Lesson 250 - Senior
Memory Verse
“Sia ama okokut Mi, omonim ke akpanikọ? ọfọfọn ọnọ mmọ emi mikekwe, edi enimde ke akpanikọ” (John 20:29).Cross References
I Akpa Christ Ndiwut Mme Owo Idem Ke Usen Easter Ke Enye Ama Ekeset
1. Jesus ayarare idem owut Mary Magdalene ke udi, Mark 16:9-11; John 20:11-18
2. Jesus ayarare idem owut mme iban emi ekenyọñọde udi, Matthew 28:9, 10
3. Jesus ayarare idem owut Simon Peter, Luke 24:34; 1 Ñwed Corinth 15:5
4. Jesus ayarare idem owut mbet iba ke usuñ Emmaus, Mark 16:12, 13; Luke 24:15-31
5. Jesus ayarare idem owut mme Apostle ye mmọ efen ke ini Thomas mikoduhe do, Mark 16:14-18; Luke 24:36-48; John 20:19-23
II Akpa Christ Ndiwut Mme Owo Idem Ke Easter Ama Ekebe
1. Ke akpa usen urua ke Easter ama ekebe, Jesus owut mme Mbet idem ke ini Thomas odude do ñko, John 20:26-29
2. Jesus ayarare idem owut mbet Esie itiaba ke ini mmọ esuk ekọde iyak ke inyañ Tiberias, John 21:1-25
3. Jesus ayarare idem Esie owut mme Apostle ke obot kiet ke Galilee, Matthew 28:16-20
4. Jesus ayarare idem owut nditọ-ete emi ewakde ekan owo ikie ition, 1Ñwed Corinth 15:6
5. Jesus ayarare idem owut James, 1 Ñwed Corinth 15:7
6. Jesus ọdọk ke enyọñ ke iso mme Apostle ke Bethany, Mark 16:19; Luke 24:50; Utom Mme Apsotle 1:2-9; 1 Ñwed Corinth 15:7
7. Jesus ayarare idem owut Paul, 1 Ñwed Corinth 15:8
Notes
SE EKPEPDE EBAÑAMbuk Eriset ke Mkpa
Isọñ ama enyek. Angel ama etie ke enyọñ itiat emi enye akakpatde efep ke inua udi. Mbuk Christ nte Enye emi odude uwem, emi angel eketiñde ọnọ mme iban oro eketie ñke-ñke ke utọñ mbet. Mmọ ekekere ete ke ñkpọ emi ikemeke ndidi akpanikọ. Peter ama ọnuhọ onyuñ ọsuhọde oduk ke udi emi akanade iñwañ. Mme mfia ọfọñ linen ikpọñ ekesuhọ do, edi okpo ikoduhe. Idem ama akpa enye abaña se ikotibede.
Mary ama okut Jesus, edi mme Apostle ikekemeke ndinim ke akpanikọ ete ke edi Enye. Mme iban eken ñko ema ekut Jesus, edi mbuk mmọ ama ọsọñ owo ndinim ke akpanikọ. Ọbọñ ama owut Peter idem Esie (ndien ikọ emi ama odu ke inua kpukpru mmọ ete, “Ọbọñ emeset ke akpanikọ, omonyuñ owut Simon idem.” Edi kpa ye oro, ke esit ediwak owo eyighe okosuk ododu. Mbet iba emi eketode Emmaus edi, ema esaña eduk ke otu mmọ enyuñ esian mmọ ete ke Ọbọñ ama asaña ye mmọ ke usuñ ye nte Enye akayarare idem owut mmọ ke ini Enye okobuñde uyo. Kpa ye oro, ubak mmọ ekesuk ededu ke eyighe.
Edibe Nduk Jesus
Mbet ekedu ke akwa oyomo-nsia ye ndik, koro ke ufọt mmọ, ñkpọ eke ekebietde spirit ọwọrọ ada, oro ekedi Jesus! Kpa ye ikọ emi Enye eketiñde ye mmọ ndinam mmọ enim ke akpanikọ ete ke edi Imọ, okosuk ọsọsọñ mmọ idem ndinim. Enye ama ọdọhọ mmọ ete “Ese ubọk ye ukot Mi.” Do ke ubọk ye ukot Esie mme nde okpukwak ema edu. Emi ekedi Jesus, Andikpep ye Ufan mmọ, kpa Jesus emi akasañade onyuñ etiñde ikọ ye mmọ!
Idighe Spirit, Edi, Edi Owo Ke Ikpọhidem Ubọñ
Jesus ama ọsọñọ etin ete: “Spirit inyeneke obuk ye ọkpọ,” onyuñ otim anam mbet efiọk ete ke edi Imọ-ke ikpohidem. Ke ndisọñọ nte ke Imọ idodu uwem ke ikpohidem ke ima ikeset ke mkpa, Enye obup ete enọ Imọ udia onyuñ adia ke iso mmọ. Jesus ama otim ọdiọñọ mme nsio-nsio ukpep-ñkpọ eke edidahade eda ndifaña ikọ eriset Esie ke mkpa; ke ntak emi, Enye ama ada “ediwak ikpọ idiọñọ owut mmọ idem” (Utom Mme Apostle 1:3). Enye ikenyeneke obuk ye ọkpọ ikpọñ, edi mme nde okpukwak ye unan emi okotode eduat ema edu Enye ke idem nte ikpọ idiọñọ ndisọñọ eriset Esie ke mkpa.
Ikpọhidem emi Christ ekenyenede ke eriset Esie ama ọkpuhọre ye ikpọhidem obot, koro ye ikpọhidem eriset, Enye ama ekeme ndibe nduk ke ufọk emi “ema ekeberi usuñ” (John 20:26). Enye ñko ama “osop mmọ ke enyin” (Luke 24:31). Edi Enye ikedighe spirit; koro Enye ama enyene ikpọhidem, kpa ikpọhidem eriset, ikpọhidem ubọñ. Kpukpru mme anditiene-Christ emi edide mme andikan, eyekpuhọre mmọ ke utọ usuñ emi ke ini Ntañ-ndọk Ufọk Abasi: “Eyenam kpukpru nnyin ikpuhọre, ke idaha kiet, ke eriyip enyin kiet, ke adaña emi edifride akpatre ukorowo. Koro eyefri ukorowo, ndien eyenam mme akpa mkpa eset nte mmọ midikemeke ndibiara aba, eyenyuñ ekpuhọre nnyin” (I Ñwed Corinth 15:51, 52). Jesus “emi eyetọñọ ntak obot ikpọhidem nnyin emi odude ke ata usuhọre itie, esin ke mbiet idem Esiemọ emi enyenede ubọñ” (Ñwed Mbon Philippi 3:21). Nnyin iyenyene ikpọhidem ubọñ emi edibietde enye emi idaha emi. Oro edi, nnyin iyediọñọ kiet eken, edi kpukpru se ikwañade emi otode isuñi eyebe efep, ndien nnyin iyedu uwem, idinyuñ ikpaha aba.
Ediñwaña Mmọ Ikike
“Ndien Enye añwaña mmọ ikike, man mmọ efiọk ikọ Abasi” (Luke 24:45). Iminim ke akpanikọ ite Jesus ama asiak ibuot ñwed emi edọhọde ete, “Edi Enye akada unan abaña mme idiọk ido nnyin, anuaha abaña mme ukwañ-ñkpọ nnyin: ufen odoro Enye ke idem man nnyin ikut emem: ndien inia esie ọkọk nnyin” (Isaiah 53:5). Ntem ke uñwana asiaha ọnọ mmọ ndien mmọ ediọñọ ete ke Enye edi Jesus.
Akpan Ñkpọ ke abaña Eriset ke Mkpa
Ke ini ndusuk owo efañade idaha Christ nte Abasi, mmọ efen enyuñ ekañde utibe eriset Esie, ata anditiene-Christ esọñọ eda ke idaha ete, Christ edi Abasi, enyuñ enim ete ke Enye ama eset ọwọrọ ke udi. Edieke nnyin ifañade eriset Esie, ọwọrọ ete nnyin imakañ mbuọtidem nnyin, inyuñ iduọk idorenyin emi abañade Heaven. “Edieke mikanamke Christ eset ke mkpa, se nnyin ikwọrọde ọwọrọ ikpikpu, mbuọtidem mbufo edinyuñ okpu … edi edieke mikanamke Christ eset, mbuọtidem mbufo ọwọrọ ikpikpu; mbufo ke esuk edodu ke mme idiọk-ñkpọ mbufo. Ñko-ñko, mmọ emi ekedede idap ke Christ ema etak” (1 Ñwed Corinth 15:14, 17, 18). Emi ekedi ntak emi Jesus okoyomde mbet esie etim ediọñọ ete ke edi Imọ, inyuñ idighe spirit. Erinyaña ye idorenyin nsinsi uwem nnyin ọkọñọ ke ñkpọ emi, oro edi ikpọhidem Esie ama eset ke mkpa.
Ọsọñ Ndinam Onim Ke Akpanikọ
Okposuk edi nte Christ okowutde mbet Esie idem ke ñkpọ nte utim ikotion ke Enye ama ekeset, eyighe okosuk odudu ke esit Thomas, emi ekedide kiet ke otu mbet “duopekiet”. Thomas ikoduhe ke mbubreyo oro ke ini Jesus akayarade idem Esie owut mme Apostle eken: “Ndinimke ke akpanikọ ibọhọke ini ñkutde nde okpukwak ke ubọk Esie.” (John 20:25), Thomas owo ọkpọsọñ eyighe etiñ emi.
Ọbọñ ama ọdiọñọ ete ke esit ọkpọsọñ ifiọk Thomas idinimke ke akpanikọ ke ema etiñ enọ enye. Ke ntre Ọbọñ ikoyomke Thomas ọsuhọ ke eyighe esie. Ke usen itiaita ema ekebe, oro ekedi ke akpa usen urua ke udiana urua, Jesus ama ayarade idem owut mbet Esie emi ekebonode ọtọ kiet onyuñ etiñ mme ikọ emi ye Thomas ete, “Nyan nnuen-ubọk fo, se ubọk Mi; nyuñ nyanare ubọk fo sin ke ñkañ Mi, kunyuñ unana mbuọtidem, edi nim ke akpanikọ” (John 20:27). Edinam emi ama ekem, onyuñ enyik Thomas ndifiori ke ọkpọsọñ uyo ete, “Ọbọñ ye Abasi mi.” Kpa Thomas emi mikonyimeke ndinim ama ọfiọk ndien ete ke ekedi Jesus.
Ibifik Abasi
“Jesus ọtọñọ ntak ọdọhọ mmọ ete, Emem osuk odu ye mbufo. Nte Ete okosiode Mi ọdọñ, kpa ntre ke Ami nnyuñ nsio mbufo ndọñ. Ndien ke Enye ama eketiñ ntem, ọduọk mmọ ibifik ke idem, onyuñ ọdọhọ mmọ ete, Ebọ Edisana Spirit” (John 20:21, 22). Utọ ibifik oro eke otode Eyen Abasi ntem ikpekemeke ndidi ikpikpu ibifik. Ke ntọñọ ererimbot emi Abasi okobotde kpukpru ñkpọ, Enye ọkọduọk ibifik uwem esin owo emi Enye okobotde ke ibuo, ndien owo akabare edi ukpọñ emi odude uwem (Se ke Genesis 2:7). Ke ini Jesus ọkọduọkde mbet Esie ibifik ke idem, Enye ama ọdọhọ ete, “ebọ Edisana Spirit”, edi ekedi ofuri akpanikọ ete ke Enye okoyom Edisana Spirit edi ntiense ọnọ edinam-asana emi mmọ ekebọde. Nnyin imọdiọñọ ite ke ema eda iyip Jesus enam mmọ esana mbemiso osim usen Pentecost, koro kpukpru ekodude ọtọ kiet ye ke esit kiet. Edi edinam-asana ọkọnọ mmọ edidiana kiet oro: “Da akpanikọ fo dianare mmọ nim nọ Idem Fo … man mmọ edi kiet, kpa nte nnyin idide kiet” (John 17:17, 22).
Edifen Ke Mme Idiọk-Ñkpọ
“Owo ekededi eke mbufo efende mme idiọk-ñkpọ, emefen mmọ mme idiọk-ñkpọ mmọ; owo ekededi eke mbufo emumde mme idiọk-ñkpọ enim, emum mme idiọk-ñkpọ mmọ enim” (John 20:23). Odudu emi ekenọde mme Apostle nte mme adaha ntọñọ ufọk Abasi ama ọnọ mmọ unen ndida mbon mfiak edem emi etọñọde ntak ekabare esit nsin ke ufọk Abasi, ndinyuñ mbin mmọ oro mimaha ndikabare ñkpọñ usuñ mmọ mfep ke ufọk Abasi. Item emi edi ukem-ukem ye se ewetde ke Matthew 18:15-17, edi do ke etiñ ete edieke eyen-ete esinde ndikop uyo ufọk Abasi, yak eda enye nte “Owo mme idut ye Publican.” Paul ke ini enye ewetde ñwed ọnọ mbon Thessalonica ama ọdọhọ ete, “Imada enyiñ Ọbọñ nnyin Jesus Christ isọñọ inọ mbufo uyo, ite edianare idem ye eyen-ete ekededi eke asañade otime-otime, minyuñ isañake ke item eke ekebọde ke inua nnyin” (2 Ñwed Thessalonica 3:6). Odudu eke ufọk Abasi enyenede ndida mfen nnọ owo mmọ ekededi edi ukem ye odudu eke eyen-ete kiet enyenede ndida mfen nnọ owo eke eduede enye. “Edieke eyen-ete eduede fi, sua nọ enye; ndien edieke enye atuade mkpọfiọk, dahado nọ enye” (Luke 17:3). Emi iwutke ite ke ufọk Abasi, mme pope, mme oku, mme owo ekededi ekeme ndifen mme idiọk-ñkpọ emi owo anamde Abasi. Idiọk-ñkpọ emi owo anamde eyen-eka esie ọwọrọ ete enye anam Abasi ñko. Owo eke anamde idiọk ana nte enye eneñerede usuñ esie ke iso owo ye ke iso Abasi nde, koro edi Abasi ikpọñ ekeme ndifen idiọk-ñkpọ.
Eyen Abasi
“Jesus okonyuñ anam ediwak mme idiọñọ eñwen ke iso mbet Esie, emi miwetke isin ke ñwed emi. Edi ewet mmọ emi, man mbufo enim ke akpanikọ ete Jesus edi Christ, Eyen Abasi; man, ke erinim ke akpanikọ, mbufo ekpenyene uwem ke enyiñ Esie” (John 20:30, 31). John eneñere etiñ ọsọñọ ete ke Jesus edi Eyen Abasi. Ndien ata ediwak owo emi ekenimde Enye ke akpanikọ enyuñ enyenede uwem eto ke Enyiñ Esie, ke mme isua emi ebede edi mme ntiense ebaña odudu eriset Esie ke mkpa.
Questions
MME MBUME- Ke ewe usen ke urua ke Jesus ekeset ke mkpa?
- Ke Jesus ama ekeset, ekebighi didie mbemiso Enye owut mbet idem ke akpa ifet?
- Siak mme ñkpọ eke Jesus akanamde ndisọñọ eriset Esie.
- Bat mme nsio-nsio idaha emi Christ akayarade idem Esie owut mme owo ke usen Easter.
- Yom mme ntiñ-nnim-ikọ emi ebañade mkpa ye eriset Christ.
- Ke ewe usen ke urua ke Jesus okowut mme Apostle idem Esie ọyọhọ ikaba?
- Anie mikoduhe ke akpa ediyarare idem Esie?
- Nso idi ata akpan ntak emi anade nnyin ineñere inyene idiọñọ ke eriset Jesus ke ikpọhidem?
- Tiñ se ekemede baña ikpọhidem ubọñ.
- Nso ukpuhọre ke spirit enyene ye ikpọhidem ubọñ?