Lesson 256 - Senior
Memory Verse
“Ọfọfọn ọnọ mmọ eke eduñde ufọk fo: mmọ eyesuk etoro fi” (Psalm 84:4).Cross References
I Item Ke Abaña Itoro
1. Enọ item ete ofuri ererimbot, kpukpru owo, ye kpukpru se iduọkde ibifik enyene nditoro Ọbọñ, Psalm 100:1; 150:6; 68:32; Ñwed Mbon Rome 15:10, 11.
2. Andiwet Psalm ọsọñọ owuk ete yak enam ñkpọ enọ Ọbọñ ke idaresit, Psalm 100:2; Utom Mme Apostle 2:46; Ñwed Mbon Philippi 4:4; 2 Chronicles 29:30; Isaiah 30:29; 35:10
3. Ikọt Abasi enyene ndida ikwọ ndi Enye ke iso, Psalm 100:2; 126:2; 1 Chronicles 6:32; Isaiah 44:23; Ñwed Mbon Ephesus 5:19; Ñwed Mbon Colossae 3:16
4. Enyene ndida ikwọ ye nsio-nsio ñkpọ-ikwọ ntoro Abasi, Psalm 150: 3-5; 2 Chronicles 20:28; 1 Chronicles 13:8; Exodus 15:20; Eriyarare 5:8; 14:2; 15:2
5. Nnyin imenyene ifet ndikpono nnyuñ ntoro Abasi ke edisana okure Esie, Psalm 100:4; 150:1; Mme Hebrew 10:23-25; Deuteronomy 12:5; 16:16; Micah 4:2; Luke 4:16
6. Ata itoro eke enọde Abasi ayarade owut akwa mfọn emi Abasi ọfọnde ye ikọt Esie, Psalm 100:3, 5; 150:2; 145:1-21; Eriyarare 5:9-14; 15:3, 4.
Notes
SE EKPEPDE EBAÑAItoro Emi Enọde Ọbọñ
Edi ata akpanikọ emi etimde efiọk ete ke owo ikemeke ndidianare itoro ye ikwọ ñkpọñ ido ukpono Abasi mme anditiene- Christ. Ke kpukpru ebiet, mme anditiene-Christ ekut ete ke edinọ Abasi itoro, ye edikwọ ikwọ esaña ọtọ kiet ye eti spirit ukpono Abasi. Se iwọrọde itode oruk eti erikpono oro, ke asañade ke spirit ye ke akpanikọ, edi emem ye idara. Itoro emi enọde Ọbọñ, Andibot Enyọñ ye isọñ, ye kpukpru se idude mmọ ke esit, ekpenyene nditie ukem nte ibifik emi anditiene-Christ eñwekde. Enye ekpenyene ndisuk ñka iso ntoro Akwa Andifak, emi anyañade enye osio ke nsobo ye ufen idiọk-ñkpọ kpukpru ini. Edieke itoro esie otode ke esit, eyetop ọwọrọ nte mmọñ emi otode edituñọ obube mmọñ.
Ukpọñ eke mikemeke ndituak ibuot nọ Abasi, minyuñ ikemeke ndinọ Enye itoro ke idaresit nte odotde, ifiọkke idara erinyaña ukpọñ. Etiñ enọ nnyin ete: “Ndien mbufo eyekot mmọñ ke idaresit ke mme obube mmọñ erinyaña” (Isaiah 12:3). Mbet Jesus ema eyarare efiọk ete ke ndiñwọñ mmọñ nto obube mmọñ erinyaña ọnọ akwa idara. Ke Jesus akawatde ubọñ-ubọñ oduk ke Jerusalem, “Mbet etọñọ ndidara nyuñ ntoro Abasi ke ọkpọsọñ uyo, ke abaña kpukpru utom odudu eke mmọ ekekutde” (Luke 19:37). Ke ini ndusuk mme Pharisee edọhọde ete, yak Jesus akpan mmọ ndinọ oruk itoro oro, Enye ọbọrọ ete, “Edieke mme mmọ emi ekpedopde uyo, mme itiat ekpesio mkpo” (Luke 19:40).
Itoro Ke Idaresit
Itoro emi Abasi ọbọde oto ikọt Esie, inyeneke ndidi emi enyikde-nyik, edi enyene ndinọ Enye ke idaresit. “Enam ñkpọ enọ Jehovah ke idaresit,” edi item eke ibọde ito itie edikot ñwed ukpep-ñkpọ nnyin, emi ñko onyuñ edi “uwa eke anade ọnọ mbufo ndiwa” ye utom inemesit. Abasi iyomke mme anam utom ke iñwañ-utom Esie edi mmọ emi enanade inemesit me mbon ikpon-esit. Mmọ eke enamde ñkpọ enọ Abasi enyene ndinam ke unyime esit, ye udọñ ndinem Abasi esit, idighe idem mmọ ikpọñ (Kot 1 Ñwed Thessalonica 4:1; 2 Timothy 2:4). Jesus akanam utom Ete Esie ke unyime esit, koro Enye ama ọdọhọ abaña Idem Esie ete, “Koro Ami nnamde se inemde Enye esit kpukpru ini.” (John 8:29).
David ọkodọhọ ete, Mmọ eke edọhọde mi ete, “Nnyin iyeka ke ufọk Jehovah” edat mi esit, (Psalm 122:1). Edinam utom Abasi ikedighe ñkpọ mba inọ David, inyuñ ikemeke ndidi nnọ owo kiet ekededi emi atuakde ibuot ọnọ Abasi ke Spirit ye ke akpanikọ.
Itoro Eke Odotde
Ke Ñwed Eriyarare, nnyin ikot ibaña akwa udim mbon enyọñ emi ekanarede Ebekpo ekuk, ke enọ Jesus emi odotde ndibọ itoro mmọ ete: “Eyenerọñ emi ekewotde omodot ndibọ odudu, ye inyene, ye ifiọk, ye ukeme, ye ukpono, ye ubọñ, ye eridiọñ” (Eriyarare 5:12). Abasi ke akwa ubom Esie, idotke ndibọ itoro emi otode kpukpru se idude uwem ikọñ-ikpọñ, edi omodot akan se inua owo ekemede nditiñ. Anam idiọk-ñkpọ inyeneke itoro ke esit esie inọ Andibot enye, koro esit emi ọdiọkde, osuk oyom enye ọyuhọ itoro idem esie ikpọñ. Ke ndikpọnọre ido obukidem emi nnim, idighe udọñ anditiene-Christ nditoro Ọbọñ ikpọñ-ikpọñ, edi ọfiọk ñko ete ke Enye odot ata eti itoro, enyene udọñ ndisuan etop akwa odudu Esie ke ofuri ekondo.
Edikpono Abasi Ke Ikwọ Ye Ke Ñkpọ-ikwọ
Ediwak ñkpọ edu emi ekpetiñde ebaña edikpono Abasi ke ikwọ ye mme ñkpọ ikwọ - ewak ekan se ekemede ndiwet ke ukpep-ñkpọ emi. Ikọ Abasi otim owut iñwan-iñwan ete ke Abasi oyom ikọt Esie eda ikwọ ye mme ñkpọ-ikwọ etuak ibuot enọ Enye. Itie edikot ñwed ke ukpep-ñkpọ emi etiñ ete, “Eda ikwọ edi Enye ke iso”(Psalm100:2) ye “Etoro enye ke uyom ukorowo; Etoro enye ke psaltery ye harp. Etoro enye ke ekọmọ ye unek: Etoro enye ke ndido uruk ye ke ifiom. Etoro enye ke ọkpọsọñ uyo cymbal: Etoro Enye ke cymbal mkpo-idara” (Psalm 150:3-5). Mme ikọ emi enyene odudu ekem ndinọ nditọ Abasi uko ndida mme ñkpọ ikwọ ye ikwọ mkpono Abasi.
Ama edi mmọ eke ekerede ete ke owo ikpenyeneke ndida ikwọ, mme ñkpọ-ikwọ mkpono Abasi, , Ñwed Abasi otim etiñ añwaña ete ke enyene ndituak ekeme ndiwut mmọ ete ke Ñwed Abasi ikpanke owo ndinam ntre. Ñwed Abasi akam otim etiñ añwaña ete ke ndituak ibuot nnọ Abasi ke usuñ oro. Iduhe ebiet ke Ikọ Abasi, ke Obufa mme Akani Ediomi, eke ebiọñọde ndikpono Abasi ke oruk usuñ emi. Abasi inyimeke inọ emana kiet ndida ñkpọ-ikwọ ye ikwọ ntuak ibuot nnọ Enye, ndien ọbiọñọ emana efen ndinam ntre. Enye edi ukem-ukem mkpọñ ye mfin ye ke nsinsi, Enye inyuñ ikpuhọkere. (Kot Malachi 3:6).
Mme Okure Itoro
Ikọ Abasi ọmọnọ nnyin item ete, “ikunyuñ isin ndisop idem ọtọ kiet” (Mme Hebrew 10:25). Ebuana nditọ Abasi ọtọ kiet ndituak ibuot nnọ Abasi edi akpan ñkpọ. Edi akpan ñkpọ koro Abasi ama ọñwọñọ ndidu ke ọtọ nte ikọt Esie owo iba mme akande oro ebonode ọtọ kiet ke Enyiñ Esie. (kot Matthew 18:20). Abasi ọsuhọre edi onyuñ ọdiọñ ikọt Esie; mmọ ekọri ke nti ido enyuñ esọñ idem ke mfọn Abasi; enyaña mme anam idiọk, mbon udọñọ ebọ erikọk, enyuñ ekwọrọ Eti-mbuk.
Ñwed Abasi eneñere owut ete ke Ufọk Abasi, edi ebiet eke Abasi oyomde ikọt Esie ebono etuak ibuot enọ Enye ke ini, ke ini; onyuñ otim owut akpan-akpan ete, ke enyene ndisuk ñka-iso nsop idem ọtọ kiet. (Kot Psalm 65:4; 84:1-4, 10; 118:19, 26; Isaiah 2:3). Isioho mme anditiene-Christ ifep ke edituak ibuot nnọ Abasi ke Ufọk Abasi, ndien ata nditọ Abasi iyomke esio mme imọ efep. Ke eyo emi, mme owo edu emi ekerede ete, ke edikop Ikọ Abasi nto ekebe-utiñ-ikọ ye ekebe-ndise, eyenọ mme imọ ukem eridiọñ emi ikpọbọde edieke ikpodukde ikokpono Abasi ke Ufọk Abasi. Emi edi ata akamba ndudue emi esinde ndiọk-idem ke ukpọñ, oto koro mmọ esinde ndibuana ke mboho emi etuakde ibuot enọ Abasi.
Eti ukwọrọ Ikọ Abasi ke ekebe-utiñ-ikọ eke ekemde ye se idude ke Ñwed Abasi, edi edidiọñ ọnọ ediwak mmọ eke otode ke ọkpọsọñ udọñọ mme ubiak, ndien mmọ ikemeke ndibuana ke esop eke ndisana Ikọt Abasi etuakde ibuot enọ Abasi. Abasi ọdiọñ oruk mbio oro sia mmọ inyeneke se ekemede ndinam ñkan oro. Abasi iñwañake mfọn ye edidiọñ Esie inọ mme owo emi enyenede ukeme, edi etre ndibuana ke ebiet eke ekponode Abasi, ye mfaña ete ke mme imọ imekeme ndituak ibuot nnọ Abasi ke ufọk mme imọ ukem-ukem nte enamde ke ufọk Abasi. Uduak mmọ edikpañ utọñ nnọ Eti-mbuk emi ekwọrọde ke ekebe-utiñ-ikọ mme ekebe-ndise, edi ñkari usuñ mmọ ndida ifet oro mkpañ utọñ nnọ mme erinam efen, man mmọ ekeme ndinam sededi eke mmọ emade ke Usen Ọbọñ, utu ke ndinim enye ke edisana nnọ Ọbọñ.
Usen Ọbọñ Emi Enimde Enọ Edituak Ibuot
Se Abasi oyomde nnyin inam ke abaña edinim Usen Ọbọñ, oro edi Sunday, isuhọkede ke idaha ke ñkañ spirit, ikan ibet emi Abasi ọkọnọde ke abaña Sabbath, eke Akani Ediomi. “Afo ama akabare ukot fo osio ke Sabbath efep, ke erinam utom fo ke edisana usen Mi: ama onyuñ okot Sabbath, ete, inemesit, okot edisana usen Jehovah, ete ñkpọ ukpono; ama onyuñ okpono enye ke eritre ndinam ido fo, ndinyuñ ntiene utom fo, nnyuñ ndọhọ ikọ: ndien Jehovah eyedat fi esit; Ami nyenyuñ nnam fi odoro ke edikoñ ebiet isọñ, nnyuñ nnọ fi akpa Jacob usọ adia: koro inua Jehovah ọdọhọde” (Isaiah 58:13,14).
Akakan ñkpọ edi emi, ete ke edituak ibuot nnọ Abasi mi ke isọñ edi ntọñọ ọnọ edituak ibuot nnọ Enye ke akwa mbono emi edibohode ekanare ebekpo Abasi. Nte nnyin ikpepde ndituak ibuot nnọ Abasi, ndida ikwọ ye ikọ ntiense ntoro Enye mi ke isọñ, ntre ke nnyin idikeme nditoro Enye kpa ke ido oro ke akwa usen edifak ye usen edinọ ubọñ. Eteme nnyin ndiduk ke esop ndinen owo nnyuñ ntoro Abasi ke mfọn Esie; ndinyuñ nsio mme akaña nnyin nnọ Abasi ke iso ofuri ikọt Esie.
Ke Psalm, Edip-ye iba, nnyin ikot ntem: “Nyebuk enyiñ fo nnọ nditọ-ete mi: nyetoro fi ke ufọt mbon esop. Mbufo emi ebakde Jehovah, ekwọ Enye; kpukpru ubon Jacob, ekpono Enye ... Itoro mi eyeto fi ke akamba esop: nyesio akaña mi ke iso mmọ eke ebakde enye” (Psalm 22:22-25). Itie Ikọ Abasi emi etiñ abaña Jesus Christ, etiñ owut ete ke Enye eyetoro Abasi Ete, ke iso anana – ibat udim mmọ eke Abasi ama akafak.
Akpan Ñkpọ Emi Itoro Akamade
Ñwed emi ewetde enọ mbon Hebrew etiñ abaña Ñwed Psalm, edip-ye-iba ke ini ọdọhọde ete: “Nyetaña enyiñ Fo nnọ nditọ ete Mi, Nyekwọ itoro Fo ke otu mbon esop” (Mme Hebrew 2:12). Mi ñko, efiak ewut nte edide akpan ñkpọ nditoro Abasi ke ufọk Abasi, koro, Jesus, Akwa Oku, ye uwut-ñkpọ nnyin, eyetoro Abasi ke iso nditọ-ete Esie ke otu ufọk Abasi.
Jesus itoroke kaña Ete Esie ke iso akwa esop ndinen owo oro, koro ibat akwa otu oro iyọhọke kaña. Mme itie Ñwed Abasi emi ikokotde enam añwaña ete ke Enye eyenam ntre. Edi akpan-ikọ ñko ete ke Abasi oyom nnyin ida itoro iduk ke ufọk Esie kpa ke idem ererimbot emi, oro edi ndibeñe idem mbaña akwa usen erifak. Kpa nte Jesus ama okonim uwut-ñkpọ ọnọ nnyin nte Etubom nnyin ke erinyaña ukpọñ, ke edida ediwak mme owo nduk ke ubọñ (Mme Hebrew 2:10), ye nte akpa mbuñwum eke eriset ke mkpa (1 Ñwed Corinth 15:20, 23), kpa ntre ñko Enye eyedi uwut-ñkpọ nnyin ke nsinsi ini, ke ndidi akpa ye ebe-iso ke edinọ Abasi Ete itoro (Kot 1Ñwed Corinth 15:25-28).
Mmọ emi mikemeke nditoro Abasi mi, idikemeke ndinam ntre ko. Baba owo kiet ikpenyeneke ndifehe ndik ke iso owo, ikponyuñ ikopke but ndida ke ukot esie ke iso ndisana ikọt Abasi nnyuñ nyarare enyiñ Christ. Nnyin ikpenyene ndisọsọp nsio mme akaña nnyin ke iso Abasi ke ufọk Abasi mi ke isọñ, ndien nnyin iyetim inyene ukeme ndinam ntre ke Enyọñ ke akwa usen Jehovah.
Nnyin iyeda ikọ-ntiense nnyin ye Iyip Eyen-erọñ ikan odudu idiọk-ñkpọ (Eriyarare 12:11). Nnyin inyene nditiñ ikọ-ntiense oro ke ufọk Abasi. Oro edi ewuhọ emi Abasi ọnọde.
Edinọ Abasi Ubọñ
Abasi anyaña ikọt Esie man mmọ ekpenọ Enye ubọñ ke nsinsi Nnyin ikot ntem: “Ke Christ enyuñ enam nnyin (mme Jew) idi udeme Abasi, sia Enye, emi adade ekikere esit Esie anam kpukpru ñkpọ ewọrọ, ekebemde iso aduak ndinim nnyin nnọ emi; man nnyin, emi ikebemde iso idori enyin ke Christ, ikpakabare inọ ubọñ Esie itoro” (Ñwed Mbon Ephesus 1:11, 12). Nnyin imokut nte ewutde mbukpọñ edinam emi oto se ikotde ke Ñwed Eriyarare, koro ewetde ntem do ete, “Ndien ñkop kpukpru ñkpọ emi ekebotde, emi edude ke heaven, ye ke isọñ ye ke idak isọñ, ye ke inyañ, ye kpukpru ñkpọ eke edude mmọ ke esit, nte edọhọde ete, Yak eridiọñ, ye ukpono, ye ubọñ, ye erikara ofuri ekondo, enyene Enye emi etiede ke ebekpo, enyuñ enyene Eyen-erọñ ke nsinsi-nsinsi” (Eriyarare 5:13). “Ke ñkpọ emi ema ekebe, nkut, ndien sese, akwa otu owo, eke baba owo kiet mikemeke ndibat, eke etode ke kpukpru obio ye esien ye idut ye usem, eda ke iso ebekpo ye ke iso Eyen-erọñ, esine mfia ọfọñidem, enyuñ ekama ndak eyop ke ubọk; mmọ enyuñ efiori ke ọkpọsọñ uyo, ete, Yak erinyaña enyene Abasi nnyin emi etiede ke ebekpo, Onyuñ enyene Eyen-erọñ” (Eriyarare 7:9, 10).
Andiwet Psalm eteme ete, “Ekọm enye, etoro enyiñ esie”. Akpatre Psalm etre ye mme ikọ emi, “Yak kpukpru ñkpọ eke eduọkde ibifik etoro Jehovah. Mbufo etoro Jehovah”.
Questions
MME MBUME- Nso edi ntak emi ikpotorode Abasi?
- Ke mmọñ ke nnyin ikpotoro Abasi?
- Nso edi ntak emi nnyin mikpesinke ndiduk ke Ufọk Abasi ndituak ibuot nnọ Abasi?
- Mme anie edi mmọ eke editorode Abasi ke Heaven?
- Nnyin inam didie ifiọk ite ke Jesus eyenọ Abasi Ete itoro?
- Nso edi ntak emi nnyin ikpekade ke Ufọk Abasi ndituak ibuot nnọ Abasi ñkan nditie ke ufọk nnyin?