Lesson 247 - Junior
Memory Verse
“Ndinyuñ mfọpke edifọp uwa nnọ Jehovah Abasi mi ke se mikpaha mi baba okuk kiet” (2 Samuel 24:24).Notes
Edomo Man Enam idiọk-Ñkpọ
Ini ama edi ke eyo Edidem David, emi Nditọ Israel ekebọde ufen eto idiọk-ñkpọ. “Satan adaha ke enyọñ ndibiat Israel, onyuñ esin David abat Israel” (1 Chronicle 21:1). David ama ọduọ oduk ke idomo oro. Enye ọnọ ewuhọ ete ebat nditọ Israel man enye ọfiọk ibat mmọ. Ama odu ini kiet emi ekebatde Nditọ Israel, edi Abasi ọkọnọ ewuhọ oro (Exodus 30:11-14).
David ikọnọhọ ntak emi enye okoyomde ebat mme owo. Nnyin ifiọkke mme okoto ke ntak ntañ-idem ekesin David oyom ndifiọk ibat owo emi ekedude ke idak ukara esie. Nnyin ifiọkke mme David ekebere edem ke uwak ibat owo akan ndibuọt idem ke odudu Abasi emi ekemede ndiñwana ekọñ nnọ mmọ. Se ededi ntak ke esit David emi ekenyikde enye ndifiọk ibat Nditọ Israel, oro ekedi idiọk-ñkpọ.
Ntọt
Ema ekpan David ete okunam ñkpọ emi. David ama ọnọ Joab, etubom mbon-ekọñ ewuhọ ete abat. Joab ama odomo ndikpan David ete okunam ubat owo emi, koro ntak ikoduhe ndinam ntre. Joab ama ọdọhọ ete, “Nsinam Ọbọñ mi oyomde ñkpọ emi? Nsinam enye oyomde ndikabare ndi ntak isop nnọ Israel?” Joab ama odomo ndikpan David mbemiso idiọk-ñkpọ oro ada itie, ukem nte Spirit Abasi anamde akpanikọ nditọt nnyin, ye nte ekikere owo ekemede ndinam owo ofiọk se idiọkde.
David ikekpañke utọñ ke ntọt nti ufan esie, Joab ye eke mme etubom mbon-ekọñ. David ama ọdọñ iren owo emi eka ekebat Nditọ Israel. Mmọ ewọrọ ekesaña ke ofuri Israel ( 1 Chronicles 21:4). Mmọ ebe inyañ Jordan eka isọñ emi Reuben ye Gad ekeduñde (Numbers 32:1-5). Mmọ esaña eka enyọñ-enyọñ ye ke mben esuk Dan-jaan, Zidon ye Tyre, ndien mmọ ewọñọde ke edem usuk-usuk Beersheba ye Judah, esaña ebat owo.
Inemesit Iduhe
Ke awakde akan ọfiọñ usukkiet ikọt David esin ifik ke ubat owo. Utom oro ikememke koro mmọ ekefiọkde ete ke ikenenke. Ke akptre Joab amada ibat owo oro mmọ ekebatde ọsọk David. Itiñke inọ nnyin nte ke David ama enem esit, mme enye ama ọyuhọ, mme ibat owo oro ema ewak nte enye ekekerede.
Edi akpanikọ ke ubiom-ikpe ama osio inemesit ekededi ke esit David efep. Ke ini owo aduakde ke esit esie ndinam ñkpọ ekededi, ke usuñ idem esie ke nsọñ-ibuot onyuñ esinde ntọt, Abasi ke ndusuk idaha ekeme ndisana enye nyak nnọ usuñ idem esie. Edi owo oro idikwe inemesit ye uyuhọ emi enye ekekerede ete iyenyene ke edinam oro.
Idiọk-Ñkpọ Ye Edikabare Esit
David ama ọfiọk ete ke imọ imanam idiọk-ñkpọ. Esit esie ama obiom enye ikpe. David ama ọbọñ akam onyuñ ayarade idiọk-ñkpọ esie. David onyuñ ọdọhọ Jehovah, ete, “Mmanam idiọk eti-eti ke se ñkanamde: edi, mbọk Jehovah, kam dahado ke idiọk ido owo fo; koro mmanam ndisime ido eti-eti.” David anam nnen-nnen ñkpọ ke ndibine Abasi nyom edifen. Edieke owo ọduọde oduk ke idomo satan, onyuñ anam idiọk-ñkpọ, enye ọduọk edidiọñ Abasi. Ke edikabade esit ikpọñ ke enye ekeme ndifiak nnyene ebuana ye Abasi. Ke owo ediyararede onyuñ ọkpọñ idiọk-ñkpọ esie, onyuñ oyom edifen, enye ekeme ndibọ edidahado nto Abasi. Edi eti ñkpọ ndiyom Abasi usọp usọp akan ndisio ini ubọñ akam nim ke iso.
Ufen
Ke usen-ubọk, oto ibọrọ akam David, Jehovah ọdọñ Prophet Gad ọnọ David. Emi ekedi uyo Jehovah, “Mmanyan ñkpọ ita nnọ fi: mek kiet ke idem fo, man nda nnam fi.” (1 Chronicles 21:10). Iwakke nditibe nte owo enyenede ifet ndimek ufen nnọ idem esie, edi Abasi ama anam oro ọnọ David. Mmem mem usuñ ndiwọrọ ñkpọñ ufen emi ikeduhe. David ama anam idiọk-ñkpọ, okonyuñ enyene ndibọ ufen okposuk edi nte enye okoyomde edifen.
David ekenyene ndimek isua akañ itiaba, mme asua ndikan enye ke ekọñ ke ọfiọñ ita, mme idiọk udọñọ usen ita. Kiet ekededi ke otu ufen ita emi eyenam ibat Nditọ Israel ọsuhọre, ndusuk oro eyenam David okudiọñọ nnen-nen ibat Nditọ Israel. Ke ntak idiọk-ñkpọ owo kiet emi, ofuri Nditọ Israel akpana ebọ ufen.
Edieke David ekpekemekde akañ isua itiaba, eyighe iduhe ke enye ọkpọbọhọ ke ntak emi enye ekedide owo inyene, ñko ikọt esie ekpediana kiet ndiñwam edidem mmọ. Edieke enye ekpekemekde ekọñ ọfiọñ ita, ndusuk ikpeyakke enye ọwọrọ aka ekọñ, koro Nditọ Israel ema edọhọ David ete: “Afo kuwọrọ aba utiene nnyin uka ekọñ, kunyuñ unime utuenikañ Israel” (2 Samuel 21:17). Kiet ekededi eke ekpekemekde ke otu ñkpọ emi uwem David okpokosuk ọsọsuhọ, edi ediwak owo ekpekpaña.
Edinen Abasi
David ama emek se ifọnde ke ini enye ọdọhọde ete: “Yak nnyin ikam iduọ isine Jehovah ke ubọk: koro enye okponde mbọm: yak mi nkuduọ nsine ke ubọk owo.” David ọdiọñọ ete ke mme usuñ Jehovah enen enyuñ edi akpanikọ (Eriyarare 15:3). Ke ndimek idiọk udọñọ, David ekpeketiene akpa ye udim Nditọ Israel. David emek ndiyak idem esie nsin ke ubọk Abasi, ndien Abasi okutde, ete ọfọn, ekeme ndida idiọk udọñọ ntọ enye.
Ubiere-ikpe Abasi ama ọsọp eti eti. Ama ada Joab ye ikọt esie se iwakde ikan ọfiọñ usukkiet ndisaña ke ofuri isọñ nnam ubat owo, edi ke hour ifañ idiọk udọñọ ama oto ke Dan osim Ber-sheba, ọtọñọde ke ñkañ enyọñ-enyọñ tutu osim usuk usuk Cannan. Idiọk udọñọ ama ọtọñọ usen ubọk oro ndien tọsin owo ata ye duop ke otu Nditọ Israel ekpaña, ke kpukpru isọñ Israel ke mibọhọke ke Jerusalem. Abasi anyaña David ye mbiowo Israel (1 Chronicles 21:16).
David ama ọfiọk ete ke kpukpru Nditọ Israel emi ekekpañade ekedi ke ntak idiọk-ñkpọ imọ. David ama ọfuhọ, onyuñ ọbọ ufen eti eti. Enye ọkọdọhọ Jehovah ete, “Ami ñkedue, ñkonyuñ nnam se ikwañade: edi ñkpri ufene emi ekenam nso? mbọk yak ubọk fo, odoro mi.”
Itie Uwa
Prophet Gad ọdọhọ David Ọbọp itie-uwa ọnọ Jehovah ke ọtọ ubek ibokpot Araunah owo Jebusite. David ama okop uyo. Enye aka ebine Araunah ndidep ọtọ ubek ibokpot ndida mbọp itie-uwa nnọ Abasi. Araunah okoyom ndinọ edidem inyene esie ke mfọn. Araunah okoyom ndinọ ñkpọ uwa ye ifia eda edian ye itie-uwa. Enye okoyom ndiyak kpukpru ñkpọ oro nnọ edidem.
Ofuri Ekọm Urua
David edep ọtọ ubek ibokpot oro ye enañ. Enye ọkọdọhọ ete, ndinyuñ mfọpke edifọp uwa nnọ Jehovah Abasi mi ke se mikpaha mi baba okuk kiet. David ekpe ọyọhọ ekọm urua. Didie ke emi enyene ukpuhọre ye se ndusuk owo enamde mfin emi. Mmọ ekpema ndibọ edidiọñ ke Eti-mbuk, edi enọ Jehovah ata esisit ke usiene nsinsi uwem. Mkpa ukpọñ kebet owo kiet ekededi emi miwaha nnen-nnen uwa inọ Abasi, uwa edibuñọ ye edinuaha esit (Psalm 51:17). Ediwak owo mfin emi iyomke ndikpe “Ofuri ekọm urua” (1Chronicles 21:24). Mmọ iyomke ndinọ Abasi mme ñkpọ emi esit mmọ amade. Mmọ iyomke ndinọ Abasi ñkpọ eke akpade mmọ ekọm urua. Edidiọñ Abasi edi etiene mmọ emi enyimede ndisana idiọk ñkpọ nyak nyuñ nnọ Abasi se ifọnde ikan, oro edi uwem mmọ, ini mmọ, ye talent mmọ.
Abasi ọbọ uwa David; efen ọnọ David, udọñọ inyuñ ibiatke uwem owo aba. Abasi eyebọ uwa nnyin onyuñ ọbọrọ akam nnyin edieke nnyin, nte David, itiñde inọ Enye ite ke iyekpe ofuri ekọm urua, ke nnyin ñko idinọhọ Enye se inyenede owo efen, ñko idinọhọ Enye se mikpaha nnyin ñkpọ. Owo ikemeke ndifaña ye Abasi. Edibiere urua ye edikpe urua iduhe ye Abasi. Eti-mbuk Ọbọñ nnyin Jesus Christ odot ke ofuri ediyak idem nnọ ke sededi eke ikemede. Mme mfọn eke ibọde ewak akan se ukeme nnyin edide. (Kot Mark 10:28-30).
Ke Ukem Ukem Itie
Ke ediwak isua emi ebede, mbemiso emi, Abasi ama ọdọhọ Abraham ọnọ Imọ eyen esie Isaac ke edifọp uwa (Genesis 22:1, 2). Nte item ekedide, mmọ eka ke obot Moriah, ke ukem itie emi David awade edifọp uwa ke ọtọ ubek ibokpot Araunah. Nnyin imeti ite ke Abasi okokot Abraham nte enye okoyomde ndikuere ufọp uwa. Kpukpru ñkpọ ama odu ke itie ye mbeñidem. Abraham ama etiene item Abasi onyuñ ebeñe idem ndiwa eyen esie. Abasi ama odomo Abraham edi ikeyomke enye awa eyen esie. Abraham ama odu ke mbeñidem ndinam se Abasi ọdọhọde enye. Abraham ama okop uyo Abasi ke esit esie. Abasi ama “oyom eyen erọñ uwa ọnọ idem esie.” Ke mfuhọ ikọt nnuk okukim ama ọkọmọ do. Abraham ama awa okukim “ke uwa ke itie eyen esie” (Genesis 22:13).
Ke oro ama ekebe ke ini ukara Solomon, eyen David, ema ebọp ufọk Jehovah ke ukem itie oro (2 Chronicles 3:1). Ikpọ ñkpọ ntibe ita emi ekeda itie ke Obot Moriah.
Mme Enọ Spirit
Mme ikpọ edinam ita emi ebiet enọ eke spirit emi owo ekemede ndibọ. Edifọp uwa Abaraham ke Obot Moriah etie nte erinyaña ukpọñ. Nte oro ekedide akpa itie uwa emi ebọpde do, ntre ke erinyaña ukpọñ edi akpa udori-ukot ke mme enọ spirit. Uwem nnyin ikemeke ndisio isop idiọk-ñkpọ nnyin. Ana nte ibọ uwa Abasi, Enye emi miduehe isop, emi ekenyimede ndida itie ibuot nnyin. Abasi ama ọnọ uwa, Eyen Esie, emi ọkọduọkde Iyip Esie ndifen mme idiọk-ñkpọ nnyin.
Itie uwa emi David ọkọbọpde ke Obot Moriah edi mbiet edinam asana, ọyọhọ utom mfọn iba. Enọ mfọn emi etienede erinyaña Ukpọñ, ndien oto ke enye eyet nda mana idiọk-ñkpọ efep. Ọyọhọ edinam ita ke Obot Moriah, edidiọñ Itie-ukpono Abasi, ke ini ekebọpde ema edi mbiet Baptism Edisana Spirit emi owo ọbọde ke ama ọkọbọ erinyaña ye edinam asana. Ke ini ekeberede usuñ Itie-ukpono Abasi enọ Jehovah ema enọ mme enọ ima esit ye ediwak edifọp uwa, ọkọrọ ye akam Solomon (2 Chronicles 7:5). Abasi ama ọbọrọ akam, ikañ oto ke enyọñ ọsuhọre edita mme edifọp uwa (2 Chronicles 7:10). Ubọñ Jehovah oñyuñ ọyọhọ ke ufọk tutu mme oku ikemeke ndinam utom mmọ.
Nte nnyin ikpepde ukpep-ñkpọ Ñwed Abasi, nnyin ikut nte ekpepde ukpep-ñkpọ mme enọ mfọn emi ke Obufa Ediomi, emi ñko onyuñ anyande Ubọk owut ke Akani Ediomi. Owo ibọhọ mmọ kpukpru ini kiet, edi mmọ edi nsio-nsio enọ mfọn ita, ukem nte nsio nsio ñkpọ ntibe ita ke Ñwed Abasi. Edi Abasi ọnọ mmọ ke ini owo ọbọñde akam, onyuñ eyakde uwem esie ọnọ Abasi, onyuñ anamde uwa ọnọ Abasi. Nte afo ọmọbọ kpukpru mme enọ mfọn ita emi?
Questions
MME MBUME- David akanam didie ọfiọk ete ke imọ ima inam idiọk?
- Ewe ñkpọ ke otu ita ke David ekemek nte ufen esie?
- Nso idi ntak emi David ekemekde udọñọ?
- Nso idi ntak emi David ekemekde ndiduọ nsine ke ubọk Abasi?
- Owo ifañ ke otu Nditọ Israel ekekpaña?
- Anie ke otu mmọ ekebọhọ?
- Nso idi ntak emi David okoyomde ọtọ ubek ibokpot Arunah?
- Didie ke David akasaña enyene itie ubek ibokpot?
- Nso idi ntak emi David ekekpede ekọm urua ọnọ enye?
- Tiñ wut ñkpọ ntibe iba efen emi akadade itie ke ebiet emi.