1 Ndidem 3:5-15; 4:21-34

Lesson 255 - Senior

Memory Verse
“Buọt idem ye Jehovah, nyuñ nam se ifọnde; duñ ke isọñ, nyuñ dia akpanikọ” (Psalm 37:3).
Cross References

I Eñwọñọ Jehovah Ye Akam Solomon

1. Abasi anam eñwọñọ eke minyeneke adaña ọnọ Solomon, 1 Ndidem 3:5; 2 Chronicles 1:7

2. Mme eñwọñọ Abasi eke enyenede mme andinim ke akpanikọ idahaemi inyeneke adaña, John 15:7; Matthew 7:7, 8; Mark 11:24

3. Solomon owut nsuhọre-idem ukem-ukem nte ikpọ mbon Abasi eken, 1 Ndidem 3:6-8; Jeremiah 1:6; Exodus 4:10; Genesis 18:27; 32:10; Judges 6:15; 2 Samuel 7:18

4. Solomon ebeñe ifiọk ndikara Israel, 1 Ndidem 3:9, 10; Job 28:28; James 1:5-7; 1 Ñwed Corinth 1:23, 24; Ñwed Mbon Colossae 2:2, 3

5. Jehovah ọnọ Solomon ibọrọ, 1 Ndidem 3:11-15; Matthew 6:33

II Uforo Ye Ubọñ Ke Obio Ukara Solomon

1. Mme eñwọñọ eke ikpọhidem emi Abasi ọkọñwọñọde ọnọ Abraham osu,1 Ndidem 4:21, 24, 25; Genesis 22:17; 15:18

2. Abasi ofori Solomon ọyọhọ-ọyọhọ, 1 Ndidem 4:22, 23, 26-28; Luke 6:38

3. Abasi ọnọ Solomon ifiọk, 1 Ndidem 4:29-34; Matthew 12:42.

Notes
SE EKPEPDE EBAÑA

Akparawa Emi Ọkọbọde Erinyaña

“Ndien Solomon ama Jehovah.” Jesus ama ọnọ emi nte akamba ye ebeiso item, “Ma Jehovah Abasi fo ke ofuri esit fo, ye ke ofuri ukpọñ fo, ye ke ofuri ekikere fo” (Matthew 22:37). Utọ ntọtuñọ ima emi ekeme ndikut ke esit owo emi amanade obufa. Nnyin idiọñọke ini emi Solomon akamanade obufa, edi ekeme ndidi enye ekewet oto ke ifiọk emi enye ekenyenede abaña edimana obufa ke ini enye ọdọhọde ete, “Nyuñ ti Andibot fi ke ini afo edide akparawa” (Ecclesiates 12:1). Edi akpanikọ nte ke Solomon ama ọbọ erinyaña ke ubak ini uwem esie, koro esinde ñwed emi enye ekewetde ke Edisana Ñwed Abasi. “Koro akanam baba ikọ prophet itoho ke uduak owo: edi mme owo etiñ ikọ eke otode Abasi, nte edisana spirit esinde mmọ etiñ” (2 Peter 1:21).

Solomon ekedi ekpri eyen ke ini enye ọtọñọde ndikara: mme ikọ esie ekedi, “ndien ami ndi ata eyenọwọñ” (1 Ndidem 3:7). David okot enye “eyenọwọñ ye mmeme.” Ndusuk owo ekere ete ke enye ekedi owo isua edip. Se ekpededi isua emana esie, ima emi Solomon ekenyenede ọnọ Jehovah ekesin enye okot kpukpru mme etubom mbon-ekọñ, mme ebierikpe, ye mme mbọñ edisaña ye enye eka ke Gibeon. Kpa ke ebiet itie-uwa okpoho okodude ke ufọk Abasi emi Moses akanamde, Solomon ama awa tọsin edifọp uwa ke esit ọnọ Jehovah. (Se ke 2 Chronicles 1;3, 6). Kere baña, tọsin edifọp uwa! Emi owut mfọn ido Solomon. Enọ ima esit emi ama enem Jehovah esit. Kpa ke okoneyo oro Jehovah owut Solomon idem ke ndap onyuñ ọdọhọ ete, “Beñe se ndinọde fi” (1 Ndidem 3:5).

Mme Eñwọñọ Abasi

Anie ke otu nnyin akanam minyeneke ata inemesit ke adaña emi okopde abaña anana utit enọ. Solomon mi ekedi akparawa emi eketiede ke ebekpo nte edidem, ndien Abasi anam anana utit eñwọñọ ọnọ enye, “Beñe se ndinọde fi”. Kere baña ukeme eke Akwa Andibot enyenede. Baba ñkpọ isọñke ke ubọk Abasi. Nso ikpedi ebeñe fo?

Ndusuk afo emekere ete ke Solomon ama ọbọ uñwam ke ubọk Jehovah akan nte ekpedide ke enye ndikọbọ utọ eñwọñọ emi nto Enye. Edi eyak nnyin ikere ibaña mme eñwọñọ Abasi emi anade ọnọ kpukpru mme andinim ke akpanikọ ke eyo emi. “Ebeñe, ndien eyenọ mbufo; eyom, ndien mbufo eyekut; etuak, ndien eyesio usuñ enọ mbufo; koro kpukpru owo eke ebeñede ebọde; owo eke oyomde okutde; edinyuñ esiode usuñ enọ owo eke atuakde” (Matthew 7:7, 8). Nte enim adaña ke mme enwọñọ emi? Nte idighe ukem Abasi oro ke nnyin ikpono? Edieke nnyin ikpebeñede ifiọk kpa nte Solomon ekebeñede, nnyin ikpekeme ndinyene idorenyin ke ikọ emi “Edi edieke owo mbufo ekededi ananade eti ibuot, yak enye ebeñe Abasi, emi ọnọde kpukpru owo ke ntarubọk, minyuñ itọhọke owo; ndien Abasi eyenọ enye” (James 1:5). Ndien James adian item emi; “Edi yak enye ebeñe ke mbuọtidem, okuyok; koro owo eke oyokde ebiet mbufut mmọñ, eke ofim eberide, emen, otop ọduọk ko. Owo oro okuse ete imọ iyebọ baba ñkpọ kiet ke ubọk Ọbọñ” (James 1:6, 7).

Mme Uwa Ke Idak Ibet

Isañ emi Solomon akakade ke Gibeon ke ini enye ọkọtọñọde ukara esie ekedi ndikayak idem esie ofuri ofuri nnọ utom Abasi. Mme uwa emi enye akawade ekeda enọ ñkpọ ke ñkañ spirit. Mmọ ekeda enọ ntọtuñọ ediyak idem nnọ ye editoro Abasi. “Yak nnyin iwa uwa ekọm inọ Abasi kpukpru ini ke enyiñ Jesus, kpa mfri mkpọk-inua eke ekponode enyiñ Esie” (Mme Hebrew 13:15). Imekeme ndisuk ñka iso ndiọñọ se mme uwa emi ekedade enọ edieke isede akam emi David ọkọbọñde, “Yak akam mi ada ke iso fo nte incense; yak umenere ubọk mi etie nte uwa mbubreyo” (Psalm 141:2). Abasi oyom mme owo eyak idem mmọ enọ Enye ke idak mfọn emi kpa nte Enye okoyomde ke idak Ibet.

Mme Uwa Ke Idak Mfọn

“Mmọdo mmada mbọm Abasi mkpe mbufo ubọk, nditọ - ete mi, nte eda ikpọhidem mbufo enọ Abasi, nte odu-uwem uwa, emi asanade, emi onyuñ enemde Abasi ndibọ; koro emi edide uwa eke anade ọnọ mbufo ndiwa” (Ñwed Mbon Rome 12:1). Baba ñkpọ iduhe eke edide ikpikpu ke adaña emi Abasi oyomde ñkpọ oro oto nnyin. Ñkpọ oro ana edi enye emi nnyin inyenede ukeme ndinam; ndien ke ini nnyin idiọñọde emi, enye añwam nnyin ndiyak idem nnọ. Ndusuk ini mme ete ye eka eyom ikpikpu ñkpọ eto nditọ mmọ, edi akananam Abasi iyomke ikpikpu ñkpọ ito nditọ Esie. Se Enye oyomde oto nnyin edi se idotde ye se idude ke ukeme nnyin ndinọ sia edide Enye ọnọ nnyin uñwam. Ediwak owo akananam ikereke ndituk idem mmọ ke ñkpọ ekededi. Kpa ye oro ata ediwak ini mme ñkpri ñkpọ oro nnyin ikpotukde idem ekeme ndikabare ndi ntọtuñọ isañ nnyin ye Abasi. Ediwak ini mme owo eyom owo efen obiom krọs mme imọ, edi Jesus ọdọhọ ete, “Edieke owo ekededi oyomde nditiene Mi, yak enye otuk idem esie, onyuñ emen krọs esie, etiene Mi” (Matthew 16:24).

Ekọm Ye Nsuhọridem

“Esaña ye akam ye mkpe-ubọk ye ekọm, esian Abasi se mbufo eyomde” (Ñwed Mbon Philippi 4:6). Ekedi ke adaña emi Solomon ama ọkọfọp mme tọsin edifọp uwa okure ke Jehovah okosobo ye enye onyuñ ọdọhọ ete yak enye anam efiọk ebaña ebeñe esie. Solomon ọbọrọ ete, “Ndien ami ndi ata eyenọwọñ mfiọkke ndiwọrọ nnyuñ nduk” (1 Ndidem 3:7). Utọ nsuhọridem emi owut idaha uduot akwa owo. Mme ikọ esie ekedi, “Nsukidem onyuñ ebem ubọñ iso” (Mme Ñke 15:33). “Usuñ emi ọdọkde edi emi ọsuhọrede,” ekeme nditiñ ke usuñ efen ete, “Edi owo ekededi eke edisuhọrede idem, eyemenere enye” (Matthew 23:12). Jehovah ama enem esit ke uwem nsuhọridem emi Solomon akadade ebeñe eti ibuot, ndien Enye ọnọ enye esit ọniọñ.

Mme Ñkpọ-Uto Eke Edibede

Ndusuk owo ekeme ndikere ete ke Solomon ekedemere ke ndap esie akabare edi akwa owo ifiọk emi akananam miduhe ke ererimbot. Edi akpanikọ nte ke enye ekede idap ye ukpọk ekpat ndien edemere ye ekpat eke ọyọhọde ye inyene. Abasi etiñ ọnọ nnyin ebe ke ñwed Solomon, ete ke odot nnyin ndinam utom nnyuñ nyom ifiọk. “Ama ofiori okot asian,emenere uyo fo ọnọ mbufiọk; Ama oyom enye nte silver, onyuñ ọduñọre enye nte ñkpọ-uto eke edibede; ndien afo eyetim ọfiọk uteñe Jehovah, onyuñ osime ifiọk Abasi” (Mme Ñke 2:3-5). Abasi ọnọ nnyin ukeme, edi ana nnyin inam ifiọk nnyin atara inyuñ inam enọ eke Abasi ọnọde nnyin ọfọn ebe ke ọkpọsọñ utom. Ọbọñ ọnọ nnyin ñkpọ etiene nte asañade ekekem nte enwọñọ Esie edide. Nte nnyin idade mme odudu eke Abasi ọnọde nnyin inam ñkpọ, ntre ke Enye anam mme odudu emi ekọri: edi Enye oyom nnyin ida mme odudu emi inam ñkpọ. Nte uwut-ñkpọ, ke adaña emi Nditọ Israel esimde isọñ Canaan, Abasi ikọdọñke ukut mme udọñọ ebem Nditọ Israel iso aka okowot kpukpru mme okpono-ndem ke isọñ oro mbemiso Nditọ Israel ekesim do. Edi Enye akanam Nditọ Israel ewọrọ eka ekeñwana mme ekọñ mmọ. Ndien nte mmọ eñwanade Enye ọnọ mmọ erikan. Edieke mmọ ekpetrede ndiñwana mmọ ikpenyeneke erikan.

Mme Ebeiso Ñkpọ

Akam Solomon asaña ekekem ye Ikọ Jesus emi ọdọhọde ete, “Ekam ebem iso eyom obio ubọñ Esie ye edinen ido Esie; ndien eyedian kpukpru ñkpọ emi enọ mbufo” (Matthew 6:33). Enye ikoyomke inyene, ikoyomke ukpono, ikoyomke erikan ke ekọñ mme odudu. Ada esit emi ọyọhọde ye edibọñ akam ndifiọk se inemde ye se minemke Abasi esit ke adaña emi nnyin inimde mme ebeñe nnyin ke iso Esie. Ke ini emi ibọñde akam, Ọbọñ oyom nnyin iyom mbemiso ñkpọ ke akpa itie. Abasi ama ọnọ Solomon mme ñkpọ emi enye mikebeñeke, ndien Enye eyenam ukem oro ọnọ nnyin edieke nnyin ibemde iso iyom Obio ubọñ Abasi.

Mme Adaña Israel

“Solomon onyuñ akara kpukpru mme idut, ọtọñọde ke Akpa ye idut mme Philistine, tutu osim ke adaña Egypt” (1 Ndidem 4:21). Do ndien ekedi ke eyo Solomon ke Abasi akanam eñwọñọ emi Enye ọkọñwọñọde ọnọ Abraham osu. “Ndada isọñ emi nnọ ubon fo, ọtọñọde ke akpa Egypt, tutu osim akamba akpa, akpa Euphrates” (Genesis 15:18).

Enye Emi Okponde Akan Solomon

“Ndien Abasi ọnọ Solomon eti ibuot ye asian eti-eti, ye ọniọñ esit, nte ntan emi odude ke mben inyañ” (1 Ndidem 4:29). “Owo enyuñ eto ke kpukpru mme idut edi ndikop ifiọk Solomon, eto ke ọtọ kpukpru ndidem ererimbot” (1Ndidem 4:34). Mmọ ema ekop mme ikọ Solomon, edi nnyin imenyene Ikọ ito Enye emi okponde akan Solomon oro edi, Ọbọñ Jesus Christ.

Questions
MME MBUME
  1. Efe-esop ye itie uwa okpoho ekedu mmọñ ke ini Solomon ọkọtọñọde ndikara?
  2. Ke ini emi Ekebe Ediomi Abasi okodu mmọñ?
  3. Nọ uwut-ñkpọ ndiwut nte ke Solomon ama enyene erinyaña.
  4. Nso ikotibe ke edem usen oro mbemiso Jehovah owut Solomon idem?
  5. Siak ndusuk ikpọ eñwọñọ Abasi eke enade enọ ikọt Esie mfin emi.
  6. Nso edi ndusuk item eke Solomon ọnọde abaña usuñ nte owo okpoyomde eti ibuot?
  7. Ke nso utọ usuñ ke ebeñe Solomon ekebiet ikọ eke edọhọde ete ebem iso kaña eyom Obio Ubọñ Abasi?
  8. Nte afo emekeme ndikut eñwọñọ emi ekenyenede Solomon edieke enye akpanamde se ifọnde (1 Ndidem 3) emi mikosuhọ?
  9. Ewe eñwọñọ emi ekeñwọñọde enọ Abraham okosu ke ini ukara Solomon?
  10. Siak mme ndusuk usuñ eke ekedade eyarade ifiọk Solomon.