Lesson 253 - Senior

Memory Verse

“Jesus emi, emi emende Enye ekpọñ mbufo eduk ke heaven, eyedi kpa ido emi mbufo ekutde Enye ọnyọñde oduk ke heaven” (Utom Mme Apostle 1:11).

Cross References

I Akpatre Mme Item Emi Jesus Ọkọnọde Mbet

1. Ñwed Luke etiñ abaña mme ukpep-ñkpọ Jesus ye mme erinam Esie tutu osim ini emi Enye ọdọkde ke enyọñ, Utom Mme Apostle 1:1, 2; Luke 1:3; Mark 16:19

2. Jesus ama owut Idem Esie nte odu-uwem ke usen aba, etiñ ikọ ye mbet abaña Obio Ubọñ Abasi, Utom Mme Apostle 1:3; Mark 16:14; Luke 24:36; John 20:19

3. Enye ama ọdọhọ mbet ete ebet ndibọ eñwọñọ emi Ete ọkọñwọñọde, Utom Mme Apostle 1:4, 5; John 14:16

4. Mbet ema ebup ebaña Obio Ubọñ Israel, Utom Mme Apostle 1:6; Matthew 24:3

5. Ema etiñ enọ mbet ete ke Ete ikpọñ ekenyene ibọrọ emi mmọ ekeyomde, Utom Mme Apostle 1:7; 1 Ñwed Thessalonica 5:1; Mark 13:32

6

. Eyenọ odudu, ndien mbet eyedi mme ntiense enọ Christ, Utom Mme Apostle 1:8; 2:1-4; Luke 24:48; John 15:26, 27

II Eridọk Jesus ke Enyọñ

1. Ema emen Jesus edọk ke heaven, Utom Mme Apostle 1:9

2. Angel iba ekenọ etop ke abaña eñwọñọ edifiak ndi Christ, Utom Mme Apostle 1:10, 11; Daniel 7:13; Matthew 24:30; Mark 13:26; Luke 21:27; John 14:3; 1 Ñwed Thessalonica 1:10; 4:16

III Erimek Mme Mbet

1. Ke ini ema eketo Obot Olivet enyọñ edi, mbet ema eka iso ke akam ye mkpe-ubọk, Utom Mme Apostle 1:12-14

2. Ema emek Matthias ndida itie Judas, Utom Mme Apostle 1:15-26; Psalm 69:25; 109:8

Notes

SE EKPEPDE EBAÑA

Luke, ke eti mbuk emi enye ewetde ama ọnọ ọyọhọ etop abaña mme utibe utom ye mme ukpep ñkpọ Jesus ọtọñọde ke ini emana Esie tutu osim ini emende Enye edọk. Idaha emi, ke Utom Mme Apostle, Luke etiñ abaña eridọk ke enyọñ Jesus ye utom eke mme Apostle.

Ke ofuri usen aba tọñọ nte Jesus ekeset ke mkpa, Enye ama osobo ye mbet Esie, etiñ ikọ ọnọ mmọ onyuñ adia ñkpọ ye mmọ. Enye ama owut idem Esie nte odu uwem ke ini ndutuhọ mkpa Esie ke eto ama ekebe ye edibuk Esie. Oto ke eriset Jesus ye erinam ye mme ikọ Esie, Enye ama ebin eyihe osio ke esit mbet Esie ke abaña idaha Esie nte edisana odu uwem, Ọbọñ ye Andinyaña emi ekesetde.

Eriset Jesus ke mkpa edi akpan oruñ ke Ikọ Abasi. Christ ama eneñere ọsọñọ ewet ukpep ñkpọ emi ke esit mbet oto ke eriyarare Idem Esie ke ediwak idaha nnọ mmọ man oto do emi ọkpọri eyihe osio ke esit ye ekikere mmọ. Mme ñkpọ emi ekpenamde mmọ enim Enye ke akpanikọ ema edu. Enyin mmọ ema ekut Enye. Mmọ ema ekut idiọñọ ọkpukwak ke ubọk, ye ukot, ye idiọñọ eduat ke ñkañ Esie. Enye ama eneme nneme ye mmọ. Mmọ ema ekut ete Enye ekedi Jesus oro ọkọbọkde otu owo, anam akpa-mkpa eset, anam akpa-mfia asana, onyuñ anam nnan okut usuñ. Idaha emi, Enye odu uwem ke nsinsi kpa Jesus emi anamde mme utibe-ñkpọ.

Mbume Ke Abaña Obio Ubọñ

Ke eriset ke mkpa Jesus ama ekebe, eketie nte mbet Esie ema ekpep usọp usọp ata akpanikọ emi odude ke Ikọ Abasi. Ekikere Enye ndida ubọñ ke isọñ ama osuk odu ke esit mmọ: ke abaña edifiak nda nditọ Israel nsin ke itie nte mme andikara idem mmọ, ye nte mmọ ekpedide mme ada ibuot ke idaha oro.

Mbet efiak edi ye mbume, “Nte Afo ọmọñ ọtọñọ ntak ayak Obio Ubọñ ọnọ Israel ke emi?” Edi Jesus ọbọrọ mmọ ete “Inaña inọ mbufo ndifiọk ini mme eyo, eke Ete okonimde akama ke ubọk Esiemọ.” Enye akanyan ubọk owut mmọ ata Obio Ubọñ, ọwoñọre ekikere mmọ osio ke obio ubọñ ererimbot esin ke Obio Ubọñ Heaven.

Ndineñere Mbeñe-Idem Mbaña Utom

Akpatre item emi Jesus ọkọnọde ekedi mmọ ndibet ke Jerusalem nyuñ mbọ enwọñọ Ete emi ekenyenede ndidi ntiene mmọ. Jesus ama anam añwaña ete ke Imọ iyenyọñ, ndien iberedem eyedi. Enye ama etiñ ọnọ mmọ ete ke eyenim mmọ baptism oto ke Edisana Spirit ye Ikañ, ke ediwak usen mibehe. Enye ama ọkpọñ mmọ, edi mmọ eyenyene Iberedem efen, Enye emi edidude ye mmọ ke nsinsi. Edieke ekedide akpan ñkpọ ọnọ mbet ke akamba usen oro, ndibet tutu mmọ ebọ odudu oro Ete ọkọñwọñọde, edi akpan ñkpọ nnyin ñko ndibet nnyuñ nyom tutu nnyin ibọ ukem odudu oro ke uwem nnyin.

Ndusuk edọhọ ete ke ediyak Edisana Spirit ntem nnọ ekenyene akpa ntọñọ ufọk Abasi. Edi Ikọ Abasi etiñ ọnọ nnyin: “Uñwọñọ oro enyene mbufo, ye nditọ mbufo ye kpukpru mmọ emi edude nsan nsan, adaña owo nte Jehovah Abasi nnyin edikotde”. Peter, kini ọkọkwọrọde Ikọ Abasi ke usen Pentecost, ama etiñ ikọ Joel ete ke Ọbọñ ọkọdọhọ ete ke Imọ iyeñwaña spirit Imọ inọ ofuri obukidem (Joel 2:28). Nte afo ọmọbọ Iberedem Edisana Spirit tọñọ nte okonim ke akpanikọ?

Mme Ntiense Christ

“Mbufo eyebọ odudu ke Edisana Spirit ama edi edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judaea, ye Samaria, tutu osim utit ererimbot”. Jesus akanam utom ukwọrọ ikọ Esie akpan akpan ke otu mme Jew, man otodo edisana uduak Esie ke abaña mmọ ọwọrọ osu. Edi mme Jew, nte idut ikonyimeke Enye ye ukwọrikọ Esie. Enye ama ọnọ mmọ emi ekenyimede Enye odudu ndika ke ofuri ererimbot man owo kiet ekededi edide Jew mme Gentile okpokop mbuk idaresit emi.

Ke ini ekesiode owo ata ye duop edọñ, Jesus ama etiñ ọnọ mmọ ete ekuka ke usuñ mme Gentile, mme ke Obio Samaria. Ntak ekedi man nditọ Israel enyene ifet ndibọ Ikọ Abasi man itie emi Abasi ọkọdiọñde onim ọnọ mmọ ọkpọwọrọ osu nte ekekotde mmọ. Edi idahemi mbet Jesus ema ekut ete utom emi ekeyakde enọ mmọ ama eneñere okpon. Mmọ ekenyene ndika ke ofuri ererimbot idahemi ñkọkwọrọ Ikọ Abasi nnọ kpukpru owo.

Mbet ema eka ke kpukpru ebiet ke ererimbot. Mmọ ema etim enam utom mmọ. Mbuk etiñ ọnọ nnyin ete ke ndusuk mmọ ema ekpa ke ntak Ikọ Abasi ke ubọk mme owo ke mme obio emi eyomde usuñ ekpọñ Jerusalem. Se nte ikọ ntiense emi ọnọde nnyin udọñ ye nsin ifik ke edinam mme item Jesus ọyọhọ-ọyọhọ! Spirit ndisaña utom Abasi okpon didie ke afo?

Edidọk Ke Enyọñ

Ke ini Jesus ama ọkọnọ item onyuñ ọdọhọ mbet ete mmọ ebet ke Jerusalem man eñwọñọ emi Ete ọkọñwọñọde etiene mmọ, Enye ama emenere Ubọk Esie onyuñ ọdiọñ mmọ. Itiñke inọ nnyin mme ikọ edidiọñ emi ekedade ediọñ mmọ, edi ekedi akwa ñkpọ ọnọ mmọ. Emi ekedi akpatre Amen ọnọ mme ikọ ye mme ukpep ñkpọ Esie. Nte Enye ọkọdiọñde mmọ, ikpat Esie ama ọtọñọ ndikpọñ isọñ ndien Enye ama ọtọñọ ndidọk ñka Heaven; ndien mbet Esie ema ekut Enye nte akpatre ke eyo uwem mmọ ke ererimbot.

Mbet Jesus ema ekut Enye nte ọnyọñde. Mmọ ema eka iso ndise Enye tutu ikpa enyoñ ofuk Enye ndien mmọ ikwe Enye aba. Jesus ikosopke ke otu mmọ nte Enye ekesinamde ke mme ini emi Enye ekesiyararede idem ke Enye ama ekeset ke mkpa. Ini enye emi Enye akaka Heaven, idighe nte Enye okososop ndifiak ñwọrọ nwut mmọ idem ke ini iso. Akana edi ntre nte ntiense ọnọ emana emi edidide ete ke mmọ ema ekut Enye nte ọnyọñde. Utom Jesus ke ererimbot ke idaha oro ama okure. Enye ọkọkpọñ mbet Esie ndida utom oro nam aka iso. Mmọ ema ese Enye adaña nte enyin mmọ ekekemede ndikut Enye tutu mmọ efiọk ete Ete ufọk mmimọ ọnyọñ.

Edi ke ndondo oro isen-isen ye utibe ñkpọ efen ama ada itie. Angel iba eda ye mmọ enyuñ etiñ ikọ enọ mmọ ntem “Jesus emi, emi emende Enye ekpọñ mbufo eduk ke heaven, eyedi kpa ke ido emi mbufo ekutde Enye ọnyọñde oduk ke heaven.” Jesus emi! Enye emi mmọ ekenemede neme kiet, edia ñkpọ kiet, enyuñ eñwọñ ñkpọ ọtọ kiet, eyefiak edi ke ererimbot.

Edisana Ikpat Andinyaña ama asaña akpatre isañ ke Obot Olive, ibọhọke tutu utibe usen oro edi, emi Zechariah, anditiñ ntiñ-nnim ikọ eketiñde ọnọ nnyin ete, ke ini mme ndisana ikpat oro edifiakde otuk obot oro, ndien obot oro eyesiaha mbak iba, mbak kiet eyesihere aka edere ndien kiet aka usuk. (Kot Zechariah 14:3-11).

“Andinyaña Nnyin Oto ke Obot Olivet ọdọk ke Heaven Oduk ke enyọñ ebe ke ntuk ube ubọñ; Edi Angel etiñ mme utibe ikọ ndọñesit, ‘Ke oruk usuñ oro, Enye eyefiak edi nte ededi.”

Nso utibe idorenyin! Nso edidiọñ ye idorenyin! Emi edi idorenyin emi ọyọhọde ke esit kpukpru nti ikọt Abasi mfin, ñko onyuñ edi ñkpọ ndọñesit ọnọ oruk owo Abasi oro (I Ñwed Thessalonica 4:18).

Isen Ñkpọ Ntibe

Nso isen ye utibe ñkpọ ke mbet usuhọre owo Nazareth ekekut ke mme usen ifañ emi ekebede! Mmọ ema ekut nte ekekọñde Ọbọñ mmọ! Ubọk mmọ ekesin Enye ke udi. Ke ọyọhọ usen ita, ndik ama anam mmọ ndikut nte udi anade ukpọk. Ñko ama anam mmọ ndik ndikut Enye ọwọrọde owut Idem ke otu mmọ ke ini ema ekeberi usuñ. Usen kiet Jesus ama ada ke mben inyañ ke usenubọk ke ini mmọ ema ekeduọk iyire ke ofuri okoneyo oro ndien imumke iyak, okot mmọ ete eduọk iyire mmọ ke ñkañ nnasia ndien eyemum iyak.

Idahemi mmọ etọñọ ntak ekut utibe ñkpọ efen. Mbet ema edu ye Jesus ke Obot Olivet. Enye ama enyene nneme ye mmọ abaña Obio Ubọñ, ñko ye Edisana Spirit emi edidide ndinọ mmọ odudu onyuñ ada mmọ osim ofuri akpanikọ. Ke ndo ndo oro Enye ama emenere ubọk onyuñ ọdiọñ mmọ, ndien Enye ọdọk ke Heaven. Mmọ ema etiñ enyin ese nte Enye ọdọkde ke ikpa enyọñ ndien enyọñ ofuk Enye, ndien mmọ ema ekop etop emi okotode mme Angel iba emi mmọ ekekutde edade ye mmọ. Ke ini mmọ ema ekenyene ọyọhọ idorenyin emi ayamade ke esit mmọ, mmọ efiak enyọñ ke Jerusalem nditie mbet eñwọñọ odudu.

Ndimek Andida Itie Judas

Mbet Jesus ema eka ke ubet enyoñ ke Jerusalem. Ekeme ndidi ukem itie emi mmọ ekediade akpatre udia mbubreyo, emi Jesus okonyuñ eyetde mmọ ukot. Mbet duopekiet, ye Mary eka Jesus, nditọ ete esie, ye mmọ eken – ke ediande ibat ọwọrọ owo ikie ye edip emi ekemade enyuñ etienede Jesus ema edu do. Ke ofuri usen duop mmọ ema eka iso ke akam ye mkpe ubọk.

Peter ama ekere ete ke ekpenyene ndimek owo efen ndida itie Judas, emi ọkọduọde ke ntak idiọk-ñkpọ. Peter ekenyene isọñ oto ke mme ikọ emi mme Anditiñ ntiñ-nnim ikọ eketiñde ebaña Judas. Ke enamde etiene eti edibiere ke ini oro, mbet ema emek owo iba, Barsabas ye Matthias; ndien ke ini ema ekebọñ akam ekure, ete yak Ọbọñ anam uduak Esie, mmọ esin afia. Afia oro emek Matthias.

Itie emi Judas ekenyenede akana ukpọk ndien mme mbet ema ekere ete ke ekpenyene ndisin owo ke itie esie. Judas ekedi akama okuk kotu mbet, ndien utom Judas oro ye itie esie enyene nditiene owo efen man oto do enye ọnọ mmọ uñwam ke mme ñkpọ uwem emi. Edi nnyin imokut nnen-nnen uduak Abasi ke ndimek Paul ndida itie nte Mbet. Paul, ndikabare ndi ọyọhọ mbet duopeba idighe se efañade mme eyikde, koro Edisana Spirit etiñ ediwak ikọ ke abaña emi ke ñwed Abasi.

Ekpeye didie edieke mme owo ke idut nnyin ekpebọñde akam nte mbet duopekiet, ekpenyuñ ebupde Abasi ndida mmọ usuñ ke erimek mme ada ibuot ukara nnọ mmọ. Baba odudu kiet ke ofuri ererimbot ikpekanke nnyin, koro nnyin ikpesaña ke uduak Abasi. Edi nnyin kiet kiet inyene ndida ifiọk ndibọñ akam ndiyire Abasi, nyom nda usuñ Esie ke kpukpru se inamde ke usen ke usen. Edieke nnyin inamde ntem, Enye eyeda nnyin usuñ, koro “Jehovah otim onim ikpat (eti) owo onyuñ amama usuñ esie” (Psalm 37:23).

Questions

MME MBUME

1. Jesus ye mbet Esie ekedu ke mmọñ ke ini akpatre ñkpọ-ntibe emi akadade itie?
2. Nso ikedi ibuot nneme mmọ ke ini emi?
3. Nso mbume ke mbet ekebup? Ndien nso ikedi ibọrọ?
4. Tiñ ñkpọ baña akpatre edidiọñ Jesus ye edidọk Esie.
5. Mum etop Angel sin ke ibuot.
6. Ekenyene ndikwọrọ Ikọ Abasi ke mmọñ ke ini Jesus ama ọkọdọk ke enyọñ?
7. Anie ke ekemek idahemi ndidi Apostle man ada itie Judas? Anie ke Abasi ekemek ndida itie emi?