Matthew 26:1-5, 14-16; Luke 22:3-6; John 12:4-6; 17:12

Lesson 249 - Senior

Memory Verse
“Mbọm ererimbot ke ntak erisin owo ọduọ; koro ntak iduọ enyene ndidi, edi eyedọdiọk ọnọ owo oro ñkpọ iduọ otode enye” (Matthew 18:7).
Cross References

I Owo Oro, Judas Iscariot

1. Ema emek enyuñ eyet enye aran nte kiet ke otu mbet duopeba ye nte Apostle, Matthew 10:1-5; 26:14; Mark 3:13-19; Luke 6:13-16; Utom Mme Apostle 1:17, 25.

2. Enye ama etre ndika iso ke usuñ edinen ido, onyuñ akabare esin esit ke ñkpọ owo eñwen, akabare ñko edi inọ, edi akpanikọ ndidọhọ ete enye ama enyene udọñ obukidem abaña obio ubọñ Christ ke isọñ emi mmọ ekedoride enyin, John 12:4-6.

II Editap Ye Mme Ñkpọ-Ntibe Eke Ekebemde Iso

1. Mme anditiñ ntiñ-nnim ikọ ke Akani Ediomi ema etiñ ebaña edinam Judas, ke Psalm 109:8; Se Utom Mme Apostle 1:16, 17; Zechariah 11:12, 13

2. Jesus ama etiñ ntiñ-nnim ikọ abaña edinam Judas, okot enye Satan ye eyen nsobo, John 6:70, 71; 13:18-30; 17:12

3. Okposuk edi oro, Judas akanam uduak esit esie, Matthew 26:1-5, 14-16; Mark 14:10, 11; Luke 22:3, 6; Zechariah 11:12, 13

4. Judas ama emek udọñ esit esie ndien Satan oduk enye ke idem, Luke 22:3; se ke John 13:2, 27

5. Nte eyen nsobo -- idighe aba eyen Abasi, ekedi mmem-mmem ñkpọ enye nditap Eyen Abasi ke ntim-inua, Mark 14:43-45; Luke 22:47, 48; John 18:2-5

III Idiọk Utit Judas

1. Ke ndo-ndo oro Judas ọkọfiọkde se edinam esie edidade idi, enye ama ọyọhọ ye mfuhọ edi ikasañake ye erikabare esit mfiak ntiene Abasi, Matthew 27:3-5; Zechariah 11:12, 13; Psalm 94:20-23

2. Enye ama eyiri idem esie owot, Matthew 27:5; Utom Mme Apostle 1:18, 19

3. Okuk oro enye ọkọbọde ama afiak emen akayak, enye ekeda edep iñwañ obot-eso, Matthew 27:6-10; Zechariah 11:13

Notes
SE EKPEPDE EBAÑA

Uwut-Ñkpọ Akakan Esuene

Ke kpukpru mme uwut-ñkpọ esuene ye ediduk odu emi etimde ewet enim enọ nnyin, ke Edisana Ñwed Abasi Ibom ye ke mme ñwed ñkpọ-ntibe ererimbot emi, iduhe eke ọdiọkde nte eke Judas Iscariot. Ke nsinsi, enyiñ esie edisine ke oruk itie oro, koro akananam ererimbot ikwe owo eke ọsọñde esit nditap owo ke utọ usuñ oro. Enye akañwam ndinam edimum Eyen Abasi edi mmem-mem ñkpọ ọnọ mme asua edinen ido, oto ke ñkari ye mbubik ntim- inua emi ediọñọde ke emi nte “Ntim-Inua Judas”. Idem mme mmọ emi minimke ikọ Abasi ke akpanikọ ese edinam esie ke ndek. Se itetim inam ñkpọ emi ọdiọk akan, edi koro owo emi ekedide edimek mbet ye Apostle Eyen Abasi!

Nnyin ikopke ke ikọ Abasi nte enyene ata akpan ini mme ebiet emi Judas ọkọbọñde akam, eritua mkpọfiọk man ọbọ erifen ke idiọk-ñkpọ emi kpukpru eren, ye ñwan ye eyen-ọwọñ enyenede ndibọ man eduk ke Heaven. Edi nnyin imenyene ntak ndinim ke akpanikọ nte ke enye ama enyene erinyaña , koro Abasi idọñke mmọ emi minimke ke akpanikọ ete ekwọrọ mbuk erinyaña Esie.

Judas ekedi kiet ke otu mmọ oro ekeyomde ekut ekenyuñ esioñode edọñ, iba, iba, ete ekekwọrọ Eti mbuk obio Ubọñ (Mark 6:7). Enye ekedi kiet ke otu mmọ oro Christ ọkọnọde utom, ye enye emi Christ ọkọnọde odudu ndinam utom oro. Mme mbet emi ñko, ekena nte “enam mbon udọñọ ekop nsọñidem, enam mme akpa-mkpa eset, enam mme ọdọñọ akpa-mfia esana enyuñ ebin mme demon eduọk”; Christ onyuñ ọsọñọ mmọ idem nte ke eyenọ mmọ uñwam ke ini mmọ edinamde utom oro enọ Imọ. Judas ekedi kiet ke otu mmọ oro Jesus okosioñode ọdọñ nte “mme erọñ ke ufọt mme ekpe ikọt”.

Judas ekedi kiet ke otu mmọ oro Christ ọkọdọhọde ete ke Spirit Ete eyetiñ ikọ ke enye. Enye ekedi kiet ke otu mmọ oro Christ ọkọdọhọde ete ke kpukpru owo eyesua mmọ ke ntak Imọ, ñko ke edidi ifet esie ndiyọ isin-enyin ke ntak Christ. Enye ekedi kiet ke otu mmọ oro Christ eketiñde abaña ke ini Enye ọkọdọhọde ete ke mmọ nte mbet ye nte nditọ ufọk idikponke ikan Imọ, Ete- ufọk ye Ọbọñ mmọ.

Judas ekedi kiet ke otu mmọ oro Christ ọkọdọhọde ete ke mmọ ekpuhọre ye nditọ ufọk Beelzebub. Enye ekedi kiet ke otu mmọ oro ekenyimede ndimen krọs ntiene Jesus. Enye ñko ekedi kiet ke otu ibat mmọ oro ekenyọñde edi, etiene Jesus enyuñ etiñ enọ Enye “kpukpru ñkpọ se ededi mmọ ekenamde, ye se ededi mmọ ekekpepde”, mmọ enyuñ etiene Enye eka ke ebiet emi odobode man eda nduọk odudu enọ ikpọhidem mmọ ke ema ekekure utom emi mmọ ekenamde enọ Enye. (Kot Matthew 10:1-42 ye Mark 6:7-13, 30-32).

Nte enyene owo emi ekemede ndidọhọ ete, oruk owo oro ekedi anam-idiọk ke kpukpru ini emi Jesus ọdọñde enye ndinam utom edinen ido? Nte odu owo ndidọhọ ete ke Abasi emi ọdiọñọde utit oto ke eritọñọ eketre ndikpono ata akpan mbet Esie emi etemede ete ekuda baba ọkọi ye enye emi minenke ye owo eke misanake esin ke itie utom ikọ Abasi, akakabare ada ndien Judas emi mikabakere esit enyuñ ọnọ enye akwa ikot ye idaha utom ke akpa eritọñọ utom Christ? Nte owo ekeme ndidọhọ ete enye emi ekekotde enyuñ eyetde aran esin ke idaha mbet, emek esin ke idaha Apostle emi ekenyenede udeme ke utom mbet; ata akpan idaha emi mme Apostle duopekiet mikikereke nte ke akpana ebiat ini ndimek owo eñwen ndida itie esie -- akanam iyomke edifen nnọ ke idiọk-ñkpọ mme odudu obufa uwem Spirit emi enọde ke ini enamde owo akabare edi obufa ke Christ Jesus?

Edi akpanikọ nte ke ini kiet Jesus ama etiñ abaña Judas ete ke enye edi eke Andidiọk, ini efen etiñ abaña enye nte eyen nsobo. Edi akpanikọ ñko ete ke mme anditiñ-ntiñ nnim-ikọ ke Akani Ediomi ema etiñ ebaña idiọk edimek ye edinam esie. Kpa mme anditiñ ntiñ-nnim ikọ ke Akani Ediomi emi ñko ema ewet ebaña mme ndutuhọ Christ. Mmọ ema etiñ ebaña mkpa ye eriset Esie. Mmọ ñko ema etiñ ebaña ekọm-urua emi Enye edikpede ọnọ nnyin. Edi etiñ enọ nnyin ete Christ ama enyene odudu ndiduọk uwem Esie ndinyuñ ntọñọ ntak nda nnyene. Enye ama enyene odudu ndikot udim mme angel ndibiọñọ nnyuñ ññwana ñkan udim ekọñ emi ekedide ndimum Enye, ñko Enye ekpekeme ndisuhọre ke krọs nnyuñ nsin ndikpa nnọ idiọk-ñkpọ owo.

Edi Jesus ama onyime ndika ke krọs. Enye ama onyuñ onyime ndikpa, okposuk edi nte akanade Enye ebeñe ukeme ndiyọ utọ mfuhọ ye ubiak ini oro. Enye ama anam mme ntiñ-nnim ikọ ndisana mbio Abasi eyo oko esu. Mme ntiñ-nnim ikọ ikedighe mme mbet emi ekenyikde-nyik Jesus ete onim; mmọ ekedi mbuk emi ekewetde ebaña ini iso oto Edisana Spirit emi ọfiọkde uduak Abasi onyuñ edide ukem ye Abasi onyuñ enyenede nsinsi ifiọk ini iso.

Ntiñ-nnim ikọ ama osu ke idem Judas ñko. Ekekot enye “eyen nsobo” koro enye ekemekde usuñ oro adade enye osim utọ idaha eke anamde enyiñ oro ekem ye enye. Ikokotke enye eyen nsobo koro ekenimde enye enọ nsobo emi enye mmikenyeneke usuñ ubọhọ. Ekekot enye “andidiọk” koro enye ekemekde usuñ oro akadade enye aka ekim onyuñ adianarede enye efep ye Abasi ye Heaven. Enye okokokoi emek utip ukwañ ido akan ndimek ñkpọ eyen-utom Abasi. Ke ini emi enye okokutde ofuri ekọm-urua utip oro akanade enye ekpe, ndik ama anam enye eti eti, edi enye ama ononuk ofuri ibuot esie esin ke akwa ikañ, nsinsi ufen, emi usuñ ubọhọ mikoduhe. Owo ikpekewetke ntiñ-inim ikọ ibaña Judas, nte emi ewetde ebaña enye, edieke enye ekpekemekde eti usuñ akan ndimek usuñ oro adade owo aka nsobo.

Yak kpukpru owo eke ekade ndidibe ke ebiet eke mikemeke ndidip mmọ, ke ukpep-ñkpọ oro ekotde nsinsi erinyaña emi mme andinim ke akpanikọ edọhọde ete ke owo ọbọde erinyaña onyuñ ọtọñọde ntak aka akanam idiọk ke enye osuk odu ye erinyaña, ekpeme idem ke uwut-ñkpọ emi ye se ikọwọrọde owo emi Abasi okokotde onyuñ eyetde aran, onyuñ ọdọñ ndinam utom Obio Ubọñ. Yak kpukpru owo emi ekerede ete imedibe ke idak Iyip, emi edọhọde ete ema eduọk ke ntak idiọk-ñkpọ mme mmọ ke ini edem, ke emi ye ke ini iso, etim efiọk ete iyip emi ididoroke mmọ udori ibọhọke ke mmọ eyomde enye ebe ke erikabare esit ye erifen nnọ oto ke mbuọtidem ye edisin idiọk-ñkpọ ofuri-ofuri. Yak kpukpru mmọ eke edọhọde ete edinam mmọ esana ke ini mmọ ekpade, etọñọ ntak ekot ikọ Apostle Peter emi ọdọhọde ete Judas “ema ebat enye esin ke otu nnyin enye ama onyuñ enyene udeme ke utom emi”, emi enye “ọkọduọde ọkpọñ”. Peter ñko etiñ abaña mkpa eriyire idem Judas ye se Andiwet Psalm eketiñde abaña enye, emi anamde nnyin iti ibaña isuñi oro ekesinde ke mme inyene esie.

Nte owo baba kiet ekeme ndibọhọ emi esinde mfọn Abasi, onyuñ otutde utọñ ke mbet Abasi ke nditap, nnyuñ nyak nnọ mme idiọk owo, Enye emi enọde nnyin uyo ete ima ke ofuri esit ye ke ofuri ekikere ye ke ofuri ukpọñ ye ke spirit? Nte owo emi edighide ke ikpat “Iyip emi miduehe isop” ekeme ndibọhọ ke emi esibede idorenyin esie efep ke Iyip emi eyetde mme idiọk-ñkpọ esie? Nte owo emi anamde idiọk-ñkpọ uwot-owo onyuñ ọduọk ukpọñ esie esin ke nsinsi nsobo ke edinam ntem ọduọk ifet erikabare esit, eyebọhọ? Ibọrọ ke kpukpru mme mbume emi edi Ih Ih! Afo emi okotde, tim kere mme ñkpọ emi!

Iduọ Judas Nte Akasañade

Ekeme ndibup ete: Nso utọ ufọn ke inyene ke ukpep-ñkpọ emi abañade uwem owo emi Abasi ekesinde? Ñkpọ kiet edi nnyin imekeme ndikut nte enye akasañade ke nde ke nde tutu osim utit nsobo esie ndien ana nnyin ikpeme idem mbak nnyin ikuduk ke usuñ esie.

Utit idiọk-ñkpọ isifọnke. Kpa ke idem uwem emi, iduhe ñkpọ eke owo okpoyomde oto utip uwem iseri ye uwem edidia, nta, nnyuñ ññwọñ nnem obukidem esit. Ñwak ñkan ibat owo eda udọñọ ke ikpọhidem mmọ ke utit mme usen mmọ oto ñkoi-nam idiọk-ñkpọ. Mmọ enana emem ke esit ofuri ini. Esit mmọ, ke ediwak ini inyeneke nduọk odudu. Adaña ini nte mme usen inem-esit ye uyuhọ ke idiọk-ñkpọ ebede, ikpọhidem emi idiọk-ñkpọ ama okowuri ọsuhọ ke ndutuhọ.

Edi ke owo ọtọñọde ndinam idiọk-ñkpọ mme unọmọ emi isidighe kaña. Ediwak ini idiọk-ñkpọ esisin udọñ ke esit ye ekikere mkparawa. Ekeme ndidi ke eritọñọ, inem, idara ye uyuhọ esidu ke ini owo ọtọñọde ndiduk usuñ idiọk. Utọ usuñ emi esida eritua mkpọfiọk ye eribiat ikpọhidem ke idiọk ọnọ owo emi okodude uwem ọnọ obukidem, tutu iduhe ñkpọ eke ekemede ndisio unan idiọk-ñkpọ mfep, mme ndinam enye ọtọñọ ntak etie ukem-ukem nte akpa ini emi enye mikanamke idiọk-ñkpọ.

Ekuyak oduk ke ekikere, ekpedi ke ata esisit ini, ete ke inem idiọk-ñkpọ edi ukem-ukem ye akwa utip eke ibọde ke emi ye nsinsi uwem emi nnyin idibọde ke ntak edidu edisana uwem. Ediwak ekpa mba ke uwem owo Abasi ye ke mme edinam nditọ Abasi emi edude ye mmọ ye usuñ mbon akpanikọ, ekabare ndien eyom obufa ye ukpuhọre ñkpọ. Ntọñọ idiọk-ñkpọ enenem mmọ koro mmọ ema ewọñọre esit mmọ efep ke Enye emi inemesit ye idara otode.

Saul, akpa edidem Israel amakabare ọsuhọre tutu ke akpatre owot idem esie oto ke ediyak ntañidem oduk ke uwem esie okposuk edi nte enye ọkọyọhọde ye nsuhọre-idem. Enye ñko, ama okop inem ke ikot Spirit ye uteñe Abasi, ema enyuñ enọ enye obufa esit, Abasi ama onyuñ emek enye. Edi Saul ama okure uwem esie ke ererimbot ke ido nte eke Judas. Usuñ nte akasañade ndien Abasi esin edidem emi ofuri-ofuri ọkọtọñọ ke enye ndiyak ntañidem odu ke esit esie.

Kpa ntre ñko, eritọñọ iduọ Judas ekedi se ererimbot ekpekotde ekpri ñkpo, inyuñ idighe se ekpedade nte akpan ñkpọ. Enye ọkọtọñọ ke edisin esit ke inyene. Ema enọ enye utom ke ekpri otu oro eketienede Jesus. Edi etiñ enọ nnyin ete enye akakabare edi inọ. Owo itiñke inọ nnyin se enye okoyipde mme owo emi enye okoyipde ñkpọ esie. Edi ntak ndidọhọ ete enye ekedi inọ ayarare añwa-añwa.

Emi ada enye osim ndiduk ke ediomi ye mmọ emi ekesuade Christ. Jesus asua ọnọ enye onyuñ etiñ ete ke edi enye edida Imọ ọnọ mme asua. Edi Judas ikakabakede esit, inyuñ inyimeke ndikpọñ usuñ oro adade enye osim ndinam idiọk-ñkpọ emi enyenede ndik ke ererimbot emi.

Kpa mme anditiñ ntiñ-nnim ikọ ema etiñ ebaña utit ye nsobo emi akanade ebet enye, edieke enye edinamde se enye akaduakde ndinam. Enye ama enyene ifiọk abaña mme ikọ oro koro Peter ama ọfiọk ñko, emi ikerede ite ikenyeneke ifiọk ñwed nte Judas. Ikedighe ke ema ekebọ Iberedem, Andida nnyin usuñ nsim ofuri ifiọk akpanikọ ye andiyarade mme utibe ñkpọ Abasi nnọ nnyin, ke Peter ọkọdọhọ mme ikọ oro akabañade Judas. Ekedi ke ayakde ñkpọ nte usen duop mbemiso utibe edinam oro ke Usen Pentecost (Psalm 69:25; 94:20-23; 109:8 da domo ye Utom Mme Apostle 1:15-26). Ke ntre edieke Judas mikọdiọñọke, ekpekenyene ndifiọk emi. Ema ebiere enọ enye nte okodotde. Yak andinim mme ukpep-ñkpọ abiaña ke akpanikọ emi ekpepde ete ke owo ama ọkọbọ erinyaña ekeme nditọñọ ntak ñkanam idiọk-ñkpọ, ekpeme kpukpru mme ntiñ-nnim ikọ oro asuade ọnọ Judas. Ema esibe enye efep ke ukwañ ñkpọ esie! Edi akpanikọ ñko, ete ini kiet, enye ekedi edinen owo!

Ke Judas ama ekesin mme item emi ekenọde enye, enye ayak Satan esin unyime ke esit esie ndinam idiọk uduak esie (John 13:2). Judas ama ebebem iso enyene ediomi ye mme asua Christ. Enye ama ayak andidiọk añwana ye enye oto ke ndinyene ediomi ye mmọ eke edade ye Satan.

Se ikedianade ekedi Satan ndida enye ofuri-ofuri nte ewetde, “Ndien ke Judas ama ọkọbọ uyo oro, ekem Satan oduk enye ke esit.” Mi, ke enye akakabare edi eyen nsobo ke ofuri akpanikọ. Idaha emi enye eyedi eyen ufọk Satan - andibiọñọ Christ ke akpa eritọñọ ini oro – ata owo mfiak-edem ye andisin Christ. Idorenyin oro okofiopde ke esit esie ini kiet iduhe aba. Enye emi, ini kiet ekedide ñkpọ utom ke utom Obio Ubọñ Christ ama akabare idaha emi onyime ke ofuri esit esie ndidi ofin ke ukara Satan. Edi akpanikọ nte ke idara odu ke Heaven ke abaña ukpọñ kiet emi ewabarede esio ke ukara ekim esin ke Obio Ubọñ Uñwana, nnyin imonim ite ke inemesit, ye idara ama odu ke otu mbon nsobo ke adaña emi Satan okurede idiọk utom esie.

Se ikadade itie efen akana iñwañ-iñwañ. Judas ama anam ñkpọ emi, edi ikekereke ñkpọ ndik eke editienede edem. Enye ikenyeneke ndik ke esit, ke adaña emi enye otimde edisana Eyen Abasi inua ndinọ udim mbon-ekọñ emi ekebetde idiọñọ ete ke Enye edi Enye emi eyomde. Ima ikoduhe ke ntim inua oro. Ekikere nditi kpukpru nti ñkpọ oro Christ akanamde ọnọ enye ikoduhe. spirit eritap okodu ke enye, ada-owo-nnọ mme asua, Spirit erisin enyin ke ñkpọ owo emi anamde enye onyime ndinyam ata ñsọñ urua Ñkpọ-uto Heaven ke ata ekpri ekọm-urua. (okuk emi Judas ọkọbọde, emi ke edade edomo ye okuk mbon America edi 19.50.)

Ekọm-urua oro Judas okodiomide ye mme asua Christ ekedi ukem ye se ekenyimede ke ini Ibet ete akama ofin ekpe ke ini eti ofin esie akpade ke unọmọ. Judas idaha emi afiak edem osim itie emi enye esinde Abasi ye Christ ke emi anyamde Ete-ufọk esie ke ekọm-urua ofin!

Judas ama atua mkpọfiọk edi ikakabakere esit. Enye akada “ekọm urua Iyip” akayak; onyuñ ọdọhọ ete imọ imanam idiọk ke emi ikadade “iyip eke miduehe isop”, inọ mmọ. Ikoduhe owo efen emi okpokodotde ndikere enyiñ emi ke mibọhọke Christ. Ekeme ndidi ema ewot mme owo emi mikeduehe isop mikonyuñ inamke ñwọrọ-nda idiọk-ñkpo, ekeme ndidọhọ mbaña mmọ ete ema eduọk iyip eke miduehe isop. Edi ke edọhọde ete, “ke emi ñkayakde iyip eke miduehe isop nnọ”, idighe efen ibe Christ ke etiñ emi ebaña koro edi Enye ikpọñ edi Enye emi Miduehe isop. Judas ama onyime idiọk-ñkpọ esie ke ndikayak Edisana Eyen Abasi nnọ, edi oyom se ikande oro koro erinyaña akan erikut ndudue nnọ idem.

Mme inọ oro ekekọñọde ke krọs, mmọ mbiba ema enam idiọk, edi kiet kpọt ọkọbọhọ, enye ọkọbọ erinyaña koro enye okokotde Ọbọñ oyom mbọm ye uñwam, sia enye ama okonyime idiọk-ñkpọ esie. Erinyaña iduhe inọ mmọ eke mikabakere esit. Judas ikakabakere esit itiene Abasi. Enye okodomo nditọñọ ntak nnyene ebuana ke nditua mkpọfiọk nnọ mme akwa oku ye mme mbio owo, edi iduhe nte enye ọkọbọñde akam esie ọnọ Abasi, Enye emi ikpọñ-ikpọñ ekemede ndifen idiọk-ñkpọ.

Abasi esin enye, mme owo oro enye okodiomide kiet ye mmọ esin enyuñ esak enye, owo emi ekedide mbet ini kiet, ye Apostle ama owot idem esie. Nnyin imokut nte enye adade nsobo ke nsinsi ọnọ idem esie, ke ndiyiri idem esie emi edide idiọk-ñkpọ, koro oto ke idiọk-ñkpọ emi enye ama ebe efep ke ererimbot emi man ada ke iso Abasi esie enyuñ ebiom enye ikpe ke ntak idiọk-ñkpọ esie, unana erikabare esit ye unana idorenyin.

Questions
MME MBUME
  1. Nso utom ke ekekot Judas edinam? Utom esie ekedi nso?
  2. Nso ikedi ubiọñ utom esie ke otu mme Apostle duopeba?
  3. Nso ikedi akpa ediwọñọre ñkpọñ edinen ido emi nnyin ikutde ke uwem Judas?
  4. Ke usuñ ewe ke Judas akabiat ibet emi ọdọhọde ete ndinen owo ikpenyeneke ebuana ye ndibọp idem utiñe-utiñe ye mme idiọk owo?
  5. Nso ikedi nduri-utọñ emi Judas ọkọbọde emi akpakanyañade enye osio ke se ikọwọrọde enye?
  6. Nte ekefefik Judas ndinam se enye akanamde oto nte ema ekewewet se iditibede emi enye mikekemeke ndibiọñọ?
  7. Ini ewe ke ekeme ndidọhọ ete enye ama akabare ofuri-ofuri edi “eyen nsobo”?
  8. Ke didie ke ukpep-ñkpọ emi owut ete ke ukpep-ñkpọ emi ọdọhọde ete ke owo osuk odu ke erinyaña ke ọtọñọde ntak aka akanam idiọk-ñkpọ edi nsu?
  9. Tiñ ukpuhọre emi odude ke edinam Satan ke abaña Judas nte ewetde ke ñwed John 13: 2 ye 27?
  10. Nso idi ukpuhọre editua ñkpọfiọk ye erikabare esit? Ewe ke Judas ekenyene? Nte Judas ama ọbọhọ ke akpatre?