet ndidu uwem nnọ Enye nnyuñ ntiñ mbaña Enye. Ekọm nnyin ye ima nnyin ye Abasi, akpakam otop ọwọrọ ke esit nnyin kpukpru ini!

Questions

MME MBUME

1. Nso ikanam David okop idem ke ekọñ?
2. Didie ke Abasi akanam ñkpọ ọnọ Nditọ Israel?
3. Nso ntak ke David ọkọnọ ke abaña uñwam Abasi?
4. Didie ke ikeme ndima mme asua nnyin?
5. Tiñ usuñ kiet emi nnyin ikemede ndida nyene mme ufan?
6. Didie ke ifiọk ite ke mme Gentile enyene udeme ke ima Abasi?
7. Nso idi ntak emi Abasi okobotde owo?
8. Nso utọ udeme ke Jesus enyene ọnọ mmọ oro emade Enye?