Lesson 246 - Junior
Memory Verse
“Kpukpru usuñ Jehovah edi ima ye akpanikọ enọ mmọ eke ekpemede ediomi esie” (Psalm 25:10).Notes
Mme Edidiọñ Odu ekese nti ñkpọ ke uwem, emi ndinen owo ye ndiọi owo ebuanade ke esit. Abasi amayak kpukpru owo edia ufọn mme ñkpọ emi Enye okobotde. Mme owo ebọ edidiọñ ye inemesit ke ini mmọ esede ndiye ikpọ obot, mmọñ, ebiet emi snow ọduọde, akpa uta-tan, ye ndiye ñwed ikpa enyọñ. Ndusuk owo esikop inemesit ke ndikut mme unam ikọt ye nsio-nsio flawa ikọt ke mme ebiet emi obot onimde mmọ. Ediwak owo eke mifiọkke Abasi esiforo, ekut unen ke uwem mmọ, ekop nsọñidem, eñyuñ edu ke inemesit ke mme ñkpọ uwem emi. Mmọ ebuana ke mme ñkpọ emi Abasi onimde ọnọ owo, nte ofim, unwana-utin, udia,, ye mme ñkpọ eken emi enamde uwem enem. Kpukpru emi edi mme edidiọñ emi mme owo ebọde ke usen ke usen. Edi odu saña-saña edidiọñ emi Abasi ebeñede onim ọnọ ikọt Esie. Odu mme edidiọñ emi enọde ndinen owo ikpọñ-ikpọñ. Uko David andiwet Psalm, ama etiñ abaña uko emi enye ekenyenede ke Abasi. Enye ama etiñ abaña mbuọtidem emi enye ekenyenede ye Abasi ete ke Enye eyebọrọ akam imọ. Se David okobupde onyuñ oyomde oto Abasi ekedi mme edidiọñ emi enyenede ndinen owo. Edidiọñ emi David ọkọbọde ikedighe saña-saña. Se David ọkọbọde oto Abasi, eyen Abasi ekededi ekeme ndibọ! David ọkọdọhọ ete, “O Jehovah? Nyemenere ukpọñ mi nse fi.” David ama ọbọñ akam; enye ekebere ke Abasi; okonyuñ ọsọñọ idem esie ke Abasi. Ukpọñ David ama ọdọk koro enye ọkobuọtde idem ye Abasi. Mme ikọ David akpakam añwam nnyin ndibọñ akam nnyuñ mmenere ukpọñ nnyin nnọ Abasi ñkan nte ikesinamde. Prophet Jeremiah ke eseme esie ọkọdọhọ ete, “Yak nnyin imenere esit nnyin ikọrọ ye ubọk nnyin inọ Abasi ke enyọñ” (Ñwed Eseme 3:41). Owo ekeme ndimenere Ukpọñ esie ọnọ nsu (Psalm 24:4), onyuñ ọnọ ñkohoridem idem (1 Timothy 3:6); edi oro eyeda ubiom-ikpe ye unana edidiọñ Abasi edi. Eyak nnyin imenere esit ye ukpọñ nnyin inọ Abasi ke akam ye ke ndikpono Enye! Mbuọtidem Ke Abasi Ndinen Owo enyene uko ye mbuọtidem ke Abasi. Owo ikemeke ndida idori-enyin mmọ ndomo ye baba ñkpọ efen ke ererimbot emi. Mme idiọk owo ke ekese idaha ebuọt idem mmọ ke Okuk, ye mme ufan, ke ukeme ye ifiọk mmọ, mme ke utom emi mmọ enamde. Edi owo ikemeke ndisọñọ ete ke mme ñkpọ emi idikpuhu. Mme ñkpọ ererimbot emi kiet kiet edi se efiọkde ete ke esikpu. Ke ini owo enyenede uko ye mbuọtidem esie ke Abasi ye ke Ikọ Esie, enye ebere edem ke Kiet, ñkukure Kiet, emi mikemeke ndikpu. Moses ama etiñ mme ikọ Jehovah ọnọ Nditọ Israel ete ke Abasi idikpọñke idinyuñ iduọkke mmọ (Deuteronomy 31:6). Moses ọkọdọhọ Joshua ete: “Sọñọ idem, nyuñ nyene esit: ... onyuñ edi Jehovah ebem fi iso asaña; enye eyedu ye afo, idikpọñke fi, idinyuñ iduọkke fi: kufehe ndik, kunyuñ uyomo nsia” (Deuteronomy 31:7, 8). Abasi ama odu ye Joshua ye Nditọ Israel. Nnyin ikot ntem “Baba Ikọ kiet ke kpukpru nti Ikọ oro Jehovah ọkodọhọde ye ufọk Israel ikpuhu; kpukpru esu” (Joshua 21:45). Abasi ye Ikọ Esie ikemeke ndikpu; Ikọ Esie esiwọrọ osu. Nnyin imekeme ndibuọt idem ke mme eñwọñọ Abasi inyuñ ifiọk ke mmọ idibiañake. (Kot Isaiah 34:16; 40:8; Matthew 24:35; Luke 16:17; ye 1 Peter 1:25). Mme idiọk owo inyeneke oruk ñkpọ ntem ndibuọt-idem nnyuñ mfiọk nte ke eyewọrọ esu. Ikemeke Ndikut But Ke ini owo ayakde mbuọtidem ye Idori-enyin esie esin ke Abasi, enye inyeneke ñkpọ baba kiet ndikop but mbaña. Ekese mme idiọk owo ekop but ebaña usuñ nte mmọ edude uwem. Mmọ ekop but ebaña mme idiọk-ñkpọ mmọ. Anditiene Christ ama ebeñe Abasi emen mme idiọk-ñkpọ esie efep, onyuñ ọnọ enye ukeme kpukpru usen ndidu uwem eke ananade idiọk-ñkpọ. Anamidiọk odu uwem esuene, edi Anditiene Christ ebet Abasi man añwam enye ndisaña ke eti usuñ. Andiwet Psalm ọkọdọhọ ete, “Ndien but idinamke mi, ke ini ami ntiñde enyin ke kpukpru mbet fo” (Psalm 119:6). Ke ini owo okopde uyo ọnọ Ikọ Abasi, enye odu eti ye edisana uwem, ndien enye inyeneke ntak ndikop but ke ñkpọ baba kiet ke uwem esie. Abasi ama ọnọ eñwọñọ ete ke ikọt Esie, oro edi, mmọ eke ebetde Enye, idikwe but. Ekenọ Nditọ Israel eñwọñọ emi ye mme ata anditiene Christ mfin. “Ndien mbufo eyefiọk ete ke ami ndodu Israel ke ufọt, ami nnyuñ ndi Jehovah Abasi mbufo, eñwen inyuñ iduhe; ikọt mi idinyuñ ikwe but ke nsinsi” (Joel 2:27). “Sese, nyenyanare ubọk mi nnọ mme idut; nnyuñ mmenere banner nnọ mme obio ... ndien afo eyefiọk ete ke ami ndi Jehovah, emi but midinamke mmọ eke eberede idem ye ami” (Isaiah 49:22, 23). Emi idighe ntre ye mmọ emi enyenede idiọk-ñkpọ ke uwem mmọ! Mmọ edodomo ndifuk idiọk-ñkpọ mmọ. Mmọ iyomke ndisobo ye ndinen owo ke ntak idiọk-ñkpọ oro. Mmọ edu ke ubiom-ikpe ye ndik ebak idiọk-ñkpọ mmọ ediyarare. Anditiene Christ enyene esit eke mibiomke enye ikpe inyuñ inyeneke ñkpọ baba kiet ndikop but mbaña. Nda-Usuñ David okobọñ akam ete Abasi eteme onyuñ ada enye usuñ. David ama ọfiọk nte edide akpan-ñkpọ owo ndisaña ke usuñ Ọbọñ akan ndisaña ke usuñ idem esie. “Enyene usuñ eke enende ke iso owo: ndien utit esie edi usuñ mkpa” (Mme-Ñke 14:12). Se inọde owo idori-enyin ndika Heaven edi nditiene Ọbọñ. Jesus ọkọdọhọ ete: “Ami ndi usuñ ye akpanikọ ye uwem: owo baba kiet itieneke Ete, ibọhọke ebe ke Ami” (John 14:6). Prophet Isaiah ama etiñ abaña “usuñ edinen owo” emi mmọ emi efakde edisañade, emi baba edidehe ñkpọ kiet midinyuñ isañake ke esit ibe (Isaiah 35:8, 9). Odu edidiọñ eke enọde mmọ eke esañade ke usuñ Ọbọñ (Psalm 128:1). Edidiọñ odu ke uwem enye emi ke uwem eke edidide. Ke ndisaña ke mfafaha ye nsisire usuñ, owo eyenyene nsinsi uwem (Matthew 7:14). Mbọm Ye Akpanikọ David ama ọbọñ akam ete Abasi ada enye usuñ, koro enye ama ọfiọk ete ke usuñ Ọbọñ ada owo osim Heaven. Ke ini owo emekde usuñ Idem esie, mme obube, ñkpọ iduọ, afia ye ñkpriusuñ efen eyedu emi edidade enye aka nsobo. Ke ini owo asañade ke usuñ Abasi, eduri enye utọñ ebaña mme ñkpọ ndik; enye enyene Ọbọñ ndiñwam enye asaña ebe ke mme idiọk itie; Ọbọñ “eyesio’ ukot esie efep ke iyire; koro etimde ewut usuñ eke adade owo osim nsinsi uwem. “Abasi! usuñ esie ọfọn ama” (Psalm 18:30). Mmọ emi enimde mbet Esie, Abasi ada mmọ usuñ ke mbọm ye akpanikọ. Owo enyene ndisuhọre idem nnyuñ nnyime Abasi ada enye usuñ. Abasi idaha mme idiọk owo ye mbon iseri usuñ, koro mmọ iyomke Abasi ada mmọ usuñ. Nte nnyin imekeme ndidọhọ ye andiwet Psalm ite: “Mmemek usuñ akpanikọ: mmonim mme ikpe fo ke iso mi” (Psalm 119:30)? Yak akam nnyin etie nte eke David: “O Jehovah, teme mi usuñ fo, nyuñ da mi usuñ eke enende” (Psalm 27:11). Edifen Ndinen owo ema ebọ edidiọñ efen, edifen ke mme idiọk-ñkpọ mmọ. Ekefen enọ mmọ koro mmọ ema ekabare esit enyuñ ebeñe Abasi anyaña mmọ. David ọkọbọñ akam ete: “Dahado ntem ke ndudue mi; ... nyuñ tua mbọm; ,,nyuñ dahado ke kpukpru mme idiọk ido mi.” David ama eti Abasi abaña mbọm ye mfọn-ido Esie emi edude ke nsinsi. David ama ọfiọk ete ke owo baba kiet idotke ndibọ emem Abasi; ekefen mme idiọk-ñkpọ esie koro Abasi enyenede mbọm. Oto ke mfọn Abasi enam owo edi edinen, itoho ke eti ñkpọ eke owo ekemede ndinam. Mme idiọk owo inyeneke edidiọñ emi odude ke ifiọk edifen ke mme idiọk-ñkpọ, koro mmọ mikabakere esit inyuñ iyom mbọm Abasi. Abasi ikpọñ-ikpọñ ekeme ndifen mme idiọk-ñkpọ. Enye ekeme ndimen idiọk-ñkpọ mfep, Enye ñko ekeme ndikpeme owo ndien enye inamke aba idiọk-ñkpọ. David ọkọbọñ akam ete: “Kpeme Ukpọñ mi.” Nnyin inyene ndibọ erinyaña, inyuñ ika iso imum erinyaña oro ikama, edieke iyomde ebat nnyin esin ke otu ndinen owo. Ke ebede Abasi ndisio idiọk-ñkpọ mfep nnyuñ mkpeme owo man okunam aba idiọk-ñkpọ, Abasi itihi aba mme idiọk-ñkpọ oro Enye ama ekefen. Ọbọñ ọdọhọ ete, “koro nyefen mme idiọk ido mmọ, ndinyuñ ntihi aba mme oburobut ido mmọ” (Jeremiah 31:34; Mme Hebrew 8:12; 10:17). Mme Idiọk-Ñkpọ Ini Uyen David ama ebeñe Abasi ete Enye okuti mme idiọk-ñkpọ ini uyen esie. David ama ọfiọk ete ke kpukpru nditọwọñ, emi ema ekekponi, etim efiọk eti ye idiọk, emenam idiọk-ñkpọ, ke ntre enyene ndiyom erifen nnọ. David ikọnọhọ mfaña ke abaña mme idiọk-ñkpọ esie nte ndusuk owo esinamde. David ikọdọhọke ite ke imọ ikedi eyenọwọñ. David ama ọfiọk ete ke mme idiọk edinam ini uyen esie ekedi mme idiọk-ñkpọ, ndien enye ama ebeñe Abasi ete efen ọnọ imọ. Ndidi eyenọwọñ mme akparawa idighe ntak ndinam idiọk. Abasi eyefen ọnọ nditọwọñ ke mmọ ekabarede esit. Abasi eyesio idiọk-ñkpọ ke uwem mmọ efep onyuñ ọnọ mmọ ukeme ndidu uwem unana idiọk-ñkpọ. Ubierikpe Mme idiọk owo eyema ndikere nte ke Abasi ikopke ke ini mmọ etiñde idiọk. Mmọ ñko eyema ndikere nte ke Abasi ikwe ke ini mmọ enamde idiọk. Abasi emi akanamde utọñ, esikop ñkpọ. Abasi emi akanamde enyin, esikut ñkpọ. Ke ekem ini eyenọ mme idiọk owo ufen, Abasi eyesio usiene ye mmọ emi ekediọkde ido ye ikọt Esie. Mme idiọk-owo etaba edidiọñ emi Abasi edinọde ikọt Esie. Akan oro, ke usen ikpe, eyeti mme idiọk-ñkpọ kiet kiet eyewọrọ ke uñwana onyuñ ayarare. David ama ọfiọk se iditibede inọ mme idiọk owo, edi David ekenyene ndọñesit ye uñwam esie ke Abasi. David ama ọdiọñọ se Abasi edide. Edi Abasi akanyaña David osio mme asua esie ke ubọk, onyuñ omum enye akama ke ini ikpat esie ọkọfiọnọrede. David ama enyene uko ke Abasi abaña ini iso, koro enye ekenyenede mbuọtidem ke Abasi. David ọkọdọhọ ete, “Jehovah edi ebiet ukpeme mi; Abasi mi onyuñ edi akwa itiat ubọhọ mi.” Afo ọbuọt idem ke nso?
Questions
MME MBUME- Owo ekeme didie ndimenere ukpọñ esie nnọ Abasi?
- David ọkọbuọt idem ye anie?
- Anie odu uwem but?
- David okoyom anie ada enye usuñ?
- Usuñ ọbọñ ada owo osim mmọñ?
- David okoyom anie efen mme idiọk-ñkpọ esie?
- Anie ekeme ndifen mme idiọk-ñkpọ?
- Usiene enyene anie?
- Anie ekedi ukpeme ye ubọhọ David?
- Siak ndusuk mme edidiọñ emi ndinen owo enyenede.